ဆိပ်ဖြူကြက်သွန်နီ ဆောင်းစိုက်(ပင်စိုက်) စိုက်ပျိုးထုတ်လုပ်မှုအခြေအနေ
စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်စားသုံးသူရေးရာဦးစီးဌာနမှ ဒု-ဦးစီးမှူး ဒေါ်မြင့်မြင့်သန်းသည် (၁၂.၁၂.၂၀၂၁) ရက်နေ့၊ နံနက်(၁၀:၀၀) အချိန်တွင် ပြည်တွင်း စိုက်ပျိုးထုတ်လုပ်မှုနှင့် ကုန်သွယ်မှုကဏ္ဍမြှင့်တင်နိုင်ရေးအတွက် ဆိပ်ဖြူမြို့နယ်၊ ကူရှည်အုပ်စု ရွာမ နှင့်အလယ်စုကျေးရွာရှိ ကြက်သွန်နီစိုက်တောင်သူနှင့်တွေ့ဆုံပြီး ကြက်သွန်နီဆောင်းစိုက် (ပင်စိုက်) စိုက်ပျိုးနိုင်မည့်အခြေအနေ တစ်ဧကကုန်ကျစရိတ်နှင့် ဝင်ငွေအကျိုးအမြတ်ရရှိနိုင်မည့် အခြေအနေ ကိုမေးမြန်းဆွေးနွေးခဲ့ပါသည်။
ကြက်သွန်နီစိုက်တောင်သူနှင့် မေးမြန်းဆွေးနွေးရာတွင် ယခုနှစ် ကူရှည်အုပ်စု အလယ်စု ကျေးရွာနှင့် နီးစပ်ရာကျေးရွာများတွင် ကြက်သွန်နီမိုးစိုက်(ဥစိုက်)ကို လုံးဝစိုက်ပျိုးခြင်း မရှိကြောင်း၊ ယခုအချိန်တွင် ဆောင်းစိုက် (ပင်စိုက်)များကိုသာ စိုက်ပျိုးကြကြောင်း၊ စိုက်ပျိုးရန်အတွက် နိုဝင်ဘာလ (၁၅)ရက်နေ့မှစတင်ပြီး ကြက်သွန်နီမျိုးစေ့များကို ပျိုးခုံလုပ်၍ တစ်ဧကစိုက်ပျိုးရန်အတွက် (၂)ပြည်၊ (၄)ဗူး ပျိုးရပြီး မျိုးအနေဖြင့် (၁)ပြည်၊ (၁၀၀၀၀)ကျပ်ခန့်ဝယ်ရကြောင်း၊ ကြက်သွန်နီဈေးကျ၍ မျိုးစေ့ဈေးလည်းကျပါကြောင်း၊ ပျိုးပင်သက်တမ်း(၁)လခန့်ကြာမှ စိုက်ပျိုးရန်နှုတ်ယူရကြောင်း၊ ယခုဒီဇင်ဘာလလယ်လောက်တွင်စတင်၍ ကြက်သွန်နီဆောင်းစိုက်(ပင်စိုက်)များ စိုက်ပျိုးကြမည် ဖြစ်ကြောင်း၊ တစ်ဧကစိုက်ပျိုးရန်အတွက် ကြက်သွန်နီပျိုးပင်ရရှိရန် ကုန်ကျစရိတ်မှာ ပျိုးခုံပြုလုပ်ခ၊ ကြက်သွန်နီမျိုးစေ့ဝယ်ယူခ၊ ရေသွင်းဖျန်းခ၊ စက်ဆီဝယ်ယူခ၊ ပျိုးပင်နှုတ်ခ၊ သယ်ယူခစရိတ် စသည့် ကုန်ကျစရိတ် စုစုပေါင်းမှာ ငွေကျပ် (၅၀၀၀၀)မှ(၈၀၀၀၀) ဝန်းကျင်ခန့်ရှိကြောင်း သိရှိရပါသည်။
ကြက်သွန်နီတစ်ဧကစိုက်လျှင် (၁၀)တောင်ပတ်လည်၊ ဝါးကွက်(၁၄၀)ရှိကြောင်း၊ စိုက်ပျိုး သက်တမ်းမှာ (၃) လခွဲအထိကြာမြင့်ကြောင်း၊ ဧပြီလမှစ၍ ကြက်သွန်နီဥ တူးဖော်ရကြောင်း၊ စိုက်ခင်းအတွင်း အပင်စိုက်သည်မှစပြီး ကြက်သွန်နီ(ဥ)တူးဖော်ပြီးသည်အထိ ကုန်ကျစရိတ်စုစု ပေါင်းမှာ ယခင်နှစ်တွင် ငွေကျပ်(၈)သိန်းကုန်ကျပြီး ယခုနှစ်တွင် လုပ်အားခဈေးနှုန်းများကြီးမြင့် နေခြင်း၊ နွားရှဉ်းခ၊ ထွန်စက်ခ၊ စက်သုံးဆီများ ဈေးနှုန်းမြင့်တက်နေပြီး ထုတ်လုပ်မှုကုန်ကျစရိတ် များ ယခင်နှစ်ထက်ပိုမိုကြီးမြင့်နေခြင်းကြောင့် ယခုနှစ် မိမိကိုယ်ပိုင်မြေတွင် တစ်ဧကစိုက်ပျိုးပါက ကုန်ကျစရိတ်မှာ ငွေကျပ်(၁၂)သိန်းခန့်ကုန်ကျမည်ဖြစ် ကြောင်းသိရှိရပါသည်။ စိုက်ပျိုးတောင်သူ၏ ကိုယ်ပိုင်မြေတွင် စိုက်ပျိုးခြင်းဖြစ်ပြီး ယောချောင်းတွင် စိုက်ပါက မြေငှားခတစ်ဧကလျှင် (၂/၃)သိန်း ခန့်ပေးရပါသည်။ မြေငှားခပေး၍ စိုက်ပျိုးပါက တစ်ဧကကုန်ကျစရိတ်မှာ (၁၄/၁၅)သိန်းခန့်ကုန် ကျပြီး တစ်ဧကအထွက်မှာလည်း ပိဿာ (၅၀၀၀)ခန့်ထွက်ရှိကြောင်း သိရှိရပါသည်။
ကြက်သွန်နီဆောင်းစိုက်(ပင်စိုက်)တစ်ဧကစိုက်လျှင် အထွက်နှုန်းမှာ ပျိုးပင်အနေအထား ကွာခြားခြင်း၊ သွင်းအားစုအမျိုးမျိုးသုံးစွဲပုံကွဲပြားခြင်း၊ မှိုဆေး၊ ပိုးသတ်ဆေး၊ အားဆေးသုံးစွဲပုံ ကွဲပြားခြင်းတို့ကြောင့် ကြက်သွန်နီအထွက်နှုန်းမှာမတူညီကွဲပြားကြောင်း၊ ဒီဇင်ဘာလတွင် တစ်ဧက စိုက်လျှင် ကြက်သွန်နီအထွက်နှုန်း ပိဿာ(၅၀၀၀/၄၀၀၀/၃၅၀၀/ ၃၀၀၀)အထိ ထွက်ရှိကြောင်း၊ တစ်ဧကမှာ (၁၀)တောင်ပတ်လည် ဝါးကွက်(၁၄၀)ရှိ၍ (၁)ကွက်လျှင် အထွက်နှုန်းနှင့် ပိဿာ (၃၅/၃၀/၂၅/၂၂) ထွက်ရှိပြီး စိုက်တောင်သူအများစုမှာ တစ်ဧကလျှင် ကြက်သွန်နီပိဿာ(၄၀၀၀)
ဝန်းကျင်ခန့်သာထွက်ရှိကြောင်း၊ အထွက်နှုန်းကောင်းသော်လည်း (၂)နှစ်ဆက်တိုက် ကြက်သွန်နီ ဈေးကွက်မရှိ၍ အရှုံးပေါ်နေကြောင်း၊ ယခုနှစ်ကြက်သွန်နီဈေးနှုန်းဈေးကွက်မှာ ၁ပိဿာ လျှင် ငွေကျပ်(၅၀၀) အထက်ဝန်းကျင်ရှိမှသာလျှင် အကျိုးအမြတ်ရရှိမည်ဖြစ်ကြောင်း သိရှိရပါသည်။ စိုက်ပျိုးတောင် သူများသည် အရှုံးပေါ်မှုများလာသောကြောင့် ယခင်နှစ်ထက် စိုက်ပျိုးသူတောင်သူဦးရေနှင့် စိုက်ဧက ရာခိုင်နှုန်းမှာ လေးပုံတစ်ပုံအထိ လျော့နည်းသွားနိုင်ကြောင်း ကြက်သွန်နီအစား ကုလားပဲ၊ စပါးနှင့် ပဲစဉ်းငုံသီးနှံများကို အစားထိုး၍ စိုက်ပျိုးနေကြကြောင်း သိရှိရပါသည်။
ကြက်သွန်နီစိုက်တောင်သူများအနေဖြင့် ယခုနှစ်တွင် စိုက်ဧက၊ စိုက်တောင်သူ လျော့နည်း သွားသော်လည်း ယခုလာမည့် ကြက်သွန်နီဈေးကွက် ကောင်းမွန်လာပါက ကြက်သွန်နီစိုက်ဧက ရာခိုင်နှုန်း ပြန်လည်များလာနိုင်ပြီး စိုက်ပျိုးတောင်သူများအနေဖြင့် အကျိုးအမြတ်များစွာရရှိလာနိုင်သည်ဟု မျှော်လင့်ပါကြောင်း ကြက်သွန်နီစိုက်တောင်သူများမှတစ်ဆင့် သိရှိရပါသည်။
စားသုံးသူရေးရာဦးစီးဌာန(မကွေးတိုင်းဒေသကြီး)
