ပြည်ပကုန်သွယ်မှုသတင်းများ

     မလေးရှားနိုင်ငံအနေဖြင့် ပါကစ္စတန်ဆန်များ တင်သွင်းမှုအပေါ် ကောက်ခံသည့် အခွန်နှုန်းများကို အခြားပင်ရင်း‌ဒေသများမှ တင်သွင်းသည့်ဆန်များအပေါ် စည်းကြပ်သော အခွန်နှုန်းများနှင့် အညီ ပြန်လည်ပြင်ဆင်ရန် သဘောတူညီခဲ့သည်ဟု ပါကစ္စတန်ဝန်ကြီးချုပ်ရုံး၏ နိုဝင်ဘာ ၃၀ ရက် နေ့၌ ထုတ်ပြန်သော ကြေညာချက်တွင် ဖော်ပြထားပါသည်။

     ယခုနှစ် အောက်တိုဘာလအတွင်း ပါကစ္စတန်နိုင်ငံသို့ လာရောက်သည့် ခရီးစဉ်၌ မလေးရှားဝန်ကြီးချုပ် Anwar Ibrahim အား လက်ခံတွေ့ဆုံဆွေးနွေးခဲ့ရာတွင် ကုန်သွယ်မှုဆိုင်ရာ ကိစ္စရပ်များစွာကို ဖြေရှင်းဆောင်ရွက်နိုင်ခဲ့မှုအပေါ် ပါကစ္စတန်ဝန်ကြီးချုပ် Shehbaz Sharif အနေ ဖြင့် ကျေနပ်အားရမှုရှိသည်ဟု အဆိုပါ ထုတ်ပြန်ချက်၌ ဖော်ပြခဲ့သည်။ မည်သည့် ကုန်သွယ်ရေး ဆိုင်ရာ ပြဿနာရပ်များအား ဖြေရှင်းနိုင်ခဲ့သည်ကို အသေးစိတ်ဖော်ပြထားခြင်းမရှိသော်လည်း အဆိုပါခရီးစဉ်၌ ပါကစ္စတန်ထံမှ ဆန်တန်ချိန် ၁၀၀၀၀၀ နှင့် ဟာလာအသားများကို တင်သွင်းရန် စိတ်ဝင်စားကြောင်း မလေးရှားဝန်ကြီးချုပ်က ပြောကြားခဲ့သည်။ ပါကစ္စတန်ဘက်ကမူ မလေးရှား ၏ အကောက်ခွန်နှုန်းထားမြင့်မားမှုက ပါကစ္စတန်ဆန်၏ ဈေးကွက်ယှဉ်ပြိုင်နိုင်စွမ်းကို နည်းပါး စေပြီး အထူးသဖြင့် အိန္ဒိယထံမှ တင်သွင်းသောဆန်များနှင့် ယှဉ်ပြိုင်နိုင်မှုမရှိကြောင်း အလေးပေး ပြောဆိုထားခြင်းဖြစ်သည်။

     လွန်ခဲ့သော အောက်တိုဘာလအတွင်း အိန္ဒိယမှ တင်ပို့သော ဆန်ကွဲ ၅ ရာခိုင်နှုန်း ပါဝင် သည့် ဆန်ဈေးနှုန်းသည် ၁ တန်လျှင် ၄၄၄ ဒေါ်လာမှ ၄၄၈ ဒေါ်လာ အတွင်းရှိနေချိန်တွင် ပါကစ္စတန်မှ တင်ပို့သော အလားတူဆန်၏ ဈေးနှုန်းမှာ ၁ တန်လျှင် ၄၆၃ ဒေါ်လာမှ ၄၆၇ ဒေါ်လာ နှုန်းထားအတွင်း၌ ရှိနေခဲ့သည်။

     နှစ်နိုင်ငံတွေ့ဆုံဆွေးနွေးခဲ့ရာ၌ ပါကစ္စတန် ပို့ကုန်လုပ်ငန်းရှင်များ အနေဖြင့် ၎င်းတို့၏ ဆန် အတွက် မြင့်မားသော ဈေးနှုန်းများ တောင်းဆိုလျက်ရှိသဖြင့် ဈေးကွက်ယှဉ်ပြိုင်နိုင်စွမ်းဆိုင်ရာ စိန်ခေါ်မှုဖြစ်ပေါ်ရခြင်းဖြစ်သည်ဟု မလေးရှားအစိုးရအရာရှိများက ညွှန်ပြပြောဆိုခဲ့ကြသည်။

     ပါကစ္စတန် ဝန်ကြီးချုပ်ရုံး၏ သတင်းထုတ်ပြန်ချက်၌ နှစ်နိုင်ငံဆက်ဆံရေးတွင် အပြု သဘောဆောင်သည့် တိုးတက်ဖြစ်ထွန်းမှုများ အပေါ် ဝန်ကြီးချုပ် Shehbaz က အားရမှုရှိကြောင်း၊ ပါကစ္စတန်အနေဖြင့် နှစ်ဘက်အပြန်အလှန် အကျိုးဖြစ်ထွန်းမည့် လုပ်ငန်းနယ်ပယ်များအားလုံး တွင် ပူးပေါင်းဆောင်ရွက်မှု အားကောင်းခိုင်မာစေရေး ကတိကဝတ်ထားရှိမှုကို ထပ်လောင်း အတည်ပြုကြောင်း၊ နှစ်နိုင်ငံ ခေါင်းဆောင်များ အနေဖြင့် အဓိကကျသည့် လုပ်ငန်းကဏ္ဍများတွင် နီးကပ်စွာ ပူးပေါင်းဆောင်ရွက်မှုကို ဆက်လက်လုပ်ဆောင်ရန် သဘောတူညီခဲ့ကြကြောင်း ဖော်ပြ ထားသည်။

     နှစ်နိုင်ငံအကြား ပူးပေါင်းဆောင်ရွက်မှုကို ထပ်မံတိုးမြှင့်ရန်အတွက် ပါကစ္စတန်ဝန်ကြီးချုပ်Shehbaz သည် ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဖြစ်သူ Ishaq Dar လိုက်ပါလျက် ရှေ့ လာမည့် နှစ်ဆန်းပိုင်းတွင် မလေးရှားနိုင်ငံ ကွာလာလမ်ပူမြို့သို့ တရားဝင်ခရီး သွားရောက်ဖွယ် ရှိကြောင်း သိရှိရသည်။

Source: Dawn, 1 Dec 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ထိုင်းနိုင်ငံ၏ ယခုနှစ် ပို့ကုန်တင်ပို့မှုသည် ယခင်ခန့်မှန်းထားသည့် ၂% တိုးတက်မှုထက် မြင့်မားလျက် ၄% အထိ တိုးတက်မှုရရှိနိုင်ပြီး ၂၀၂၅ ခုနှစ်တွင်လည်း ၁% မှ ၃% အထိ တိုးတက် လာနိုင်ကြောင်း ထိုင်းပို့ကုန်လုပ်ငန်းရှင်များကောင်စီက ၃-၁၂-၂၀၂၄ ရက်နေ့တွင် သတင်းထုတ် ပြန်ခဲ့သည်။

      စီးပွားရေး၏ အဓိကမောင်းနှင်အားဖြစ်သည့် ပို့ကုန်တင်ပို့မှုများသည် ယခုနှစ်အစောပိုင်းက ထက် အောက်တိုဘာလတွင် ၁၄.၆% မြင့်တက်ခဲ့ပြီး ၂၀၂၄ ခုနှစ် ပထမ ၁၀ လ၏ နှစ်ချုပ်အနေဖြင့် ၄.၉% တိုးလာကြောင်း သိရှိရသည်။

     ယခုနှစ် ပထမ ၁၀ လအတွင်း ထိုင်းနိုင်ငံ၏ နယ်စပ်နှင့် နယ်စပ်ဖြတ်ကျော်ကုန်သွယ်မှုများ မှာ ၆.၁၈ ရာခိုင်နှုန်း မြင့်တက်ခဲ့ပြီး တန်ဖိုးအားဖြင့် ဘတ်ငွေ ၁.၅၁ ထရီလီယံသို့ ရောက်ရှိခဲ့သည် ဟု ကုန်သွယ်ရေးဝန်ကြီး Pichai Naripthaphan က ဒီဇင်ဘာ ၂ ရက်နေ့တွင် ပြောကြားခဲ့သည်။

      တစ်ချိန်တည်း၌ ထိုင်းဆန်တင်ပို့မှုသည် ၂၀၂၄ ခုနှစ် ပထမ ၁၁ လတွင် တန်ချိန် ၉.၂၇ သန်း သို့ ရောက်ရှိခဲ့ပြီး ယခင်နှစ် အလားတူကာလ တင်ပို့မှုထက် ၁၆.၆ ရာခိုင်နှုန်း တိုးမြင့်လာခဲ့ကြောင်း၊ သို့သော် အိန္ဒိယ၏ဆန်တင်ပို့မှု ပြန်လည်စတင်ခဲ့ပြီးနောက် ကမ္ဘာ့ဒုတိယအကြီးဆုံး ဆန်တင်ပို့ သည့် ထိုင်းနိုင်ငံ၏ ဆန်တင်ပို့မှုမှာ ၂၀၂၅ ခုနှစ်တွင် ကျဆင်းသွားနိုင်ဖွယ်ရှိကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ဒီဇင်ဘာ ၃ ရက်နေ့တွင် သတင်းထုတ်ပြန်ခဲ့သည်။  

Source: Bangkok Post, 3 December, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     Zeekr သည် ယနေ့တွင် Zeekr 009 MPV (ဘက်စုံသုံးယာဉ်) အား စင်္ကာပူတွင် မိတ်ဆက်ခဲ့ပြီး ကမ္ဘာတစ်ဝှမ်းရှိ ၎င်း၏ နှစ် ၅၀၀ မြောက်ဆိုင်ဖြစ်သော စတိုးဆိုင်အား စင်္ကာပူမြို့တော်အတွင်း ၌ ဖွင့်လှစ်ခဲ့ကြောင်း သိရသည်။ Zeekr 009 အား စင်္ကာပူတွင် ထိုင်ခုံခုနှစ်လုံးပါသော ဗားရှင်းနှင့် ထိုင်ခုံရှစ်လုံးပါသော ဗားရှင်းဟူ၍ စင်္ကာပူဒေါ်လာ ၄၀၉၉၀၀ (အမေရိကန်ဒေါ်လာ ၃၀၅၀၅၀) နှင့် စင်္ကာပူဒေါ်လာ ၄၁၉၉၀၀ တို့ အသီးသီးဈေးနှုန်းရှိမည် ဖြစ်သည်။ တရုတ်နိုင်ငံတွင် ပုံမှန် Zeekr 009 အား ယွမ် ၄၃၉၀၀၀ (အမေရိကန်ဒေါ်လာ ၆၀၅၄၀)၊ ယွမ် ၄၅၉၀၀၀ နှင့် ယွမ် ၄၆၉၀၀၀ ဟူ၍ အမျိုးအစားသုံးမျိုးဈေးနှုန်း အသီးသီးရှိမည် ဖြစ်သည်။ ထိုပုံမှန်ဗားရှင်းအပြင် Zeekr 009 Grand အား ယွမ် ၇၈၉၀၀၀ ဖြင့် စတင်ရောင်းချပေးလျက်ရှိကြောင်း သိရသည်။ COE (ရပိုင်ခွင့်လက်မှတ်၀ အပါအဝင်ကားတစ်စီးပိုင်ဆိုင်ရန် ကုန်ကျစရိတ်ကြီးမြင့်ခြင်းကြောင့် စင်္ကာပူနိုင်ငံရှိ မော်တော်ယာဉ်ဈေးနှုန်းများသည် တရုတ်နိုင်ငံထက် မြင့်မားလျက်ရှိသည်။ Zeekr 009 သည် စင်္ကာပူတွင် Zeekr မှ ကမ်းလှမ်းသည့် ဒုတိယမြောက်မော်ဒယ်ဖြစ်ပြီး Zeekr X compact SUV တွင် (Sport Utility vehicle) အား ဩဂုတ်လ ၁ ရက်နေ့က မိတ်ဆက်ခဲ့သည်။ Zeekr ၏ နှစ် ၅၀၀ မြောက် ကမ္ဘာလုံးဆိုင်ရာစတိုးဆိုင်အား ယနေ့ (နိုဝင်ဘာလ ၂၈ ရက်နေ့) တွင် ဖွင့်လှစ်ခဲ့ပြီး ယခုနှစ်အတွင်း နောက်ထပ်ဆိုင်များလည်း တိုးလာမည်ဖြစ်ကြောင်း ထုတ်ပြန်ချက်တွင် ကြေညာထားသည်။ ယနေ့အချိန်ထိ Zeekr သည် တရုတ်နိုင်ငံတွင် ဆိုင်ပေါင်း ၄၄၇ ဆိုင်နှင့် နိုင်ငံတကာတွင် ၅၃ ဆိုင် ဖွင့်လှစ်ထားပြီး ဖြစ်သည်။ ကုမ္ပဏီသည် ၎င်း၏ ပထမဆုံးစတိုးဆိုင်အား ၂၀၂၁ ခုနှစ်၊ စက်တင်ဘာလတွင် Zhejiang ပြည်နယ်၊ Hang zhou တွင် ဖွင့်လှစ်ခဲ့သည်။ Zeekr သည် ကမ္ဘာ့ဈေးကွက်သို့ အရှိန်အဟုန်ဖြင့် ဝင်ရောက်လာခဲ့ကာ ဆွီဒင်၊ ဩစတြေးလျ၊ အာရပ်စော်ဘွားများ ပြည်ထောင်စု၊ စင်္ကာပူ၊ မက္ကဆီကိုနှင့် အီဂျစ်တို့အပါအဝင် နိုင်ငံတကာပင်မဈေးကွက် ၄၀ ကျော်သို့ ဝင်ရောက်ခဲ့ကြောင်း ယင်းထုတ်ပြန်ချက်တွင် ဖော်ပြထားသည်။ ယခုနှစ်ကုန်တွင် Zeekr သည် ကမ္ဘာလုံးဆိုင်ရာ စတိုးဆိုင်ပေါင်း ၅၂၀ ဖွင့်လှစ်နိုင်ရန် မျှော်လင့်ထားကြောင်း သိရသည်။

Source : cnevpost

DOCA(ရန်ကုန်)

     ထိုင်းနိုင်ငံနှင့် ဥရောပဆိုင်ရာ လွတ်လပ်သောကုန်သွယ်ရေးအသင်း (EFTA) တို့သည် ၂၀၂၅ ခုနှစ် ဇန်နဝါရီလတွင် လွတ်လပ်သောကုန်သွယ်ရေးသဘောတူညီချက်(FTA)ကို လက်မှတ်ရေးထိုးရန် စီစဉ်ထားပြီး ထိုင်းနိုင်ငံအတွက် တင်ပို့ရန်အခွင့်အလမ်းများ မြင့်တက်လာကာ ဥ‌ရောပ ရင်းနှီးမြှုပ်နှံသူများအား ဆွဲဆောင်နိုင်စေမည်ဖြစ်ကြောင်း ထိုင်းနိုင်ငံစီးပွားကူးသန်းဝန်ကြီးဌာနက နိုဝင်ဘာ ၃၀ ရက်နေ့ကပြောကြားခဲ့ပါသည်။ ထိုင်းနိုင်ငံစီးပွားကူးသန်းဝန်ကြီးဖြစ်သူ Pichai Naripthaphan က ထိုင်းနိုင်ငံနှင့် ဆွစ်ဇာလန်၊ နော်ဝေ၊ အိုက်စလန်နှင့် လတ်ချင်စတိန်းတို့နှင့် ဖွဲ့စည်းထားသည့် ဥရောပလွတ်လပ်သောကုန်သွယ်ရေးအသင်းတို့အကြား ဆွေးနွေးမှုအောင်မြင်ကြောင်း ကြေညာခဲ့ခြင်းဖြစ်သည်ဟု သိရပါသည်။ ထိုသဘောတူညီချက်သည် ထိုင်းနိုင်ငံ၏ ကုန်သွယ်ရေးမိတ်ဖက်ဆောင်ရွက်မှု အားကောင်းရန်၊ ပို့ကုန်အခွင့်အလမ်းတိုးချဲ့ရန်နှင့် ပြည်ပရင်းနှီးမြှုပ်နှံသူများကို ဆွဲဆောင်ရန် ကြိုးပမ်းမှုတွင် သိသာထင်ရှားသောခြေလှမ်းတစ်ရပ်ဖြစ်ခဲ့ကြောင်း သိရပါသည်။ ထို FTA သည် ကုန်ပစ္စည်းကုန်သွယ်ရေး၊ ကုန်သွယ်မှုလွယ်ကူချောမွေ့စေရေး၊ ဝန်ဆောင်မှုများ၊ ရင်းနှီးမြှုပ်နှံမှုများ၊ မူပိုင်ခွင့်၊ ယှဉ်ပြိုင်နိုင်စွမ်းနှင့် SME ဖွံ့ဖြိုးတိုးတက်ရေးအစရှိသည့် ကျယ်ပြန့်သောဧရိယာ ၁၅ ခုတို့ကိုလွှမ်းခြုံထားကြောင်းသိရပါသည်။ Mr.Pichai က ဆွေးနွေးမှုများကို ၂၀၂၂ ခုနှစ်တွင် ကနဦးစတင်ခဲ့ခြင်းဖြစ်ပြီး နှစ်နှစ်အတွင်း ပြီးမြောက်ခဲ့ကြောင်း၊ ထိုထိုင်းနိုင်ငံ၏ ဥရောပကုန်သွယ်ရေးအုပ်စုတစ်စုနှင့် ပထမဆုံး FTA သည် တည်ငြိမ်သောဖွံ့ဖြိုးတိုးတက်မှုရည်မှန်းချက်နှင့် ခေတ်မီစံနှုန်းများကို ဖော်ဆောင်ပေးနိုင်မည်ဖြစ်ကြောင်းနှင့် ထိုမှတစ်ဆင့် ဥရောပသမဂ္ဂကဲ့သို့သော အခြားအဓိကမိတ်ဖက်များနှင့် အနာဂတ် သဘောတူညီမှုများရရှိရန်အတွက် လမ်းကြောင်းဖွင့်လှစ်ပေးနိုင်မည်ဖြစ်ကြောင်း ပြောကြားခဲ့ပါသည်။ ထိုင်းနိုင်ငံစီးပွားကူးသန်းဝန်ကြီးဌာနသည် အထက်လွှတ်တော်၏ခွင့်ပြုချက်ရရှိကာ သဘောတူညီမှုအပြီးသတ်နိုင်ပါက၂၀၂၅ ခုနှစ်ဇန်နဝါရီလတွင် ဆွစ်ဇာလန်နိုင်ငံတွင်ကျင်းပမည့် ကမ္ဘာ့စီးပွားရေးဖိုရမ်တွင် လက်မှတ်ရေးထိုးရန် စီစဉ်ထားကြောင်း သိရပါသည်။ ယခုနှစ်၏ပထမ ဆယ်လအတွင်း ထိုင်းနိုင်ငံနှင့် EFTA တို့ကြား ကုန်သွယ်မှုပမာဏသည် အမေရိကန်ဒေါ်လာ ၁၀ ဘီလီယံရှိပြီး ထိုင်းနိုင်ငံ၏စုစုပေါင်းကုန်သွယ်မှု၏ ၂.၀၃ ရာခိုင်နှုန်းရှိကာ၂၀၂၃ ခုနှစ်တူညီ သည့်ကာလထက် ၂၃.၂၂ ရာခိုင်နှုန်းမြင့်တက်လာကြောင်း သိရပါသည်။ ထိုင်းနိုင်ငံ၏ EFTA သို့ အဓိကပို့ကုန်များတွင် ကျောက်မြတ်ရတနာများ၊ နာရီများ၊ ပင်လယ်စာစည်သွပ်ဘူးများ၊ စက်ပစ္စည်းများ၊ အလှကုန်ပစ္စည်းများနှင့် ဆန်တို့ ပါဝင်ပြီး ရွှေ၊ ရတနာများ၊ သိပ္ပံဆိုင်ရာပစ္စည်းများနှင့် လတ်ဆတ်သောပင်လယ်စာများ ပြန်လည်တင်သွင်းကြောင်း သိရပါသည်။

Bangkok Post

DOCA(ရန်ကုန်)

        ဗီယက်နမ်ဘဏ္ဍာရေးဝန်ကြီးဌာနသည် ပြည်တွင်းမော်တော်ယာဉ်လုပ်ငန်းဖွံ့ဖြိုးတိုးတက်မှုမြှင့်တင်ရန် မော်တော်ယာဉ်အစိတ်အပိုင်း ထုတ်လုပ်သည့်လုပ်ငန်းအတွက် အခွန်မက်လုံးပေးထားမှုကို ယခုနှစ်ကုန်အစား ၂၀၂၇ ခုနှစ် ဒီဇင်ဘာလ ၃၁ ရက်နေ့ထိ တိုးမြှင့်ရန် ကမ်းလှမ်းခဲ့ကြောင်း သိရပါသည်။ ဗီယက်နမ်သည် မော်တော်ယာဉ်အစိတ်အပိုင်းထုတ်လုပ်သည့်လုပ်ငန်း ဖွံ့ဖြိုးတိုးတက်မှုမြှင့်တင်ရေးက အဓိကကျသည့် မော်တော်ယာဉ်လုပ်ငန်းကို ဦးစားပေးစက်မှု လုပ်ငန်းထဲမှတစ်ခုအဖြစ် သတ်မှတ်ထားကြောင်း သိရပါသည်။ ဗီယက်နမ်သည် ပြည်တွင်း၌ ထုတ်လုပ်တပ်ဆင်သည့်ကားများနှင့် မော်တော်ယာဉ်အစိတ်အပိုင်းထုတ်လုပ်သည့်လုပ်ငန်း အတွက် အခွန်မက်လုံးပေးသည့်ပရိုဂရမ်ကို ၂၀၂၀ ခုနှစ်မေလ ၂၅ ရက်နေ့မှစ၍ အကောင်အထည် ဖော်ခဲ့ကြောင်း သိရပါသည်။ ထိုပရိုဂရမ်သည် ပြည်တွင်းစက်မှုလုပ်ငန်းဖွံ့ဖြိုးတိုးတက်မှု မြှင့်တင်ရာတွင် အရေးပါသောကဏ္ဍကပါဝင်ခဲ့ကြောင်း သိရပါသည်။ အထူးသဖြင့် မော်တော်ယာဉ် ထုတ်လုပ်တပ်ဆင်ရာတွင်အသုံးပြုမည့် ပြည်တွင်း၌ထုတ်လုပ်ခြင်းမဟုတ်သည့် ကုန်ကြမ်း ပစ္စည်းများနှင့် အစိတ်အပိုင်းများကို သွင်းကုန်အခွန်ကောက်ခံမှုမရှိကြောင်း သိရပါသည်။ စက်မှုနှင့် ကုန်သွယ်ရေးဝန်ကြီးဌာနသည်လည်း ၂၀၅၀ သို့ရှုမြင်မှုနှင့်အတူ ဗီယက်နမ်၏ ၂၀၃၀ တွင် မော်တော်ယာဉ်လုပ်ငန်းဖွံ့ဖြိုးတိုးတက်မှုမြှင့်တင်ရေးအတွက် မဟာဗျူဟာမူကြမ်းကို လူအများ မှတ်ချက်ပြုနိုင်ရန် အောက်တိုဘာလက ကြေညာခဲ့ကြောင်း သိရပါသည်။ ထိုဥပဒေမူကြမ်းသည် ပြည်တွင်း၌တပ်ဆင်သည့်ကားများက ပြည်တွင်းဝယ်လိုအား၏ ၇၈ ရာခိုင်နှုန်းဖြစ်စေရန် ရည်ရွယ်ချက်ဖြစ်ကြောင်း သိရပါသည်။ ဗီယက်နမ်မော်တော်ယာဉ်အစိတ်အပိုင်းထုတ်လုပ်သည့် လုပ်ငန်းသည်လည်း ပြည်တွင်းမော်တော်ယာဉ်ထုတ်လုပ်ရာတွင်လိုအပ်သည့် အစိတ်အပိုင်းနှင့် ပစ္စည်းအတွက် ဝယ်လိုအားတန်ဖိုးတွင် ၂၀၂၅ ခုနှစ်တွင် ၃၅ ရာခိုင်နှုန်းနှင့်၂၀၃၅ ခုနှစ်တွင် ၆၅ ရာခိုင်နှုန်းအခြေခံအားဖြင့် ပြည့်မီရမည်ဟုသိရပါသည်။

Vietnam Plus

DOCA(ရန်ကုန်)