သတင်းနှင့် လှုပ်ရှားမှုများ

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ပန်းတနော် မြို့နယ်တာဝန်ခံ မသင်းသင်းစိုးနှင့် ဝန်ထမ်းများသည် မိတ်ဖက်အဖွဲ့အစည်းများဖြစ်သော စိုက်ပျိုးရေးဦးစီးဌာနနှင့် ပူးပေါင်း၍ ပန်းတနော်မြို့ပေါ်ရှိ  စိုက်ပျိုးရေး သုံးကိရိယာ၊ စိုက်ပျိုးရေးဆေးဝါးနှင့် ဓါတ်မြေဩဇာဆိုင်များသို့ (၁၃.၃.၂၀၂၂) နေ့နံနက် (၀၉:၃၀)နာရီအချိန် ဈေးကွက်စောင့်ကြည့်စစ်ဆေးခဲ့ပါသည်။

            အဆိုပါ ဈေးကွက်စောင့်ကြည့် စစ်ဆေးမှုတွင် ပန်းတနော်မြို့နယ်တာဝန်ခံ မသင်းသင်းစိုးမှ စိုက်ပျိုးရေးသုံးကိရိယာ၊ စိုက်ပျိုးရေးဆေးဝါးနှင့် ဓါတ်မြေဩဇာများနှင့် မျိုးစေ့ထုတ်များတွင် ကုန်အညွှန်းအမှတ်အသား ပြည့်စုံမှုရှိရေး စားသုံးသူကာကွယ်ရေးဥပဒေ၏ အခန်း(၁၈) ကုန်အညွှန်းအမှတ်အသားဖော်ပြခြင်း၊  စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပါရှိမှု ရှိ/ မရှိနှင့် ကုန်အညွှန်းအမှတ်အသား မပါရှိပါက မရောင်းချသင့်ကြောင်းနှင့် စားသုံးသူကာကွယ်ရေး ဥပဒေအကြောင်းများကို အကျယ်တဝင့် ဆွေးနွေးပြီး ဈေးကွက်စောင့်ကြည့် စစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းများကို ၂၀၁၆ ခုနှစ်တွင် စတင်အကောင်အထည်ဖော်ခဲ့ပြီး အာဆီယံအဖွဲ့ဝင်နိုင်ငံများနှင့်အတူ စားသုံးသူကာကွယ်ရေးလုပ်ငန်းများကို အကောင်အထည်ဖော်ဆောင်ရွက်လျက်ရှိပါသည်။ ထိုသို့ ဆောင်ရွက်လျက်ရှိရာ စားသုံးသူပြည်သူများအနေဖြင့် စားသုံးသူကာကွယ်ရေးနှင့် စပ်လျဉ်း၍ အသိပညာရှိမှုနှင့် စွမ်းဆောင်ရည်မည်မျှရှိသည်ကို တစ်နိုင်ငံလုံးအတိုင်းအတာဖြင့်သိရှိနိုင်ရန်အတွက် စားသုံးသူစွမ်းဆောင်နိုင်မှုအညွှန်းကိန်းစစ်တမ်းအား ကောက်ယူသွားမည်ဖြစ်ရာ ရခိုင်ပြည်နယ် စားသုံးသူရေးရာဦးစီးဌာနအနေဖြင့်လည်း စားသုံးသူစွမ်းဆောင်နိုင်မှုအညွှန်းကိန်းစစ်တမ်းအား လူကိုယ်တိုင်တိုက်ရိုက် မေးမြန်းခြင်းနှင့် Online မှမေးမြန်းခြင်း နည်းလမ်း(၂)သွယ်ဖြင့် ကောက်ယူခဲ့ပါသည်။ စစ်တမ်း ကောက်ယူရာတွင် ရခိုင်ပြည်နယ်ရှိ လူဦးရေစာရင်းပေါ်အခြေခံ၍ လူဦးရေ(၁)သိန်းလျှင် (၆)ဦးနှုန်းဖြင့် လူကိုယ်တိုင်(၁၃၀)ဦး၊ Online မှ(၂၀)ဦး၊ စုစုပေါင်းလူဦးရေ(၁၅၀)ဦးအား ၂၀၂၂ ခုနှစ်၊ မေလမှစတင်၍ စားသုံးသူရေးရာဦးစီးဌာန(ရုံးချုပ်)၏လုပ်ငန်းစီမံချက်အတိုင်း ကောက်ယူခဲ့ပါသည်။

          ထိုသို့စစ်တမ်းကောက်ယူရာတွင် ရခိုင်ပြည်နယ်ဦးစီးမှူးရုံး၊ စားသုံးသူရေးရာဌာနခွဲမှ ပြည်သူ (၂၀) ဦး၏ e-mail လိပ်စာများနှင့် Messengers များသို့ Online Survey Link အား ပေးပို့၍ Online မှတဆင့် ကောက်ယူခဲ့ပြီး တိုက်ရိုက်မေးမြန်းခြင်း(၁၃၀)ဦးအား ရခိုင်ပြည်နယ်အတွင်းရှိ စစ်တွေခရိုင်၊ မြောက်ဦးခရိုင်၊ မောင်တောခရိုင်၊ ကျောက်ဖြူခရိုင်နှင့် သံတွဲခရိုင်များရှိ ရပ်ကွက်၊ ကျေးရွာများသို့ ပြည်နယ်ဦးစီးမှူးနှင့် သက်ဆိုင်ရာခရိုင်ဦးစီးမှူးများမှ  တာဝန်ပေးအပ်ထားသော ဝန်ထမ်းများမှ သွားရောက်ကွင်းဆင်းကောက်ယူခဲ့ပါသည်။

          စစ်တမ်းကောက်ယူရာတွင် ပြည်သူများသို့ စားသုံးသူအသိပညာပေးမှုလုပ်ငန်းများ၊ စားသုံးသူ ထိခိုက်နစ်နာမှုနှင့်စပ်လျဉ်း၍ကုစားမှုအစီအစဉ်များ၊ ကုန်အညွှန်းအမှတ်အသားနှင့်စပ်လျဉ်း၍ စားသုံးသူ များသိရှိရမည့် သတင်းအချက်အလက်များ၊ စားသုံးသူကာကွယ်ရေးဥပဒေပါ စားသုံးသူအခွင့်အရေးများနှင့် ပြဌာန်းချက်များအပေါ် သိရှိမှုအခြေအနေ စသည့်အချက်များကို အခြေခံသည့် စစ်တမ်းမေးခွန်းလွှာအား မေးမြန်းခဲ့ကြောင်းသတင်းရရှိပါသည်။

DOCA(ရခိုင်)                                        

           စားသုံးသူရေးရာဦးစီးဌာန၊ ကချင်ပြည်နယ်၊ ဗန်းမော်ခရိုင်ဦးစီးမှူးရုံး၌ ၁၃.၅.၂၀၂၂ ရက်နေ့တွင် စိုက်ပျိုးရေး လုပ်ငန်းသုံးပစ္စည်းရောင်းချနေသော စီးပွားရေးလုပ်ငန်းရှင်များအား တွေ့ဆုံဆွေးနွေးခဲ့ပါသည်။

          ထိုသို့တွေ့ဆုံဆွေးနွေးရာတွင် ခရိုင်ဦးစီးမှူးဦးအောင်ကျော်ဦးက စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်၏တာဝန်များ၊ ကုန်စည်နှင့်စပ်လျဉ်း၍ အာမခံထားမှုအပေါ် စားသုံးသူက တောင်းဆိုနိုင်သည့်အခွင့်အရေးများ၊ ကုန်စည်/ဝန်ဆောင်မှုနှင့်စပ်လျဉ်း၍ ဘေးအန္တရာယ်ကင်းရှင်းရေး၊ ကုန်စည်သို့မဟုတ်ဝန်ဆောင်မှုအပေါ်တာဝန်ရှိမှု၊ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာ ဖော်ပြရမည့်အချက်များ၊ ကုန်အညွှန်းအမှတ်အသားဖော်ပြခြင်းဆိုင်ရာအချက်များနှင့်ကိုက်ညီမှုမရှိသည့် ကုန်စည်ကို ထုတ်လုပ်ခြင်း၊ ကုန်သွယ်ခြင်းသို့မဟုတ်ရောင်းချခြင်းမပြုရန်၊ ဖောက်ဖျက်ကျူးလွန်ပါက စားသုံးသူကာကွယ်ရေး ဥပဒေအရ ပြစ်ဒဏ်ကျခံရမည်ဖြစ်ကြောင်း ရှင်းလင်းဆွေးနွေးခဲ့ပါ သည်။

DOCA(ကချင်)

                ပဲခူးတိုင်းဒေသကြီး ၊စားသုံးသူရေးရာဦးစီးဌာန၊ညောင်လေးပင် မြို့နယ်တာဝန်ခံရုံးမှ ဝန်ထမ်းများသည် ၂.၅.၂၀၂၂ ရက်နေ့တွင် ညောင်လေးပင်မြို့နယ် ၊ မြို့မစျေးအတွင်း ပင်ရင်းကုန်စုံဆိုင်များတွင် ရောင်းချလျက်ရှိသော ဆပ်ပြာခဲများတွင် ကုန်အညွှန်းအမှတ်အသား ဖော်ပြပါဝင်မှု ရှိ/မရှိ ၊ ဖော်ပြပါ အလေးချိန်နှင့် အမှန်တကယ်ပါဝင်သော အလေးချိန် ကိုက်ညီမှု ရှိ/မရှိ စျေးကွက်စောင့်ကြည့် စစ်ဆေးခဲ့ကြပါသည်။

          ထိုသို့ စစ်ဆေးရာတွင် စျေးကွက်အတွင်းရောင်းချလျှက်ရှိသော ဆပ်ပြာမွှေးခဲများအနက် အချို့ဆပ်ပြာမွှေးခဲများသည် ဖော်ပြထားသော အလေးချိန်နှင့် ပါဝင်သောအလေးချိန် အနည်းငယ်လျော့နည်းသည်ကို တွေ့ရှိရပါသဖြင့် မြို့မစျေးကြီးအတွင်းရှိ  ကုန်စုံဆိုင်များအား ဖော်ပြပါ အလေးချိန် နှင့် အမှန်တကယ်ပါဝင်သော အလေးချိန် ကိုက်ညီမှုမရှိသည့် ကုန်ပစ္စည်းများအား ကုမ္ပဏီသို့ ပြန်လည်ပြောကြားပြီး လဲလှယ်၍ ပြန်လည်‌‌ရောင်းချရန် ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏ အခွင့်အရေးနှင့် တာဝန်များ ၊ စာသုံးသူကာကွယ်‌ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ အသိပညာပေး ဆွေးနွေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များ ဖြန့်ဝေခဲ့ကြောင်း  သိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊ ပဲခူးခရိုင်၊ ဒိုက်ဦးမြို့နယ် ၊ ဒိုးတန်းကျေးရွာအုပ်စု ၊ တောင်ဘို့ကိုးလုံးကျေးရွာ ၊ ဘုန်းတော်ကြီးကျောင်း၌ ၂၈.၄.၂၀၂၂ ရက်နေ့ မွန်းလွဲ ၁:၀၀ နာရီတွင် ဒိုက်ဦးမြို့နယ် စီမံ အုပ်ချုပ်ရေးအဖွဲ့ ၊ မြို့နယ်ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန ၊ မြို့နယ် ဆည်မြောင်း ဦးစီးဌာန၊ မြို့နယ် မွေးမြူရေးနှင့်ကုသရေးဦးစီးဌာန ၊ မြို့နယ်စက်မှုလယ်ယာဦးစီးဌာန ၊ စားသုံးသူရေးရာဦးစီးဌာန၊ ဒိုက်ဦးမြို့နယ်တာဝန်ခံနှင့် ဖိတ်ကြားထားသော တောင်သူများ တက်‌ရောက်၍ စိုက်ပျိုးရေး ၊  မွေးမြူရေးနှင့် ကုန်ထုတ်လုပ်မှု ဖွံ့ဖြိုးတိုးတက်ရေး နည်းပညာပေးသင်တန်း ဆွေးနွေးပွဲ ကျင်းပပြုလုပ်ခဲ့ပါသည်။

          အဆိုပါ နည်းပညာပေးသင်တန်းတွင် မြို့နယ်စီမံအုပ်ချုပ်ရေးအဖွဲ့ ၊ ဥက္ကဌ ဦးဝင်းမြင့်က အဖွင့် အမှာစကား ပြောကြားခဲ့ပြီး စိုက်ပျိုးရေးဦးစီးဌာန ၊ ဦးစီးမှူးမှ နည်းပညာပေးသင်တန်းဖွင့်လှစ်ရခြင်း၏ ရည်ရွယ်ချက်နှင့် စိုက်ပျိုးရေး၌ အဓိကဖြစ်သော မြေ ၊ မျိုး ၊ ပိုးမွှားများအကြောင်းကို လည်းကောင်း ၊ မြို့နယ်ကျေးလက်ဒေသ ဖွံ့ဖြိုးတိုးတက်‌‌ရေး ဦးစီးမှူးက မြစိမ်းရောင် စီမံကိန်းနှင့် ပတ်သက်၍ လည်းကောင်း၊ မြို့နယ် ဆည်မြောင်းဦးစီးဌာနမှ နွေစပါးစိုက်ပျိုးရေးအတွက် ရေရရှိရေးကို လည်းကောင်း ၊ မြို့နယ် မွေးမြူရေးနှင့် ကုသရေးဦးစီးမှူးမှ အသားကဏ္ဍတိုးတက်‌ရေးအတွက် လည်းကောင်း၊ စက်မှုလယ်ယာဦးစီးမှူးမှ ကောက်စိုက်စက် ၊ ရိတ်သိမ်းစက်များ အကြောင်းကို လည်းကောင်း ၊ စားသုံးသူရေးရာဦးစီးဌာန ၊ ဒိုက်ဦးမြို့နယ်တာဝန်ခံမှ စားသုံးသူကာကွယ်ရေးနှင့် ပြည်တွင်း ကုန်သွယ်မှု ဖွံ့ဖြိုးတိုးတက်ရေး အကြောင်းအရာများကို ကျယ်ကျယ်ပြန့်ပြန့် အသိပညာပေး ဆွေးနွေးခဲ့ပြီး တက်ရောက်လာသူများမှ သိလို၍ မေးမြန်းချက်များကို သက်ဆိုင်ရာ ဌာနများမှ ပြန်လည် ဖြေကြားပေးခဲ့ကြောင်း သိရှိရပါသည်။

DOCA(ပဲခူး)