သတင်းနှင့် လှုပ်ရှားမှုများ

         (၃၁-၇-၂၀၂၆) ရက်နေ့တွင် မအူပင်ခရိုင် စားသုံးသူရေးရာဦးစီးဌာနမှ တာဝန်ရှိသူများသည် ဓနုဖြူမြို့နယ်အတွင်းရှိ Gasifier လုပ်ငန်း (ဦးတေဇာမင်း) နှင့် J ဝင်းဆန်စက်၊ မြဉ္ဇူဆန်စက် (ဒေါ်သူဇာလင်း) တို့သို့ ကွင်းဆင်းစစ်ဆေးခဲ့ကြောင်း သိရသည်။

      ကွင်းဆင်းစစ်ဆေးရာတွင် Gasifier လုပ်ငန်း၏ လည်ပတ်ဆောင်ရွက်နေမှုအခြေအနေ၊ စပါးခွံ လောင်စာအသုံးပြုမှု၊ ထုတ်လုပ်သည့် ဓာတ်ငွေ့စနစ်၏ လုပ်ငန်းဆောင်ရွက်မှုအခြေအနေနှင့် စက်ကိရိယာများ လုံခြုံစိတ်ချစွာ အသုံးပြုနေမှုတို့ကို လေ့လာစစ်ဆေးခဲ့ကြောင်း သိရသည်။

       ထို့အပြင် J ဝင်းဆန်စက်နှင့် မြဉ္ဇူဆန်စက်တို့တွင် စပါးဝင်ရောက်ကြိတ်ခွဲမှု၊ ဆန်ထုတ်လုပ်မှု၊ ဆန်နှင့် စပါးလက်ကျန်အခြေအနေများ၊ လုပ်ငန်းလည်ပတ်နေမှုနှင့် MyRo စနစ်တွင် လစဉ်စာရင်းများကို အချိန်နှင့်တစ်ပြေးညီ မှန်ကန်စွာ ဖြည့်သွင်းထားရှိမှုအခြေအနေများကို စိစစ်စစ်ဆေးခဲ့ကြောင်း သိရသည်။

         စစ်ဆေးမှုအတွင်း လုပ်ငန်းရှင်များအား စာရင်းဇယားများကို တိကျမှန်ကန်စွာထားရှိရေး၊ ကုန်စည်စီးဆင်းမှုနှင့် လက်ကျန်အခြေအနေများကို မှန်ကန်စွာတင်ပြရေး၊ သက်ဆိုင်ရာဥပဒေ၊ လုပ်ထုံးလုပ်နည်းများနှင့်အညီ လုပ်ငန်းများကို စနစ်တကျဆောင်ရွက်ကြရန် အသိပညာပေး လမ်းညွှန်မှာကြားခဲ့ကြောင်း သိရှိရပါသည်။

DOCA(ဧရာဝတီ)

       အရေးကြီးကုန်စည်နှင့် ဝန်ဆောင်မှုဆိုင်ရာ လုပ်ငန်းများကို စဉ်ဆက်မပြတ် စောင့်ကြည့်ကြပ် မတ်နိုင်ရေးအတွက် မအူပင်ခရိုင်အတွင်း နှလုံးအားဆေးနှင့် လေဆေးများ ပြတ်လပ်မှုရှိမရှိကို (၄-၈-၂၀၂၆) ရက်နေ့တွင် ညောင်တုန်းမြို့နယ်နှင့် ပန်းတနော်မြို့နယ်တို့ရှိ မြို့ပေါ်ဆေးဆိုင်များသို့ မအူပင်ခရိုင် စားသုံးသူရေးရာဦးစီးဌာနက ကွင်းဆင်းစစ်ဆေးခဲ့ကြောင်း သိရသည်။

      ကွင်းဆင်းစစ်ဆေးရာတွင် ညောင်တုန်းမြို့နယ်ရှိ ဆေးဆိုင် (၈) ဆိုင်နှင့် ပန်းတနော်မြို့နယ်ရှိ ဆေးဆိုင် (၇) ဆိုင်တို့တွင် စစ်ဆေးစဉ် ဆေးဆိုင်များတွင် ရောင်းချလျက်ရှိသည့် အရေးကြီးဆေးဝါးများ၏ လက်ကျန်အခြေအနေ၊ ပြတ်လပ်မှုရှိ/မရှိ၊ ဆေးဝါးများကို ကုမ္ပဏီများထံမှ ပုံမှန်ရရှိမှုအခြေအနေ၊ ဈေးနှုန်းပြောင်းလဲမှုနှင့် လက်ရှိဆေးဈေးကွက်အတွင်း ဖြန့်ဖြူးရောင်းချနေမှုအခြေအနေများကို ဆေးဆိုင်ပိုင်ရှင်များနှင့် တွေ့ဆုံမေးမြန်း၍ ကွင်းဆင်းစိစစ်ခဲ့ကြောင်း သိရသည်။

      ထို့အပြင် ဆေးဝါးဝယ်ယူထားသည့် ဘောင်ချာများ၊ ကုန်ပစ္စည်းဝင်/ထွက် မှတ်တမ်းများကို စစ်ဆေးခဲ့ပြီး ဆေးဝါးရောင်းချရာတွင် တရားဝင်တင်သွင်းဖြန့်ဖြူးသည့် ကုမ္ပဏီများမှရရှိသည့် ဆေးဝါးများကိုသာရောင်းချရေး၊ ဈေးနှုန်းများကို မှန်ကန်စွာ သတ်မှတ်ရောင်းချရေးနှင့် ဆေးဝါးပြတ်လပ်မှုများ ဖြစ်ပေါ်လာပါက သက်ဆိုင်ရာဌာနသို့ ချက်ချင်းအကြောင်းကြားပေးရန် လိုအပ်ကြောင်း အသိပေးဆွေးနွေးခဲ့ကြောင်း သိရသည်။

         မအူပင်ခရိုင် စားသုံးသူရေးရာဦးစီးဌာနအနေဖြင့် ဆေးဝါးဈေးကွက်တည်ငြိမ်ရေး၊ အရေးကြီးဆေးဝါးများ လုံလောက်စွာရရှိရေးနှင့် ပြည်သူများ အရည်အသွေးပြည့်မီသည့် ဆေးဝါးများကို သင့်တင့်မျှတသော ဈေးနှုန်းဖြင့် ဝယ်ယူနိုင်ရေးအတွက် ဆေးဆိုင်များအား ပုံမှန်ကွင်းဆင်းစစ်ဆေး၍ စောင့်ကြည့်ကြပ် မတ်ဆောင်ရွက်လျက်ရှိကြောင်း သိရှိရပါသည်။

DOCA(ဧရာဝတီ)

         (၃၁-၇-၂၀၂၆) ရက်နေ့ နံနက် (၁၀:၀၀) နာရီအချိန်တွင် ညောင်တုန်းမြို့နယ် အထွေထွေအုပ်ချုပ်ရေး ဦးစီးဌာန အစည်းအဝေးခန်းမ၌ မြို့နယ်ဌာနဆိုင်ရာများ၊ မြို့နယ်ရပ်ကွက်/ ကျေးရွာအုပ်စု အုပ်ချုပ်ရေးမှူးများအား ကုန်အညွှန်းအမှတ်အသားနှင့် စားအုန်းဆီဖြန့်ဖြူးရောင်းချမှု အခြေအနေများကို စနစ်တကျဆောင်ရွက်နိုင်ရေးကို ညောင်တုန်းမြို့နယ် တာဝန်ခံ ဒေါ်ချိုမီဇင်မှ အသိပညာပေးဟောပြော ဆွေးနွေးပွဲကို ကျင်းပပြုလုပ်ခဲ့ကြောင်း သိရသည်။

       ဟောပြောဆွေးနွေးရာတွင် ကုန်စည်များ၌ ဥပဒေအရ ဖော်ပြရမည့် ကုန်အညွှန်းအမှတ်အသားများကို စိစစ်ကြပ်မတ်ဆောင်ရွက်ရေး၊ စားသုံးသူများ ဘေးကင်းလုံခြုံပြီး အရည်အသွေးပြည့်မီသော ကုန်စည်များကို ရွေးချယ်ဝယ်ယူနိုင်ရေးအတွက် ကုန်အညွှန်းအမှတ်အသား၏ အရေးပါမှုတို့ကို ရှင်းလင်းဆွေးနွေးခဲ့ကြောင်း သိရသည်။

    ထို့အပြင် စားအုန်းဆီဖြန့်ဖြူးရောင်းချမှုလုပ်ငန်းများကို သတ်မှတ်လုပ်ထုံးလုပ်နည်းများနှင့်အညီ စနစ်တကျဆောင်ရွက်ရေး၊ အကျိုးခံစားခွင့်ရှိသူများထံ မျှတစွာဖြန့်ဖြူးရောင်းချနိုင်ရေး၊ စာရင်းဇယားများ တိကျမှန်ကန်စွာ ပြုစုထားရှိရေးနှင့် ဌာနဆိုင်ရာများ၊ ရပ်ကွက်/ကျေးရွာအုပ်ချုပ်ရေးမှူးများအနေဖြင့် ပူးပေါင်းညှိနှိုင်း ဆောင်ရွက်ပေးကြရန် အသိပညာပေးဆွေးနွေးခဲ့ကြောင်း သိရသည်။

         အဆိုပါ ဟောပြောဆွေးနွေးပွဲသည် ကုန်အညွှန်းအမှတ်အသားဆိုင်ရာ အသိပညာများ တိုးမြှင့်ရရှိစေရန်နှင့် စားအုန်းဆီဖြန့်ဖြူးရောင်းချမှုလုပ်ငန်းများကို ပိုမိုစနစ်တကျ၊ ထိရောက်စွာဆောင်ရွက်နိုင်စေရန် ရည်ရွယ်ကျင်းပခဲ့ခြင်းဖြစ်ကြောင်း သိရပြီး တက်ရောက်သူ ၇၅ ဦးရှိကြောင်း သိရှိရပါသည်။

DOCA(ဧရာဝတီ)

         ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အနောက်ပိုင်းခရိုင်ဦးစီးမှူးရုံးမှ ဒုခရိုင်ဦးစီးမှူးနှင့် ဝန်ထမ်းများသည် မြို့နယ်အထွေထွေအုပ်ချုပ်ရေးဦးစီးဌာနမှတာဝန်ရှိသူ၊ မြို့နယ်ရဲတပ်ဖွဲ့မှ တာဝန်ရှိသူနှင့်ဝန်ထမ်းများ၊ မြို့နယ်စည်ပင်သာယာ‌ရေးအုပ်ချုပ်ရေးရုံးမှ တာဝန်ရှိသူတို့နှင့် ပူးပေါင်း၍ ၃.၈.၂၀၂၆ ရက်နေ့ နံနက် (၁၀း၀၀) နာရီအချိန်တွင် တာဝန်ရှိသူများသည် ဒဂုံမြို့နယ်နှင့် ဗဟန်းမြို့နယ်များသို့ စားအုန်းဆီလက်လီ/လက်ကား ဖြန့်ဖြူးရောင်းချသည့် အရောင်းဆိုင်များ သို့သွားရောက်၍ စားအုန်းဆီများသတ်မှတ်ရည်ညွှန်း ဈေးနှုန်းများအတိုင်း ရောင်းချနေခြင်း ရှိ/ မရှိ ကွင်းဆင်းစစ်ဆေးခဲ့ကြောင်း၊ ကွင်းဆင်းစစ်ဆေးရာတွင် စားအုန်းဆီများ ဖြန့်ဖြူးရောင်းချရာတွင် စားအုန်းဆီခွဲတမ်းရရှိမှုအပေါ် သတ်မှတ်ဈေးနှုန်းဖြင့် အပြည့်အဝရောင်းချမှု ရှိ/ မရှိနှင့် အိမ်ထောင်စုစာရင်း(သို့)စာအုပ်စနစ်ဖြင့် ရောင်းချပေးရာတွင် ပြည်သူများပိုမိုအဆင်ပြေစွာဝယ်ယူနိုင်ရေး၊ စားအုန်းဆီများကို ဈေးကစားရန်ရည်ရွယ်ချက်ဖြင့် သိုလှောင်ထားခြင်းများမဖြစ်ပေါ်စေရေး၊ ဆီအရည်အသွေးမှန်ကန်မှုရှစေရေး ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

          စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးသည် အွန်လိုင်းစနစ်ဖြင့် ရောင်းချသည့် လုပ်ငန်းများ‌အား မြေပြင်စစ်ဆေးရန် ညွှန်ကြားလာသည်များကို ဆောင်ရွက်လျက်ရှိရာ ၂၀၂၆ ခုနှစ်၊ ဇူလိုင်လ ၂၈ ရက်နေ့တွင် စစ်ကိုင်းခရိုင်ရုံးမှ ဝန်ထမ်းများသည် အွန်လိုင်းမှတ်ပုံတင် လျှောက်ထား လာသည့် စစ်ကိုင်းမြို့၊ မြို့သစ်ရပ်ကွက်၊ နယ်မြေ ၂ ရှိ “ Yoon Shwe Yee Aung (ယွန်းရွှေရည်အောင်)” ဖန်စီပစ္စည်းများ၊ ဖက်ရှင်အသုံးအဆောင်ပစ္စည်းများ၊ အထည်အလိပ်၊ အဝတ် အထည်နှင့်ဆက်စပ်ပစ္စည်းများ၊ အိမ်သုံးပစ္စည်းများလုပ်ငန်းအား မြေပြင်စစ်ဆေးခဲ့ကြောင်း သိရှိရသည်။

     ထိုသို့ မြေပြင်စစ်ဆေးခဲ့မှုတွင် အွန်လိုင်းမှတ်ပုံတင်လျှောက်ထားစဉ်က အချက်အလက်များနှင့် မြေပြင်အချက်အလက်များ ကိုက်ညီမှု ရှိ၊ မရှိ DOCA Mobile Application ဖြင့် စစ်ဆေးခဲ့ပြီး စားသုံးသူရေးရာဦးစီးဌာနမှ တာဝန်ရှိသူက မှတ်ပုံတင်လက်မှတ်ရရှိသူ၏ တာဝန်များနှင့် အခွင့်အရေး များ၊ မှတ်ပုံတင်၊ သက်တမ်းတိုး၊ ပြင်ဆင်ကြေးတို့အတွက် သတ်မှတ်နှုန်းထားများအကြောင်း၊ စားသုံးသူ ကာကွယ်ရေး ဥပဒေ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းဆိုင်ရာ အချက်အလက် များ၊ ဥပဒေ အခန်း(၁၀)ပါ စီးပွားရေးလုပ်ငန်းရှင်၏ တာဝန်များ၊ အခန်း (၁၁)ပါ ကုန်စည်နှင့် စပ်လျဉ်း၍ အာမခံချက်ပေးခြင်းဆိုင်ရာ အချက်အလက်များ ရှင်းလင်းပြောကြားခဲ့ကြောင်း သတင်းရရှိ ပါသည်။

DOCA(စစ်ကိုင်း)