သတင်းနှင့် လှုပ်ရှားမှုများ

         ပဲခူးတိုင်းဒေသကြီး၊ ပဲခူးခရိုင်၊ ဒိုက်ဦးမြို့နယ်၊ အမှတ်(၃) စိုက်ပျိုးရေးဆိုင်ရာ လူထုအခြေပြုလေ့လာမှုစခန်း (ACLC) ၌ ၂၇.၄.၂၀၂၂ ရက်နေ့၊ နံနက် ၁၁:၀၀ နာရီအချိန်တွင် ပဲခူးတိုင်းဒေသကြီး  ၊ ဝန်ကြီးချုပ်မှ ထောက်ပံပေးအပ်သော ဓာတ်မြေသြဇာအိတ်များကို တစ်နှစ်သုံးသီး စိုက်ပျိုးသော ဒိုးတန်းကျေးရွာမှ တောင်သူဦးမောင်စိုးထံသို့ လွှဲပြောင်းပေးအပ်ပွဲ အခမ်းအနား ကျင်းပပြုလုပ်ခဲ့ပါသည်။

          အဆိုပါ အခမ်းအနားသို့ ဒိုက်ဦးမြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်ကျေးလက် ဒေသဖွံ့ဖြိုးတိုးတက်ရေးဦးစီးဌာန၊ မြို့နယ်စက်မှုလယ်ယာဦးစီးဌာန၊ မြို့နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန ၊ စားသုံးသူရေးရာဦးစီးဌာန၊ ဒိုက်ဦးမြို့နယ်တာဝန်ခံ ၊ မြို့နယ် စိုက်ပျိုးရေးဦးစီးဌာနမှ တာဝန်ရှိသူများနှင့် ဖိတ်ကြားထားသောတောင်သူများ တက်ရောက်ခဲ့ပါသည်။ အခမ်းအနားတွင် ဒိုက်ဦးမြို့နယ် အထွေထွေအုပ်ချုပ်ရေးဦးစီးဌာန၊ အထွေထွေအုပ်ချုပ်ရေးမှူး ဦးဝင်းမြင့်မှ အမှာစကားပြောကြားခဲ့ပြီး တောင်သူဦးမောင်စိုးက ဓာတ်မြေသြဇာ ၂၀ အိတ်အား ထောက်ပံ့ပေးအပ်သည့်အတွက် ကျေးဇူးတင်စကားပြောကြားကာ အခမ်းအနား ရုတ်သိမ်းခဲ့ကြောင်း သိရှိရပါသည်။

DOCA(ပဲခူး)

              စားသုံးသူရေးရာဦးစီးဌာန၊ တောင်ငူခရိုင်၊ အုတ်တွင်းမြို့နယ်တာဝန်ခံ ဒေါ်အေးအေးခိုင် နှင့် ဌာနခွဲစာရေး ဦးအောင်ဝင်းတို့သည့် မေလ ၉ ရက်နေ့ နံနက်ပိုင်းက အုတ်တွင်းမြို့ပေါ်ရှိ ဆေးဆိုင်ကြီးများသို့ သွားရောက်၍ ဈေးကွက်အတွင်း ရောင်းချနေသော ပလာစတာများ၌ ဆေးဝါး မှတ်ပုံတင် ရှိ/မရှိ၊ ကုန်အညွှန်းအမှတ်အသား ပြည့်စုံမှု ရှိ/မရှိတို့ကို စောင့်ကြည့်စစ်ဆေးခဲ့ပါသည်။

              ထိုသို့ဈေးကွက်အတွင်း စောင့်ကြည့်စစ်ဆေးရာတွင် အုတ်တွင်းပေါ်ရှိ အရောင်းဆိုင်ကြီး များ၌ ဆေးဝါး မှတ်ပုံတင်ထားသည့် ကုန်အညွှန်းအမှတ်အသား ပြည့်စုံစွာဖော်ပြထားရှိသော Bella Plus ပလာစတာ , Belladonna, Tiger Balm, Hansa Plast, , Capsium နှင့် Shin Way အမှတ်တံဆိပ် ပလာစတာများကို တွေ့ရှိရပါသည်။

             ဆက်လက်၍ မြို့နယ်တာဝန်ခံသည် ဆေးဆိုင်ပိုင်ရှင်များနှင့် အရောင်းဝန်ထမ်းများအား မြန်မာနိုင်ငံဆေးဝါးမှတ်ပုံတင်ထားခြင်းမရှိသည့် ဆေးဝါးများနှင့် မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ အရ ကုန်အညွှန်းအမှတ်အသားများ ပြည့်စုံစွာဖော်ပြထားရှိသောဆေးဝါးများကိုသာ ရောင်းချကြရန် မှာကြားခဲ့ကြောင်း သိရှိရပါသည်။

DOCA(ပဲခူး)

        စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်းရှင်းစေရေး၊ ထုတ်ကုန်များလုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်းမှပပျောက်သွားစေရေးနှင့် စားသုံးသူကာကွယ်ရေးဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာဖော်ပြထားမှုအခြေအနေတို့နှင့်စပ်လျဉ်း၍   ဈေးကွက်စောင့်ကြည့်စစ်ဆေးခြင်းလုပ်ငန်းများအား တိုင်းဒေသကြီးအတွင်းရှိ ခရိုင်၊ မြို့နယ်များတွင် လစဉ်ဆောင်ရွက်လျက်ရှိပါသည်။

        ထိုသို့စောင့်ကြည့်စစ်ဆေးနိုင်ရန် စားသုံးသူရေးရာဦးစီးဌာနမှ ဒုတိယဦးစီးမှူးအောက်မနိမ့်သူကို စစ်ဆေးရေးမှူးအဖြစ် ခန့်အပ်တာဝန်ပေး၍ စားသုံးသူကာကွယ်ရေးလုပ်ငန်းများကို ဆောင်ရွက်လျက် ရှိပါသည်။ ဈေးကွက်စောင့်ကြည့်စစ်ဆေးရာတွင် မိမိတို့ဌာနမှဦးဆောင်၍သော်လည်းကောင်း၊ မိတ်ဖက်ဌာနများဖြစ်သည့် အစားအသောက်နှင့်ဆေးဝါးကွပ်ကဲရေးဦးစီးဌာန၊ ကျန်းမာရေး၊ စည်ပင်၊ စိုက်ပျိုးရေး၊ အထွေထွေအုပ်ချုပ်ရေးဦးစီးဌာနတို့ပါဝင်သော အဖွဲ့ဖြင့်သော်လည်းကောင်း စောင့်ကြည့်စစ်ဆေးခြင်း လုပ်ငန်းများ ဆောင်ရွက်လျက်ရှိပါသည်။

       စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်းရှင်းရေး၊ ထုတ်ကုန်များလုံခြုံစိတ်ချရမှုရှိစေရေး၊ ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းစွာအသုံးပြုခွင့်ရရှိစေရေး၊ ဘေးအန္တရာယ်ရှိသော ကုန်စည်များဈေးကွက်အတွင်းမှပပျောက်သွားစေရေးတို့အတွက် ၂၀၂၂ခုနှစ် ဧပြီလတွင် ဈေးကွက်အတွင်းရောင်းချနေသော စားသောက်ကုန်များ၊ လူသုံးကုန်များအား ကွင်းဆင်းစစ်ဆေးရေးလုပ်ငန်းများ(၁၈)ကြိမ် ဆောင်ရွက်ခဲ့ပြီး ယခုမေလပထမပတ်နှင့် ဒုတိယပတ်အတွင်း(၂၀)ကြိမ်ဆောင်ရွက်နိုင်ခဲ့ကြောင်း၊ ထိုသို့ဆောင်ရွက်ရာတွင်စားသုံးသူများအနေဖြင့်  ကုန်စည်များဝယ်ယူအသုံးပြုရာတွင် ယင်းကုန်စည်နှင့်ပတ်သက်သည့် သတင်းအချက်အလက်များ ပြည့်စုံစွာရရှိနိုင်ပြီး စားသုံးသူ၏ လိုအပ်ချက်နှင့် ကိုက်ညီသည့်ကုန်စည်များအား ရွေးချယ်ဝယ်ယူနိုင်စေ ရေးအတွက် စားသုံးသူကာကွယ်ရေးဥပဒေပါ မြန်မာဘာသာဖြင့် ကုန်အညွှန်းအမှတ်အသားပြည့်စုံစွာ ဖော်ပြနိုင်ရေး၊ ဌာန၏ အတည်ပြုချက်ရယူရန် တင်ပြလာပါက ဌာနမှ ဥပဒေနှင့်ကိုက်ညီမှုရှိ/မရှိ စိစစ် ပြန်ကြားပေးနိုင်ရေးတို့ကို ဆွေးနွေးအသိပေးပြောကြားခဲ့ပြီး သက်ဆိုင်ရာဌာနများမှလည်း သတ်မှတ်လိုင်စင်များ ရှိ/မရှိ စစ်ဆေးပြီး၊ လိုင်စင်လျှောက်ထားနိုင်ရေး၊ သက်တမ်းကုန်လိုင်စင်များအား သက်တမ်းတိုးဆောင်ရွက်နိုင်ရေး၊ စားသုံးရန် သို့မဟုတ် အသုံးပြုရန် မသင့်သည့် ကုန်စည်များအား သက်ဆိုင်ရာတည်ဆဲဥပဒေများနှင့်အညီ အရေးယူဆောင်ရွက်လျှက်ရှိကြောင်း သတင်းရရှိပါသည်။

DOCA(စစ်ကိုင်း)

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဝါးခယ်မမြို့နယ်တာဝန်ခံ  ဦးအောင်မိုးနှင့် ဝန်ထမ်းများသည် မြို့နယ်အစားအသောက်နှင့် ဆေးဝါးကြီးကြပ်ကွပ်ကဲရေးကော်မတီအဖွဲ့နှင့် ပူးပေါင်း၍  (၁၃.၅. ၂၀၂၂)ရက်နေ့ နံနက်(၁၀:၄၀)နာရီအချိန်တွင် ဝါးခယ်မမြို့၊ မြို့မဈေးရှိ ဆေးဝါးရောင်းချနေသော ဆေးဆိုင်များသို့ သွားရောက်ကွင်းဆင်းစစ်ဆေးခဲ့ပါသည်။

          ထိုသို့ကွင်းဆင်းစစ်ဆေးရာတွင် Bella  Plus  Plaster နှင့်ပတ်သက်၍ ထုတ်လုပ်သည့် နိုင်ငံ၊ ထုတ်လုပ်သည့် ကုမ္ပဏီ၊ တင်သွင်းသည့် ကုမ္ပဏီ ဆေးဝါးမှတ်ပုံတင်အမှတ် Import မှ Registration No, (IR) များ ဖော်ပြခြင်းမရှိဘဲ ဈေးကွက်အတွင်း ရောင်းချနေခြင်းရှိ/မရှိနှင့် Online ပေါ်တွင် ကြော်ငြာ၍ ရောင်းချနေသော ရသေ့ဆေး(သို့)ထိုင်းတိုင်းရင်းဆေးများရောင်းချခြင်း  ရှိ/မရှိစစ်ဆေး ခဲ့ပြီး သတ်မှတ်ညွှန်ကြားချက်များနှင့် ကိုက်ညီမှုမရှိသော ဆေးဝါးများ၊ သက်တမ်းလွန်ဆေးဝါးများ၊ ဆေးဝါးမှတ်ပုံတင်မရှိသောဆေးများအား ရောင်းချခြင်းမပြုရန် ဆေးဝါးရောင်းချနေသော ဆေးဆိုင် ပိုင်ရှင်များအား အသိပေးဆွေးနွေးမှာကြားခဲ့ကြောင်း သိရှိရပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ ရခိုင်ပြည်နယ်၊ စစ်တွေမြို့နယ်တာဝန်ခံ ဦးသိန်းအောင်နှင့် ဝန်ထမ်းများသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ (၁၂.၅.၂၀၂၂) ရက်နေ့တွင် Online ပေါ်တွင်ရောင်းချနေသည့် “ရသေ့ဆေး” ဟု ခေါ်ဆိုသည့် ထိုင်းတိုင်းရင်းဆေးများ စစ်တွေမြို့မဈေးအတွင်း ရောင်းချမှုရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

          ယင်း “ရသေ့ဆေး” (သို့) ထိုင်းတိုင်းရင်းဆေးသည် ထိုင်းနိုင်ငံ၏ FDA က ဘေးအန္တရာယ်ရှိ သည့်ဆေးအဖြစ် ထုတ်ပြန်ထားသည့် ဆေးဖြစ်ပြီး မြန်မာနိုင်ငံတွင်လည်း တရားဝင်ဆေးဝါး မှတ်ပုံတင်ထားခြင်းမရှိသည့်ဆေးဖြစ်ကြောင်းသိရှိရသည့်အတွက် ဈေးကွက်အတွင်းရောင်းချမှုမရှိ စေရေး၊  မိဘပြည်သူများအနေဖြင့် ၎င်းဆေးအား သုံးစွဲမှုမရှိစေရေး နှင့် ဘေးအန္တရာယ်ကင်းရှင်းမှုရှိ စေရန် ရည်ရွယ်၍ သွား‌ရောက်စစ်ဆေးရခြင်းဖြစ်ပါသည်။

          ထိုသို့ကွင်းဆင်းဆောင်ရွက်ရာတွင် စစ်တွေမြို့ မြို့မဈေးအတွင်း ရောင်းချမှုမရှိကြောင်း စိစစ်တွေ့ရှိခဲ့ရပြီး စစ်တွေမြို့နယ်တာဝန်ခံက ရောင်းချသည့်ဆေးဆိုင် လုပ်ငန်းရှင်များအား “ရသေ့ဆေး”(သို့) ထိုင်းတိုင်းရင်းဆေးသည် Online ပေါ်တွင် အကိုက်အခဲ ရောဂါပေါင်းစုံပျောက်ဆေးအဖြစ် ကြော်ငြာရောင်းချနေကြောင်း၊ ၎င်းဆေးအား ထိုင်းနိုင်ငံမှ ဘေးအ‌န္တရာယ်ရှိသည့် ဆေးအဖြစ်ထုတ်ပြန်ထားပြီး မြန်မာနိုင်ငံတွင်လည်း တရားဝင်ဆေးဝါးမှတ်ပုံတင်ထားခြင်းမရှိသည့်ဆေးဖြစ်၍ သုံးစွဲသူများအား ဘေးအန္တရာယ်ဖြစ်စေနိုင်သည့်အတွက် မှာယူရောင်းချခြင်းမပြုလုပ်ကြရန် အသိပညာပေး ဆွေးနွေးခဲ့ကြောင်း သတင်းရရှိပါသည်။                                                             

DOCA(ရခိုင်)