နေပြည်တော်ဆီကုန်သည်နှင့်ဆီလုပ်ငန်းရှင်များအသင်းအစည်းအဝေး(၃/၂၀၂၂)ကို ၁၂-၈-၂၀၂၂ ရက်နေ့၊ နံနက်(၁၀း၃၀)အချိန်တွင် စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော် ဦးစီးမှူးရုံးတွင် ကျင်းပပြုလုပ်ခဲ့ပါသည်။
အစည်းအဝေးတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ နေပြည်တော်ဦးစီးမှူး၊ ဒေါက်တာဇော်လွင်က “စားသုံးသူရေးရာဦးစီးဌာနအနေဖြင့် နေပြည်တော်ဆီကုန်သည်နှင့် ဆီလုပ်ငန်းရှင်များအသင်းနှင့်ပူးပေါင်းပြီး ပြည်ထောင်စုနယ်မြေ၊ နေပြည်တော်အတွင်း အပတ်စဥ်ရရှိသော ဆီပမဏများကို ကျေးရွာ၊ ရပ်ကွက်များအရောက် ဈေးကားများဖြင့် ရောင်းချပေးနေသည့်အတွက် စားသုံးသူပြည်သူများ နှစ်သက်သဘောကျလျက်ရှိပါကြောင်း၊ အသင်းသားများအားလုံး စည်းလုံးညီညွတ်စွာဖြင့် ပူးပေါင်းဆောင်ရွက်ကြစေလိုပါကြောင်း၊ မိမိတို့ ဌာနအနေဖြင့် နေပြည်တော်ဆီကုန်သည်နှင့်ဆီလုပ်ငန်းရှင်များအသင်းနှင့် ဆက်လက်ပူးပေါင်းဆောင်ရွက်သွားမှာဖြစ်ပါကြောင်း၊ နေပြည်တော်အတွက် ရရှိမည့် ဆီပမာဏများကိုလည်း အချိန်မီရရှိရေး ကြိုးစားဆောင်ရွက်သွားမည်ဖြစ်ပါကြောင်း” ပြောကြားခဲ့ပါသည်။
ဒုတိယတိုင်းဦးစီးမှူး၊ ဦးခင်မောင်ဆွေက “ဈေးကားများဖြင့် ဆီရောင်းချရာတွင် ဥတ္တရခရိုင်ကိုဦးဆောင်နေပါကြောင်း၊ ဒက္ခိဏခရိုင်ကို ဒေါ်စောမာလာနွယ်မှဦးဆောင်နေပါကြောင်း၊ အသင်းသားများအနေဖြင့် စည်းစည်းလုံးလုံး ဆောင်ရွက်စေလိုပါကြောင်း၊ အကူအညီလိုအပ်ပါက တင်ပြသွားကြရန်နှင့် အတတ်နိုင်ဆုံးကူညီဆောင်ရွက်ပေးသွားမှာဖြစ်ကြောင်း” ပြောကြားခဲ့ပါသည်။
နေပြည်တော်ဆီကုန်သည်နှင့်ဆီလုပ်ငန်းရှင်များအသင်းဥက္ကဋ္ဌက “ ပျဥ်းမနားမြို့နယ်မှ Viber Group သီးသန့်ဖွင့်ရန်လိုကြောင်း၊ မိမိတို့အသင်းမှာ ခိုင်မာတောင့်တင်းသော အသင်းတစ်ခုဖြစ်သည်နှင့်အညီ တစ်ဦးချင်းအလိုက် တာဝန်သတ်မှတ်ပြီး ခွဲဝေဆောင်ရွက်သွားရန်လိုအပ်ပါကြောင်းနှင့် ဈေးကားများလှည့်လည်ရောင်းချရာတွင် စားသုံးသူရေးရာဦးစီးဌာန၏ လမ်းညွှန်မှုဖြင့်ပူးပေါင်းဆောင်ရွက်မှသာ အောင်မြင်မှာဖြစ်ကြောင်း” ပြောကြားခဲ့ပါသည်။
စားသုံးသူရေးရာဦးစီးဌာန၊ နေပြည်တော်ဦးစီးမှူးအနေဖြင့် နိဂုံးချုပ်အမှာစကားပြောကြားရာတွင် “ နေပြည်တော်ဆီအသင်းအားရေရည်တည်တံ့ခိုင်မာစေရန် အသင်းသားများအားလုံးညီညီညွတ်ညွတ် ဆောင်ရွက်သွားရမှာဖြစ်ကြောင်း၊ မိမိအနေဖြင့်အသင်းကို အကောင်းဆုံးဖြစ်စေရန် ကြိုးစားဆောင်ရွက်သွားမှာဖြစ်ကြောင်း” ပြောကြားပြီး အစည်းအဝေးကိုနေ့လည် (၁၂း၀၀)အချိန်တွင် ပြီးဆုံးခဲ့ကြောင်း သတင်းရရှိပါသည်။
DOCA(ပြည်ထောင်စုနယ်မြေ)