သတင်းနှင့် လှုပ်ရှားမှုများ

                  ၂၀၂၆ ခုနှစ်၊ ဧပြီလ (၂)ရက်နေ့၊ နံနက် (၁၀:၀၀)နာရီအချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူး ဦးအောင်လင်းဦး (ဦးစီးမှူး)နှင့် တာဝန်ရှိသူများသည် ကျိုင်းတုံမြို့၊ ရပ်ကွက် (၁)၊ ယန်းခမ်းရပ်အတွင်းရှိ Online စနစ်ဖြင့် အလှကုန်၊ Fancy ပစ္စည်းနှင့် အိတ်အမျိုးမျိုး လက်လီ/လက်ကား ရောင်းချသည့် ဟွမ်မွေ Online Shop လုပ်ငန်းအား ကွင်းဆင်းစစ်ဆေးခြင်းလုပ်ငန်း ဆောင်ရွက်ခဲ့ပါသည်။

                       ထိုသို့ ကွင်းဆင်းစစ်ဆေးရာ၌ တာဝန်ရှိသူများသည် Online စနစ်ဖြင့် ရောင်းဝယ်မှု ပြုလုပ်ရာ တွင် သက်ဆိုင်ရာဌာန၏ ထောက်ခံချက်မှတ်ပုံတင်ပြုလုပ်၍ စနစ်တကျဖြန့်ဖြူး ရောင်းဝယ်မှု ပြုလုပ်ရန်၊ အရေးကြီးကုန်စည်နှင့်ဝန်ဆောင်မှုဥပဒေပါအတိုင်း လိုက်နာဆောင်ရွက်ရန်နှင့် စားသုံးသူ ကာကွယ်ရေးဥပဒေ အခန်း (၁၀)ပါ “စီးပွားရေးလုပ်ငန်းရှင်၏တာဝန်များ”ကို လိုက်နာဆောင်ရွက် ရန် အသိပညာပေးခြင်းလုပ်ငန်းများ ဆောင်ရွက်ခဲ့ပါသည်။ 

DOCA(ရှမ်း)

           စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဒေါ်မိုးမိုးကြည်နှင့်ဝန်ထမ်းများသည်  မြို့နယ်စည်ပင်သာယာရေးဦးစီးဌာနတို့ ပူးပေါင်း၍ သာကေတမြို့နယ်ရှိ၊ (မျိုးမြန်မာ) သောက်ရေသန့်လုပ်ငန်းမှ တာဝန်ခံနှင့် တွေ့ဆုံ၍ ၆.၄.၂၀၂၆ ရက်နေ့၊ နံနက်(၁၀:၀၀)နာရီအချိန်တွင် ထုတ်ကုန်များလုံခြုံစိတ်ချရမှုရှိစေရန်အတွက် ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

     ထိုသို့စစ်ဆေးရာတွင် သောက်ရေသန့်လုပ်ငန်းများသည် စားသုံးသူကာကွယ်ရေးဥပဒေအခန်း(၁၈)ပါ “ကုန်အညွှန်အမှတ်အသားဖော်ပြခြင်း”နှင့်ပတ်သက်၍ ပြည့်စုံစွာဖော်ပြထားပြီး ထုတ်ကုန်များကိုလဲ သန့်ရှင်းသပ်ရပ်စွာထုတ်လုပ်ဖြန့်ချိသည်ကို စစ်ဆေးတွေ့ရှိရပါသည်။ ထိုနောက် စစ်ဆေးရေးမှူးနှင့်ဌာနဆိုင်ရာတာဝန်ရှိသူများသည် လုပ်ငန်းများရှင်အား စားသုံးသူများဘေးအန္တ ရာယ်ကင်းရှင်းစေရေးကို အလေးထားဆောင်ရွက်ရန်၊ ထုတ်လုပ်မှုအဆင့်တိုင်းစနစ်တကျရှိစေရန်၊ သက်ဆိုင်ရာဌာနများ၏ လုပ်ငန်းလိုင်စင်သက်တမ်းတိုးခြင်းများဆောင်ရွက်ရန်၊  စားသုံးသူကာ ကွယ်ရေးဥပဒေအခန်း(၁၀)ပါ “စီးပွားရေးလုပ်ငန်းရှင်၏ တာဝန်များ”ကို လိုက်နာဆောင်ရွက်ရန်ပြောကြားခဲ့ပြီး စားသုံးသူရေးရာဦးစီးဌာနမှ ဈေးကွက်စောင့်ကြည့်စစ်ဆေးမှုအား စဉ်ဆက်မပြတ် ဆောင်ရွက်သွားမည်ဖြစ်ကြောင်း အသိပညာပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

                 စားသုံးသူရေးရာဦးစီးဌာန၊ နေပြည်တော်၊ ရုံးချုပ်မှ ဒုတိယညွှန်ကြားရေးမှူးချုပ်-၁ ဦးကျော်ကျော်လွင်သည် ၂၀၂၆ ခုနှစ်၊ ဧပြီလ ၅ ရက်နေ့ နေ့လည်(၁၃း၃၀)နာရီအချိန်တွင် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံး၌ စစ်ကိုင်းခရိုင်ရှိ ပြည်သူဆီထုတ် ကိုယ်စား လှယ်များနှင့် စက်မှုလုပ်ငန်းသုံးဆီထုတ်ကိုယ်စားလှယ်များနှင့် တွေ့ဆုံဆွေးနွေးခဲ့ပါသည်။

          အဆိုပါတွေ့ဆုံဆွေးနွေးပွဲတွင် ဒုတိယညွှန်ကြားရေးချုပ်-၁ ဦးကျော်ကျော်လွင်မှ မိမိအနေဖြင့်  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ပြည်ထောင်စုဝန်ကြီး၏တာဝန်ပေးချက်အရမန္တလေးမြို့နှင့်စစ်ကိုင်းမြို့တွင်စားအုန်းဆီ(၁)ပိဿာ (၁၆၀၀၀/၁၇၀၀၀/၁၈၀၀၀)ကျပ်ဖြစ်နေ၍ မြေပြင်အခြေအနေ ကွင်းဆင်းစိစစ်တင်ပြရန် လာရောက်ရခြင်းဖြစ်ကြောင်း၊ စစ်ကိုင်းတိုင်းအနေဖြင့် ဆီထွက်သီးနှံ စိုက်ပျိုးထွက်ရှိမှုများသည့် တိုင်းဖြစ်၍ တန်(၇၀၀) သာခွဲတမ်းပေးနိုင်ကြောင်း၊ ပေးထားသည့် ခွဲတမ်းအနေဖြင့်လည်း နည်းပါကြောင်း၊ ခွဲတမ်းရသည့်ဆီများအား သတ်မှတ်သည့် တိုင်း/နေရာဒေသသို့ အရောက်သယ်၍ သတ်မှတ်ဈေးနှုန်းဖြင့် ပြည်သူလက်ဝယ်အရောက် ရောင်းချရန်လိုအပ်ကြောင်း၊ စက်မှုလုပ်ငန်းသုံးဆီများအားလည်း သက်ဆိုင်ရာလုပ်ငန်းတွေဆီ ဖြန့်ဖြူးရောင်းချပေးရမှာဖြစ်ကြောင်း၊ မိမိဒေသသို့သာ အရောက်သယ်၍ သတ်မှတ်ရည်ညွှန်း ဈေးနှုန်းဖြင့် ရောင်းချကြရမှာဖြစ်ကြောင်း၊ စားအုန်းဆီသည် အရေးကြီးကုန်စည်ဖြစ်သည့်အတွက် အတိုင်ခံရ၍ ပြဿနာတစုံတရာဖြစ်ပါက လုံးဝအာမခံ မရကြောင်း၊ အနည်းဆုံး ထောင်ဒဏ် (၆)လ မှ (၂)နှစ်ထိ ချမှတ်နိုင်ကြောင်း၊ မြန်မာနိုင်ငံမှာနေလျှင် မြန်မာနိုင်ငံ၏ ပြဌာန်းထားသော ဥပဒေ၊ မူဝါဒများကို လိုက်နာရမည်ဖြစ်ကြောင်း၊ စားသုံးဆီသည် သခင်ချစ်ပါကြောင်း၊ အကျိုးအမြတ် လည်းရှိပါကြောင်း၊ ဆီကိုနေရာတိုင်းမှာ မပါမဖြစ်အသုံးပြုမှု များသလို ကောင်းကျိုးများစွာရှိကြောင်း၊ ဆီလုပ်ငန်းရှင်များအနေဖြင့် သမာအာစီဝကျပြီး အတ္တနှင့် ပတ္တမျှတအောင် လုပ်ဆောင်ကြရန် လိုကြောင်း ဆွေးနွေးပြောကြားပါသည်။

                      စက်မှုလုပ်ငန်းသုံးဆီထုတ်ကိုယ်စားလှယ်များအနေဖြင့်လည်း လိုအပ်သလောက်သာ တင်ပြ တောင်းခံသွားကြရန်၊ စက်မှုဆီ တစ်ပြည်လုံးလိုအပ်ချက်မှာ တန်ချိန်(၁၀၀၀၀)ဖြစ်သော်လည်း လျှောက်ထားချက်မှာ တန်ချိန်(၄၀၀၀၀)ကျော် ဖြစ်နေပါကြောင်း၊ မိမိတို့အနေဖြင့် တစ်လ တန်ချိန် (၁၅၀၀၀) ကို တစ်လလုံးစာ တစ်ခါတည်း ခွဲရတာမဟုတ်ကြောင်း၊ တစ်ကြိမ်ခွဲလျှင် တန်ချိန်(၃၀၀၀/ ၄၀၀၀) သာခွဲတမ်းချရသည်ဖြစ်၍ တစ်ဦးချင်း (၁)ပေပါနှုန်းဖြင့် ဦး(၂၀၀) တောင်းမည့်အစား (၂၀)ဦး ပေပါ (၂၀၀)နှုန်းဖြင့်တောင်းခံပါက မိမိတို့အနေဖြင့် ခွဲတမ်းချရမှာ   လွယ်ကူကြောင်း၊ ဥပမာ-လုပ်ငန်းရှင် (၂၀၀)ဦး (၁)ပေပါနှုန်းအား (၁၀%)ချပေးလျှင် တစ်ဦးလျှင် (၁၀)ကျပ်သားနှုန်းသာ ၂ရမည်ဖြစ်၍ မိမိတို့မှာ အနည်းဆုံး (၁) ပေပါသာ ချခွင့်ရှိကြောင်း၊  Supply နှင့် Demand မျှဘို့ လိုကြောင်း ဆွေးနွေးပြောကြားပါသည်။

            နှစ်စဥ် နိုဝင်ဘာလမှ ဖေဖော်ဝါရီလထိ ဆီဈေးနှုန်းကျတတ်၍ ထုတ်ယူမှုနည်းကြောင်း၊ ကျန်လများတွင် ထုတ်ယူမှုများကြောင်း၊ ဈေးကျသည်ဖြစ်စေ၊ ဈေးတက်သည်ဖြစ်စေ ရရှိသည့် ခွဲတမ်းဆီများအား အပြည့်အဝ ကိုယ့်မြို့နယ်ကိုယ်သယ်၍  လက်ဝယ်အရာက်ရောင်းချကြရန် လိုကြောင်း၊  မိမိလာသည်မှာ အချက်ပေးခေါင်းလောင်း လာထိုးတာဖြစ်ကြောင်း၊ ယခုမိမိလာသည့် အချိန်မှစ၍ ကိုယ်စားလှယ်များအနေဖြင့် မလိုလားအပ်သော ဘေးဒုက္ခများ မကျရောက်အောင် ဆီနှင့်ပတ်သတ်၍ သတ်မှတ်ချက်များအတိုင်း သယ်ယူဖြန့်ဖြူးရောင်းချခြင်းကို မှီတဲ့နေရာက လိုက်နာဆောင်ရွက်ကြပါစေလိုကြောင်း ပြည်သူဆီနှင့်စက်မှုဆီကိစ္စ ဆောင်ရွက်ရန်အတွက် တိုင်းဆီကုန်သည်နှင့် ဆီလုပ်ငန်းရှင်များအသင်းကို မာမာခြာခြာ ဖွဲ့စည်းဆောင်ရွက်သွားရန် လိုကြောင်း၊ နောင်တချိန်တွင် အစိုးရဆိုဒ်က နောက်ဆုတ်ပြီး အသင်းများက ဦးဆောင်၍ လုပ်ကိုင် ဆောင်ရွက်ကြရမှာဖြစ်ကြောင်း တွေ့ဆုံပြောကြားခဲ့ပါကြောင်း  သိရှိရပါသည်။

DOCA(စစ်ကိုင်း)

         ဧရာဝတီတိုင်းဒေသကြီး၊ မအူပင်ခရိုင် စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူးရုံးအနေဖြင့် စားသုံးသူပြည်သူများ ကုန်စည်နှင့် ဝန်ဆောင်မှုများသုံးစွဲရာတွင် ထိခိုက်နစ်နာမှုမရှိစေရေး၊ လုံခြုံစိတ်ချရမှုရှိစေရေး၊ ဥပဒေ ပြဌာန်းချက်များနှင့် ကိုက်ညီမှုမရှိဘဲ မမှန်မကန်ထုတ်လုပ်ဖြန့်ဖြူး ရောင်းချလျက်ရှိသော ကုန်စည်များနှင့် လုံခြုံစိတ်ချရမှုမရှိသော ကုန်စည်များ လျော့နည်းပပျောက်သွားစေရေးတို့အတွက် ဈေးကွက်များအတွင်းရောင်းချမှုမရှိစေရေး ဈေးကွက်စောင့်ကြည့် စစ်ဆေးခြင်းများကို ၁.၄.၂၀၂၆ ရက်နေ့ နံနက် (၁၀း၀၀)နာရီအချိန်က ဆေးဆိုင်များအား စစ်ဆေးဆောင်ရွက်ခဲ့ကြောင်း သိရသည်။

           စားသုံးသူ ရေးရာဦးစီးဌာန၊ ညောင်တုန်းမြို့နယ်ဦးစီးမှူး ဦးဆောင်၍ စစ်ဆေးရေးမှူးများသည် မြို့ပေါ် ဆေးနှင့် ဆေးပစ္စည်းရောင်းချသော ဆေးဝါးများနှင့် ဆေးအပိုပစ္စည်းများတွင် အရည်အသွေးမပြည့်မီသည့် ဆေးဝါးများ၊ ဆေးဝါးအတုများ၊ သက်တမ်းလွန်ဆေးဝါးများနှင့် ခွင့်ပြုလိုင်စင်မရှိသည့် ထိန်းချုပ်ဆေးဝါးများအား ရောင်းချခြင်းများမရှိစေရေး၊ သက်ဆိုင်ရာဌာနထောက်ခံချက်ပါဝင်သော ဆေးဝါးများနှင့်စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းများနှင့် ကိုက်ညီသော ဆေးဝါးများသာရောင်းချစေရေး၊ သတ်မှတ်ချက်နှင့်ကိုက်ညီသောဆေးဝါးများ ရောင်းချရာတွင် လက်ကားဈေးအပေါ်တွင် ဒေသပေါက်ဈေးထက် ဈေးနှုန်းပိုမိုသော အမြတ်တင်ရောင်းချမှုများမဖြစ်ပေါ်စေရေး၊ ဆေးဝါးလက်ကျန်အခြေအနေနှင့် ဆေးဝါးများပြတ်လပ်မှု မဖြစ်ပေါ်စေရေး၊ ဈေးနှုန်းဈေးကွက်အခြေအနေများအား ကွင်းဆင်း ဈေးကွက်စောင့်ကြည့် စစ်ဆေးခဲ့ကြောင်း သိရှိရပါသည်။

DOCA(ဧရာဝတီ)

                        စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ဝန်ထမ်း (၂) ဦးတို့သည်‌ ဆေးနှင့်ဆေး ပစ္စည်းများအား လက်ကားဈေးပေါ်တွင် ဒေသပေါက်ဈေးထက် ဈေးနှုန်းပိုမိုအမြတ်တင်ပြီး လက်လီ ရောင်းချနေမှုအပေါ် ဈေးနှုန်းတည်ငြိမ်စေရေးအတွက် မြို့နယ်စည်ပင်သာယာရေးအဖွဲ့မှ တာဝန်ရှိသူ များနှင့်အတူ ၂၀၂၆ ခုနှစ်၊ မတ်လ ၂၆ ရက်နေ့တွင် စစ်ကိုင်းမြို့ပေါ်ရှိ ဆေးနှင့်ဆေးပစ္စည်း အရောင်းဆိုင်များဖြစ်သော “နန္ဒဝန်”နှင့် ”ဆေးဘုရင်”ဆေးဆိုင်များအား ကွင်းဆင်းစစ်ဆေး ဆောင်ရွက်ရာတွင် “နန္ဒဝန်”နှင့်”ဆေးဘုရင်”ဆေးဆိုင်များအနေဖြင့် ကုမ္ပဏီများမှ ခွဲတမ်းရရှိမှု အပေါ်မူတည်၍ ၃ ရာခိုင်နှုန်းမှ ၅ ရာခိုင်နှုန်းထိ အမြတ်တင်ရောင်းချခြင်းများ ရှိသလို ဆေးကဒ် တစ်ကဒ်အား ၁၀ဝိ/- မှ ၂၀ဝိ/- ထိ အရေအတွက်ပေါ်မူတည်၍သာ အမြတ်ယူ ရောင်းချကြကြောင်း၊ ကုမ္ပဏီများထံမှ ဝယ်ယူရသည့် ဈေးနှုန်းအပေါ်အခြေပြု၍ ဈေးနှုန်းအပြောင်း အလဲများဖြစ်ပေါ် လျက်ရှိကြောင်း၊ အဆိုပါ ဆေးဆိုင်(၂)ဆိုင်မှ သောက်ဆေး၊ ထိုးဆေး အပါအဝင် အမျိုးအစားတူ ဆေးဝါးအမျိုးအစား(၇၀၀)နီးပါးရှိကြောင်း သိရှိရပြီး စားသုံးသူရေးရာဦးစီးဌာနမှ တာဝန်ရှိသူများက ဆေးအရောင်းဆိုင် ပိုင်ရှင်များအနေဖြင့်တရားဝင်ဆေးဝါးမှတ်ပုံတင်လျှောက်ထား ရရှိပြီးသော ဆေးဝါးများကို တင်သွင်းဖြန့်ဖြူးရောင်းချရန်နှင့် ဆေးနှင့်ဆေးပစ္စည်းများကို ဈေးနှုန်း မြှင့်တင် ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းများ မပြုလုပ်ရန် ဆွေးနွေးပြောကြားခဲ့ကြောင်း သတင်းရရှိပါသည်။

DOCA( စစ်ကိုင်း)