HighLight News

        စားသုံးသူရေးရာဦးစီးဌာန၊ လေးမျက်နှာမြို့နယ်တာဝန်ခံသည် ဇန်နဝါရီလ(၂၀)ရက်နေ့ နံနက် (၀၉:၀၀)နာရီအချိန်တွင် လေးမျက်နှာမြို့၊ လှော်ကထားကျေးရွာရှိ အခြေခံပညာအထက်တန်းကျောင်း၊ ကျောင်းမုန့်ဈေးတန်းတွင် ရောင်းချသောမုန့်ဆိုင်များအား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ကြောင်းသိရသည်။

           ထိုသို့ကွင်းဆင်းခဲ့ရာတွင် ကျောင်းဈေးတန်းတွင်ရောင်းချသော မုန့်များတွင်ရက်လွန်ခြင်း ၊မှိုတက်ခြင်းများ ရောင်းချမှုရှိ/မရှိ၊ တားမြစ်ဆိုးဆေးသုံးစွဲထားသော မုန့်များရောင်းချမှုမရှိစေရေးနှင့်  စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများ ပြည့်စုံ မှန်ကန်စွာ ဖော်ပြခြင်းရှိ/မရှိ၊ သတ်တမ်းလွန်ကုန်စည်များရောင်းချခြင်းရှိ/မရှိတို့ကို စစ်ဆေးခဲ့ပြီး၊  မြန်မာ့ရိုးရာမုန့်မျိုးစုံနှင့် အသုပ်များတွင် ခွင့်မပြုဓါတုဆေးများအသုံးမပြုစေရေး အသိပညာပေးပြောကြားခြင်း၊ ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးနှင့် သတ်မှတ်အရည်အသွေး ပြည့်မီသော ကုန်စည်များကိုသာရောင်းချရန်စသည်တို့ကို အသိပညာပေးဆွေးနွေးခဲ့ပြီး ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ဟင်္သာတမြို့နယ်ဦးစီးမှူးသည်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ အားကစားနှင့်ကာယပညာဦးစီးဌာန၊ အခြေခံပညာဦးစီးဌာနတို့နှင့်အတူပူးပေါင်း၍(၂၁.၁.၂၀၂၅) ရက်နေ့ နံနက်(၁၀:၃၀)နာရီအချိန်တွင် ဟင်္သာတမြို့၊ ယုန်သလင်းကျေးရွာရှိ အခြေခံပညာအထက်တန်းကျောင်းတွင် ဆရာ၊ ဆရာမနှင့် ကျောင်းသား၊ ကျောင်းသူ ၆၀၀ ဦးအား လူငယ်နှင့်အားကစားအသိ ပညာပေးဟောပြောခြင်းနှင့် စားသုံးသူကာကွယ်ရေးဆိုင်ရာ အသိပညာပေးဟောပြောခြင်းကို ဆောင်ရွက်ခဲ့ကြောင်းသိရသည်။

         အဆိုပါဟောပြောပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မြို့နယ်ဦးစီးမှူးက လူငယ်စကားဝိုင်းကျင်းပရခြင်း၏ ရည်ရွယ်ချက်များ၊ စားသုံးသူရေးရာဦးစီးဌာန မြို့နယ်ဦးစီးမှူး ဦးမိုးကျော်က အစားအသောက်များတွင် ပါဝင်သော ဓါတုဆိုးဆေး၏ ဆိုးကျိုးများအကြောင်း၊ မြန်မာ ဘာသာဖြင့် ကုန်အညွှန်းဖော်ပြထားခြင်းမရှိသော အစားအသောက်များနှင့်လူသုံးကုန်ပစ္စည်းများဝယ်ယူ အသုံးပြုရာတွင် သတိပြုလိုက်နာဆောင် ရွက်ရမည့်အချက်များ၊ အငယ်တန်းစာရေး ဦးချမ်းငြိမ်းဇော်မှ စားသုံးသူကာကွယ်ရေးဥပဒေပါ စားသုံးသူအခွင့်အရေးများအကြောင်း၊ အားကစားနှင့်ကာယပညာဦးစီး ဌာနမှ မြို့နယ်ဦးစီးမှူးမှ လူငယ်နှင့် အားကစားရေးရာ အသိပညာပေဟောပြောခြင်းများ ဟောပြောခဲ့ပြီး   နေ့လယ် (၁၂:၀၀) နာရီအချိန်တွင် ဟောပြောပွဲကိုရုပ်သိမ်းခဲ့ကြောင်း သိရှိရပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ် ပြန်ကြားရေးနှင့်ပြည်သူ့ ဆက်ဆံရေးဦးစီး ဌာန ၊ လူထုအခြေပြု ဗဟိုဌာနဖြစ်သော Community Centre ခန်းမတွင် ပြည်သူများ အသိပညာဗဟုသုတရရှိစေရန် ရည်ရွယ်ပြီး မြို့နယ် ပြန်/ဆက်ဦးစီးဌာနနှင့် စားသုံးသူရေးရာဦးစီးဌာနတို့ ပူးပေါင်း၍ အွန်လိုင်းမှတ်ပုံ တင်ခြင်းဆိုင်ရာ သိကောင်းစရာအကြောင်းTalk Show ကို (၂၁-၁-၂၀၂၅)ရက်နေ့ နံနက် (၁၁း၀၀) နာရီအချိန်တွင် ပြုလုပ်ခဲ့ကြောင်းသိရသည်။

            ရှေးဦးစွာ ပန်းတနော်မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ အွန်လိုင်းမှတ်ပုံတင်ခြင်းဆိုင်ရာ သိကောင်းစရာအကြောင်းကို ရှင်းလင်းဆွေးနွေးပေးပါရန်တင်ပြရာ စားသုံးသူရေးရာ ဦးစီးဌာန ပန်းတနော်မြို့နယ်တာဝန်ခံရုံးမှ ဦးအောင်ကျော်သက် မြို့နယ်တာဝန်ခံက  အွန်လိုင်းစနစ်ဖြင့် ရောင်းချခြင်းလုပ်ငန်း မှတ်ပုံတင်ခြင်းဆိုင်ရာ အမိန့်ကို စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန က အမိန့် ကြော်ငြာစာအမှတ် (၅၁/၂၀၂၃) ဇူလိုင်လ ၂၁ရက်နေ့က ထုတ်ပြန်ခဲ့ပြီးဖြစ်ကြောင်း၊ အရေးကြီးကုန်စည်နှင့် ဝန်ဆောင်မှု ဥပဒေအရ  အွန်လိုင်းစနစ်ဖြင့် ရောင်းချသည့်လုပ်ငန်းများအားလုံး အွန်းလိုင်းမှတ်ပုံတင်ခြင်း မရှိပဲရောင်းချခွင့်မရှိကြောင်းနှင့် ရောင်းချသူများကို ၂၀၂၅ခုနှစ်တွင် အရေးယူ ဆောင်ရွက်ခြင်းများ ဆောင်ရွက်သွားမည်ဖြစ်သည့်အတွက် သတ်မှတ်ချက်များကို လိုက်နာဆောင်ရွက်ရန်လိုအပ်ပါကြောင်း၊ မှတ်ပုံတင်နိုင်ရန်အတွက် အွန်လိုင်းစနစ်ဖြင့် မှတ်ပုံတင်ခြင်း လုပ်ငန်းတွင် လျှောက်ထားရာတွင် လုပ်ငန်းပိုင်ရှင်၏ နေရပ်လိပ်စာမှန်ကန်ကြောင်း ရပ်ကွက်ထောက်ခံချက်၊ လုပ်ငန်းတည်နေရာမှန်ကန်ပါကြောင်း ရပ်ကွက်ထောက်ခံချက်၊ လုပ်ငန်း ပိုင်ရှင်၏ အကျင့်စာရိတ္တ ကောင်းမွန်ကြောင်း ရဲစခန်းထောက်ခံချက်၊ လုပ်ငန််းပိုင်ရှင်၏ မှတ်ပုံတင် အရှေ့ အနောက်ဓါတ်ပုံ၊ ပါတ်စပိုစ့်ဆိုဒ် ဓါတ်ပုံ၊ လုပ်ငန်း၏ Logo ပုံ တို့ဖြင့်အတူ မိမိကိုယ်တိုင် လျှောက်ထား နိုင်ကြောင်းကို ပြည်သူနှင့် အွန်းလိုင်းစနစ်ဖြင့် ရောင်းချသူလုပ်ငန်းရှင်များ သိရှိနိုင်ရန် ရှင်းလင်း ဆွေးနွေးခဲ့ကြောင်း သိရသည်။ 

DOCA(ဧရာဝတီ)

            အခြေခံပညာကျောင်းနေရွယ်ကလေးများ စာသင်ချိန်နှစ်တွင် စားသုံးသူအခွင့်အရေးနှင့် လိုက်နာရမည့် တာဝန်များကို လိုက်နာကျင့်သုံးရွေးချယ် တက်စေရန်ရည်ရွယ်၍ စားသုံးသူရေးရာ ဦးစီးဌာနမှ တာဝန်ရှိသူများက အခြေခံကျောင်းများရှိ ကျောင်းသားလူငယ်ကလေးများ စားသုံးသူကာကွယ်ရေး လုပ်ငန်းစဉ်များကို သိရှိနားလည် တက်စေရန်၊ မိမိအခွင့်အရေးကို တောင်းဆိုတက်စေရန်၊အတွက် စားသုံးသူရေးရာဦးစီးဌာနနှင့် မြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ ညောင်တုန်းကြိမ်ပင်ဆယ် အခြေခံ ပညာအထက် တန်းကျောင်း၊ ရှိ ကျောင်းသား/သူ ကလေးငယ်များကို (၂၀.၁.၂၀၂၅) ရက်နေ့ နံနက်(၁၀၃၀) အချိန်က အသိပညာပေး ဟောပြောပွဲပြုလုပ်ခဲ့ကြောင်း သိရသည်။

          အသိပညာပေးဟောပြောပွဲတွင် မြို့နယ်ပြန်ဆပ်မှ တာဝန်ရှိသူက ကလေးငယ်များအား မူးယစ်ဆေး ဝါး၏ ဆိုးကျိုးများ၊ မူးယစ်ဆေးဝါးအမျိုးအစားများအကြောင်းနှင့် ကျောင်းစာအပြင် ပြင်ပဗဟုသုတ ရရှိမည့် စာပေများကို လည်းလေ့လာရမည့်အကြောင်း နံရံကပ်စာစောင်နှင့် ဓါတ်ပုံပြပွဲများပြုလုပ်၍  အသိပညာ ပေးပြောကြားခဲ့သည်။

          စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူးရုံးက ဒေါ်ချိုမီဇင်ဒု-ဦးစီးမှူးက ကလေးငယ် များအား  စားသုံးသူ ၏အဓိပ္ပါယ်ဖွင့်ဆိုချက်၊စားသုံးသူအခွင့်အရေး(၈)ချက်ကို လည်းကောင်း၊ စားသုံးသူကာ ကွယ်ရေးဥပဒေကို ၂၀၁၉ ခုနှစ်၊ မတ်လ (၁၅)ရက်နေ့တွင် အခန်း(၂၅)ခန်း၊ ပုဒ်မ (၈၄)ခုဖြင့် ပြဌာန်းခဲ့ကြောင်း၊ စားသုံးသူကာကွယ်ရေးဥပဒေပါ စားသုံးသူ အခွင့်အရေးနှင့်တာဝန်များ၊ အခန်း(၁၈) ကုန်အညွှန်းအမှတ်အသားများ ဖော်ပြခြင်းနှင့် စပ်လျဉ်း၍ ရှင်းလင်းခြင်း၊ ကုန်စည် (သို့မဟုတ်)ဝန်ဆောင်မှုတို့ ဝယ်ယူအသုံး ပြုခြင်းကြောင့် နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်းများအကြောင်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း Website တွင် ဝင်ရောက်လေ့လာနိုင်ကြောင်း၊ တိုင်ကြားနိုင်သည့် နည်းလမ်းများကို  အသိပညာပေး ဟောပြောခဲ့ပြီကျောင်းသား၊ ကျောင်းသူများသည် အသင့်စားအစားအစာများကို ဝယ်ယူအသုံးပြုရာတွင် မြန်မာဘာသာဖြင့် ကုန်အညွှန်း အမှတ်အသား ဖော်ပြထားသည့် အစားအစာ များကို ရွေးချယ်ဝယ်ယူအသုံးပြုရန် နမူနာပစ္စည်းများဖြင့် ရှင်းလင်း ခြင်း၊ သက်တမ်း ကုန်ဆုံးရက်စွဲများ သေချာ သိရှိနားလည်စေရန် ပုံစံနမူနာပြသ၍ အပြန်အလှန်မေးမြန်းခြင်းတို့ကို အသိပညာ‌ပေးဟောပြောခဲ့ပြီး စားသုံးသူကာကွယ်ရေးဆိုင်ရာ အသိပညာပေး လက်ကမ်းစာစောင်များပေးဝေပြီး၊ ကျောင်းသား/ ကျောင်းသူ(၁၅၀)ဦး၊ ဆရာ/ဆရာမ(၆) ဦး   တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

          (၂၀.၁.၂၀၂၅) ရက်နေ့ နံနက် (၁၀း၀၀) နာရီအချိန်တွင် ပန်းတနော်မြို့နယ်ဦးစီးမှူးနှင့် ဝန်ထမ်းများသည် မြို့နယ်ဈေးကွက်အတွင်း ရောင်းချနေသော ဘိလပ်မြေအိတ် လက်ကျန်အခြေအနေနှင့် ရောင်းချမှု ဈေးနှုန်းအခြေအနေများကို မြေပြင်ကွင်းဆင်းစစ်ဆေးဆောင်ရွက်ခဲ့ကြောင်းသိရသည်။

         ကွင်းဆင်းစစ်ဆေးရာတွင် ပန်းတနော်မြို့နယ် အရှေ့ပိုင်းရပ်ကွက်မှ ဦးအောင်ကိုနိုင် ဘိလပ်မြေ အရောင်းဆိုင်၊ အောင်ပွင့်သစ်ဆန်းဘိလပ်မြေအရောင်းဆိုင်၊ အနောက်ပိုင်း ရပ်ကွက်ရှိ အောင်သပြေ၊ မင်းဆွေဦး  ဘိလပ်မြေ လက်လီ/လက်ကား အရောင်းဆိုင်(၄)ဆိုင်မှ ဘိလပ်မြေ ရောင်းချမှုအခြေအနေ ဆိုင်ရှိဘိလပ်မြေလက်ကျန်စာရင်း ဘိလပ်မြေဝယ်ယူရရှိမှုနှင့် ရောင်းချမှု ဈေးနှုန်းအခြေအနေကို ဆိုင်ရှင်များအား မေးမြန်းစစ်ဆေးခဲ့သည်။

          ဘိလပ်မြေအရောင်းဆိုင်များတွင် ကြံနီ  နှင့် ALPHA နှစ်မျိုးသာရောင်းချပြီး အောင်ကိုနိုင်ဆိုင်မှ ကြံနီဈေးနှုန်ူး ယခင်ဈေး ငွေကျပ် ၁၆၅၀၀/- ယခုရောင်းချဈေး ၁၉၅၀၀/-၊  Alpha ယခင် ဈေးနှုန်း ငွေကျပ် ၁၈၀၀၀/-ယခုဈေး ၂၀၀၀၀/- ဖြင့် ရောင်းချကြောင်း၊ အောင်ပွင်သစ်ဆိုင်လည်း ဈေးနှုန်းတူညီပြီး အောင်သပြေဆိုင်မှ ALPHA ယခင်ဈေး ၁၇၀၀၀/-ယခုဈေး ၂၀၀၀၀/- မင်းဆွေဦး ဆိုင်မှ ALPHA ယခင်ဈေး ၁၇၅၀၀/-ယခုဈေး ၂၀၀၀၀/- ကြံနီ ယခင်ဈေး ၁၆၅၀၀/- ယခုဈေး ၁၉၅၀၀/-ဖြင့် ရောင်းချနေပြီး၊ ယခင်ဈေးနှင့် နှိုင်းယှဥ်ပါက (၂၀၀၀-၂၅၀၀-၃၀၀၀)ကျပ် အနည်းငယ် ဈေးတက်နေကြောင်း တွေ့ ရှိရသည်။ ရန်ကုန်မှ မှာယူရောင်းချပြီး ပစ္စည်းမှာယူတွင် လိုသလောက် မရ၍  ပွင့်လင်းရာသီ ဆောက်လုပ်ရေးကာလတွင်  ဝယ်ယူသူများပြားလာပြီး အကန့်အသတ်ဖြင့်သာ ဝယ်ယူရရှိ သဖြင့် ဈေးနှုန်းအနည်းငယ် မြင့်တက်လာခြင်းဖြစ် ရန်ကုန်ပင်ရင်းဆိုင်များမှ ဈေးနှုန်းမြင့်ခြင်းကြောင့် ဈေးတက်ရခြင်းဖြစ်ကြောင်း လေ့လာသိရှိရသည်။

DOCA(ဧရာဝတီ)