သတင်းနှင့် လှုပ်ရှားမှုများ

         ရန်ကုန်တိုင်းဒေသကြီး၊ တွံတေးခရိုင်၊ ဈေးအတွင်း/ အပြင်ရှိ မုန့်မျိုးစုံရောင်းချသောဆိုင်များသို့ စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်လုံခြုံစိတ်ချရမှုရှိစေရေးအတွက် အသင့်စားမုန့်အမျိုးမျိုးတို့တွင် ကုန်အညွှန်းအမှတ်အသားများ ပြည့်စုံစွာဖော်ပြထားခြင်းရှိ/ မရှိ ဈေးကွက်စောင့်ကြည့် စစ်ဆေးခြင်းအား  ဒီဇင်ဘာ လ(၉)ရက်နေ့၊ နေ့လယ်(၁၂:၀၀)နာရီအချိန်တွင် ကွင်းဆင်းစစ်ဆေးခဲ့ကြောင်း သိရသည်။

         ထိုသို့ ကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ တာဝန်ရှိသူများသည် မြို့နယ်စည်ပင်သာယာရေးအဖွဲ့မှ ဒုဈေးတာဝန်ခံ ဦးသန်းထွန်းတို့ပူးပေါင်း၍ ကမာကဆစ်ဈေးအတွင်း/ အပြင်ရှိ မုန့်မျိုးစုံရောင်းချသောဆိုင်များတွင် ရောင်းချလျက်ရှိသည့် အသင့်စားမုန့်အမျိုးမျိုးတို့တွင် စားသုံးသူကာကွယ်ရေး ဥပဒေပြဌာန်းချက်များနှင့် အညီ ကုန်အညွှန်းအမှတ်အသားများအား ဖော်ပြရာတွင် မြန်မာဘာသာဖြင့်သော်လည်းကောင်း၊ မြန်မာဘာသာနှင့် အခြားဘာသာတစ်ခု(သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြထားခြင်းရှိ/ မရှိ ဈေးကွက် စောင့်ကြည့်စစ်ဆေးခြင်း၊ မုန့်မျိုးစုံရောင်းချသည့်လုပ်ငန်းရှင်များအား ကုန်အညွှန်းအမှတ်အသား ပြည့်စုံစွာဖော်ပြထားခြင်းမရှိသည့် မုန့်မျိုးများအား ရောင်းချခြင်းမပြုလုပ်ကြရန်၊ ထိုသို့ပြုလုပ်ပါက စားသုံးသူကာကွယ်ရေးဥပဒေနှင့် အညီအရေးယူဆောင်ရွက်သွားမည်ဖြစ်ကြောင်း အသိ ပညာပေးဆွေးနွေးခဲ့ကြောင်း သိရှိရပါသည်။

DOCA(ရန်ကုန်)

  မအူပင်ခရိုင်၊ မအူပင်မြို့နယ်တွင် တပိုင်တနိုင် မုန့်လုပ်ငန်းများလုပ်ကိုင်နေပြီး ပြည်သူများ ဘေးအန္တရာကင်းရှင်းစွာ စားသုံးနိုင်ရန်အတွက် နေ့စဉ် စားသုံးနေသည့် မုန့်ဟင်းခါးဖတ် လုပ်ကိုင်နေသည့် ဦးမျှား မုန့်ဟင်းခါးဖိုလုပ်ငန်းအား ခရိုင်ကျန်းမာရေးဦးစီးဌာန၊ ခရိုင်အထွေထွေအုပ်ချုပ်ရေးဦးစီးဌာန၊ မြို့နယ် စည်ပင်သာယာ‌ရေးအဖွဲ့နှင့် ခရိုင်စားသုံးသူရေးရာဦးစီးဌာန တို့ပူးပေါင်း၍ မုန့်ဟင်းခါးဖိုလုပ်ငန်း အား ၅-၁၂-၂၀၂၅ ရက်နေ့ နံနက် (၀၇:၃၀)နာရီအချိန်က ရှောင်တခင်ကွင်းဆင်းစစ်ဆေးခဲ့ကြသည်။

    စစ်ဆေးဆောင်ရွက်ရာတွင် ဦးမျှားမုန့်ဖတ်လုပ်ငန်း၏ လုပ်ါငန်းဆောင်ရွက်မှု အဆင့်ဆင့်ကို ခရိုင်စီမံအုပ်ချုပ်ရေးကောင်စီမှ တာဝန်ရှိသူက မေးမြန်းပြီး ထုတ်လုပ်မှုအဆင့်ဆင့်ကို ခရိုင်စားသုံးသူရေးရာဦးစီးဌာနမှ ဦးအောင်ဇော်ဦးက ကြည်ရှု့ စစ်ဆေးကာ ခရိုင်ကျန်းမာရေး ဦးစီးဌာနမှ မုန့်ဖတ်များတွင် တာရှည်ခံဆေးအသုံးပြု မပြုတို့ကို ကြည်ရှုစစ်ဆေးခဲ့ကြသည်။ ဆက်လက်၍ လုပ်ငန်းရှင်မှ  မုန့်ဖတ်လုပ်ရန် ဆန်နှင့် ဆန်ကွဲကို စိမ်၍ ဆန်/ဆန်ကွဲနူးသောအခါ ကြိတ်ရကြောင်း၊ ကြိတ်ဖတ်ကို စနစ်တကျပေါင်း၍ မုန့်ဖတ် ခေါင်းတဲ့သူက ခေါင်းပြုလုပ်ရပါကြောင်း၊ မုန့်ဖတ်ဝဘ်ယူသူများကို တဆင့်သယ်ယူ နိုင်ရန် ကြာဖတ်၊ ဝါးတောင်များထည့်၍ လိုက်လံပို့ဆောင်ရောင်းချကြောင်း၊ ကုန်ကြမ်းပြုလုပ်သည့်အခါ ရွေသွယ်လေး၊ မီးကောက်နှင့် မနောသုခ ဆန်ကို ပြုလုပ်ကြောင်း မိုးမမိသော စပါးမှ ထွက်သည့်ဆန်ဖြစ်ပါက မုန့်ဖတ်ကောင်းမွန်ကြောင်း ဆန်/ဆန်ကွဲမကောင်းပါက မုန့်ဖတိမှာ မခံကြောင်း၊ တာရှည်ခံဆေးအသုံးမပြုကြောင်း၊ သုံးစွဲသူများ ပိုမိုမှာပါက ထုတ်လုပ်မှုများပြီး ပုံမှန် ထုတ်လုပ်ရောင်းချလျက်ရှိကြောင်း သိရသည်။ ထုတ်လုပ်သူလုပ်ငန်းရှင်ကို ထုတ် ကုန်များ လုံခြုံစိတ်ချရမှုရှိစေရန်၊ ကုန်စည်၏ ထုတ်လုပ်ပုံနည်းစနစ်၊ ဈေးနှုန်း ဈေးကွက်အခြေအနေ၊ ရင်းနှီးမြှပ်နှံမှုနှင့် အကျိုးအမြတ်ရရှိမှု၊ သက်ဆိုင်ရာဌာနများ၏ ထောက်ခံချက်၊ သတ်မှတ်ထားသော စံချိန်စံညွှန်းပြည့်မီ အောင်ထုတ်လုပ်နိုင်ရေး၊ ပတ်ဝန်းကျင်သန့်ရှင်းမှုတို့ကို အလေးထား ဆောင်ရွက်စေလိုကြောင်း ဆွေးနွေးခဲ့ပြီး မုန့်ဖတ် ၁ပိဿာလျှင် လက်ကားဈေး ၂၃၀၀ ကျပ်ဖြင့် ရောင်းချကြောင်း သိရပြီး နေ့စဉ်ထုတ်လုပ်မှုအနေဖြင့် မှာယူသူ အနည်းအများအပေါ်မူတည်၍ ထုတ်လုပ်ပြီး မုန့်ဖိုပတ်ဝန်းကျင် အနံအသက်များကောင်းမွန်ရေး ဂရုစိုက်ဆောင်ရွက်ရန် မှာကြားခဲ့ကြောင်း သိရသည်။

DOCA (ဧရာဝတီ)

         ရန်ကုန်တိုင်းဒေသကြီး၊ တောင်ပိုင်းခရိုင်အတွင်းရှိ Orange Super Marketသို့ သွားရောက်၍ စားသုံးဆီအမျိုးမျိုးတွင် ကုန်အညွှန်းအမှတ်အသား ပြည့်စုံစွာဖော်ပြထားခြင်းရှိ/ မရှိစားသုံးသူ ရေးရာဦးစီးဌာနမှ ဝန်ထမ်းများသည် ဒီဇင်ဘာလ(၉)ရက်နေ့၊ နေ့လယ် (၁၃:၀၀)နာရီအချိန်တွင် ကွင်းဆင်းစစ်ဆေးခဲ့ကြောင်း သိရှိရသည်။

        အဆိုပါ ကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာန၊ တောင်ပိုင်းခရိုင်ဦးစီးမှူးရုံးမှ ဒေါ်ငြိမ်းငြိမ်းဝင်းနှင့် ဝန်ထမ်းများသည် စားသုံးဆီဗူးများတွင် စားသုံးသူရေးရာဦးစီးဌာနမှ ထုတ်ပြန်ထားသည့် စားသုံးသူကာကွယ်ရေးဥပဒေအရ ကုန်အညွှန်းအမှတ်အသားများအား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့မဟုတ်)တစ်ခုထက်ပို၍ တွဲလျက်ဖြစ်စေ မဖြစ်မနေဖော်ပြရမည့်အချက်များ ပြည့်စုံစွာဖော်ပြထားခြင်းရှိ/ မရှိ ဈေးကွက် စောင့်ကြည့်စစ်ဆေးခြင်းနှင့် ကုန်အညွှန်းအမှတ်အသား ပြည့်စုံစွာဖော်ပြထားခြင်းမရှိသည့် စားသုံးဆီဗူးများအား ဈေးကွက်အတွင်း ရောင်းချခြင်းများ မပြုလုပ်ကြရန်နှင့် ဆိုင်မှတာဝန်ရှိသူ မန်နေဂျာအား ကုန်အညွှန်းအမှတ်အသားညွှန်ကြားချက်အမှတ်(၂/၂၀၁၉)အပြင် (၁/၂၀၂၁)တို့နှင့် ကိုက်ညီမှုမရှိသည့် စားသုံးဆီများအားရောင်းချခြင်း မပြုလုပ်ကြရန်၊ ထိုသို့ ပြုလုပ်ပါက စားသုံးသူကာကွယ်ရေး ဥပဒေနှင့် အညီ အရေးယူဆောင်ရွက်သွားမည်ဖြစ်ကြောင်း အသိပညာပေး၍ စစ်ဆေးဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံသည် မြို့နယ်စည်ပင်သာယာရေး အဖွဲ့နှင့် မွေးမြူရေးနှင့်ကုသရေးဦးစီးဌာနတို့နှင့်အတူ ဈေးကွက်အတွင်း ရောင်းချနေသော ကုန်စည် များဝယ်ယူ သုံးစွဲရာတွင် စားသုံးသူနစ်နာဆုံးရှုံးမှုများ မဖြစ်စေရေးအတွက် ကုန်ဈေးနှုန်းတည်ငြိမ်ရေး ကုန်စည်များ အလေးချိန်မှန်ကန်မှုရှိစေရန် ဒီဇင်ဘာလ ၁၅  ရက်နေ့ နံနက်ပိုင်းတွင် စားသုံးသူ ရေးရာဦးစီးဌာန၊ မြို့နယ်တာဝန်ခံဦးဆောင်၍ ကွင်းဆင်းဆောင်ရွက်ခဲ့ပါသည်။

          အဆိုပါအဖွဲ့သည် တောင်ငူမြို့ရှိ မြို့မဈေးကြီး နှင့် ဘုရင့်နောင်ဈေးတွင် ရောင်းချလျှက်ရှိ သော အခြေခံစားသောက်ကုန်ဆိုင်များ၊ဝက်သားဆိုင်၊ ဆိတ်သားဆိုင် နှင့် ကြက်သားဆိုင်များသို့ မြို့နယ် စည်ပင်သာယာရေး အဖွဲ့မှ သတ်မှတ်ထားသော ဈေးနှုန်းများအတိုင်း ပြည်သူများသို့ ရောင်းချပေးခြင်း ရှိ/မရှိကို ကွင်းဆင်း စစ်ဆေးခဲ့ပါသည်။

        တာဝန်ရှိသူများ ကွင်းဆင်းစစ်ဆေးရာတွင် ကုန်စည်များ ဈေးနှုန်းအဆမတန်ကြီးမြင့်မှုများ မဖြစ်ပေါ်စေရေးအတွက် ဈေးနှုန်းမြှင့်တင်ဖြန့်ဖြူးခြင်းများမပြုရန် နှင့် သင့်တင့်မျှတသော ဈေးနှုန်း များဖြင့်ရောင်းဝယ်မှုပြုကြရန်၊ မူလလေလံဆွဲစဉ်က လေလံဈေးနှုန်းအတိုင်းသာရောင်းချရန်၊ ဈေးနှုန်း မြှင့်တင်ရောင်းချပါက စည်ပင်ဥပဒေအတိုင်း အရေးယူဆောင်ရွက်သွားမည်ဖြစ်ကြောင်း နှင့် ကွင်းဆင်း စစ်ဆေးခြင်းများကိုလည်း စဉ်ဆက်မပြတ် ဆောင်ရွက်သွားမည်ဖြစ်ကြောင်းကို ဆိုင်ပိုင်ရှင်များအား အသိပေး ပြောကြားခဲ့ပါသည်။

DOCA(ပဲခူး)

       ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်ရပ်ကွက်များနှင့် စည်ပင်သာယာ မြို့မဈေးအတွင်း/ အပြင်ရှိ ကုန်ခြောက်ဆိုင်များသို့ ဒီဇင်ဘာလ(၁၀)ရက်နေ့၊ နံနက်(၁၀:၃၀) နာရီအချိန်တွင် ရောနှောဆီအပါအဝင်အမှတ်တံဆိပ်ပါ ပြည်တွင်းထုတ်စားသုံးဆီများ ဖြန့်ဖြူး ရောင်းချနေမှုအခြေအနေအား ကွင်းဆင်းစစ်ဆေးခဲ့ကြောင်း သိရသည်။

        ထိုသို့ ကွင်းဆင်းစစ်ဆေးခဲ့ရာတွင် မြို့နယ်စားသုံးသူရေးရာဦးစီးဌာနမှ ဒုဦးစီးမှူး ဒေါ်နီလာဝင်းနှင့် မြို့နယ်စည်ပင်သာယာရေးအဖွဲ့မှ မြို့မဈေးတာဝန်ခံ ဦးအေးသွင်တို့သည် စားသုံးဆီအမျိုးမျိုး(ဗူးဆီ)တို့ ဖြန့်ဖြူးရောင်းချလျက်ရှိသော ရပ်ကွက်များနှင့် မြို့နယ်စည်ပင်သာယာမြို့မဈေးအတွင်း/ အပြင်ရှိ ကုန်ခြောက်ဆိုင်များရှိ ဆိုင်ပိုင်ရှင်စီးပွားရေး လုပ်ငန်းရှင်များနှင့် တွေ့ဆုံပြီး စားသုံးသူရေးရာဦးစီးဌာန၊ ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့် အညီ စားအုန်းဆီ(ဗူးဆီ)များတွင် ကုန်အညွှန်းအမှတ်အသားဖော်ပြရာ၌ ညွှန်ကြားချက်အမှတ် (၁/၂၀၂၁)အရ စားသုံးဆီအများစုသည် ပင်ရင်းပါဝင်ပစ္စည်းကို အခြေခံဖော်ပြစေရန် ရည်ရွယ်၍ သက်ဆိုင်ရာ စီးပွားရေးလုပ်ငန်းရှင်များ လိုက်နာရမည့် ကုန်အညွှန်းအမှတ်အသား ညွှန်ကြားချက်အမှတ် (၁/၂၀၂၁)အား ၂၀၂၁ခုနှစ်၊ ဒီဇင်ဘာလ(၂၀)ရက်နေ့တွင် ထုတ်ပြန်ထားပြီး ဖြစ်သော်လည်း ယခုအချိန်အထိ ရာနှုန်းပြည့် လိုက်နာဆောင်ရွက်မှု အားနည်းနေသေးသည့်အတွက် ကော့မှူးမြို့နယ်ဈေးကွက်အတွင်း ညွှန်ကြားချက်အမှတ်(၁/၂၀၂၁)နှင့် ကိုက်ညီမှုမရှိသော စားသုံးဆီများ ရောင်းချနေခြင်းရှိ/ မရှိ ကွင်းဆင်းစစ်ဆေးရခြင်းဖြစ်ကြောင်း အသိပညာပေး ဆွေးနွေးပြောကြား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)