မွန်ပြည်နယ်၊ ပေါင်မြို့နယ်၌ စပါးမျိုးစေ့ချကိရိယာ(Seeder) ဖြင့် စိုက်နည်း စနစ်မှန်ကန်ရေး၊ ကြဲခင်းစနစ်လျှော့ချနိုင်ရေး လက်တွေ့ အစေ့ချ စိုက်ပျိုးပြသခြင်းကို ၂၂.၅.၂၀၂၅ နံနက်ပိုင်းက သဗြုချောင်ကျေးရွာ တောင်သူ ဦးထွန်းမောင် ၏ လယ်ယာမြေ၌ တာဝန်ရှိသူများ ပူးပေါင်းပြုလုပ်ခဲ့ကြရာ စားသုံးသူရေးရာဦးစီးဌာန၊ ပေါင်မြို့နယ်တာဝန်ခံ တက်ရောက်ခဲ့သည်။
စပါးမျိုးစေ့ချကိရိယာ(Seeder)ဖြင့် လက်တွေ့အစေ့ချစိုက်ပျိုး ပြသခြင်းကို သဗြုချောင် ကျေးရွာအုပ်စု ကွင်းအမှတ် (၇၅၀) ဦးပိုင်အမှတ် (၄၃/၁+၄၇/၁) ရှိတောင်သူဦးထွန်းမောင်၏ လယ်မြေ၌ပြုလုပ်ရာ ခရိုင်စီမံအုပ်ချုပ်ရေးအဖွဲ့ ခေတ္တဥက္ကဌ ဒုတိယဗိုလ်မှူးကြီး သန့်ဇင်ထွန်း နှင့်အဖွဲ့ဝင်များ၊ မြို့နယ်စီမံအုပ်ချုပ်ရေးအဖွဲ့ဥက္ကဌ ဦးထင်လင်းအောင်နှင့်အဖွဲ့ဝင်များ၊ မြို့နယ်စက်မှုလယ်ယာဦးစီးဌာနမှူး ဦးရဲမြင့်၊ မြို့နယ်စိုက်ပျိုးရေးဦးစီးဌာနမှူး ဦးကျော်စွာလှိုင်၊ မြို့နယ်ကြေးတိုင်နှင့်မြေစာရင်းဦးစီးဌာနမှူး ဦးအောင်ကျော်စွာဝင်း နှင့် တာဝန်ရှိသူများနှင့် ကျေးရွာတောင်သူများက ကြည့်ရှုအားပေးကာ ရှစ်တန်းသွား မျိုးစေ့ချကိရိယာဖြင့် မျိုးစေ့ချစိုက်ပျိုးရာ၌ ရရှိမည့် အကျိုးကျေးဇူးများ၊ လိုအပ်သည့် နည်းပညာပံ့ပိုးပေးနိုင်မှုများကို ရှင်းလင်းပြောကြားပြီး လိုအပ်သည်တို့ကို ပေါင်းစပ်ညှိနှိုင်း ဆောင်ရွက်ပေးခဲ့ကြသည်။
ပေါင်မြို့နယ်အတွင်း မိုးစပါးစိုက်ကာလ၌ တောင်သူများအဆင်ပြေစွာ စိုက်ပျိုးနိုင် ခြင်းဖြင့် ဒေသတွင်းစားရေရိက္ခာဖူလုံရေးနှင့် တောင်သူများ၏ လူမှုစီးပွားရေးကဏ္ဍများ ဖွံ့ဖြိုးတိုးတက် လာစေနိုင်ရန် မွန်ပြည်နယ်အစိုးရအဖွဲ့အနေဖြင့် ပေါင်မြို့နယ်အတွင်းရှိ တောင်သူများအတွက် မျိုးစေ့ချကိရိယာ (Seeder) များကို မွန်ပြည်နယ်အစိုးရအဖွဲ့မှ အခမဲ့ထောက်ပံ့ပေးအပ်ထားပြီးဖြစ်ကြောင်း သိရသည်။
DOCA (မွန်)