သတင်းနှင့် လှုပ်ရှားမှုများ

   မြိတ်ခရိုင်တွင် ဆန်စျေးကွက်စျေးနှုန်းအား ဒေသတွင်းဖြစ်သင့်ဖြစ်ထိုက်သောစျေးဖြင့် ရောင်းဝယ်ဖောက်ကားမှုရှိစေရေးအတွက် စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံးမှ ဒုခရိုင်ဦးစီးမှူးနှင့် ဝန်ထမ်းများသည် ခရိုင်ကုန်‌စျေးနှုန်းတည်ငြိမ်ရေးအဖွဲ့ဝင်များဖြစ်ကြသော အထူးစုံစမ်းစစ်ဆေးရေးဦးစီးဌာန၊ ဗဟိုစာရင်းအင်းအဖွဲ့၊ မြို့နယ်စည်ပင်သာယာရေးအဖွဲ့၊ ကျေးလက်ဖွံ့ဖြိုးရေးဦးစီးဌာနနှင့် ခရိုင် စီမံကိန်းရေးဆွဲရေးဦးစီးဌာနတို့သည် ၂၀၂၆ ခုနှစ်၊ သြဂုတ်လ ၇ ရက်နေ့၊ နံနက် (၁၀း၀၀) နာရီအချိန်တွင် ဆိပ်ငယ်ရပ်နှင့် ကန်ဖျားရပ်၊ ကန်ဖျားလမ်းမကြီး၊ မြိတ်မြို့ရှိ ဆန်အ‌ရောင်းဆိုင်များအား ရှောင်တခင် ကွင်းဆင်းစစ်ဆေးခဲ့ကြောင်း သိရှိရပါသည်။

     ကွင်းဆင်းစစ်ဆေးရာတွင် မြိတ်မြို့အတွင်းရောင်းချနေသော ဆန်ဈေးနှုန်းများအား သတ်မှတ်ထုတ်ပြန်ထားသည့် ရည်ညွှန်းဈေးနှုန်းများအတိုင်းရောင်းချနေခြင်း ရှိ/ မရှိ၊ မြန်မာဆန်စပါးအွန်လိုင်း (MyRo)တွင် သိုလှောင်ရုံမှတ်ပုံထားခြင်းများ ရှိ/ မရှိ၊ လစဥ် ကုန်ရ၊ ကုန်ထုတ်၊ လက်ကျန်စာရင်းများ ဖြည့်သွင်းမှုများ ရှိ/ မရှိစစ်ဆေးခြင်း၊ အလေးချိန် အချိန်အတွယ်မှန်ကန်မှုရှိစေရေးနှင့် ဈေးကွက်ဈေးနှုန်း တည်ငြိမ်စေရန်အတွက် ဈေးကစားရန် ရည်ရွယ်ချက်ဖြင့် သိုလှောင်ထားရှိခြင်း၊ ဈေးနှုန်းမြှင့် တင်ရောင်းချခြင်းများမရှိစေရန် ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(တနင်္သာရီ)

          ၂၀၂၆  ခုနှစ်၊ သြဂုတ်လ ၇ ရက်နေ့၊ နံနက် (၉း၀၀) နာရီအချိန်တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံးမှ ဒုခရိုင်ဦးစီးမှူးနှင့်  ဝန်ထမ်းများသည် ခရိုင်ကုန်စျေးနှုန်း တည်ငြိမ်‌‌‌ရေးအဖွဲ့ဝင်ဌာနဆိုင်ရာများဖြစ်ကြသော အထူးစုံစမ်းစစ်ဆေးရေးဦးစီးဌာန၊ စီမံကိန်းဦးစီးဌာန၊ စိုက်ပျိုးရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ မြိတ်မြို့၊ ဆိပ်ငယ်ရပ်ရှိ ဆေးဆိုင်များအား စျေးကွက်စောင့်ကြည့်စစ်ဆေးခြင်းဆောင်ရွက်ခဲ့ကြောင်း သိရသည်။

         ထိုသို့ဆောင်ရွက်ရာတွင် ဒေသတွင်း ဆေးစျေးနှုန်းများ တည်ငြိမ်စေ‌ရေးအတွက် ဆေးဆိုင်များ တွင်ရောင်းချနေသော ဆေးစျေးနှုန်းများမှာ သင့်တင့်မျှတသော စျေးနှုန်းများဖြင့် ရောင်းချနေမှုများ ရှိ/ မရှိ၊ စျေးကွက်အတွင်းဆေးဝါးများ ပြတ်လက်မှုများ ရှိ/ မရှိနှင့် သက်ဆိုင်ရာထောက်ခံချက်များမပါရှိသည့် တရားမဝင်ဆေးဝါးများနှင့် သက်တမ်းကုန်လွန်သော ဆေးဝါးများနှင့်ဆေးပစ္စည်းများရောင်းချနေမှု ရှိ/ မရှိ ဝိသမလောဘဖြင့် သိုလှောင်ထားရှိမှုများ  ရှိ/ မရှိနှင့် ဆရာဝန်ကြားချက်မလိုသော အိမ်သုံးဆေးဝါးများတွင် ကုန်အညွှန်းအမှတ်အသားပါရှိမှုများ ရှိ/ မရှိ စစ်ဆေးခြင်း၊ ဆေးဝါးရောင်းချခွင့်လိုင်စင်များ ရှိ/ မရှိ စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(တနင်္သာရီ)

     စားသုံးသူရေးရာဦးစီးဌာန၊ မြစ်ကြီးနားခရိုင်ရုံးမှ ဦးဇေယျာအောင် (ခရိုင်ဦးစီးမှူး)သည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ၆-၈-၂၀၂၆ ရက်နေ့ ၁၃:၃၀ နာရီအချိန်တွင် မြစ်ကြီးနားမြို့၊ ရမ်ပူရပ်ကွက်ရှိ စားသုံးသူပြည်သူ(၆၀)ဦးအား စားသုံးသူကာကွယ်ရေးအသိပညာပေး ဆောင်ရွက်ခဲ့ပါသည်။

          ထိုသို့ အသိပညာပေးဟောပြောရာတွင် ဦးဇေယျာအောင် (ခရိုင်ဦးစီးမှူး)က စားသုံးသူ ကာကွယ်ရေးဥပဒေ အခန်း(၁)၊ပုဒ်မ(၂)ပါ စားသုံးသူကာကွယ်ရေးနှင့် စားသုံးသူ၏ အဓိပ္ပာယ်ဖွင့်ဆို ချက်အကြောင်း၊ ဥပဒေ အခန်း(၉)၊ ပုဒ်မ(၂၀)ပါ  စားသုံးသူ၏တာဝန်များအကြောင်း၊ ဥပဒေ အခန်း(၉)၊ ပုဒ်မ(၁၉)ပါ  စားသုံးသူ၏ အခွင့်အရေးများဖြစ်သော ကုန်စည် သို့မဟုတ်  ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေခြင်း၊ ဘေးအန္တရာယ်ကင်းရှင်းစွာ  အသုံးပြုခွင့် ရှိခြင်း၊ ကုန်စည် သို့မဟုတ်   ဝန်ဆောင်မှုကို  ရွေးချယ်ဝယ်ယူအသုံးပြုရာတွင် လိုအပ်သောသတင်း အချက်အလက်များ ပြည့်စုံမှန်ကန်စွာသိရှိခွင့်နှင့် ပြေစာ သို့မဟုတ် အထောက် အထားရယူခွင့်ရှိခြင်း၊ စားသုံးသူများ စိတ်ကြိုက်‌ရွေးချယ်ဝယ်ယူနိုင်ခွင့်ရှိခြင်း စသည့်အချက်များအကြောင်း၊  ကုန်စည်/ ဝန်ဆောင်မှုနှင့် စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့် အခွင့်အရေး နှင့် တက်ရောက်လာသော  စားသုံးသူများအား Consumer Call Center 1535 သို့ လက်တွေ့ခေါ် ဆို၍ တိုင်ကြားရမည့်နည်းလမ်းများအကြောင်း၊ အွန်လိုင်းမှ ဈေးဝယ်ယူရာတွင် သတိထားဝယ်ယူ သင့်သည့် အချက်များအကြောင်း၊ Digital ငွေကြေးဝန်ဆောင်မှု ရယူအသုံးပြုရာတွင် စားသုံးသူများ ၏ ပုဂ္ဂိုလ်ရေးဆိုင်ရာ အချက်များကို လုံခြုံစိတ်ချရမှုရှိစေရေးအတွက် ဆောင်ရန်ရှောင်ရန်များ အကြောင်း၊ တရားမဝင်ကုန်သွယ်မှုတိုက်ဖျက်ရေးဆိုင်ရာ အကြောင်းတို့အား အသိပညာပေး ဟောပြောခဲ့ကြောင်း သတင်းရရှိပါသည်။

DOCA(ကချင်)

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေးတိုင်းဒေသကြီး ဦးစီးမှူးရုံးမှ စစ်ဆေးရေးအရာရှိများဦးဆောင်၍ အထွေထွေအုပ်ချုပ်ရေးဦးစီးဌာန၊ မန္တလေးမြို့တော် စည်ပင်သာယာရေးကော်မတီတို့နှင့် ပူးပေါင်း၍ ၂၈-၇-၂၀၂၆ ရက်နေ့ နံနက်(၁၀:၀၀)နာရီအချိန်တွင် ပြည်ကြီးတံခွန်မြို့နယ်၊ ချမ်းမြရွှေပြည်(ယာယီ) ကားကွင်းရှိ စည်းကမ်းထိန်းသိမ်းရေးနှင့်သာယာလှပရေး ကော်မတီရုံးခန်း၌ TikTok Social Media ပေါ်တွင် ကျော်စောသတင်းဖြစ်ခဲ့သော ထိုးမုန့်  အမှတ်တံဆိပ် များတွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စားသုံးသူကာကွယ်ရေးဥပဒေအရ ကုန်စည် အမျိုးအစားအလိုက် သတ်မှတ်ချက်များနှင့် ကိုက်ညီမှု ရှိ/မရှိ စစ်ဆေးခဲ့ရာ ကိုက်ညီမှု မရှိသည့်အတွက် ကျော်စောသတင်းတွင် ရောင်းချခဲ့သော ရောင်းချသူ ၊ တစ်ဆင့်ခံအနေဖြင့် ဖြန့်ဖြူးရောင်းချခဲ့သူနှင့် ထုတ်လုပ်သည့် လုပ်ငန်းရှင်များအား ခေါ်ယူ၍ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊တားမြစ်ချက်များနှင့် အခန်း(၁၈)ပါကုန်ပစ္စည်းထုပ်ပိုးမှုပေါ်တွင် ကုန်အညွှန်းအမှတ်အသား ဖော်ပြခြင်းဆိုင်ရာအချက်အလက်များနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် အမှတ်(၂/၂၀၁၉)ပါအချက်အလက်များအား အကျယ်တဝင့်ရှင်းလင်းပြောကြားပြီး လိုက်နာမှု မရှိပါက စားသုံးသူကာကွယ်ရေးဥပဒေအရ ထိရောက်စွာအရေးယူခြင်းခံရမည်ကို သိရှိပါကြောင်း ဝန်ခံကတိပြု လက်မှတ်ရေးထိုးစေခဲ့ပါသည်။

          အဆိုပါကိစ္စနှင့်စပ်လျဉ်း၍ ၄-၈-၂၀၂၆ ရက်နေ့ နံနက်(၁၀:၃၀)နာရီအချိန်တွင် စားသုံးသူရေးရာ ဦးစီးဌာန၊ မန္တလေးတိုင်းဒေသကြီးဦးစီးမှူးရုံးမှ စစ်ဆေးရေးအရာရှိများဦးဆောင်၍ မြန်မာနိုင်ငံရဲတပ်ဖွဲ့၊ အထွေထွေအုပ်ချုပ်ရေးဦးစီးဌာန၊ မန္တလေးမြို့တော် စည်ပင်သာယာရေးကော်မတီတို့နှင့် ပူးပေါင်း၍ ပြည်ကြီးတံခွန်မြို့နယ်၊ ချမ်းမြရွှေပြည် (ယာယီ)ကားကွင်းရှိ စည်းကမ်းထိန်းသိမ်းရေးနှင့်သာယာလှပရေး ကော်မတီရုံးခန်း၌ချမ်းမြရွှေပြည်(ယာယီ)ကားကွင်းတွင်တစ်ဆင့်ခံဖြန့်ဖြူးရောင်းချသည့် ဈေးသည်များ၊ ဆိုင်ခန်းများဖြင့် ရောင်းချ နေသည့် ဈေးသည်များနှင့် ခြင်းဆွဲ ရောင်းချသည့် ဈေးသည်များအား ခေါ်ယူ၍  TikTok Social Media ပေါ်တွင် ကျော်စောသတင်းဖြစ်ခဲ့သော ထိုးမုန့်  အမှတ်တံဆိပ်များနှင့် စပ်လျဉ်း၍ အခြားအမှတ်တံဆိပ် များတွင်လည်း နောင်တွင် အလားတူဖြစ်စဉ်မျိုး မဖြစ်ပွားရန် စားသုံးသူကာကွယ်ရေးဥပဒေ ပုဒ်မ ၄၁ အရ စီးပွားရေးလုပ်ငန်းရှင်သည် ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ကုန်စည်အမျိုးအစား အလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြရန်လိုအပ်ကြောင်း၊ ပုဒ်မ ၄၃ အရ မည်သည့် စီးပွားရေးလုပ်ငန်းရှင်မဆို ပုဒ်မ ၄၁ ပုဒ်မခွဲ(ခ)နှင့်(ဆ) တို့ပါ ကုန်အညွှန်းအမှတ်အသားဖော်ပြရာတွင် မြန်မာ ဘာသာဖြင့်ဖြစ်စေ၊ မြန်မာဘာသာနှင့် အခြားဘာသာ တစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည် ဖြစ်ကြောင်း၊ ပုဒ်မ ၆၈ အရ စီးပွားရေးလုပ်ငန်းရှင် မည်သူမျှ ကုန်အညွှန်းအမှတ် အသားများ ဖော်ပြရာတွင် ပုဒ်မ ၄၃ ပါ ပြဋ္ဌာန်းချက်နှင့် ကိုက်ညီမှုမရှိသည့် ကုန်စည်ကို ထုတ်လုပ်ခြင်း၊ ကုန်သွယ်ခြင်း သို့မဟုတ်  ရောင်းချခြင်း မပြုကြောင်းနှင့် ပုဒ်မ ၇၃ အရ စီးပွားရေးလုပ်ငန်းရှင် မည်သူမဆို ပုဒ်မ ၆၇ နှင့် ၆၈ တို့ပါ တားမြစ်ချက် တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်း ခံရလျှင် ထိုသူကို နှစ်နှစ်ထက်မပိုသော ထောင်ဒဏ် ဖြစ်စေ၊ ကျပ်သိန်း ၂၀၀ ထက်မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ခံရနိုင်မည် ဖြစ်ကြောင်းနှင့် ကုန်အညွှန်းအမှတ်အသားဖော်ပြချက်များနှင့် ကိုက်ညီမှုမရှိသော ကုန်စည်များအား ကုန်အညွှန်းအမှတ်အသား ပြည့်စုံစွာပါဝင်နိုင်ရေးအတွက် မန္တလေးတိုင်းဒေသကြီး၊ စားသုံးသူရေးရာဦးစီး ဌာနသို့ Call Center 1535 မှတစ်ဆင့် လိုင်းနံပါတ် 3 အား ရွေးချယ်၍ ဆက်သွယ်စုံစမ်းမေးမြန်း နိုင်ကြောင်း၊ အွန်လိုင်းစနစ်မှတစ်ဆင့် ရောင်းချမည် ဆိုပါက Online Sale မှတ်ပုံတင်လက်မှတ် လျှောက်ထားရယူပြီးမှသာ ရောင်းချရန်နှင့် ရောင်းချသော ကုန်စည် ဝန်ဆောင်မှုသည် စားသုံးသူ ကာကွယ်ရေးဥပဒေအပါအဝင် သက်ဆိုင်ရာဌာနများ၏ထောက်ခံချက်၊ ညွှန်ကြားချက်များနှင့် ကိုက်ညီမှု ရှိသည့်ကုန်စည်ဝန်ဆောင်မှုများကိုသာ ရောင်းချဆောင်ရွက်ရမည ဖြစ်ကြောင်းနှင့်  ဥပဒေပါပြဋ္ဌာန်းချက် များကိုလည်း သိရှိလိုက်နာ ဆောင်ရွက်ရန် လိုအပ်ကြောင်း အသိပညာပေး ဆွေးနွေးခဲ့ကြောင်း သတင်း ရရှိပါသည်။

DOCA(မန္တလေး)      

    ကချင်ပြည်နယ်အတွင်း ဆန်စပါးဈေးနှုန်းတည်ငြိမ်စေ‌‌ရေးအတွက် ၆-၈-၂၀၂၆ရက်နေ့ ၁၀း၀၀ နာရီ အချိန်တွင် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ မြို့နယ်အထွေထွေအုပ်ချုပ်ရေး ဦးစီးဌာန၊ မြို့နယ်စည်ပင်သာယာရေးအဖွဲ့၊ ပြည်နယ်ဆန်ကုန်သည်နှင့် ဆန်လုပ်ငန်းရှင်များအသင်း မှဥက္ကဋ္ဌနှင့် ဆန်/ပွဲရုံလုပ်ငန်းရှင်များပူးပေါင်း၍ အစည်းအဝေးကျင်းပပြုခဲ့ပါသည်။

    အဆိုပါအစည်းအဝေးတွင် ကချင်ပြည်နယ် ဆန်စပါးကြီးကြပ်ရေးအဖွဲ့၏ အတွင်းရေးမှူး (ပြည်နယ်ဦးစီးမှူး) ဦးကျော်နိုင်လင်းက ဆွေးနွေးပြောကြားရာတွင် စီးပွားရေးနှင့်ကူးသန်းရောင်း ဝယ်ရေးဝန်ကြီးဌာနအနေဖြင့် ပြည်တွင်းဆန်စပါးဖူလုံရေး၊ ပြည်ပသို့စနစ်တကျတင်ပို့ ရောင်းချ နိုင်ရေး၊ ဆန်စပါးဈေးကွက် ဈေးနှုန်းတည်ငြိမ် မှန်ကန်ရေးနှင့် ဒေသအလိုက် စိုက်ပျိုးထွက်ရှိမှု၊ စားသုံးပိုလျှံမှု၊ ဈေးကွက်ဈေးနှုန်းဖြစ်ပေါ်မှု အခြေအနေများအား သက်ဆိုင်ရာအသင်း အဖွဲ့များနှင့် ပူးပေါင်း၍ ထိန်းကျောင်းဆောင်ရွက်လျက်ရှိကြောင်း၊ ပြည်နယ်အတွင်း ဈေးနှုန်းများကြီးမြင့်မှု မရှိစေရေး၊ ဈေးကွက်နှင့်ဈေးနှုန်း တည်ငြိမ်မှန်ကန်စေရေး၊ သမားရိုးကျရောင်းဝယ်ခြင်း မဟုတ်သောဈေးကစား လိုသည့်ရည်ရွယ် ချက်ဖြင့်သိုလှောင်ခြင်း၊ ဈေးနှုန်းမြှင့်တင်ရောင်းချခြင်းများ မပြုလုပ်ရန်လိုအပ်ကြောင်း၊ ဆန်လုပ်ငန်းရှင်များအနေဖြင့် ထိုက်သင့်သော အကျိုးအမြတ်ရရှိပြီး ဈေးကွက်တွင် သင့်တင့်မျှတသောဈေးနှုန်းဖြင့် ဝယ်ယူရောင်းချရန် လိုအပ်ကြောင်း၊ ပြည်နယ်အတွင်း ဆန်‌ဈေးနှုန်း တည်ငြိမ်‌ရေးအတွက် ဝိုင်းဝန်းထိန်းကျောင်း ဆောင်ရွက်သွားရ မည်ဖြစ်ကြောင်း ဆွေးနွေးပြောကြားခဲ့သည်။

     ဆက်လက်၍ ၂၀၂၆ ခုနှစ် ဖေဖော်ဝါရီလမှ ဇွန်လအထိ စစ်ကိုင်းတိုင်းဒေသကြီး ရွှေဘိုခရိုင်မှ ကချင်ပြည်နယ်သို့ ပေါ်ဆန်းဆန်စီးဝင်မှုများ အထိုက်အ‌လျောက်ရှိပါကြောင်း၊ လမ်းပန်းဆက်သွယ် ရေးအခက်အခဲများကြောင့် သယ်ယူစရိတ်ကြီးမြင့်ခြင်း၊ အခြေအနေများကြုံတွေ့နေရသော်လည်း ဆန်ကုန်သည် အသင်းနှင့် ဆန်လုပ်ငန်းရှင်များအနေဖြင့် သယ်ယူ/သိုလှောင်စရိတ်အပါဝင် အမြတ် ၈ ရာခိုင်နှုန်း ထက်မပိုသော အမြတ်ဖြင့်သာ ရောင်းချရန်လိုအပ်ကြောင်း၊ ပြည်နယ်အတွင်း ဆန်ဈေးနှုန်း တည်ငြိမ်ရေးအတွက် မြစ်ကြီးနားမြို့နှင့် မိုးညှင်းမြို့ပေါ်ရှိ ဆန်ဆိုင်/ ပွဲရုံများအား သက်ဆိုင်ရာ ခရိုင်ဆန်စပါးလုပ်ငန်းကြီးကြပ်ရေးအဖွဲ့များက ကွင်းဆင်းစစ်ဆေး သွားမှာဖြစ်ကြောင်း ပြောကြားခဲ့ ပါသည်။

      ဆက်လက်၍ ဆန်စပါးသိုလှောင်ခြင်းများနှင့်စပ်လျဉ်း၍ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနက ၂၀၂၄ ခုနှစ်တွင် “ဆန်စပါးသိုလှောင်ရုံ မှတ်ပုံတင်ခြင်းဆိုင်ရာအမိန့်” ကို အမိန့်အမှတ် (၈၂/၂၀၂၄)ဖြင့် ထုတ်ပြန်ထားရှိကြောင်း၊ အဆိုပါအမိန့်အရ ဆန်ဆိုင်/ပွဲရုံလုပ်ငန်းရှင်များအနေဖြင့် စီးပွားရေးလုပ်ငန်းဆောင်ရွက်ရန်အလို့ငှာ ဆန်တန်ချိန်၂၅ နှင့်အထက် သို့မဟုတ် စပါးတင်း၂၅၀၀ နှင့် အထက် သိုလှောင်ရုံ တစ်မျိုးမျိုးကို ပိုင်ဆိုင်သူသည် မြန်မာဆန်စပါးအွန်လိုင်း (Myanmar Rice Online- My RO) ၏ Website ဖြစ်သည့် www. myro. Com.mm တွင် ဆန်စပါးသိုလှောင်ရုံ မှတ်ပုံတင်ခြင်းလုပ်ငန်းများကို ဆောင်ရွက်ရမည်ဖြစ်ကြောင်း၊ လုပ်ငန်းရှင်များအနေဖြင့်လည်း ဆန်တန်ချိန် ၂၅ တန်အထက် သိုလှောင်ရုံတွင် သိုလှောင်ထားရှိပါက မှတ်ပုံတင်ထားရန် လိုအပ်ကြောင်း၊ မှတ်ပုံတင်ရန်အခက်အခဲရှိပါက ပြည်နယ်ဦးစီးမှူးရုံးအနေဖြင့် ကူညီဆောင်ရွက် ပေးသွားမှာဖြစ်ပါကြောင်း ဆွေးနွေးပြောကြားခဲ့ပြီး တက်‌ရောက်လာသည့် ဌာနဆိုင်ရာများ၊ ပြည်နယ်ဆန်စပါးအသင်းဥက္ကဋ္ဌနှင့် ဆန်ဆိုင်/ပွဲရုံလုပ်ငန်းရှင်တို့က အသီးသီးဆွေးနွေး တင်ပြခဲ့ကြ ကြောင်း သတင်းရရှိပါသည်။

DOCA(ကချင်)