ဖေဖော်ဝါရီလတွင် စံချိန်တင်ရောင်းချခဲ့ရသော်လည်း ဗီယက်နမ်တူနာငါးလုပ်ငန်းနယ်ပယ်သည် အမေရိကန်နှင့် ဥရောသမဂ္ဂအစရှိသည့် စည်းမျဉ်းစိန်ခေါ်မှုများနှင့် ရင်ဆိုင်နေရကြောင်း ဗီယက်နမ်ပင်လယ်စာတင်ပို့သူများနှင့် ထုတ်လုပ်သူများအသင်း (VASEP) ၏ အဆိုအရ သိရပါသည်။ ဗီယက်နမ်အကောက်ခွန်ထံမှ အချက်အလက်များအရ ဖေဖော်ဝါရီလတွင် တူနာတင်ပို့မှုမှတစ်ဆင့် ဝင်ငွေ အမေရိကန်ဒေါ်လာ ၇၃ သန်းနီးပါး ရရှိခဲ့ပြီး ၂၀၂၄ ခုနှစ် တူညီသည့်ကာလထက် ၄၁ ရာခိုင်နှုန်းနီးပါးမြင့်တက်ခဲ့ကာ လွန်ခဲ့သည့် ၅ နှစ်ကျော် တူညီသည့် ကာလအတွင်း အမြင့်ဆုံး ပမာဏဖြစ်ကြောင်း သိရပါသည်။ ယခုနှစ်၏ ပထမနှစ်လအတွင်း တူနာတင်ပို့မှုမှာ အမေရိကန်ဒေါ်လာ ၁၃၉ သန်းကျော်တန်ဖိုးရှိခဲ့ပြီး ၂၀၂၄ ခုနှစ် တူညီသည့် ကာလထက် ၆ ရာခိုင်နှုန်းမြင့်တက်ခဲ့ကြောင်း သိရပါသည်။ VASEP ထံမှအချက်အလက်များအရ ဖေဖော်ဝါရီလတွင်လတ်ဆတ်သော၊ အေးခဲထားသောနှင့် အခြောက်ခံထားသော တူနာထုတ်ကုန်များတင်ပို့မှုမှာ ၂၃ ရာခိုင်နှုန်းမြင့်တက်ခဲ့ပြီး ပြုပြင်ထုတ်လုပ်ထားသည့်စည်သွပ်တူနာများတင်ပို့မှုမှာ ၉ ရာခိုင်နှုန်းကျဆင်းခဲ့ကြောင်း သိရပါသည်။ သို့သော်တူနာလုပ်ငန်းနယ်ပယ်သည် အဓိကပို့ကုန်ဈေးကွက်များထံမှ ကုန်သွယ်ရေးစည်းမျဉ်းများပါဝင်သည့် များစွာသော စိန်ခေါ်မှုများ နှင့် ရင်ဆိုင်ရနိုင်ကြောင်း သိရပါသည်။ တရားမဝင်သော၊ အစီရင်မခံသောနှင့် စည်းမျဉ်းနှင့်မညီ သောငါးဖမ်းခြင်းကို ကာကွယ်သည့်စည်းမျဉ်းများသည် တူနာငါးအပါအဝင် ပင်လယ်စာများအတွက် အဓိကအတားအဆီးအဖြစ် ဆက်လက်တည်ရှိနိုင်ကြောင်း သိရပါသည်။ အမေရိကန်က အကောင်အထည်ဖော်ခဲ့သည့် Marine Mammal Protection Act အရ တင်ပို့မည့်နိုင်ငံများသည် ၎င်းတို့၏ငါးဖမ်းသည့်လုပ်ငန်းစဉ်များသည် ရေနေသတ္တဝါများကို ထိခိုက်မှုမရှိကြောင်း သက်သေပြရမည်ဟု သိရပါသည်။ ထို့ပြင် အမေရိကန်သည် တင်သွင်း သည့်လုပ်ငန်းရှင်များက ၎င်းတို့၏ သွင်းကုန်များနှင့်ပတ်သတ်၍ အသေးစိတ်အချက်အလက် တင်ပြရန်လိုအပ်သော ပင်လယ်စာ တင်သွင်းမှုစောင့်ကြည့်ရေးပရိုဂရမ်ကို တိုးချဲ့ရန်စီစဉ် နေကြောင်း သိရပါသည်။ ထိုစည်းမျဉ်းများသည် ဗီယက်နမ်၏ပင်လယ်စာလုပ်ငန်းကို သိသာစွာ သက်ရောက်မှုရှိနိုင်ပြီး နိုင်ငံ၏ဂုဏ်သတင်းနှင့် နိုင်ငံတကာဈေးကွက်ရပ်တည်မှုကို ခြိမ်းခြောက်နိုင်ကြောင်း သိရပါသည်။ ထိုစိန်ခေါ်မှုများကို ကျော်လွှားနိုင်ရန် တူနာလုပ်ငန်းနယ်ပယ်သည် အာဏာပိုင်များထံမှအားကောင်းသောပံ့ပိုးမှုနှင့် လုပ်ငန်းရှင်များက ဥပဒေမူဘောင်များ တိုးမြှင့်ခြင်း၊ စောင့်ကြည့်နိုင်စွမ်းမြှင့်တင်ခြင်းနှင့် ငါးဖမ်းသမားများအား နိုင်ငံတကာစံနှုန်းများနှင့် လိုက်လျောညီထွေဖြစ်စေရန် ပံ့ပိုးခြင်းတို့ လုပ်ဆောင်ရန်လိုအပ်ကြောင်း သိရပါသည်။
Vietnam Plus
DOCA(ရန်ကုန်)