သတင်းနှင့် လှုပ်ရှားမှုများ

       ၂၇.၈.၂၀၂၅ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၊ ထုတ်ကုန်လုံခြုံစိတ်ချရမှုဌာနခွဲတာဝန်ခံသည် စားသုံးသူပြည်သူတစ်ဦးမှ စားသုံးသူထိခိုက် နစ်နာခြင်းနှင့်စပ်လျဉ်း ၍ ဆွေးနွေးမေးမြန်းခြင်းအား ပြန်လည်ဆွေးနွေးဖြေကြားခဲ့သည်။

          ထုတ်ကုန်လုံခြုံစိတ်ချရမှုဌာနခွဲတာဝန်ခံက စားသုံးသူများအနေဖြင့် ကုန်စည်၊ ဝန်ဆောင်မှုများကို ဝယ်ယူအသုံးပြုရာတွင် ထိခိုက်နစ်နာမှုများရှိပါက ပြန်လည်ကုစားနိုင်ခြင်း၊ တိုင်ကြားနိုင်ခြင်း အခွင့်အရေးများရှိပါကြောင်း၊ တိုင်ကြားမည်ဆိုပါက စားသုံးသူရေးရာ ဦးစီးဌာနသို့ လူကိုယ်တိုင် ဖြစ်စေ၊ ဖုန်းခေါ်ဆို၍ဖြစ်စေ၊ Consumer Call Center-1535 သို့ဖုန်းခေါ်ဆို၍ဖြစ်စေ၊ www.doca.gov.mm website မှဖြစ်‌စေ၊ DOCA Myanmar Mobile Application မှဖြစ်စေတိုင်ကြားနိုင်ကြောင်း၊ အဆိုပါ တိုင်ကြားမှုများကို စားသုံးသူရေးရာ ဦးစီးဌာနမှ လက်ခံဖြေရှင်းဆောင်ရွက်ပေးလျက်ရှိကြောင်း ပြန်လည်ဆွေးနွေးခဲ့သည်။

DOCA (မွန်)

      မွန်ပြည်နယ်၊ သထုံမြို့နယ်တွင် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ခရိုင် အသေးစားစက်မှုလက်မှုလုပ်ငန်းဦးစီးဌာနမှ ကြီးမှူးဖွင့်လှစ်သည့် ဒစ်ဂျစ်တယ်အသိပညာ ခံယူချက်နှင့် အလေ့အကျင့်ဆိုင်ရာသင်တန်း "Digital Knowledge Attitude and Practice Training" သင်တန်းဖွင့်ပွဲအခမ်းအနားကို ၂၆.၈.၂၀၂၅ ရက်နေ့ နံနက်ပိုင်းက နောင်ကုလား ကျေးရွာရှိ ပအိုဝ်းအမျိုးသားဗိမာန်တော်၌ ကျင်းပပြုလုပ်သည်။

     ရှေးဦးစွာ မွန်ပြည်နယ် အသေးစားစက်မှုလက်မှုလုပ်ငန်းဦးစီးဌာန၊ ပြည်နယ်ညွှန်ကြား ရေးမှူး ဒေါ်အိကလျာနိုင်က ဌာနအနေဖြင့် MSMEs လုပ်ငန်းများအား Digital နည်းပညာဖြင့် စျေးကွက်ပိုမိုရရှိပြီး အောင်မြင်သော လုပ်ငန်းရှင်များဖြစ်စေလိုပါကြောင်း၊ လူမှုစီးပွားဘဝ ဖွံ့ဖြိုးတိုးတက်ရေးအတွက် Digital နည်းပညာသည် မရှိမဖြစ်လိုအပ်ပါကြောင်း၊ ရေရှည် လုပ်ငန်းများအောင်မြင်စေရေး Traditional Market အပြင် Digital Marketing ကိုပါ ပူးတွဲ ဆောင်ရွက်ကြရန်လိုအပ်ပါကြောင်းနှင့် ပြည်တွင်း/ပြည်ပစျေးကွက်များလည်း ရရှိလာနိုင်မည် ဖြစ်ပါကြောင်း၊ ဌာနမှ အသေးစားစက်မှုလက်မှုလုပ်ငန်းများအားဥပဒေနှင့်အညီ စနစ်တကျ မှတ်ပုံတင်ဆောင်ရွက်ပေးလျက်ရှိပြီး Digital နည်းပညာကိုအသုံးပြု၍ online မှ တဆင့် လုပ်ငန်းမှတ်ပုံတင်များ ဆောင်ရွက်ပေးနိုင်ရန် ရည်ရွယ်၍ အသေးစားကုန်ထုတ်လုပ်ငန်းရှင်များ သိရှိနိုင်ကြစေရန်အတွက် သင်တန်းအား ဖွင့်လှစ်ပို့ချပေးရခြင်း ဖြစ်ပါကြောင်း၊ လုပ်ငန်းရှင် များအနေဖြင့်လည်း Online Registrationအသုံးပြုမည်ဆိုပါက လုပ်ငန်းများ ပိုမိုလွယ်ကူစွာ ဆောင်ရွက်နိုင်မည်ဖြစ်ပါကြောင်းနှင့် Digital Economy ရရှိအောင်ကြိုးစားဆောင်ရွက် သွားကြရန်တိုက်တွန်းပါကြောင်း အမှာစကားပြောကြားသည်။

    ယင်းနောက် သထုံခရိုင်အသေးစားစက်မှုလက်မှုလုပ်ငန်းဦးစီးဌာန ခရိုင်ဦးစီးမှူး ဦးခွန်ထွန်းထွန်းလှ၊ သင်တန်းနည်းပြများနှင့် သင်တန်းတက်ရောက်လာသည့် လုပ်ငန်းရှင်တို့က တစ်ဦးချင်းမိတ်ဆက်ပေးကြကာ သင်တန်းအား ဆက်လက်ကျင်းပသည်။

    အဆိုပါသင်တန်းတွင် သထုံမြို့နယ်အတွင်းရှိ အသေးစား၊ အငယ်စား လုပ်ငန်းရှင် ၂၀ ဦးတို့ တက်ရောက်ကြပြီး ခရိုင်စားသုံးသူရေးရာဦးစီးဌာနမှ အွန်လိုင်းစနစ်ဖြင့်ရောင်းချခြင်း (online sale)လုပ်ငန်းများ မှတ်ပုံတင်လက်မှတ် လျှောက်ထားခြင်းအကြောင်း သိကောင်း စရာများနှင့် အသေးစားစက်မှုလက်မှုလုပ်ငန်းဦးစီးဌာနမှ Digital Literacy and Digital Transformation in MSMEs များအကြောင်းနှင့် SSID မှရေးဆွဲထားသည့် e-Commerce Website ဝင်ရောက်ပုံနှင့်အသုံးပြုနည်းများအကြောင်း သိကောင်းစရာတို့ကို တစ်ရက်ကြာ ဆွေးနွေးသင်ကြားပေးသွားမည်ဖြစ်ကြောင်း သိရသည်။

DOCA (မွန်)

     မွန်ပြည်နယ်၊ မုဒုံမြို့နယ်တွင် ပညာရေးမိသားစု၏ (ဒသမ)အကြိမ်မြောက် ဓမ္မစကြာနှင့် ပဋ္ဌာန်းဒေသနာတော်ရွတ်ဆို ပူဇော်ပြိုင်ပွဲ ဆုပေးပွဲ အခမ်းအနားကို ၂၇.၈.၂၀၂၅ ရက်နေ့ နံနက် (၀၈း၀၀) နာရီအချိန်က လေးထပ်သာသနာ့ဗိမာန်တော်ကြီး၌ ပြုလုပ်ခဲ့သည်။

     ရှေးဦးစွာ နမောတဿသုံးကြိမ်ရွတ်ဆို ဘုရားကန်တော့၍ အခမ်းအနားအား စတင်ဖွင့် လှစ်ခဲ့ပြီး ဂျုံးဂျုံးကျတောရကျောင်း ဆရာတော် မြို့နယ်သံဃနာယက ဥက္ကဋ္ဌ ဘဒ္ဒန္တကိတ္တိ ဝဏ္ဏထံမှ မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဋ္ဌ ဦးပြည်သိမ်း၊ မြို့နယ် ပညာရေးမှူး ဦးသန်းထွန်းဋ္ဌေးနှင့်ဧည့်ပရိသတ်အပေါင်းက ငါးပါးသီလခံယူဆောက်တည်ကြ သည်။ ထို့နောက် ဆရာတော်ကြီးမှ သြဝါဒကထာချီးမြှင့်၍ တာဝန်ရှိသူများက ဆရာတော် သံဃာတော်ကြီးများအား လှူဖွယ်ဝတ္ထုများနှင့် လေးထပ်သာသနာ့ဗိမာန်တော်ကြီးအတွက် အလှူငွေများ ဆက်ကပ်လှူဒါန်းသည်။

     ဆက်လက်၍ ဆုပေးပွဲကိုကျင်းပရာ ဓမ္မစကြာ(အမွှန်း)၊ ပဋ္ဌာန်း (အမွှန်း)၊ ဓမ္မစကြာ (အဖွဲ့)၊ ပဋ္ဌာန်း(အဖွဲ့) တို့တွင် ဆုရရှိရသည့် ကျောင်းများအား ပထမ၊ ဒုတိယ၊ တတိယ၊ စတုတ္ထ၊ ပဉ္စမနှင့် အထူးဆုများကို ဆရာတော်သံဃာတော်ကြီးများက အသီးသီးဂုဏ်ပြုဆုများ ချီးမြှင့်ပြီး လှူဒါန်းမှုအစုစုတို့အတွက် ရေစက်သွန်းချ အမျှပေးဝေကာ အခမ်းအနားအား ဗုဒ္ဓသာသနံ စိရံတိဌတု သုံးကြိမ်ရွတ်ဆို၍ ရုပ်သိမ်းခဲ့ကြောင်း သိရသည်။

DOCA (မွန်)

     ကယားပြည်နယ်၊ လွိုင်ကော်မြို့တွင် စားအုန်းဆီလက်ကား၊ လက်လီ ကိုယ်စာလှယ်များဖြင့်   ပြည်နယ်အတွင်း ပြန်လည်ဝင်ရောက်နေထိုင်သော ပြည်သူလူထုများ စားသုံးဆီဖူလုံစေရန်နှင့် ဈေးနှုန်းချိုသာစွာ ဝယ်ယူရရှိနိုင်ရန်   ပြည်နယ်အစိုးရအဖွဲ့၏ ကြီးကြပ်မှုဖြင့် ကယားပြည်နယ်ဆီကုန် သည်နှင့်ဆီလုပ်ငန်းရှင်များအသင်းမှ ကိုယ်စားလှယ်ဖြင့် ပြည်နယ်အစိုးရအဖွဲ့နှင့် ဒေသကွပ်ကဲရေး စစ်ဌာနချုပ်၏ ခွင့်ပြုချက်ဖြင့် ထုတ်ယူသယ်ဆောင်ပြီး ဖြန့်ဖြူးရောင်းချလျက်ရှိပါသည်။

     စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၅ ခုနှစ်၊ ဩဂုတ်လ(၂၇) ရက်နေ့၊ နံနက်(၀၉:၀၀)နာရီအချိန်တွင် အထူးစုံစမ်းစစ်ဆေးရေးဦးစီးဌာနနှင့် ပူးပေါင်း၍ စားအုန်းဆီ လက်လီအရောင်းဆိုင်များအနေဖြင့်  စားအုန်းဆီများ တင်သွင်းဖြန့်ဖြူးရောင်းချရာတွင် သယ်ယူမှု ကုန်ကျစရိတ်များ ထည့်သွင်းတွက်ချက်ပြီး (၂%) ထက်မပိုသောအမြတ်ဖြင့် ရောင်းချစေရေး၊ စားအုန်းဆီများ အဆမတန်အမြတ်တင် ရောင်းချမှုမရှိစေရေး၊ စားအုန်းဆီများအား သတ်မှတ် အချိန်ကာလအတွင်း သတ်မှတ်ပမာဏ၊ သတ်မှတ်ဈေးနှုန်းအတိုင်း အလေးချိန်ပြည့်မီစွာဖြင့် ပြည်သူလူထုလက်ဝယ်အရောက် ရောင်းချသွားစေရေး၊ မလိုလားအပ်သောနေရာများသို့ မရောင်းချမိစေရေးတို့ကို ကွင်းဆင်းစိစစ်ကြပ်မတ်ဆောင်ရွက်ခဲ့ကြောင်း သိရှိရပါသည်။

DOCA(ကယား)

       စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနနှင့် မြန်မာ နိုင်ငံဆန်စပါးအသင်းချုပ်တို့ ပူးပေါင်း၍ ပြည်တွင်း၌ ဆန်စပါးဖူလုံရေး၊ ပြည်ပသို့ စနစ်တကျ တင်ပို့ ရောင်းချနိုင်ရေး၊ ဆန်စပါးဈေးကွက်နှင့် ဈေးနှုန်းတည်ငြိမ်မှန်ကန်စေရေး၊ သမားရိုးကျရောင်း ဝယ်ခြင်းမဟုတ်သော ဈေးကစားလိုသည့် ရည်ရွယ်ချက်ဖြင့် သိုလှောင်ခြင်း၊ ဈေးနှုန်းမြှင့်တင် ရောင်းချခြင်းများ မဖြစ်ပေါ်စေရေးတို့အတွက် သင့်တင့်မျှတသော ဈေးကွက်ဈေးနှုန်း (Reasanable Matket Price)ကို လစဉ်ထုတ်ပြန်ပေးလျက်ရှိရာ ပဲခူးတိုင်းဒေသကြီး၊ ပြည်ခရိုင်အနေဖြင့် ၂၀၂၅ ခုနှစ်၊ ဩဂုတ်လအတွက် သတ်မှတ်ထုတ်ပြန်ထားစသည့် သင့်တင့်မျှတသော ဈေးကွက်ဈေးနှုန်း ဖြင့် ရောင်းချမှုရှိ/မရှိ (၁၈.၈.၂၀၂၅)ရက်နေ့တွင် ပြည်မြို့ပေါ်ရှိ လက်လီ၊ လက်ကားရောင်းချလျက် ရှိသော ဆန်ဆိုင်ကြီးများ၊ ခရိုင်အထူးစုံစမ်းစစ်ဆေးရေးဦးစီးဌာန၊ မြို့နယ်စည်ပင်သာယာရေး အဖွဲ့ တို့ဖြင့် ပူးပေါင်း၍ ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

    ကွင်းဆင်းစစ်ဆေးရာတွင် ဆန်ဈေးနှုန်းများအနေဖြင့် ၂၄ ပြည်တစ်အိတ်လျှင် ရွှေဘို ပေါ်ဆန်းမွှေး တစ်အိတ်လျှင် (၁၆၀၀၀၀)ကျပ်၊ ဖျာပုံပေါ်ဆန်းတစ်အိတ်လျှင် (၁၃၅၀၀၀)ကျပ်၊ ဧည့်မထဆန် (၅၉၀၀၀-၆၀၀၀၀)ကျပ်၊ ရိုးနီ (၉၀၀၀၀)ကျပ်နှင့် ပခမ်းမှာ (၇၀၀၀၀)ကျပ်ဈေးဖြင့် ရောင်းချလျက်ရှိကြောင်း ကွင်းဆင်းစစ်ဆေးတွေ့ရှိရပါသည်။

DOCA(ပဲခူး)