သတင်းနှင့် လှုပ်ရှားမှုများ

စားအုန်းဆီအခြေခံလက်ကား ရည်ညွှန်းဈေးနှုန်း တစ်ပိဿာ ငွေကျပ် ၇,၂၂၀ ဖြစ်ကြောင်း ထုတ်ပြန်ကြေညာ

စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းပြီး သင့်တင့်သောဈေးနှုန်းဖြင့်ဝယ်ယူစားသုံးနိုင်စေရန်နှင့်ပြည်တွင်းလိုအပ်ချက်များကို ဖြည့်ဆည်း ပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ဆောင်ရွက်ပေးလျက်ရှိကြောင်း သိရပါသည်။

စားအုန်းဆီကို ပြည်ပမှဝယ်ယူတင်သွင်းရာတွင် စားအုန်းဆီ တင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့်ဈေးနှုန်းများ ဖြစ်ပေါ် စေရေးကို ထိန်းကျောင်းဆောင်ရွက်လျက်ရှိပါသည်။

ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှု များအရ ၂၀၂၆ ခုနှစ်၊ ဇူလိုင်လ 31 ရက်နေ့မှ ဩဂုတ်လ ၆ ရက်နေ့အထိ ရန်ကုန်အထိုင်ဈေး အခြေခံ လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၇,၂2၀ ဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန် ကြေညာထားကြောင်း သိရှိရပါသည်။

စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

အွန်လိုင်းဖြင့် အစားအသောက်ဝန်ဆောင်မှု ရောင်းချသည့် လုပ်ငန်းရှင်အား တွေ့ဆုံ အသိပညာပေးခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှု၊ ပခုက္ကူခရိုင်ဦးစီးမှူး၏ကြီးကြပ်မှုဖြင့် ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူးနှင့်ဝန်ထမ်းများသည် အရေးကြီးကုန်စည်နှင့် ဝန်ဆောင်မှု ဥပဒေအရ အွန်လိုင်းစနစ်ဖြင့် ရောင်းချခြင်းလုပ်ငန်းများ ဆောင်ရွက်သည့် လုပ်ငန်းရှင်များအနေဖြင့် မှတ်ပုံတင်လျှောက်ထားရန်အတွက် လျှောက်ထားရန် အခြေခံလိုအပ်ချက်များအပါအဝင်အခြားသိကောင်းစရာများအား သိရှိစေရန်ရည်ရွယ်၍ (၂၁.၇.၂၀၂၆)ရက်နေ့၊ နံနက် (၁၀:၀၀) နာရီအချိန်တွင် ပခုက္ကူမြို့ပေါ်ရှိ အစားအသောက်ရောင်းချသည့် လုပ်ငန်းရှင်နှင့် ပခုက္ကူခရိုင်ဦးစီးမှူးရုံး၌ တွေ့ဆုံအသိပညာပေး ဆောင်ရွက်ခဲ့ကြောင်း သိရသည်။

ထိုသို့အသိပညာပေးရာတွင် ဒု-ခရိုင်ဦးစီးမှူးက အွန်လိုင်းဖြင့်ရောင်းဝယ်မှုများ ပြုလုပ်ဆောင်ရွက်ရာတွင် လိမ်လည်မှုများ များပြားလာပြီး တိုင်ကြားမှုများ ရှိလာသောကြောင့် အွန်လိုင်းဖြင့် ရောင်းချနေသည့် လုပ်ငန်းရှင်များအနေဖြင့် အွန်လိုင်းမှတ်ပုံတင်ထားရန်လိုအပ်ကြောင်း၊ အွန်လိုင်းမှတ်ပုံတင်ထားခြင်းမရှိလျှင် အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း၊ အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးကုန်စည်နှင့် ဝန်ဆောင်မှုလုပ်ငန်းအဖြစ် သတ်မှတ်ထားသောကြောင့် မည်သူမဆိုအွန်လိုင်းစနစ်ဖြင့် ရောင်းခြင်းလုပ်ငန်းကို မှတ်ပုံတင်လက်မှတ်လျှောက်ထားရရှိပြီးမှ လုပ်ကိုင်ရန်လိုအပ်ကြောင်း၊ အမိန့်ကြော်ငြာစာထုတ်ပြန်ပြီး ခြောက်လပြည့်မြောက်သည့် နေ့ရက်မှစတင်၍ မှတ်ပုံတင်လက်မှတ်မရှိဘဲအွန်လိုင်းစနစ်ဖြင့် ရောင်းချခြင်းလုပ်ငန်းကို လုပ်ကိုင်ဆောင်ရွက်ကြောင်းတွေ့ရှိပါက အရေးကြီးကုန်စည်နှင့် ဝန်ဆောင်မှု ဥပဒေပုဒ်မ ၅ အရ အရေးယူခြင်းခံရမည်ဖြစ်ကြောင်း၊ ထိုသို့အွန်လိုင်းမှတ်ပုံတင်ထားခြင်းဖြင့် အွန်လိုင်းရောင်းချနေသောလုပ်ငန်းများမှ အဝတ်အထည်၊ အစားအသောက်၊ အလှကုန်ပစ္စည်းများ စသည့် ကုန်စည်အမျိုးမျိုးကို စားသုံးသူများအနေဖြင့် ဝယ်ယူသုံးစွဲရာတွင် ဘေးအန္တရာယ်ကင်းရှင်းပြီး အာမခံချက်များရရှိမည်ဖြစ်ကြောင်း၊ ထို့ကြောင့် လုပ်ငန်းရှင်များအား မိမိတို့ရောင်းချသည့် ကုန်စည်အမျိုးမျိုးအား ရောင်းချနေမှုအပေါ် မှတ်ပုံတင်လျှောက်ထားရန်အတွက် လျှောက်ထားရန် အခြေခံလိုအပ်ချက်များအပါအဝင် အခြားသိကောင်းစရာများနှင့် လိုအပ်သည်များကို အကြံပြု ဆွေးနွေးခဲ့ကြောင်း သိရှိရပါသည်။

DOCA(မ‌ကွေး)

မြေပြင်စစ်ဆေးအတည်ပြုပြီး မှတ်ပုံတင်လက်မှတ်ရရှိထားသည့် လုပ်ငန်းရှင်ထံသို့ သွားရောက် အသိပညာပေးဆွေးနွေးခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှု၊ ခရိုင်ဦးစီးမှူး၏ ကြီးကြပ်မှုဖြင့် ဒု-ခရိုင်ဦးစီးမှူးနှင့်ဝန်ထမ်းများသည် အွန်လိုင်းစနစ်ဖြင့် ရောင်းချခြင်းလုပ်ငန်းများကို အရေးကြီးကုန်စည်နှင့်ဝန်ဆောင်မှုလုပ်ငန်းအဖြစ် သတ်မှတ်ထားပြီးဖြစ်သည့်အတွက် ပခုက္ကူမြို့ပေါ်ရှိ အွန်လိုင်းစနစ်ဖြင့် ရောင်းချနေသော ယခင်အွန်လိုင်းမှတ်ပုံတင်ထားသည့် လုပ်ငန်းရှင်များ၊ မြေပြင်စစ်ဆေးအတည်ပြုပြီး မှတ်ပုံတင်လက်မှတ်ရရှိထားသည့် လုပ်ငန်းရှင်များအား အွန်လိုင်းစနစ်ဖြင့် ရောင်းချသည့် လုပ်ငန်းဆိုင်ရာအမိန့်ကြော်ငြာစာများ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်မျာနှင့်ကုန်အညွှန်းအမှတ်အသားဖော်ပြချက်များ သိရှိစေရန်ရည်ရွယ်၍ (၂၀.၇.၂၀၂၆)ရက်နေ့၊ နံနက်(၁၀:၀၀) နာရီအချိန်တွင် ပခုက္ကူမြို့ပေါ်ရှိ အွန်လိုင်းစနစ် ဖြင့်ရောင်းချသည့် လုပ်ငန်းရှင်ထံသို့ သွားရောက်တွေ့ဆုံ၍ အသိပညာပေးဆွေးနွေးခဲ့ကြောင်း သိရသည်။

ထိုသို့ အသိပညာပေးရာတွင် ဒု-ခရိုင်ဦးစီးမှူးက အွန်လိုင်းစနစ်ဖြင့် ရောင်းချသည့်လုပ်ငန်းဆိုင်ရာ အမိန့်ကြော်ငြာစာများ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များနှင့် ကုန်အညွှန်းအမှတ်အသားဖော်ပြချက်များအား အသိပညာပေးဆွေးနွေးခဲ့ပြီး မိမိတို့ ထုတ်လုပ် ဖြန့်ဖြူးရောင်းချလျက်ရှိသော ကုန်စည်များတွင် ကုန်အညွှန်းအမှတ်အသားများကို ပြည့်စုံစွာထည့်သွင်းဖော်ပြရန်နှင့် စီးပွားရေး လုပ်ငန်းရှင်များ၏ တာဝန်များကို သေချာစွာလိုက်နာရန် လိုအပ်ကြောင်း၊ အွန်လိုင်းစနစ်ဖြင့် ရောင်းချသည့် လုပ်ငန်းရှင်များထံသို့လည်း မြေပြင်ကွင်းဆင်း စစ်ဆေးအတည်ပြုခြင်းများ ဆောင်ရွက်လျက်ရှိကြောင်း၊ မှတ်ပုံတင်လက်မှတ်ရရှိထားသည့် လုပ်ငန်းရှင်များသည်(၂)နှစ်ပြည့်လျှင် သက်တမ်းတိုးရမည်ဖြစ်ကြောင်း၊ အွန်လိုင်းစနစ်ဖြင့် ရောင်းချခြင်းလုပ်ငန်းများနှင့် စပ်လျဉ်း၍ တိုင်ကြားခြင်း၊ ကျော်စောသတင်း၊ သက်ဆိုင်ရာအစိုးရဌာန၊ အစိုးရအဖွဲ့ အစည်းများ၏ အကြောင်းကြားမှု သို့မဟုတ် ကုန်သွယ်ရေး ဦးစီးဌာနမှ အချက်အလက်အထောက်အထားများနှင့် အတူ ပေးပို့ညှိနှိုင်းအကြောင်းကြားလာမှုအပေါ်တွင် အခြေခံ၍ မှတ်ပုံတင်လက်မှတ် ရရှိသူ၏ တာဝန်ဖောက်ဖျက်မှု ရှိ/ မရှိ အခြေအနေ၊ မှတ်ပုံတင်လက်မှတ်လျှောက်ထားရရှိမှုနှင့် စပ်လျဉ်း၍ လျှောက်ထားစဉ်က အချက်အလက်များနှင့် မြေပြင် အခြေအနေမှန်ကန်မှု ရှိ/ မရှိ အခြေအနေများအား ကွင်းဆင်းဆောင်ရွက်လျက်ရှိကြောင်း၊ သို့မှသာ စားသုံးသူပြည်သူများအနေဖြင့် လုံခြုံစိတ်ချရမှုရှိပြီးလိမ်လည်ရောင်းချခြင်းမှ ကင်းဝေးမည်ဖြစ်ကြောင်း၊ မှတ်ပုံတင် လက်မှတ်များရရှိထားသည့်အတွက် စားသုံးသူအခွင့်အရေးများလည်း ရရှိလာမည်ဖြစ်ကြောင်း အသိပညာပေးဆောင်ရွက်ခဲ့ကြောင်း သိရှိရပါသည်။

DOCA(မကွေး)

ပခုက္ကူမြို့ပေါ်တွင် အစားအသောက် ဝန်ဆောင်မှုကဏ္ဍနှင့်စပ်လျဉ်း၍ ကွင်းဆင်းစစ်ဆေးခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒု- ခရိုင်ဦးစီးမှူး နှင့်ဝန်ထမ်းများသည် တိုင်းဒေသကြီးဦးစီးမှူး၏လမ်းညွှန်မှု၊ ခရိုင်ဦးစီးမှူး၏ကြီးကြပ်မှုဖြင့် ထုတ်ကုန်များလုံခြုံစိတ်ချရမှုရှိစေရေးအတွက် (၂၀.၇.၂၀၂၆)ရက်နေ့၊ နံနက်(၁၀:၀၀)နာရီအချိန်တွင် အစားအသောက်ဝန်ဆောင်မှုကဏ္ဍနှင့် စပ်လျဉ်း၍ ပခုက္ကူမြို့ပေါ်ရှိ စားသောက်ဆိုင်များသို့ သွားရောက်၍ ကွင်းဆင်းစစ်ဆေးဆောင်ရွက်ခဲ့ကြောင်း သိရသည်။

ထိုသို့ ကွင်းဆင်းစစ်ဆေးရာတွင် ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူးနှင့် ပူးပေါင်းအဖွဲ့များသည် အစားအသောက်ရောင်းချသည့် လုပ်ငန်းရှင်များအား မိမိတို့ရောင်းချသော စားသောက်ဆိုင်များတွင် အစားအသောက်ပြုပြင် ရောင်းချသည့်နေရာများ သန့်ရှင်းမှုရှိစေရန်၊ အစားအသောက် ကိုင်တွယ်ချက်ပြုတ်သူများ၊ ဝန်ဆောင်မှုပေးသူများ၏ တစ်ကိုယ်ရေသန့်ရှင်းမှုများရှိစေရန်၊ မိမိတို့ဆိုင်များမှ ပေးအပ်သည့် ဝန်ဆောင်မှုနှင့် စပ်လျဉ်း၍ စားသုံးသူများအားလုံလောက်သည့် သတင်းအချက်အလက်များကို အသိပေးဖော်ပြစေရန်၊ စားသောက်ဖွယ်ရာများ၏ အမျိုးအစား၊ အရွယ်အစား ပမာဏအလိုက် ဈေးနှုန်းများအား စားသုံးသူများသိရှိစေရန် ပွင့်လင်းမြင်သာစွာ ကြိုတင်အသိပေး ဖော်ပြထားရန်လိုအပ်ကြောင်း၊ သို့မှသာ စားသောက်ဆိုင်၏ ဂုဏ်သတင်းများမှာလည်း ကျော်ကြားလာမည်ဖြစ်ကြောင်း အစားအသောက် ဝန်ဆောင်မှုကဏ္ဍအနေဖြင့် အသိပညာပေး ဆွေးနွေးခဲ့ကြောင်း သိရှိရပါသည်။

DOCA(မကွေး)

သဲကုန်းမြို့နယ် အင်းမမြို့ပေါ်ရှိ စားသောက်ဆိုင်ဝန်ဆောင်မှုအား ကွင်းဆင်းစစ်ဆေးခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ ပဲခူးတိုင်းဒေသကြီး(အနောက်)၊ နတ်တလင်းခရိုင်၊ သဲကုန်းမြို့ နယ်၊ အင်းမမြို့ပေါ်ရှိ ရေပြာထွန်းစားသောက်ဆိုင်သို့ ၂၀၂၆ခုနှစ်၊ ဇူလိုင်လ(၂၀)ရက် နေ့လည် (၁း၀၀)နာရီ အချိန်တွင် စားသုံးသူရေးရာဦးစီးဌာန၊ သဲကုန်းမြို့နယ်တာဝန်ခံ ဦးထင်ဇော်ထွန်း(ဒု-ဦးစီးမှူး)နှင့် ဝန်ထမ်းများသည် အင်းမမြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်ပြည်သူ့ ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ လုပ်ငန်းရှင်များနှင့် တွေ့ဆုံပြီး ကွင်းဆင်းစစ်ဆေးခဲ့ကြောင်း သိရပါသည်။

ထိုသို့ကွင်းဆင်းစစ်ဆေးရာ ပြုပြင်ရောင်းချမှုတွင် သန့်ရှင့်မှု ရှိ/မရှိ၊ ဝန်ဆောင်မှုပေးသူများ တစ်ကိုယ်ရေသန့်ရှင်းမှု ရှိ/မရှိ၊ ပေးအပ်သည့် ဝန်ဆောင်မှုနှင့်စပ်လျဉ်း၍ စားသုံးသူအား လုံလောက် သည့် သတင်းအချက်အလက်များကို အသိပေးခြင်း ရှိ/မရှိ၊ ဝန်ဆောင်မှုပေးအပ်သည့် အဖိုးအခမည်မျှကောက်ခံသွားမည်ကို ကြိုတင်အသိပေး ဖော်ပြထားခြင်းရှိ/မရှိ၊ ဝန်ဆောင်မှုပေးအပ် သည့် အဖိုးအခကောက်ခံခြင်းရှိ/မရှိ၊ ဈေးနှုန်း(Menu)ကဒ်အား ထားရှိမှုရှိ/မရှိ လုပ်သားများ ဆေးစစ်ထားရှိမှု ရှိ/မရှိ၊ ကုန်ကြမ်းများ သန့်ရှင့်လတ်ဆတ်မှုနှင့် ဘေးအန္တာရယ်ကင်းရှင်းမှု ရှိ/မရှိ၊ အသားငါးသိုလှောင်သည့် အခြေအနေ(ရေခဲသေတ္တာစသည်ဖြင့်) သန့်ရှင်းသပ်ရပ်မှုရှိ/မရှိ စစ်ဆေး ကြောင်းသိရပါသည်။

DOCA(ပဲခူး)

ရေနံချောင်းမြို့နယ်ရှိ ဆန်ဆိုင်များနှင့် ဆန်စက်များ MyRo တွင် ကုန်ရ၊ ကုန်ထုတ်၊ ကုန်လက်ကျန် မှန်ကန်စွာ ဖြည့်သွင်းနိုင်ရေး အသိပညာပေး

သတင်းနှင့် လှုပ်ရှားမှုများ

စားသုံးသူရေးရာဦးစီးဌာနနှင့် မြန်မာနိုင်ငံဆန်စပါးအသင်းတို့ ပူးပေါင်းအကောင်အထည်ဖော် ဆောင်ရွက်လျက်ရှိသည့် မြန်မာဆန်စပါးအွန်လိုင်း (Myanmar Rice Online- MyRo) တွင် ၂၀၂၃-ခုနှစ်၊ နိုဝင်ဘာလ ၃ ရက်နေ့မှစတင်၍ ဆန်တန်ချိန် (၂၅)နှင့်အထက် သိုလှောင်ရုံ (သို့) စပါးတင်း (၂၅၀၀)နှင့် အထက် သိုလှောင်ရုံများအား မှတ်ပုံတင်ခြင်းလုပ်ငန်းဆောင်ရွက်လျက်ရှိရာ မကွေးတိုင်းဒေသကြီးတွင် ခရိုင်၊ မြို့နယ်များမှ မှတ်ပုံတင်ထားရှိသည့် အလုံးရေ(၃၉၁)လုံးရှိပြီး ရေနံချောင်းမြို့နယ်အနေဖြင့် မှတ်ပုံတင်ထားရှိသည့် အလုံးရေ (၁၁)လုံး မှတ်ပုံတင်ထားရှိကြောင်း သိရသည်။

မကွေးတိုင်းဒေသကြီး၊ ရေနံချောင်းမြို့နယ်ရုံးမှ ဝန်ထမ်းများသည် (၂၄.၇.၂၀၂၆)ရက်နေ့၊ နေ့လယ် (၁၃:၃၀) နာရီအချိန်တွင် လစဉ် ကုန်ရ၊ ကုန်ထုတ်၊ ကုန်လက်ကျန်ဖြည့်သွင်းရန် ကျန်ရှိသည့် လုပ်ငန်းရှင်များ၊ တစ်နှစ်ပြည့်မြောက်ပြီး သိုလှောင်ရုံများ သက်တမ်းပြန်လည်တိုးနိုင်ရေးနှင့် www.myro.com. mm တွင် လစဉ်လဆန်း(၁)ရက်မှ (၁၀)ရက်နေ့အတွင်း ကုန်ရ၊ ကုန်ထုတ်၊ ကုန်လက်ကျန်အခြေအနေများကို မှန်ကန်စွာ ထည့်သွင်းပေးနိုင်ရေးတို့အား ကွင်းဆင်းအသိပညာပေးဆောင်ရွက်ခဲ့ကြောင်း သိရှိရပါသည်။

DOCA(မကွေး)

သာယာဝတီခရိုင်လက်ပံတန်းမြို့၌လစဉ်ကြာသပတေးနေ့ အသိပညာပေး Talk Show ကျင်းပခြင်း

သတင်းနှင့် လှုပ်ရှားမှုများ

ပဲခူးတိုင်းဒေသကြီး၊ သာယာဝတီခရိုင်၊စားသုံးသူရေးရာဦးစီးဌာနမှလစဉ်ကျင်းပပြုလုပ်သော ဝန်ထမ်းများ စွမ်းဆောင်ရည်မြှင့်တင်ရေးအတွက် အသိပညာပေး Talk Show ဟောပြော ပွဲများ ကျင်းပပြုလုပ်ခဲ့ရာ (၁၇) ကြိမ် မြောက်ဟောပြောပွဲကို ( ၂၃.၇.၂၀၂၆ ) ရက်နေ့၊ နေ့လည် (၁:၀၀) အချိန်တွင် စားသုံးသူရေးရာဦးစီးဌာန၊ သာယာဝတီခရိုင်ဦးစီးမှူးရုံး၊ ပြည်တွင်းကုန်သွယ်ရေး ဖွံ့ဖြိုးမှုနှင့်သုတေသနဌာနခွဲ၊ ဦးဝင်းထွဋ်လွင်မှ စားသုံးသူရေးရာဦးစီးဌာနသမိုင်းအကြောင်း ဆိုင်ရာ သိကောင်းစရာ ခေါင်းစဉ်ဖြင့် အသိပညာပေး Talk Show ဆွေးနွေးပွဲကို သာယာဝတီ၊ လက်ပံတန်း၊ မင်းလှ၊ မိုးညို၊ အုတ်ဖို၊ ကြို့ပင်ကောက် မြို့နယ်များမှ ဝန်ထမ်းများနှင့် Zoom metting ဖြင့် ချိတ်ဆက် ဆောင်ရွက်ခဲ့ပါသည်။

Talk Show ဆွေးနွေးပွဲတွင် ကုန်သွယ်မှုမြှင့်တင်ရေးလုပ်ငန်းများအပြင် စားသုံးသူအကာ အကွယ်ပေးရေး ဥပဒေ အရ စားသုံးသူအခွင့်အရေးများကို ထိရောက်စွာကာ ကွယ်နိုင်သောလုပ်ငန်းများကို ဆောင်ရွက်နိုင်ရန် ၂၀၁၅ ခုနှစ် ၊ ဇန်နဝါရီလ ၁၅ ရက်နေ့တွင်ကျင်ပ ပြုလုပ်သော ပြည်ထောင် စုသမ္မတမြန်မာနိုင်ငံတော် ပြည်ထောင်စုအစိုးရအဖွဲ့ အစည်းအဝေး၏ သဘောတူခွင့်ပြုချက်အရ ကုန်သွယ်မှုမြှင့်တင်ရေးနှင့် စားသုံးသူရေးရာဦးစီးဌာနဖြင့် ဌာနခွဲ(၉)ခု တိုင်းဒေသကြီး/ ပြည်နယ် (၁၄)ခုတို့ဖြင့် ဖွဲ့စည်းဆောင်ရွက် ခဲ့ကြောင်း နေပြည်တော်ကောင်စီနယ်မြေ အပါ (၁၅)ခု ဖြစ်ပါသည်။ ၂၀၁၆ ခုနှစ် ဧပြီလ ၁ရက်နေ့တွင် စားသုံးသူရေးရာဦးစီးဌာနအား ဌာနကြီး(၆)ခု ၊ တိုင်းဒေသကြီး/ ပြည်နယ် (၁၄)ခု ၊ခရိုင်(၃၁)ခုတို့ဖြင့် ပြင်ဆင်ဖွဲ့စည်းခဲ့ကြောင်း သိရှိရပါသည်။

ခရိုင်ဦးစီးမှူးမှ ဝန်ထမ်းများကို မိမိလုပ်ငန်းများနှင့် သက်ဆိုင်သော အသိပညာပေး Talk Showများ ကျင်းပခြင်းဖြင့် ဝန်ထမ်းများစွမ်းဆောင်ရည်မြင့်မားလာနိုင်ကြောင်းထည့်သွင်းဆွေးနွေးခဲ့ပါသည်။မြို့နယ်တာဝန်ခံများမှလည်းအားနည်းချက်အားသာချက်များဖြည့်စွက်ဆွေးနွေး ပြောကြားခဲ့ကြောင်း သိရှိရပါသည်။

DOCA(ပဲခူး)

အွန်လိုင်းစနစ်ဖြင့် ရောင်းချခြင်းလုပ်ငန်းများ မှတ်ပုံတင်လက်မှတ် စိစစ်ထုတ်ပေးရန် ကွင်းဆင်းစစ်ဆေးခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဦးမြင့်နိုင် (ဦးစီးအရာရှိ) နှင့် အဖွဲ့သည် အွန်လိုင်းစနစ်ဖြင့်ရောင်းချခြင်းလုပ်ငန်းများ မှတ်ပုံတင်လက်မှတ် စိစစ်ထုတ်ပေးခြင်း၊ မြေပြင်လုပ်ငန်း နှင့် မှတ်ပုံတင်ထားရှိမှု ကိုက်ညီမှု ရှိ/ မရှိ၊ လုပ်ငန်းလိပ်စာ မှန်ကန်မှု ရှိ/ မရှိတို့ကို (၃၀-၇-၂၀၂၆) ရက်နေ့၊နံနက်(၁၀:၀၀)နာရီအချိန်တွင် အမှတ်(၃၀၂၁) ၊ မိုးမခ(၂)လမ်း၊ နယ်မြေ(၃)၊ အိမ်ရာ(၂)၊ ရတနာသိဒ္ဓိရပ်ကွက်၊ ဥတ္တရသီရိမြို့နယ်ရှိ “ Boutique By Shwe ” အလှကုန်ပစ္စည်းများ၊ အထည် အလိပ်၊ အဝတ်အထည်နှင့်ဆက်စပ်ပစ္စည်းများလုပ်ငန်းသို့ သွားရောက်စစ်ဆေးခဲ့ကြောင်း သိရှိရပါသည်။

အဆိုပါကွင်းဆင်းစစ်ဆေးရာတွင် စစ်ဆေးရေးအရာရှိက လုပ်ငန်းရှင်များကို လိုအပ်သည် များမေးမြန်းခြင်း၊ မြေပြင်ကွင်းဆင်းစစ်ဆေးရမည့်အချက်(၁၈)ချက်နှင့် ကိုက်ညီမှု ရှိ/ မရှိ စစ်ဆေး ခြင်း၊ စီးပွားရေးလုပ်ငန်းရှင်များ လိုက်နာရမည့်တာဝန်ဝတ္တရားများနှင့် စားသုံးသူကာကွယ်ရေး ဥပဒေပါ အခန်း(၁၇)ရှိ ကုန်စည်(သို့မဟုတ်)ဝန်ဆောင်မှုအပေါ် တာဝန်ရှိမှုနှင့် ပတ်သက်၍လည်းကောင်း တရားမဝင်ကုန်ပစ္စည်းများ ရောင်းချမှုမရှိစေရေး အသိပညာပေးဟောပြောခဲ့ကြောင်း သိရှိရပါသည်။

DOCA(ပြည်ထောင်စုနယ်မြေ)

တောင်ငူခရိုင်၊ရေတာရှည်မြို့တွင်လက်ဆွဲကောက်စိုက်စက်ဖြင့် မိုးစပါးစိုက်ပျိူးပွဲကျင်းပမှုအခြေအနေ

သတင်းနှင့် လှုပ်ရှားမှုများ

ပဲခူးတိုင်းဒေသကြီး ၊တောင်ငူခရိုင် ရေတာရှည်မြို့နယ် သပြေတန်းကွင်းထန်းကုန်းကျေးရွာ တွင် (၁၆.၇.၂၀၂၆)ရက်နေ့နံနက်ပိုင်း၌ ဒေသခံတောင်သူတစ်ဦး၏ ကွင်းအမှတ်(၆၃၇)၌ လက်ဆွဲကောက်စိုက်စက်ဖြင့်မိုးစပါးစိုက်ပျိုးခြင်းကွင်းသရုပ်ပြပွဲကိုခရိုင်၊မြို့နယ်စိုက်ပျိုးရေး၊ မွေးမြူရေးကြီး ကြပ်မှုကော်မတီ ဥက္ကဌနှင့် အဖွဲ့ဝင်များက ကြည့်ရှုအားပေးခဲ့သည်။

အဆိုပါစက်ကိုအသုံးပြုခြင်းဖြင့် လက်မှုလယ်ယာစနစ်မှ စက်မှုလယ်ယာစနစ်သို့အသွင် ကူးပြောင်း ဆောင်ရွက်ခြင်းဖြင့် လုပ်သားရှားပါးမှုအခက်အခဲနှင့်အချိန်တိုအတွင်းစိုက်ဧကများစွာကို စိုက်ပျိုးနိုင်သည့် အပြင်စပါးပန်းတိုင်အထွက်နှုန်းကောင်းမွန်စေသည့် အကျိုးများစွာရရှိစေကြောင်း ခရိုင်စိုက်ပျိုးရေး၊မွေးမြူ ရေးကြီးကြပ်မှုကော်မတီဥက္ကဌမှ ပြောကြားခဲ့သည်။

(PowerHarrow)မြေမွှေစက်နှင့် ကောက်စိုက်စက်တို့ကိုအသုံးပြု၍ မြေပြုပြင်ထွန်ယက်ခြင်း ဖြင့် ရရှိနိုင်သော အကျိုးကျေးဇူးနှင့် အချိန်ကုန်လူသက်သာပြီး လုပ်သားရှားပါးမှု ပြဿနာကိုပထမဦးစွာ ဖြေရှင်းပေးနိုင်ပါသည်။ခေတ်မီလယ်ယာစိုက်ပျိုးရေးတွင် လုပ်အားခသက်သာပြီး အထွက်နှုန်း တိုးစေရန် အဓိကအကျိုးပြုစေမည့်စိုက်ပျိုးရေးသုံးစက်ကိရိယာများ ဖြစ်ကြောင်းလည်း စက်မှုပိုင်း ဆိုင်ရာအချက် အလက်များကို တောင်သူများအား အသေးစိတ်သိရှိနားလည်စေရန် ရှင်းလင်းပြော ကြားခဲ့ကြောင်း သိရှိရသည်။

DOCA(ပဲခူး)

တောင်ငူခရိုင်ဦးစီးမှူးရုံးတွင် “စားသုံးသူများအတွက် အရေးပါသောထုတ်ကုန်လုံခြုံမှုကဏ္ဍ” ခေါင်းစဉ်ဖြင့် Thursday Talk အစီအစဉ် ကျင်းပပြုလုပ်

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးတွင် ဝန်ထမ်းများ စွမ်းဆောင်ရည်မြှင့်မား စေရန်ဗဟုသုတ တိုးပွားစေရန် နှင့် HR ကဏ္ဍတိုးတက် မြင့်မားစေရေး ရည်ရွယ်၍ ဦးစီးဌာန၏ လုပ်ငန်းများအောင်မြင်စွာ အကောင်အထည်ဖော်ဆောင်ရွက်နိုင်ရေးအတွက် ရည်ရွယ်၍ “Thursday Talk” အခမ်း အနားကို ၁၆.၇.၂၀၂၆ ရက်နေ့ မွန်းလွဲ ၁၃:၃၀ နာရီတွင် ကျင်းပပြုလုပ်ခဲ့ပါသည်။ အခမ်းအနားသို့ တောင်ငူခရိုင်ဦးစီးမှူးရုံးမှ ဒုခရိုင်ဦးစီးမှူး ဦးဆောင်၍ ဝန်ထမ်း (၁၅)ဦး တက်ရောက်ခဲ့ကြပါသည်။

အဆိုပါ အခမ်းအနားတွင် တောင်ငူခရိုင်ဦးစီးမှူးရုံး၊ တောင်ငူမြို့နယ်၊ မြို့နယ်တာဝန်ခံ ဦးမြင့်သူဦးစီးမှူးက စားသုံးသူပြည်သူများ နေ့စဉ်အသုံးပြုနေရသော ထုတ်ကုန်များ၏ ဘေးကင်း လုံခြုံမှုသည် စားသုံးသူတို့၏ လူမှုစီးပွားဘဝလုံခြုံရေး၊ကျန်းမာရေးနှင့် စိတ်ကျေနပ်မှု စသည်တို့ အတွက် အရေးပါပုံ၊ စားသုံးသူများယုံကြည် စိတ်ချစွာဖြင့် စိတ်ချလက်ချသုံးစွဲနိုင်ရေး အလို့ငှာ ထုတ်ကုန်များ၏ ဘေးကင်းလုံခြုံမှုသည် အလွန်အမင်းအရေးကြီးပုံ၊ စားသုံးသူများ ဝယ်ယူအသုံး ပြုလိုသည့် ထုတ်ကုန်များနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ် မှုရရှိ စေရန်နှင့် ဘေးအန္တရာယ်ကင်းရှင်းစွာ အသုံးပြုခွင့် ရရှိစေရန်အလို့ငှာ ထုတ်ကုန်ပစ္စည်းအုပ်စု အမျိုး မျိုးအတွက် သိပ္ပံနည်းကျ ရေးဆွဲထားသော စံချိန်စံညွှန်းများ အရေးပါပုံများအား “စားသုံးသူများ အတွက် အရေးပါသောထုတ်ကုန်လုံခြုံမှုကဏ္ဍ” ခေါင်းစဉ်ဖြင့် ဟောပြောဆွေးနွေး ခဲ့ရာ ဟောပြော ဆွေးနွေးချက်များအပေါ် ဒုတိယခရိုင်ဦးစီးမှူးနှင့် ဝန်ထမ်းများက အပြန်အလှန် ဆွေးနွေးပေးခဲ့ကြပြီး “Thursday Talk” အစီအစဉ် ကျင်းပခြင်းကို (၁၅:၃၀)နာရီ အချိန်တွင် ရုတ်သိမ်းခဲ့ပါသည်။

DOCA(ပဲခူး)

Languages

Main menu

သတင်းနှင့် လှုပ်ရှားမှုများ

စားအုန်းဆီအခြေခံလက်ကား ရည်ညွှန်းဈေးနှုန်း တစ်ပိဿာ ငွေကျပ် ၇,၂၂၀ ဖြစ်ကြောင်း ထုတ်ပြန်ကြေညာ

အွန်လိုင်းဖြင့် အစားအသောက်ဝန်ဆောင်မှု ရောင်းချသည့် လုပ်ငန်းရှင်အား တွေ့ဆုံ အသိပညာပေးခြင်း

ပခုက္ကူမြို့ပေါ်တွင် အစားအသောက် ဝန်ဆောင်မှုကဏ္ဍနှင့်စပ်လျဉ်း၍ ကွင်းဆင်းစစ်ဆေးခြင်း

သဲကုန်းမြို့နယ် အင်းမမြို့ပေါ်ရှိ စားသောက်ဆိုင်ဝန်ဆောင်မှုအား ကွင်းဆင်းစစ်ဆေးခြင်း

သာယာဝတီခရိုင်လက်ပံတန်းမြို့၌လစဉ်ကြာသပတေးနေ့ အသိပညာပေး Talk Show ကျင်းပခြင်း

အွန်လိုင်းစနစ်ဖြင့် ရောင်းချခြင်းလုပ်ငန်းများ မှတ်ပုံတင်လက်မှတ် စိစစ်ထုတ်ပေးရန် ကွင်းဆင်းစစ်ဆေးခြင်း

တောင်ငူခရိုင်၊ရေတာရှည်မြို့တွင်လက်ဆွဲကောက်စိုက်စက်ဖြင့် မိုးစပါးစိုက်ပျိူးပွဲကျင်းပမှုအခြေအနေ

Pages

You are here

သတင်းနှင့် လှုပ်ရှားမှုများ

Pages