HighLight News

             စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေပါ ပြဌာန်းချက်များအား  လိုက်နာဆောင်ရွက်ခြင်းဖြင့် စားသုံးသူများ ဘေးအန္တရာယ်ကင်းရှင်း၍ မိမိတို့လုပ်ငန်းများ ထုတ်ကုန်လုံခြုံစိတ်ချရမှုရှိပြီး အကျိုးစီးပွားအောင်မြင်ဖြစ်ထွန်းစေရန် ရည်ရွယ်၍ ၂၀၂၂ ခုနှစ်၊ မေလ(၂၅) ရက်နေ့၊ နံနက်(၁၀:၀၀)အချိန်တွင် ခရိုင်ဦးစီးမှူး ဦးဝေဠုအောင်၊ ဒု-ခရိုင်ဦးစီးမှူးနှင့် ဝန်ထမ်းများသည် ခရိုင်ဦးစီးမှူးရုံး အစည်းအဝေးခန်းမတွင် ဒေသတွင်းစားသောက်ကုန် ထုတ်လုပ်ဖြန့်ဖြူး ရောင်းချလျက်ရှိသော လုပ်ငန်းရှင်များအား အသိပညာပေးဆွေးနွေးခဲ့ပါသည်။

          ခရိုင်ဦးစီးမှူးမှ လုပ်ငန်းရှင်များနှင့် တွေ့ဆုံဆွေးနွေးရာတွင် မိမိတို့ဌာန၏ လုပ်ငန်းဆောင်ရွက်ချက်များ ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ စီမံခန့်ခွဲရေးနည်း ဥပဒေအရ အရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်း၊ မြန်မာနိုင်ငံစားသုံးသူကာကွယ်ရေး ကော်မရှင်မှ ထုတ်ပြန်ထားသော ညွှန်ကြားချက်ပါ ကုန်စည် အုပ်စုအလိုက် မြန်မာဘာသာဖြင့် ထည့်သွင်းဖော်ပြရမည့်အချက်အလက်များ၊ လုပ်ငန်းရှင်များမှလည်း မိမိတို့ ထုတ်လုပ်သောကုန်စည် အမျိုးအစားအလိုက် စားသုံးသူ ကာကွယ်ရေးဥပဒေ (၂၀၁၉)အခန်း (၁၈)ပါ ကုန်အညွှန်းအမှတ်အသားဖော်ပြချက်များနှင့် ကိုက်ညီသည့် ကုန်စည်များကို စားသုံးသူရေးရာဦးစီးဌာန၏ စိစစ်ခွင့်ပြုချက်ရရှိရန် လျှောက်ထားနိုင်ကြောင်း Power Point ဖြင့် ဆွေးနွေးပါသည်။

          ဆက်လက်၍ စားသုံးသူများတွင် အခွင့်အရေးနှင့်တာဝန်များလည်းရှိကြောင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့် အခွင့်အရေးများလည်းရှိ၍ ရိုးရှင်းမှန်ကန်စွာ သတင်းအချက်အလက်ပေးစေလိုကြောင်း၊ စီးပွားရေး ကျင့်ဝတ်နှင့်အညီ လုပ်ကိုင်ဆောင်ရွက်ခြင်းဖြင့် ဈေးကွက်များ ပိုမိုရရှိလာနိုင်ပြီး စားသုံးသူများမှလည်း လုံခြုံစိတ်ချရသော ကုန်စည်များအား ရွေးချယ်ဝယ်ယူသုံးစွဲလာနိုင်၍ နှစ်ဦးနှစ်ဖက် အကျိုးကျေးဇူးများရရှိစေလိုကြောင်း၊ သိရှိလိုသည်များ၊ အခက်အခဲများကိုလည်း ရင်းနှီးပွင့်လင်းစွာ တင်ပြ ပြောစေလိုကြောင်း ဆွေးနွေးခဲ့ပြီး စားသုံးသူအသိပညာပေး လက်ကမ်းစာစောင်များ ဖြန့်ဝေခဲ့ပါသည်။

DOCA(မကွေး)

           စားသုံးသူရေးရာဦးစီးဌာန၊ ပြည်နယ်စားသုံးသူရေးရာကော်မတီ (၁/၂၀၂၂) လုပ်ငန်းညှိနှိုင်း အစည်းအဝေးအား ၂၀၂၂ ခုနှစ်၊ မေလ (၂၇)ရက်နေ့၊ နံနက် (၀၉:၃၀) နာရီအချိန်တွင် ပြည်နယ် အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ ကျင်းပပြုလုပ်ခဲ့ရာ ပြည်နယ်စားသုံးသူ ရေးရာကော်မတီ ဥက္ကဌ၊ အတွင်းရေးမှူး၊ အဖွဲ့ဝင်များနှင့်  စားသုံးသူရေးရာဦးစီးဌာနမှ ဝန်ထမ်း(၆)ဦး၊ စုစုပေါင်း(၂၀)ဦး တက်ရောက်ခဲ့ကြပါသည်။

          အဆိုပါ အစည်းအဝေးတွင် ပြည်နယ်စားသုံးသူရေးရာကော်မတီဥက္ကဌ၊ စီးပွားရေးရာဝန်ကြီး ဌာန၊ ဝန်ကြီး ဦးစိန်ဦးက စားသုံးသူရေးရာကော်မတီအစည်းအဝေးကို တစ်လ(၁)ကြိမ် ကျင်းပ ပြုလုပ်သွားမည်ဖြစ်သည့်အတွက် အဖွဲ့ဝင်များအနေဖြင့် ပူးပေါင်းဆောင်ရွက်စေလိုကြောင်း၊ စားသုံးသူ ကာကွယ်ရေးဆိုင်ရာ လုပ်ငန်းများ ဆောင်ရွက်ရာတွင် ကြုံတွေ့ရသည့် အခက်အခဲ၊ စိန်ခေါ်မှု၊ အားသာချက်၊ အားနည်းချက်ပေါ်မူတည်ပြီး ဆက်လက်ပူးပေါင်း၍ အကြံပြုဆွေးနွေးရန် မှာကြားခဲ့ ပါသည်။

          ဆက်လက်၍ ကယားပြည်နယ် စားသုံးသူရေးရာကော်မတီ အတွင်းရေးမှူးက ၂၀၂၂ ခုနှစ်၊ မေ လအတွင်း စားသုံးသူစွမ်းဆောင်နိုင်မှု အညွှန်းကိန်းစစ်တမ်းအား မြေပြင်(၁၀)ဦးနှင့် Online (၁၀)ဦး စုစုပေါင်း(၂၀)ဦး စစ်တမ်းကောက်ယူပြီး ဖြစ်ကြောင်း၊ ဟင်းသီးဟင်းရွက်ဆီနှင့် ပတ်သတ်၍ ညွှန်ကြားချက် ထုတ်ပြန်ထားပြီးဖြစ်ရာ အဆိုပါအမိန့်နှင့် ပတ်သတ်ပြီး စားသုံးသူလုပ်ငန်းရှင်များ အား အသိပညာပေးခြင်းများ ဆောင်ရွက်လျက်ရှိကြောင်း၊ Online ပေါ်တွင် ရောင်းချလျက်ရှိသော ရသေ့ဆေး(ခေါ်)ထိုင်းဗိန်းတောဆေး အကိုက်အခဲပျောက်ဆေးအား ထိုင်းနိုင်ငံ FDA က ဘေးအန္တရာယ် ရှိဆေးအဖြစ် ညွှန်ကြားချက် ထုတ်ပြန်ထားကြောင်း၊ ဈေးကွက်အတွင်းရောင်းချနေသော Paris ဆပ်ပြာခဲများတွင် ကုန်အညွှန်းအမှတ်အသားပါ အလေးချိန်ဖော်ပြချက်နှင့် အမှန်တကယ်ပါဝင်သော အလေးချိန်ကိုက်ညီမှုရှိ/မရှိ စစ်ဆေးသွားရန်လိုအပ်ကြောင်း၊ တင်သွင်းထုတ်လုပ်သည့် ကုမ္ပဏီနှင့် Import Registration No. (IR) များ ဖော်ပြထားခြင်းမရှိဘဲ၊ ဈေးကွက်အတွင်း ရောင်းချလျက်ရှိသော Bella Plus Plaster များ ရောင်းချနေခြင်းကြောင့် တရားဝင်အခွန်အခများ ပေးသွင်း၍ တင်သွင်းရောင်းချနေသော လုပ်ငန်းရှင်များအနေဖြင့် အကျိုးစီးပွားများ ထိခိုက်နစ်နာရကြောင်း၊ စားအုန်းဆီများ ဖြန့်ဖြူးသယ်ဆောင်ရာတွင် လိုက်နာရမည့် လုပ်ငန်းစဉ်အား ၂၀၂၂ ခုနှစ်၊ မေလ (၁)ရက်နေ့မှစပြီး လိုက်နာဆောင်ရွက်ရမည် ဖြစ်ကြောင်းနှင့် လက်ရှိဆောင်ရွက်နေသော အသိပညာပေးလုပ်ငန်းများ၊ ဈေးကွက်စောင့်ကြည့် စစ်ဆေးခြင်းလုပ်ငန်းများနှင့် ပတ်သတ်ပြီး အမှာစာများအား ရှင်းလင်းတင်ပြ၍ တက်ရောက်လာသော ကော်မတီအဖွဲ့ဝင်များက အသီးသီးအကြံပြုဆွေးနွေးခဲ့ကြပြီး ၎င်းအစည်းအဝေးမှ အမှာစာ(၇)စောင်အား အတည်ပြု ဆုံးဖြတ် ချက်ချမှတ်ခဲ့ပြီးနောက် အစည်းအဝေးကို  (၁၁:၀၀)နာရီအချိန်တွင် ရုပ်သိမ်းခဲ့ကြောင်း သတင်းရရှိ ပါသည်။

DOCA(ကယား)

၁။           စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ အောက်ဖော်ပြပါ ဧရာဝတီတိုင်းဒေသကြီးမှ သိုလှောင်ရုံ(၆)လုံး၊ ပဲခူးတိုင်းဒေသကြီးမှ သိုလှောင်ရုံ (၃)လုံးနှင့် မန္တလေးတိုင်းဒေသကြီးမှ သိုလှောင်ရုံ(၁)လုံး  စုစုပေါင်း သိုလှောင်ရုံ(၁၀)လုံးတို့အား အိတ်ဖွင့် တင်ဒါစနစ်ဖြင့် (မြေမပါ) ထုခွဲရောင်းချမည် ဖြစ်ပါသည်-

Lot(1)         (က) ဧရာဝတီတိုင်းဒေသကြီး၊ အင်္ဂပူမြို့နယ်၊ မဲဇလီကုန်းရှိ မြဲ-၁၊ ၂၊ ၇ သိုလှောင်ရုံ(၃)လုံး

Lot(2)         ( ခ )   ဧရာဝတီတိုင်းဒေသကြီး၊ အင်္ဂပူမြို့နယ်၊ ထူးကြီးရှိ မြဲ-၅ သိုလှောင်ရုံ(၁)လုံး

Lot(3)         ( ဂ )  ဧရာဝတီတိုင်းဒေသကြီး၊ ဟင်္သာတမြို့နယ်၊ နတ်မော်ရှိ ပတ်ကား-၉၊ ၁၀ သိုလှောင်ရုံ (၂)လုံး

Lot(4)         (ဃ)  ပဲခူးတိုင်းဒေသကြီး၊ ပဲခူးမြို့၊ မြို့သစ်(က)ရပ်ကွက်ရှိ သိုရုံ(၂/၁)၊ သိုရုံ(၂/၂) သိုလှောင်ရုံ (၂)လုံး

Lot(5)         ( င )   ပဲခူးတိုင်းဒေသကြီး၊ ပေါင်းတည်မြို့နယ်ရှိ သိုရုံ - ၁၅ သိုလှောင်ရုံ(၁)လုံး

Lot(6)         ( စ )  မန္တလေးတိုင်းဒေသကြီး၊ ပျော်ဘွယ်မြို့နယ်၊ ရွှေပြည်ရန်နိုင်ရပ်ကွက်ရှိ မြဲ-၅ သိုလှောင်ရုံ (၁)လုံး

၂။            တင်ဒါပုံစံရောင်းချမည့်ရက်              -   ( ၃၁.၅.၂၀၂၂)နေ့မှ (၁၃.၆.၂၀၂၂)နေ့ထိ

၃။           တင်ဒါပိတ်မည့် ရက်/ အချိန်             -   (၁၃.၆.၂၀၂၂)ရက် ညနေ (၄)နာရီ

၄။           တင်ဒါယှဉ်ပြိုင်ရမည့် ရက်/အချိန်      -   (၁၆.၆.၂၀၂၂)ရက် မွန်းလွှဲ (၁)နာရီ

၅။           တင်ဒါတင်သွင်းရမည့် နေရာ            -   စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ ရုံးအမှတ်(၃)၊ နေပြည်တော်

၆။           စာရင်းပေးသွင်းရမည့် နေရာ            -   ရုံးအမှတ်(၅၂)၊ နေပြည်တော်

၇။           တင်ဒါစည်းကမ်းချက်များ                -   (၁၆.၆.၂၀၂၂)ရက် နံနက် (၁၁)နာရီ

              ရှင်းလင်းမည့်ရက်/အချိန်/နေရာ        -   ရုံးအမှတ်(၅၂)၊ နေပြည်တော်

၈။           တင်ဒါပုံစံရောင်းချမည့်နေရာ            -   စားသုံးသူရေးရာဦးစီးဌာန၊ တိုင်းဒေသကြီးဦးစီး မှူးရုံး၊ ပုသိမ်မြို့၊ ပဲခူးမြို့၊ မန္တလေးမြို့

၉။           Deposit ပေးသွင်းနိုင်သည့်ဘဏ်များ  -   တင်ဒါစည်းကမ်းသတ်မှတ်ချက်ပုံစံတွင် ဖေါ်ပြထားပြီး ဖြစ်ပါသည်။

၁၀။         အဆိုပါ ဧရာဝတီတိုင်းဒေသကြီးမှ သိုလှောင်ရုံ(၆)လုံး၊ ပဲခူးတိုင်းဒေသကြီးမှ သိုလှောင်ရုံ (၃)လုံးနှင့် မန္တလေးတိုင်းဒေသကြီးမှ သိုလှောင်ရုံ(၁)လုံးတို့၏ မျက်မြင်အခြေအနေအား သက်ဆိုင်ရာ မြို့နယ်များသို့ သွားရောက် ကြည့်ရှု့နိုင်ပြီး အသေးစိတ်အချက်အလက်များကို သိရှိလိုပါက တင်ဒါပုံစံ ဝယ်ယူရမည့် နေရာသို့ လူကိုယ်တိုင်ဖြစ်စေ၊ ဖုန်း ၀၁-၂၅၀၄၃၂ ၊ ၀၅၂-၂၂၂၁၁၀၈၊ ၀၂-၄၀၃၆၃၃၈ သို့ ဆက်သွယ် စုံစမ်းမေးမြန်း နိုင်ပါသည်။

                                                                                                တင်ဒါစိစစ်ရေးအဖွဲ့

            တိုင်းရင်းဆေးပညာဦးစီးဌာနမှ အများပြည်သူသုံးစွဲရန် မသင့်သောဆေးဝါးဖြစ်ကြောင်း ကြေညာထားသည့် အာရှရွှေကြယ် အမှတ်တံဆိပ် အဆစ်အမျက်ရောင်ရောဂါသောက်ဆေးများနှင့် Online ပေါ်တွင်ရောင်းချနေသည့် တိုင်းရင်းဆေးပညာဦးစီးဌာနတွင် မှတ်ပုံတင်ထားခြင်းမရှိသည့် ရသေ့ဆေး (သို့) ထိုင်းဗိန်းတောဆေးများ ဈေးကွက်အတွင်းရောင်းချခြင်းရှိ/မရှိ ကွင်းဆင်းစစ်ဆေး ရာတွင် လိုက်ပါဆောင်ရွက်ပေးနိုင်ပါရန် တိုင်းရင်းဆေးပညာဦးစီးဌာနမှ သက်ဆိုင်ရာမြို့နယ်ဦးစီးမှူး များ၏ ညှိနှိုင်းချက်အရ စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံဒေါ်သန္တာစိုး နှင့် ဝန်ထမ်းများသည် တိုင်းရင်းဆေးပညာဦးစီးဌာန၊ ဖြူးမြို့နယ်ဦးစီးမှူး ဒေါ်ဝင်းဝင်းအေးဦးဆောင် သော ဝန်ထမ်းများနှင့်အတူ မေလ ၂၁ ရက်နေ့ နံနက်ပိုင်းက ဖြူးမြို့ပေါ်ရှိ တိုင်းရင်းဆေးရောင်းချသည့် ဆေးဆိုင်များသို့ ကွင်းဆင်းစစ်ဆေးခဲ့ပါသည်။

            အလားတူ ရေတာရှည်မြို့နယ်တာဝန်ခံ ဦးဇော်ဇော်ထွေးသည် တိုင်းရင်းဆေးပညာဦးစီး ဌာန၊ ရေတာရှည်မြို့နယ်ဦးစီးမှူး ဒေါ်မေနှင်းဦးဆောင်သော ဝန်ထမ်းများ၊ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန မြို့နယ်ဦးစီးမှူး ဒေါ်အေးဆုစံတို့နှင့်အတူ ရေတာရှည်မြို့ပေါ်ရှိ တိုင်း ရင်းဆေးရောင်းချသည့် ဆေးဆိုင်များသို့ သွားရောက်၍ အာရှရွှေကြယ် အမှတ်တံဆိပ် အဆစ်အမျက်ရောင်ရောဂါသောက်ဆေးများနှင့် ရသေ့ဆေး (သို့) ထိုင်းဗိန်းတောဆေးများ ရောင်းချခြင်းရှိ/ မရှိ ကွင်းဆင်းစစ်ဆေးစစ်ဆေးခဲ့ပါသည်။

           ထိုသို့ကွင်းဆင်းစစ်ဆေးရာတွင် တောင်ငူခရိုင်အတွင်း ဖြူးမြို့နယ်နှင့် ရေတာရှည်မြို့နယ် တို့၌ အဆိုပါဆေး ၂ မျိုးကို ရောင်းချခြင်းမရှိသည်ကို တွေ့ရှိရကြောင်းနှင့် မြို့နယ်တာဝန်ခံများက တိုင်းရင်းဆေးများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ ကုန်အညွှန်းအမှတ်အသားများ ဖော်ပြရန် ညွှန်ကြားထားပြီးဖြစ်ပါသဖြင့် ကုန်အညွှန်းအမှတ်အသား ပြည့်စုံစွာဖော်ပြထားသော ဆေးဝါးများကိုသာရောင်းချရန် အသိပညာပေးခဲ့ကြောင်း သိရှိရပါသည်။

DOCA(ပဲခူး)

              စားသုံးသူရေးရာဦးစီးဌာနအနေဖြင့် စားသုံးသူပြည်သူများ၏ စားသုံးသူကာကွယ်ရေးနှင့် စပ်လျဉ်း၍ အသိပညာရှိမှုနှင့် စွမ်းဆောင်ရည်မည်မျှရှိသည်ကို တစ်နိုင်ငံလုံး အတိုင်းအတာဖြင့် သိရှိနိုင်ရန်အတွက် စားသုံးသူစွမ်းဆောင်နိုင်မှု အညွှန်းကိန်းစစ်တမ်းကို ကောက်ယူလျှက်ရှိရာ တောင်ငူ ခရိုင်ဦးစီးမှူးရုံးအနေဖြင့် စစ်တမ်းမေးခွန်းလွှာ အစောင် ၅၀ ကို မြို့နယ်လေးခုတွင် ကောက်ယူခဲ့ရာ

          ခရိုင်ဦးစီးမှူး ဦးမျိုးအောင်ဦးဆောင်သောအဖွဲ့သည် မေလ ၁၁ ရက်နေ့မှ ၁၃ ရက်နေ့ အထိ ရေတာရှည်မြို့နယ်အတွင်းရှိ ရေတာရှည်နှင့် ရေနီဒေသများမှ လူဦးရေ ၂၀ ဦးကိုလည်းကောင်း၊ တောင်ငူမြို့နယ်တာဝန်ခံ ဦးမြင့်သူဦးဆောင်သောအဖွဲ့သည် မေလ ၉ ရက်နေ့မှ ၁၇ ရက်နေ့အထိ တောင်ငူမြို့ပေါ်ရှိ ပြည်တော်သာ၊ ခြင်္သေ့ဦး၊ ဇေယျာခင်ဦးနှင့် တောင်ကွေ့ဈေးအရပ်တို့မှ လူဦးရေ ၁၀ ဦးကိုလည်းကောင်း၊ အုတ်တွင်းမြို့နယ်ဦးစီးမှူး ဒေါ်အေးအေးခိုင်ဦးဆောင် သော အဖွဲ့သည် မေလ ၁၆ ရက်နေ့မှ ၁၈ ရက်နေ့အထိ အုတ်တွင်းမြို့နယ်အတွင်းရှိ အုတ်တွင်း၊ ကျွဲပွဲနှင့် ညောင်ခြေထောက်ဒေသတို့မှ လူဦးရေ ၁၀ ဦးကိုလည်းကောင်း၊ ဖြူးမြို့နယ်တာဝန်ခံ ဒေါ်သန္တာစိုး ဦးဆောင်သော အဖွဲ့သည် မေလ ၁၈ ရက်နေ့မှ ၂၀ ရက်နေ့အထိ ဖြူးမြို့နယ်အတွင်းရှိ ဖြူးနှင့် ဇေယျဝတီဒေသတို့မှ လူဦးရေ ၁၀ ဦးကိုလည်းကောင်း စားသုံးသူစွမ်းဆောင်နိုင်မှု အညွှန်းကိန်းစစ်တမ်းကို ကောက်ယူပြီးစီးပြီး ဖြစ်ပါသည်။

            စစ်တမ်းကောက်ယူရာတွင် ပြည်သူများသို့ စားသုံးသူပညာပေးမှုလုပ်ငန်းများ၊ စားသုံးသူ ထိခိုက်နစ်နာမှုနှင့် စပ်လျဉ်း၍ ကုစားမှုအစီအစဉ်များ၊ ကုန်အညွှန်းအမှတ်အသားနှင့် စပ်လျဉ်းသည့် စားသုံးသူများ သိရှိရမည့် သတင်းအချက်အလက်များ၊ စားသုံးသူကာကွယ်ရေးဥပဒေပါ စားသုံးသူ အခွင့်အရေးနှင့် ပြဌာန်းချက်များအပေါ် သိရှိမှုအခြေအနေစသည့်အချက်များကို အခြေခံသည့် စစ်တမ်းမေးခွန်းလွှာကို တိုက်ရိုက်မေးမြန်းကောက်ယူကြောင်း သိရှိရပါသည်။

DOCA(ပဲခူး)