စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး တိုင်းဒေသကြီးဦးစီးမှူး၏လမ်းညွှန်မှုဖြင့် ဒုတိုင်းဒေသကြီးဦးစီးမှူးဦးဆောင်၍ ဝန်ထမ်းများသည် (၁၈.၈.၂၀၂၂)ရက်နေ့ ညနေ (၄း၀၀)နာရီ အချိန်တွင် မုံရွာမြို့၊ ဒေါနခြံရပ်ကွက်ရှိ “လပြည့်” ကိတ်မုန့်လုပ်ငန်းရှင်နှင့် တွေ့ဆုံဆွေးနွေးခဲ့ကြပါသည်။
ယင်းသို့ဆောင်ရွက်ရာတွင် “လပြည့်” ကိတ်မုန့်လုပ်ငန်းရှင်မှ မိမိထုတ်လုပ်သော ကိတ်မုန့်၊ ကိတ်ခြောက် အထုပ်များကို နမူနာထုတ်ပြပြီး ယခုကာလအနေဖြင့် ထုတ်လုပ်ရောင်းချမှုများမှာ ယခင်ကာလထက် အရောင်းအဝယ်ပါးနေသည့်အတွက် ထုတ်လုပ်မှုနည်းနေပါကြောင်း၊ ကုန်ကြမ်း ပစ္စည်းများဈေးနှုန်းမြင့်တက်လျက်ရှိပါကြောင်း၊ နိုင်ငံတော်မှရည်ညွှန်းဈေးဖြင့် ရောင်းချပေးသည့် စားအုန်းဆီများ ဝယ်ယူခွင့်ရရှိရေး စစ်ကိုင်းတိုင်းဒေသကြီး မုန့်လုပ်ငန်းရှင်များအသင်းမှ တဆင့်တင်ပြမည်ဖြစ်ပါ၍ ကူညီဆောင်ရွက်ပေးစေလိုပါကြောင်း တင်ပြပါသည်။ စားသုံးသူရေးရာ ဦးစီးဌာနမှ ဒုတိယညွှန်ကြားရေးမှူး ဦးဝေဖြိုးထက်က လုပ်ငန်းရှင်၏ ထုတ်လုပ်သော ကိတ်မုန့်၊ ကိတ်ခြောက် အမျိုးအစားများအား ကြည့်ရှု၍ ကုန်အမှတ်တံဆိပ်ပေါ်တွင် လိုအပ်သော ကုန်အညွှန်းအမှတ်အသားများ ဖြည့်စွက်ဆောင်ရွက်နိုင်စေရန် ပညာပေး ဆွေးနွေးခြင်း၊ လုပ်ငန်း လိုင်စင်၊ စည်ပင်လိုင်စင်များအား ဆောင်ရွက်စေပြီး သက်တမ်းကျော်လွန်ပါက သက်တမ်းတိုးစေရန် ပြောကြားခြင်း၊ ဌာနသို့ ကုန်အညွှန်းအမှတ်အသား ပြည့်စုံမှန်ကန်စွာ လာရောက်ဆောင်ရွက်နိုင်ရန် ပြောကြားခြင်း၊ မိမိထုတ်လုပ်သော လုပ်ငန်းများအပေါ် အချက်အလက် အထောက်အထား ပြည့်စုံမှန်ကန်ပါက မည်သည့်နေရာတွင်မဆို လုံခြုံစိတ်ချစွာ ရောင်းဝယ်နိုင်ကြောင်းနှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များလိုက်နာရန် တာဝန်များကို ဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ ပညာပေးလက်ကမ်းစာစောင်များ ဖြန့်ဝေခြင်းများ ဆောင်ရွက်ခဲ့ပါသည်။
DOCA(စစ်ကိုင်း)