တောင်ငူခရိုင်၊ ရေတာရှည်မြို့နယ်၊ ဆွာချောင်းတံတားမြောက်ဘက်ရှိ ဆီဆုံကုန်းကျေးရွာသည် မိရိုးဖလာ လယ်ယာလုပ်ငန်းကို အဓိကထား လုပ်ကိုင်ကြသော်လည်း တစ်ဖက်တလမ်းမှ အပိုဝင်ငွေရရှိစေရန်အတွက် တပိုင်တနိုင်လုပ်ငန်းအဖြစ် ဝါးကုလားထိုင်လုပ်ငန်းကို လုပ်ကိုင်ကြပါသည်။ ဝါးကုလားထိုင်ပြုလုပ်ရန်အတွက် လိုအပ်သောကုန်ကြမ်းများမှာ ကြက်သောင်းဝါး၊ ဝါးကျစ်၊ ဝါးပျက်နှင့် သံတို့ဖြစ်ပါသည်။
ဝါးကုလားထိုင် ပြုလုပ်ပုံမှာ ကြက်သောင်းဝါးကို လိုအပ်သောအတိုင်းအတာဖြတ်တောက်၍ အခင်းယက်လုပ်ခြင်း၊ ဝါးကျစ်အား အခင်းတိုင်ပြုလုပ်ခြင်း၊ ဝါးပျက်အား ချုပ်တန်းထည့် သံနှင့်ရိုက်ပြီးပါက အသင့်ထိုင်ကုလားထိုင်တစ်လုံးအားရရှိပြီ ဖြစ်ပါသည်။
ဝါးကုလားထိုင် (၁)လုံးပြုလုပ်ရန်အတွက် ကုန်ကျစရိတ်စုစုပေါင်းအနေဖြင့် (၃၂၀၀) ကျပ်ခန့်ရှိပြီး ရောင်းတန်းဝင်ဝါးကုလားထိုင် (၁)လုံးလျှင် (၄၅၀၀) ကျပ်ခန့် ရောင်းရပါသည်။ တစ်နေ့လျှင် ဝါးကုလားထိုင် (၁၆) လုံးခန့်ပြီးစီးပြီး ရေတာရှည်၊ ဆွာ၊ သာဂရ၊ မြို့လှ၊ ရေနီမြို့နှင့် တောင်ငူမြို့များသို့ တင်ပို့ရောင်းချကြောင်း သိရှိရပါသည်။
DOCA(ပဲခူး)