မေလ ၂၃ ရက်နေ့ နံနက်ပိုင်းတွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ လက်ထောက် ညွှန်ကြားရေးမှူး ဒေါ်ဇင်မာဦး၊ ဦးစီးအရာရှိ ဒေါ်ခိုင်မို့မို့နှင့် ဝန်ထမ်းများသည် မုံရွာမြို့ပေါ်ရှိ အသေးစား စက်မှုလက်မှု လုပ်ငန်းရှင်များ ၊ တစ်ပိုင်တစ်နိုင် စီးပွားရေး လုပ်ငန်း ရှင်များအား မန္တလေးငလျင်ကြီးကြောင့် လုပ်ငန်းများ ထိခိုက်မှု ၊ လုပ်ငန်းလည်ပတ်ရာတွင် နှောင့်နှေး ကြန့်ကြာမှု မရှိစေရေး၊ ကုန်စည် စီးဆင်းမှု ၊ ဝင်ထွက်မှု မှန်ကန်မြန်ဆန်စေရေးနှင့် ထုတ်ကုန်များ စိတ်ချ လုံခြုံမှု ရှိစေရေးတို့အတွက် ရည်ရွယ်၍ မုံရွာမြို့ပေါ်ရှိ လုပ်ငန်းရှင်များနှင့် တွေ့ဆုံ ဆွေးနွေးခဲ့ကြောင်း သိရသည်။
ဦးစွာ မုံရွာမြို့ ပွဲတော်အုပ် ကုန်အမှတ်တံဆိပ် လ္ဘက်ပိုင်ရှင်နှင့် တွေ့ဆုံကာ ဒေသထွက် ကုန်များ ဖွံ့ဖြိုးတိုးတက်ရေးအတွက် ကုန်ကြမ်းရရှိမှု၊ ကုန်ချောထုတ်လုပ် တင်ပို့နိုင်မှု၊ အလုပ်အကိုင် ဖန်တီးပေးနိုင်မှု၊ ထားသို သိမ်းစည်းမှု အခြေအနေများနှင့် ပွဲတော်အုပ် အမှတ်တံဆိပ် လ္ဘက်အား ပြည်တွင်းဈေးကွက်အပြင် ပြည်ပနိုင်ငံတကာသို့ တင်ပို့ရောင်းချနေမှု အခြေအနေများကို တွေ့ဆုံ ဆွေးနွေးခဲ့ပါသည်။
အလားတူ မုံရွာမြို့ ဆာကူရာ ယိုစုံ လုပ်ငန်းရှင်နှင့်တွေ့ဆုံပြီး ကုန်ထုတ်လုပ်မှု အခြေအနေ၊ ထားသိုမှု၊ တင်ပို့ရောင်းချမှုနှင့် ဈေးကွက် အခြေအနေတို့ကို လည်းကောင်း၊ စစ်ကိုင်းတိုင်းဒေသကြီး၊ မုံရွာမြို့ရှိ ပဲမျိုးစုံကုန်သည်ကြီးများအသင်းနှင့် တွေ့ဆုံခဲ့ရာ အသင်းသား ၄၈၀ ရှိပြီး သက်တမ်း (၃၃)နှစ်ရှိပြီဖြစ်ကြောင်း၊ တိုင်းဒေသကြီးအတွင်း ပဲမျိုးစုံထုတ်လုပ်မှု၊ တင်ပို့ရောင်းချမှု ကုန်စည်များ စီးဝင်စီးထွက်မှု အခြေအနေမှာ အမြဲဖြစ်ထွန်းလျက်ရှိကြောင်း၊ ပဲမျိုးအစား(၂၀)ရှိသည်အနက်မှ ကုလားပဲသည် ရောင်းလိုအား အကောင်းဆုံးဖြစ်ကြောင်း၊ ပဲမျိုးစုံကို နယ်စုံ ချောင်ဦး၊ ယင်းမာပင်၊ ကနီ၊ ပုလဲဘက်များမှ ဝင်ရောက်ခဲ့ပြီး ဈေးနှုန်းဈေးကွက်များကို ရန်ကုန်၊ မန္တလေးမှ ပေါက်ဈေး သိရှိပြီးမှသာ မုံရွာဈေးဖြတ်ပေးကြောင်း၊ ပေါက်ဈေးများကို တောင်သူတွေအတွက် အချိန်နှင့် တပြေးညီ သိရှိနိုင်ရန် ဆောင်ရွက်ပေးလျက်ရှိကြောင်းနှင့် ငလျင်ဘေးအလွန် ကုန်ပစ္စည်းများ တင်ပို့ရောင်းချနိုင်မှု အခြေအနေများနှင့် ပတ်သက်၍ ဆွေးနွေးခဲ့ကြကြောင်း သိရသည်။
DOCA(စစ်ကိုင်း)