ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ်တွင် စီမံကိန်းလျာထားနွေစပါးဧက (၁၈၇၄၁)ကျော် စိုက်ပျိုးမည်ဖြစ်ပါသည်။ တောင်ငူမြို့နယ်ရှိ တောင်သူဦးကြီးများသည် ရိက္ခာဖူလုံစေ ရေးအတွက် မိုးစပါး၊ မတ်ပဲ၊ နွေစပါးများကိုအဓိကအားထားစိုက်ပျိုးကြသည်။ တောင်ငူမြို့နယ်ရှိ စိုက်ပျိုးမြေဧကများသည် သဘာဝပထဝီအနေအထားအရ ပသိဆည်ရေ၊ ကရင်ချောင်းဆည်ရေ၊ ကမ်းနီဆည်ရေ၊ ခပေါင်း ဆည်ရေ၊ စစ်တောင်းမြစ်ရေတင်များရှိခြင်းကြောင့် စိုက်ပျိုးရေးကိုများစွာ အထောက်အကူပြုနေပါသည်။
စိုက်ပျိုးမှုအနေဖြင့် ပသိဆည်ရေသောက် ၁၅၁၁ ဧက၊ ကရင်ချောင်းဆည်ရေသောက် ၆၁၆ ဧက၊ ကမ်းနီဆည်ရေသောက် ၁၂၂၀ ဧက၊ ခပေါင်းဆည်ရေသောက် ၁၂၂၄၄ ဧက၊ စစ်တောင်း မြစ်ကြီးမှ ဆိုလာစနစ်ဖြင့် သဖန်းပင်မြစ်ရေတင်စီမံကိန်း ၂၀၀ ဧက၊ ပဲချက်ကုန်း (ဆိုလာ)ရေတင် စနစ်ဖြင့် ၁၅၀ ဧက၊ ရွာတန်းရှည်(လျှပ်စစ်)စစ်တောင်းမြစ်ရေစီမံကိန်းမှ ၆၀၀ ဧက၊ အင်းအိုင်များတွင် ၁၄၃၉ ဧက၊ စက်ရေ တွင်းရေဖြင့် ၆၃ ဧက၊ ချောင်းပိတ်/တာတမံပိတ် ၆၉၈ ဧက၊ စုစုပေါင်း ၁၈၇၄၁ ဧက နွေစပါးများ စိုက်ပျိုး မည်ဖြစ်ကြောင်း သက်ဆိုင်ရာဦးစီးဌာန၏စာရင်းများအရသိရှိရပါသည်။ မိုခါမုန်တိုင်းကြောင့် စစ်တောင်း မြစ်ရေကြီးမှုဖြစ်ပေါ်ခဲ့သောကြောင့် ချောင်းများ၊ မြောင်းများပျက်စီး ခဲ့သော်လည်း ဆည်မြောင်းထိန်း သိမ်းရေးဌာနမှအချိန်မီပြုပြင်ပေးနိုင်သောကြောင့် နွေစပါးစိုက် ဧကများ ကျဆင်းသွားခြင်းမရှိဘဲ စိုက်ပျိုးထားသည့်နွေစပါးများကောင်းမွန်လျက်ရှိပါသည်။
စပါးမျိုးအနေဖြင့် နှံကောက်၊ ဆင်းသုခ၊ ရက် ၉၀စပါးများကို အများဆုံးစိုက်ပျိုးကြပါသည်။ နွေစပါးသည် ဆည်ရေများကိုအားထားစိုက်ပျိုးကြသောကြောင့် နွေစပါးအတွက်ရေပေးနိုင်ရန် ဆည်ရေလုံလောက်စွာ ရှိကြောင်းလည်းသိရပါသည်။ နွေစပါးစိုက်တောင်သူဦးကြီးများအတွက် သွင်းအားစုများ ဝယ်ယူနိုင်ရန် နိုင်ငံ့စီးပွားမြှင့်တင်ရေးရန်ပုံငွေဖြင့် စိုက်ဧကအလိုက်ချေးငွေများ အတိုးနှုန်းသက်သာစွာဖြင့် ထုတ်ချေးပေးသောကြောင့် တောင်သူဦးကြီးများအတွက် စိုက်ပျိုးစရိတ် သွင်းအားစုဝယ်ယူရန်များစွာ အထောက်အကူပြုကြောင်းလည်းသိရပါသည်။
တောင်ငူမြို့နယ်တွင် နွေစပါးများကို ၂၀၂၄ ခုနှစ်၊ ဒီဇင်ဘာလတွင် စတင်စိုက်ပျိုးထားကြသည့် အတွက် ၂၀၂၅ ခုနှစ်၊ မတ်လတွင် ရိတ်သိမ်းမှုစတင်မည်ဖြစ်သည်။ စိုက်ပျိုးပြီးသည့်နွေစပါးများလည်း ဖြစ်ထွန်းလျက်ရှိကြောင်းသိရှိရပါသည်။
DOCA(ပဲခူး)