ပြည်ပကုန်သွယ်မှုသတင်းများ

        အိန္ဒိယနှင့် မြန်မာတို့သည် ပြည်တွင်းသုံးငွေဖြစ်သော ရူပီးနှင့် ကျပ်တို့မှတစ်ဆင့် နှစ်နိုင်ငံကုန်သွယ်မှုမြှင့်တင်ရေးနည်းလမ်းများကို စက်တင်ဘာလ ၂၁ရက်နေ့တွင် လာအိုနိုင်ငံ ဗီယင်ကျန်းမြို့၌ ကျင်းပသော ၁၂ကြိမ်မြောက် အရှေ့တောင်အာရှထိပ်သီးစီးပွားရေးဝန်ကြီးများအစည်းအဝေးပြင်ပ၌ ကုန်သွယ်ရေးနှင့် စက်မှုဝန်ကြီး Piyush Goyal နှင့် မြန်မာရင်းနှီးမြှုပ်နှံမှုနှင့် နိုင်ငံခြားစီးပွားရေးဆက်ဆံရေးဝန်ကြီး ကန်ဇော်တို့တွေ့ဆုံစဉ် ယခုကဲ့သို့ ဆွေးနွေးခဲ့ကြောင်းသိရသည်။

         ပဲအမျိုးမျိုး၊ ဒီဇယ်၊ ဓာတ်ဆီ၊ လျှပ်စစ်ကား အစရှိသော နယ်ပယ်များမှ အလားအလာရှိသော ပူးပေါင်းဆောင်ရွက်မှုများကိုဆွေးနွေးခဲ့ပြီး ရူပီး-ကျပ် ငွေယန္တရားမှတစ်ဆင့် နှစ်နိုင်ငံအကြား ကုန်သွယ်မှုမြှင့်တင်ရေးနည်းလမ်းများကိုဆွေးနွေးခဲ့ကြောင်း Goyal က ဆိုရှယ်မီဒီယာပလက်ဖောင်း X တွင် ရေးသားခဲ့သည်။ အိန္ဒိယ-မြန်မာနှစ်နိုင်ငံကုန်သွယ်မှုသည် ၂၀၂၃-၂၀၂၄ ခုနှစ်အတွင်း ကန်ဒေါ်လာ ၁.၇၅ဘီလီယံရှိခဲ့သည်။ ထိုကဲ့သို့ ပြည်တွင်းသုံးငွေကြေးဖြင့် ရောင်းဝယ်ခြင်းသည် ငွေကြေးအား နှစ်ဆပြောင်းရန် လိုအပ်မှုကိုဖယ်ရှားခြင်းဖြင့် ကုန်ကျစရိတ်ကို လျှော့ချနိုင်မည်ဖြစ်သည်။ အိန္ဒိယ၏ မြန်မာနိုင်ငံသို့တင်ပို့မှုမှာ ယခင်နှစ်တွင် ကန်ဒေါ်လာ ၈၀၇သန်းမှ ၂၀၂၃-၂၀၂၄ တွင် ကန်ဒေါ်လာ ၆၇၀.၄သန်းသို့ကျဆင်းသွားခဲ့သည်။ သို့သော်လည်း သွင်းကုန်ပမာဏသည် ၂၀၂၂-၂၀၂၃ ဘဏ္ဍာနှစ်တွင် ကန်ဒေါ်လာ ၉၅၄.၇၄သန်းမှ ၂၀၂၃-၂၀၂၄ ဘဏ္ဍာနှစ်တွင် ၁.၀၇ဘီလီယံအထိတိုးမြင့်လာခဲ့သည်။ အိန္ဒိယနိုင်ငံသည် မြန်မာနိုင်ငံမှ ပဲစင်းငုံနှင့် ယူရဒ်ကဲ့သို့သော ပဲမျိုးစုံကို ပြည်တွင်းဝယ်လိုအားဖြည့်ဆည်းပေးရန် ဝယ်ယူတင်သွင်းလျက်ရှိသည်။

        ဧပြီလတွင် အိန္ဒိယအစိုးရက မြန်မာနိုင်ငံမှ ပဲမျိုးစုံတင်သွင်းသည့် ကုန်သည်များအတွက် ငွေပေးချေမှုယန္တရားအား ရိုးရှင်းလွယ်ကူစေရန် ဖြေလျှော့ပေးခဲ့သည်။ ပန်ဂျပ်အမျိုးသား ဘဏ်မှတစ်ဆင့် Special Rupee Vostro Account (SRVA) ကိုအသုံးပြုရန် ရူပီး/ ကျပ်ငွေ တိုက်ရိုက်ငွေပေးချေမှုစနစ်ကိုအသုံးပြုရန် တင်သွင်းသူများအား တောင်းဆိုထားကြောင်း စားသုံးသူရေးရာဝန်ကြီးဌာနမှ ထုတ်ပြန်ချက်တွင် ဖော်ပြထားသည်။ မြန်မာနိုင်ငံတော်ဗဟိုဘဏ်သည် SRVA လက်အောက်ရှိ ငွေပေးချေမှုလုပ်ငန်းစဉ်များအတွက် လမ်းညွှန်ချက်များကို ၂၀၂၄ခုနှစ်၊ ဇန်နဝါရီလ ၂၆ရက်နေ့တွင် ထုတ်ပြန်ခဲ့သည်။

Source : khmertimeskh

DOCA(ရန်ကုန်)

        တရုတ်ကွန်မြူနစ်ပါတီ (CPC) ဗဟိုကော်မတီ၏ အထွေထွေအတွင်းရေးမှူး Xi Jinping သည် သတ္တမအကြိမ်မြောက် တရုတ်တောင်သူလယ်သမားများ ရိတ်သိမ်းပွဲတော်နေ့မတိုင်မီ CPC ဗဟိုကော်မတီကိုယ်စားလယ်သမားများနှင့် ကျေးလက်ဒေသများတွင် စိုက်ပျိုးမွေးမြူရေးလုပ်ကိုင်နေသူများကို နှုတ်ခွန်းဆက်စကားပြောကြားခဲ့သည်။ တရုတ်နိုင်ငံ၏သမ္မတနှင့် ဗဟိုစစ်ကော်မရှင်ဥက္ကဋ္ဌလည်းဖြစ်သည့် XI က စိုက်ပျိုးရေးကဏ္ဍ၏ စီးပွားရေးအကျိုးအမြတ်များမြှင့်တင်ရန်၊ လယ်သမားများ၏ ဝင်ငွေတိုးလာစေရန်နှင့် လယ်သမားများအတွက် ထင်သာ မြင်သာသော အကျိုးကျေးဇူးများဆောင်ကြဉ်းပေးရန်လိုအပ်ကြောင်း အလေးပေးပြောကြားခဲ့သည်။ ယခုနှစ်တွင် သဘာဝဘေးအန္တရာယ်များနှင့် အခြားစိန်ခေါ်မှုများ၏ ဆိုးရွားသော အကျိုး သက်ရောက်မှုများရှိနေသော်လည်း တရုတ်နိုင်ငံသည် ၎င်း၏နွေစပါးအထွက်တိုးပြီး တစ်နှစ်ပတ်လုံး စပါးအထွက်တိုးရန်မျှော်လင့်ထားကြောင်း Xi က မှတ်ချက်ပြုခဲ့သည်။ တရုတ်နိုင်ငံအား ခေတ်မီတိုးတက်စေရေးအတွက် Xi သည် နိုင်ငံ၏စိုက်ပျိုးရေးအခြေခံအုတ်မြစ်ကို အဆက်မပြတ်ခိုင်မာစေရေးနှင့် ဘက်စုံကျေးလက်ပြန်လည်ရှင်သန်ရေးတို့ကိုမြှင့်တင်ရန် အရေးကြီးကြောင်း အလေးပေးပြောကြားခဲ့သည်။ ကျေးလက်ဒေသပြန်လည်ထူထောင်ရေးအစီအစဉ်ကို လက်တွေ့အဖြစ်ပြောင်းလဲရန် စိုက်ပျိုးရေးနှင့် ကျေးလက်ဒေသများခေတ်မီအောင် အုတ်မြစ်ချရန်နှင့် တရုတ်နိုင်ငံကို စိုက်ပျိုးရေးအင်အားကြီးနိုင်ငံအဖြစ်တည်ဆောက်ရာတွင် လယ်သမားများနှင့် အခြားကဏ္ဍများမှ ပြည်သူများကိုပါ ပါဝင်ဆောင်ရွက်ရန် ၎င်းက တောင်းဆိုခဲ့သည်။

Source : news.cgtn.com

DOCA(ရန်ကုန်)

      ထိုင်းနှင့်မလေးရှာမှ ဒူးရင်းသီး၊ ဖိလစ်ပိုင်နိုင်ငံမှ ငှက်ပျောသီးနှင့် ဗီယက်နမ်နိုင်ငံမှ ပင်မှည့်သီးတို့အား တရုတ်နိုင်ငံ၏  စားသုံးသူမျာက ကောင်းစွာလက်ခံထားကြပြီး ယခုအခါ တရုတ်နိုင်ငံမှ ကန္တရသစ်သီးအား အရှေ့တောင်အာရှနိုင်ငံများသို့ တင်ပို့ရောင်းချလျက်ရှိကြသည်။

      တရုတ်နိုင်ငံမြောက်ပိုင်းတွင် မွန်ဂိုလီးယားကိုယ်ပိုင်အုပ်ချုပ်ခွင့်ရဒေသရှိ သဲကန္တရနယ်မြေဖြစ်သည့် Horqin Sandy Land ဥယျာဉ်ခြံများမှ ခူးဆွတ်ထားသော လတ်ဆတ်သော ဂဏန်းပန်းသီးများအား အအေးခန်းကုန်တင်ကားများဖြင့်တင်ဆောင်ကာ ဆိပ်ကမ်းများမှတစ်ဆင့် အရှေ့တောင်အာရှနိုင်ငံများသို့တင်ပို့ရန် လုပ်ဆောင်လျက်ရှိကြောင်းသိရသည်။

       Teng Dayong သည် Inner Mongolia၊ Tonglia မြို့ရှိ Horqin Left Wing Middle Banner (ခရိုင်) မှ သစ်သီးတောင်သူတစ်ဦးဖြစ်ပြီး  ၎င်းဧရိယာတွင် ၁၉၀ mu (၁၂.၆၇ ဟတ်တာ) ခန့်ရှိသော ဂဏန်းပန်းသီးပန်းခြံကို စီမံခန့်ခွဲနေသူလည်းဖြစ်သည်။ ၎င်း၏ သီးစားပင်များသည် ယခုနှစ်တွင် ၁ mu လျှင် ဂဏန်းပန်းသီး ကီလိုဂရမ်၂,၀၀၀ထွက်ရှိမည်ဖြစ်ပြီး ဝင်ငွေ၁၀,၀၀၀ (အမေရိကန်ဒေါ်လာ၁,၄၁၈) ရရှိကြောင်းပြောကြားခဲ့သည်။ ၎င်း၏ အသီးတစ်ဝက်နီးပါးအား အရှေ့တောင်အာရှနိုင်ငံများမှ မှာယူထားကြောင်းသိရသည်။

         ၎င်းသီးနှံများအား ရေကြောင်းပို့ဆောင်ရန်အတွက် Dalian ကဲ့သို့သော တရုတ်ဆိပ်ကမ်းများသို့ ကုန်တင်ကားများဖြင့် ပို့ဆောင်လျက်ရှိပြီး ဆယ်ရက်အကြာတွင် မလေးရှား၊ ဖိလစ်ပိုင်နှင့် ထိုင်းနိုင်ငံတို့ရှိ စူပါမားကတ်များပေါ်သို့ ရောက်ရှိလာမည်ဟုခန့်မှန်းထားကြသည်။

        Horqin Sandy Land ၏ကုန်းတွင်းပိုင်၌ တည်ရှိသော Tonglia မြို့တွင် ဂဏန်းပန်းသီးပင် ၃၅၀,၀၀၀ mu ရှိပြီး နှစ်စဉ်အထွက်နှုန်း တန်ချိန်၁၀၀,၀၀၀ ကျော်ရှိပြီး တန်ဖိုးအားဖြင့် ယွမ် သန်း၅၀၀နီးပါးဖြစ်သည်။

        ယခုနှစ်တွင် သစ်သီးစိုက်ပျိုးသူ Teng သည် သစ်သီးထုတ်ပို့ခြင်းနှင့် တင်ပို့ရောင်းချသည် ကုမ္ပဏီတစ်ခုတည်းတည်ထောင်ရန် မလေးရှားနိုင်ငံမှ တရုတ်နိုင်ငံသားတစ်ဦးနှင့်ပူးပေါင်းခဲ့သည်။ ပါတနာ Zeng Yong သည်Teng ထံမှ ဂဏန်းပန်သီးများကို နှစ်အတော်တန်ကြားမှာယူခဲ့သည်။

          Tonglia ရှိ Kailu ခရိုင်သည် တစ်နှစ်လျှင် ဂဏန်းပန်းသီးတန်ချိန် ၁၀၀ ကျော်တင်ပို့မှု မှတ်တမ်းတင်ထားပြီး ထိုင်း၊ မလေးရှာနှင့် အာရပ်စော်ဘွားများပြည်ထောင်စုအပါအဝင် နိုင်ငံအနှံ့အပြားသို့တင်ပို့လျက်ရှိပြီး ဂဏန်းပန်းသီးတန်ချိန် ၁,၀၀၀ သိုလှောင်ထားနိုင်သော အအေးခန်းစက်ရုံအား ထိုခရိုင်တွင် တည်ဆောက်ပြီးနောက်နှစ် ဧပြီလနှင့် မေလအထိ လတ်လတ်ဆတ်ဆတ်တင်ပို့နိုင်မည်ဖြစ်ကြောင်းသိရှိရပါသည်။

Source: news.cgtn.com

DOCA(ရန်ကုန်)        

     ဗီယက်နမ်နှင့် ကနေဒါ နှစ်နိုင်ငံမှ လုပ်ငန်းရှင်နှစ်ဦးတို့ ဖက်စပ်လုပ်ကိုင်သည့် KD Trading ထောက်ပံ့ပို့ဆောင်ရေးကုမ္ပဏီသည် စျေးကွက်သုတေသနများကို စေ့စပ်သေချာစွာ လုပ်ဆောင်ခဲ့ ပြီးနောက် ကနေဒါနိုင်ငံသို့ တင်သွင်းရန် ST25 အမျိုးအစား ဆန်ထုတ်လုပ်သူများနှင့် ပူးပေါင်း ဆောင်ရွက်ခဲ့ရာ ယခုအခါ အဆိုပါ ST25 ဗီယက်နမ်ဆန်ကို တစ်ဦးတည်း ဖြန့်ဖြူးသူအဖြစ် ကနေဒါဈေးကွက်သို့ ဝင်ရောက်ခဲ့ကြောင်း Vietnam News သတင်းဌာနက ဖော်ပြပါသည်။

    ကုမ္ပဏီအနေဖြင့် ST25 ဆန်အား စျေးကွက်အသစ်တွင် လက်ခံလာစေရန် တိကျသေချာ သော ကာလရှည် မဟာဗျူဟာများကို ချမှတ်ခဲ့ကြောင်း အဆိုပါကုမ္ပဏီမှ အမှုဆောင်အရာရှိချုပ် Kevin Le က ပြောကြားခဲ့သည်။

     ဗီယက်နမ် စိုက်ပျိုးရေးအင်ဂျင်နီယာ Hồ Quang Cua နှင့်အဖွဲ့မှ သုတေသနပြုထုတ်လုပ် ခဲ့ပြီး Mr Cua's rice အမည်ဖြင့် လူသိများသော အဆိုပါ ST25 ဆန်အမျိုးအစားသည် ၂၀၁၉ နှင့် ၂၀၂၃ ခုနှစ်များတွင် ကမ္ဘာ့အကောင်းဆုံးဆန် အဖြစ် ဆုရရှိခဲ့သည်။

   ကနေဒါနိုင်ငံရှိ ဗီယက်နမ်ကုန်သွယ်ရေးသံမှူး Trần Thu Quỳnh က ပြည်ပရှိ ဗီယက်နမ် လုပ်ငန်းရှင်များအနေဖြင့် ဗီယက်နမ်နိုင်ငံ၏ ဆန်ထွက်ကုန်များကို ကနေဒါဈေးကွက်သို့ ဝင်ရောက်အောင် စွမ်းဆောင်နိုင်ခဲ့မှုအပေါ် များစွာကျေးဇူးတင်ဝမ်းမြောက်ကြောင်း၊ ယခင်က ဗီယက်နမ် လုပ်ငန်းရှင်များသည် ကနေဒါသို့ ဆန်တင်ပို့ရန် ကြိုးစားခဲ့သော်လည်း အရည်အသွေး နိမ့်သော ဆန်များကိုသာ တင်ပို့နိုင်ခဲ့ကြောင်း၊ ကနေဒါရှိ ဗီယက်နမ် စီးပွားရေးလုပ်ငန်းများသည် ST25 ကဲ့သို့သော အရည်အသွေးမြင့် အမှတ်တံဆိပ်ပါ ဆန်ထုတ်ကုန်များကို ကနေဒါဈေးကွက်သို့ တိုးမြှင့်ပို့ဆောင်နိုင်ရေး ကြိုးပမ်းလျက်ရှိကြောင်း ပြောကြားခဲ့သည်။

    ကနေဒါနိုင်ငံသည် ၁ နှစ်လျှင် ဆန်တန်ချိန် ၅၀၀၀၀၀ ခန့် တင်သွင်းမှုရှိပြီး ဆန်စားသုံးမှု အသင့်အတင့် ကြီးမားသော ဈေးကွက်ဖြစ်သည်။ သို့သော် ဆန်အရည်အသွေးနှင့် ပတ်သက်၍ တင်းကျပ်သော သတ်မှတ်ချက်များ ချမှတ်ထားသည်။

    သွင်းကုန်ဆန်များ၏ အရည်အသွေး ကောင်းမွန်စေရန်အတွက် ဗီယက်နမ်ကုန်သွယ်ရေးရုံး၊ ပို့ကုန်လုပ်ငန်းရှင်များ၊ တင်သွင်းသူများနှင့် ဖြန့်ဖြူးသူများ အပါအဝင် ကဏ္ဍပေါင်းစုံမှ ညှိနှိုင်းဆောင်ရွက်ရန် လိုအပ်ကြောင်း Ms. Quỳnh က ပြောကြားခဲ့သည်။

    ယခုနှစ် ပထမနှစ်ဝက်တွင် ကနေဒါသည် ဆန်တင်သွင်းမှုတွင် အမေရိကန်ဒေါ်လာ ၂၀၇ သန်း  သုံးစွဲခဲ့ပြီး ၂၀၂၃ ခုနှစ် အလားတူကာလထက် ၅ ရာခိုင်နှုန်း တိုးလာခဲ့ကြောင်း၊ ဗီယက်နမ်သည် လက်ရှိတွင် ပို့ကုန်တန်ဖိုး အမေရိကန်ဒေါ်လာ ၆.၅ သန်းခန့်ဖြင့် ကနေဒါသို့ ဆန် တင်ပို့သည့် ထိပ်တန်းငါးနိုင်ငံစာရင်းတွင် ပါဝင်နေကြောင်း သိရပါသည်။

Source: Vietnam News, 19 Sept 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ကမ္ဘာ့ဈေးကွက်အခြေအနေများနှင့် ထိုင်းဘတ်ငွေတန်ဖိုးခိုင်မာမှုတို့ကြောင့် ထိုင်းနိုင်ငံတွင် ဆန်နှင့် စပါးဈေးနှုန်းများသည် မကြာသေးမီလများအတွင်း သိသိသာသာ ကျဆင်းလာခဲ့သည်။ သြဂုတ်လနှင့် စက်တင်ဘာလတို့တွင် ဖြစ်ပေါ်သော ဈေးနှုန်းများအား နှိုင်းယှဉ်ပါက စပါး ၁ တန် လျှင် ပျမ်းမျှဈေးနှုန်းအားဖြင့် ဘတ် ၁၀၀၀ ကျဆင်းခဲ့ပြီး ဆန်ဈေးနှုန်းမှာ ၁ တန်လျှင် ဘတ် ၂၀၀၀ ကျဆင်းလာခဲ့ကြောင်း ထိုင်းဆန်စက်လုပ်ငန်းများအသင်းက သတင်းထုတ်ပြန်ခဲ့သည်။

      အဆိုပါအသင်း၏ ဥက္ကဋ္ဌ Rangsan Sabaimuang က ကမ္ဘာ့ဈေးကွက်တွင် ဆန်ဝယ်ယူမှု လျော့ကျသွားကြောင်း၊ ယခုကဲ့သို့ ထိုင်းဆန်စပါးဈေးနှုန်းများ ကျဆင်းရသည့် အဓိက အကြောင်း အရင်းမှာ ဈေးနှုန်းများယှဉ်ပြိုင်ရမှု အပါအဝင် ပြည်ပနိုင်ငံများမှ ဆန်ဝယ်လိုအား လျော့ကျခဲ့ခြင်း ကြောင့် ဖြစ်ကြောင်း၊ ထိုင်းဆန်များ၏ ဈေးနှုန်းများသည် အခြားနိုင်ငံများထက် မြင့်မားနေသဖြင့်  ဘတ်ငွေတန်ဖိုး ခိုင်မာမှုမှ သက်ရောက်မှုရှိကြောင်း ‌ပြောကြားခဲ့သည်။

      အဆိုပါအခြေအနေသည် အထူးသဖြင့် ဗီယက်နမ်နိုင်ငံအပါအဝင် အခြားဆန်တင်ပို့သည့် နိုင်ငံများနှင့် ဈေးနှုန်းပြိုင်ဆိုင်မှု မြင့်တက်စေခဲ့ကြောင်း၊ နိုင်ငံအသီးသီးမှ ဆန်အရည်အသွေး တူညီသောကြောင့် ဝယ်လက်များအနေဖြင့် ဈေးနှုန်းအပေါ် အဓိကထား၍ ဝယ်ယူကြောင်း ၎င်းက မှတ်ချက်ပြုခဲ့သည်။

    ထိုင်းဆန်တင်ပို့သူများ ရင်ဆိုင်နေရသည့် စိန်ခေါ်မှုများနှင့် စပ်လျဉ်း၍ Mr. Rangsan က အလေးပေး ပြောဆိုရာတွင် ပထမအချက်မှာ ဆန်စက်လုပ်ငန်းရှင်များအနေဖြင့် လယ်သမားများ ထံမှ စပါးများဝယ်ယူနိုင်ရေးအတွက် ငွေဖြစ်လွယ်မှု ပြဿနာနှင့် ရင်ဆိုင်နေရကြောင်း၊ ဒုတိယအချက်မှာ ဆန်စက်အသင်းအဖွဲ့များအတွက် တင်းကျပ်သော ချေးငွေဆိုင်ရာ စံနှုန်းများနှင့် မူဝါဒ များကို ငွေကြေးအဖွဲ့အစည်းများက ချမှတ်ဆောင်ရွက်လျက်ရှိခြင်း ဖြစ်ကြောင်း၊ တတိယအချက်မှာ ထုတ်လုပ်မှုကုန်ကျစရိတ် မြင့်မားခြင်းဖြစ်ပြီး ယခုနှစ်တွင် သီးနှံဈေးကောင်းနေသော်လည်း ထုတ်လုပ်မှုနှင့် ထိန်းသိမ်းမှု စရိတ်များ ကြီးမြင့်ခြင်းကြောင့် လယ်သမားများ၏ အကျိုးအမြတ် ရရှိမှုမှာ အခက်အခဲများနှင့် ကြုံတွေ့နေရကြောင်း သိရှိရသည်။

    ချေးငွေကန့်သတ်ချက်များ ဖြေလျှော့ပေးရန် ဘဏ်များသို့ တွန်းအားပေးခြင်းဖြင့် ဆန်စက် လုပ်ငန်းရှင်များအား အကူအညီပေးရန် Mr. Rangsan က အစိုးရထံ တောင်းဆိုထားသည်။ စပါး များကို အရန်ဝယ်ယူထားရှိနိုင်စေရန် လုပ်ငန်းရှင်များသို့ ဘဏ်များမှ ချေးငွေထုတ်ပေးခြင်း၊ စည်းကမ်းသတ်မှတ်ချက် အမျိုးမျိုးကို လျှော့ချခြင်းနှင့် ချေးငွေပမာဏ ကန့်သတ်ချက်ကို တိုးမြှင့်ပေးခြင်းတို့ဖြင့် ဆန်စက်လုပ်ငန်းရှင်များအတွက် ငွေဖြစ်လွယ်မှုကောင်းမွန်အောင် အစိုးရဘက်မှ ကူညီပေးစေလိုကြောင်း ၎င်းက ပြောကြားခဲ့သည်။

    ကမ္ဘာ့ဝယ်လိုအား အခြေအနေ၊ အခြားနိုင်ငံများမှ ယှဉ်ပြိုင်မှုနှင့် ပြည်တွင်းဈေးကွက် အခြေအနေများအပါအဝင် အကြောင်းအချက်အမျိုးမျိုးတို့အပေါ်တွင် မူတည်နေသောကြောင့် ဆန်ဈေးနှုန်းများ၏ အနာဂတ် အလားအလာမှာ မရေရာသေးကြောင်း သိရှိရသည်။

    ဆန်စပါးလုပ်ငန်းနယ်ပယ်မှ ကျွမ်းကျင်သူများအနေဖြင့် နောင်တွင်ဖြစ်ပေါ်လာနိုင်သည့် အခြေအနေများကိုအကဲဖြတ်ရန် စောင့်ဆိုင်းနေသည့်အတွက် လာမည့်နှစ်၌ ထိုင်းနိုင်ငံ၏ ဆန် ထုတ်လုပ်မှုပမာဏ မည်မျှတိုးလာမည်ကို လက်ရှိတွင် ခန့်မှန်း၍ မရသေးကြောင်း၊  ထိုင်းဆန်စက်လုပ်ငန်းရှင်များအသင်းသည် အဆိုပါ ဖြစ်ပေါ်တိုးတက်မှုများကို အနီးကပ် စောင့်ကြည့်လျက်ရှိပြီး ဆန်စက်လုပ်ငန်းရှင်များနှင့် လယ်သမားများ ရင်ဆိုင်နေရသည့် စိန်ခေါ်မှုများကို လျော့ပါးစေရေး အစိုးရမှ ပံ့ပိုးကူညီမှုများ ပြုလုပ်နိုင်ရန် အကြံပြုခြင်းကို လုပ်ဆောင်လျက်ရှိကြောင်း Mr. Rangsan ပြောကြားခဲ့သည်။

Source: The Nation Thailand, 21 September, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)