စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးနှင့် မုံရွာမြို့နယ်တာဝန်ခံတို့သည် (၆.၉.၂၀၂၂) ရက်နေ့၊ နံနက်(၁၀:၀၀)နာရီတွင် မုံရွာမြို့၊ စက်မှုဇုန်ရပ်ကွက်ရှိ TW စားအုန်းဆီရောင်းဝယ်ရေးလုပ်ငန်းရှင်နှင့်တွေ့ဆုံ၍ ဆီများ၏ လက်ရှိဖြစ်ပေါ်နေသော ဈေးနှုန်းများ အခြေအနေ၊ ရောင်းဝယ်ဖောက်ကားမှုနှင့် ဈေးကွက်တွင် ကြုံတွေ့နေရသော အခက်အခဲများအား တွေ့ဆုံဆွေးနွေးမေးမြန်းခြင်းဆောင်ရွက်ခဲ့ပါသည်။ စားအုန်းဆီများကို စက်တင်ဘာလဆန်းပိုင်းက ကုမ္ပဏီများထံမှ ရည်ညွှန်းဈေး (၅၁၀၀)ကျပ်ဖြင့် ဝယ်ခွင့်ရခဲ့သော စားအုန်းဆီများအား (၁) ပိဿာလျှင်(၅၅၀၀)ကျပ်ဖြင့် ခရိုင်ဆီအသင်းဦးဆောင်မှုဖြင့် ရောင်းချရန်အစီအစဉ်ရှိပါကြောင်း၊ ရောင်းချမည့်ရက်ကိုလည်း ကွင်းဆင်းစိစစ်ပေးနိုင်ရန်အတွက် စားသုံးသူ ရေးရာဌာနသို့ တင်ပြဆောင်ရွက် သွားမည်ဖြစ်ပါကြောင်း၊ အခက်အခဲများအနေဖြင့် စားအုန်းဆီများ ဝယ်ယူရာတွင် ခက်ခဲသည့်အတွက် တစ်ခါတစ်ရံ ပြင်ပပေါက်ဈေးဖြင့် ဝယ်ယူရောင်းချရပြီး ဈေးအနည်းငယ်တက်ရကြောင်း၊ စားအုန်းဆီများ ရည်ညွှန်းဈေးဖြင့် ဝယ်ယူရရှိနိုင်ရေး ကူညီဆောင်ရွက်ပေးစေလိုကြောင်း ဆွေးနွေးပြောကြားခဲ့ပါ သည်။
ထို့နောက် ခရိုင်ဦးစီးမှူးက ကုန်ပစ္စည်းများကို ဈေးကစားရန်ရည်ရွယ်၍ သိုလှောင်ထား၍ မရကြောင်း၊ စားအုန်းဆီများကိုလည်း ကြီးကြပ်ရေးကော်မတီက အပတ်စဉ်ထုတ်ပြန်ကြောညာ လျက်ရှိသော သတ်မှတ်ရည်ညွှန်းဈေးအပေါ် ဒေသအလိုက်သယ်ယူပို့ဆောင်ခ ကုန်ကျစရိတ်များ ထပ်ပေါင်း၍ (၂)ရာခိုင်နှုန်း အမြတ်ထက်မပိုသောဈေးများဖြင့်သာ ရောင်းချသင့်ကြောင်း၊ စားအုန်းဆီရည်ညွှန်းဈေးနှုန်းများဖြင့် စဉ်ဆက်မပြတ်ဝယ်ယူရရှိနိုင်ရေးအတွက် မိမိတို့ဌာနကလည်း မြန်မာနိုင်ငံဆီကုန်သည်များ၊ ဆီလုပ်ငန်းရှင်များအသင်းနှင့် ချိတ်ဆက်ဆောင်ရွက်လျက်ရှိပါကြောင်း ဆွေးနွေးပြောကြားခဲ့ပြီး လက်ကမ်းစာစောင်များ ဖြန့်ဝေခဲ့ပါသည်။
DOCA(စစ်ကိုင်း)