ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်း ၊ စီးပွားရေးရာဝန်ကြီး ဦးတင်အေးနှင့် စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးစိုးအောင်၊ သက်ဆိုင်ရာ တိုင်းဒေသကြီးအဆင့် ဌာနဆိုင်ရာများ ဆီလုပ်ငန်းရှင်များနှင့် တွေ့ဆုံဆွေးနွေးပွဲကို တိုင်းဒေသ ကြီးအစိုးရအဖွဲ့ရုံး အစည်းအဝေးခန်းမ (၁)မှာ ဇူလိုင်လ ဒုတိယပတ်အတွင်း တွေ့ဆုံခဲ့ပါသည်။ထို့သို့တွေ့ဆုံခဲ့ရာတွင် ဧရာဝတီတိုင်းဒေသကြီး အစိုးရအဖွဲ့ဝန်ကြီးချုပ် ဦးတင်မောင်ဝင်း က တိုင်းဒေသကြီးအတွင်း စားသုံးဆီဖူလုံရေးအတွက် Contract Farming စနစ်ဖြင့် အကျိုးတူ နေကြာ စိုက်ပျိုးရေး ၊ ပုဂ္ဂလိက ဆီစက်များအဆင့်မီကြိတ်ခွဲနိုင်ရေး ဆီစက်လုပ်ငန်းများတွင် ကုမ္ပဏီလုပ်ငန်းရှင်များ ရင်းနှီးမြုပ်နှံနိုင်ရေးအတွက် ရည်ရွယ်၍ယခုလိုတွေ့ဆုံဆွေးနွေးရခြင်း ဖြစ်ကြောင်း တိုင်းဒေသကြီးအတွင်း စားသုံးဆီဖူလုံရေးအတွက်လည်း ဇွန်လ(၁)ရက်နေ့မှ စတင်၍ ကြံခင်း ၊ မြန်အောင် ၊ အင်္ဂပူမြို့နယ်များတွင် နေကြာမျိုး ဧက (၃၀၀၀)စိုက်ပျိုးထားပြီး ထွက်ရှိလာသော နေကြာမျိုးများအား ဆောင်းရာသီတွင် ဧက(၂)သိန်း စိုက်ပျိုးရန် လျာထား ထားကြောင်း စိုက်ပျိုးရေးကို အခြေခံသည့် မိမိတို့တိုင်းဒေသကြီးအတွင်း နိုင်ငံတော်အကြီးအကဲ လာရောက် စဉ်ကလည်း ပဲ ၊ ပြောင်း ၊ နေကြာ ၊ ပဲပုတ်များ ပိုမို စိုက်ပျိုးရန် လမ်းညွှန်ခဲ့ ပါကြောင်း စားအုန်းဆီ နေရာတွင် အစားထိုးရန်အတွက် နေကြာဆီထုတ်လုပ်နိုင်ရန် ဆောင်ရွက်သွားမှာဖြစ်ကြောင်း အဖွင့်အမှာစကားပြောကြားခဲ့ပါသည်။
စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူး ဦးစိုးအောင်က တိုင်းဒေသကြီးအတွင်း နေကြာစိုက်ပျိုးရေး စီမံကိန်းများ ဆောင်ရွက်နေသလို တက်ရောက်လာသော လုပ်ငန်းရှင်များ၊ စက်ပိုင်များကလည်း ဆီကြိတ်ခွဲနိုင်ရေးဆောင်ရွက်ရန်နှင့် အသစ်တည် ဆောက်မည့်လုပ်ငန်းရှင် (၃/၄)ဦးရှိပြီး ထပ်မံတိုးချဲ့မည့် ဆီစက်များမှလည်း ခေတ်မီနည်း စနစ်များဖြင့် အဆင့်မြှင့်တင်ထားရန် ၊ ဆီစက်လုပ်ငန်းများ ပိုမိုဖွံ့ဖြိုးတိုးတက်လာစေရန် Export လုပ်သော လုပ်ငန်းရှင်များအနေဖြင့် နေကြာဆီကြိတ်ခွဲ ထုတ်လုပ်ရေးသာမက နေကြာစိုက်ပျိုးခြင်းကို Contract Farming ဖြင့် အကျိုးတူလုပ်ကိုင်နိုင်ရေး ပေါင်းစပ်စီမံပေးရန် ဆွေးနွေးပြောကြားခဲ့ပါသည်။
စိုက်ပျိုးရေးဦးစီးဌာန တိုင်းဒေသကြီးဦးစီးမှူး ဦးစိန်မောင်မြင့်က စိုက်ပျိုးရေးဦးစီးဌာနအနေဖြင့် Contract Farming စနစ် လုပ်မည်ဆိုပါက ကုမ္ပဏီရှိရမည်ဖြစ်ကြောင်း ၎င်းကုမ္ပဏီအတွက် SOP လုပ်ထားပြီး SOP ပါအချက်အလက်များ ဖြန့်ဝေပေးသွားမည်ဖြစ်ကြောင်း Contract Farming စနစ်ဆောင်ရွက်ရန် ရည်ရွယ်ချက်က သီးနှံဖွံ့ဖြိုးပြီး တောင်သူများ အတွက်ဖြစ်ကြောင်း အရည်အသွေးကောင်းမျိုးများစိုက်ပျိုးရန်နှင့် ကြိုတင်ညှိနှိုင်းထားသည့် အတိုင်းအာမခံထားရန် ရည်ရွယ်ပြီး တောင်သူများအတွက် အစားအစာ ဘေးကင်းလုံခြုံရေး (Food Safety) GAP စနစ်ကို စနစ်တကျအကောင်အထည်ဖော်ဆောင်ရွက်ရန် SOP ရေးဆွဲခြင်းဖြစ်ကြောင်း ပြောကြားခဲ့ပါသည်။
ဧရာဝတီတိုင်းဒေသကြီးအတွင်း ဆီဖူလုံသည့်အပြင် ဈေးနှုန်းသက်သာစွာ စားသုံးနိုင်ရန်နှင့် ပြည်သူများ ကျန်းမာရေးညီညွှတ်စေရန် သာမက ပြည်ပသွင်းကုန်အစားထိုး နိုင်ငံခြား သုံးစွဲငွေ လျော့ကျစေနိုင်ပြီး နေကြာစိုက်ပျိုးခြင်း လုပ်ငန်းများအတွက် Contract Farming စနစ်တွင် ပါဝင်သည့်လုပ်ထုံးလုပ်နည်း ညွှန်ကြားချက်များနှင့်အညီ အသိပညာများ ဖြန့်ဝေပေးခြင်းနှင့် အကျိုးတူပူးပေါင်းဆောင်ရွက်သွားရန် ခေတ်မီသည့် စက်ယူနစ်များဖြင့် အဆင့်မီ ကြိတ်ခွဲထုတ်လုပ်နိုင်ရေး ကူညီဆောင်ရွက်ပေးရန်နှင့် ဆီစက်လုပ်ငန်းများတွင် ရင်းနှီးမြုပ်နှံ နိုင်ရေး အားပေးကူညီရန်နှင့် ကြိတ်ခွဲရာမှ ထွက်ရှိလာသော ဘေးထွက်ပစ္စည်းများကို တိရိစ္ဆာန်မွေးမြူရေးအစာ ကုန်ကြမ်း အသုံးပြုနိုင်ရေး ချိတ်ဆက်ဆောင်ရွက်ပေးရန် တက်ရောက် လာသော ဌာနဆိုင်ရာများနှင့် လုပ်ငန်းရှင်များမှ ဝိုင်းဝန်းဆွေးနွေး၍ တွေ့ဆုံပွဲသို့ ဌာနဆိုင်ရာများနှင့် ဆီစက်လုပ်ငန်းရှင်(၁၉)ဦး စုစုပေါင်း (၃၅)ဦး တက်ရောက်ခဲ့ကြောင်း သိရသည်။
DOCA(ဧရာဝတီ)