သတင်းနှင့် လှုပ်ရှားမှုများ

မွန်ပြည်နယ်၊ ပေါင်မြို့နယ်သည် စပါးစိုက်ဧကအများဆုံးဖြစ်ပြီး စပါးအထွက်နှုန်း ကောင်းမွန်ကာ မြေဆီ၊ မြေဩဇာကောင်းသော ဒေသဖြစ်သည်။ ယနေ့စပါးဈေးကွက် အခြေအနေအရ စပါးဈေးသည် ယခင်လထက် ဈေးကျနေပြီး အရောင်းအဝယ် မရှိခြင်းကြောင့် တောင်သူများအခက်တွေ့နေခြင်းနှင့် ဆန်စက်လုပ်ငန်းများလည်း စပါးဝယ်ယူခြင်းမရှိခြင်း ကြောင့် ‌ခေတ္တရပ်နားထားရခြင်းနှင့် လျှပ်စစ်မီးလုံလောက်စွာမရရှိခြင်းတို့ကြေင့် ဝယ်ယူသို ကြိတ်ရာတွင်ခက်ခဲဖြစ်နေရကြောင်း၊ အလုပ်သမားများ ခေါ်ယူ၍မရခြင်းနှင့် ဆန်စက်ပိုင်ရှင်များ ကိုယ်တိုင်ပင် လုပ်ကိုင်ဝင်ရောက်နေရကြောင်း၊ လက်ရှိလုပ်ကိုင်နေသော လုပ်သားများအား စက်မလည်ပတ်သောကာလများတွင်လည်း နေ့တွက်ခပေးပြီး အလုပ်သမားရှားပါးမှုအား ဖြေရှင်းနေရကြောင်း ဆန်စက်ပိုင်ရှင်တစ်ဦး၏ ပြောကြားချက်အရ သိရှိရပါသည်။ လက်ရှိ ဆန်ဈေးနှုန်းသည်လည်း အတက်အကျမရှိဘဲ အနည်းငယ်သာ အတက်/အကျဖြစ်ပေါ်နေပြီး  အဝယ်အေးနေကြောင်း ဆန်ရောင်းဝယ်နေသူများထံမှ သိရှိရပါသည်။

DOCA(မွန်)

          စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံး၊ ထုတ်ကုန်လုံခြုံစိတ်ချရမှုဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ဝန်ထမ်းများသည် (၂၄.၂.၂၀၂၅)ရက်နေ့ နံနက် (၁၄:၃၀)နာရီအချိန်တွင် ပဲခူးမြို့အတွင်းရှိ လက်လီ/လက်ကား ရောင်းချနေသော ဆန်ဆိုင်များနှင့် ဆန်သိုလှောင်များသို့ သွားရောက်ကာ ကွင်းဆင်းစစ်ဆေးခြင်းများ ပြုလုပ်ဆောင်ရွက်ခဲ့ပါသည်။

          အဆိုပါ ကွင်းဆင်းစစ်ဆေးခြင်းများ ဆောင်ရွက်ခဲ့ရာ လက်လီ/ လက်ကားရောင်းချနေသော ဆန်ဆိုင်များနှင့်ဆန်သိုလှောင်ရုံများအနေဖြင့် ဈေးကစားရန် ရည်ရွယ်ချက်ဖြင့်  ဆန်များသိုလှောင်ထားခြင်း မပြုလုပ်ကြစေရန်၊ ဈေးနှုန်းများကို အများပြည်သူများ မြင်သာသောနေရာတွင် မြင်သာသည့်စာလုံးအရွယ်အစားနှင့် ‌ရေးသားဖော်ပြ၍ ရောင်းချရန်၊ သတ်မှတ်ထားသည့် သင့်တင့်မျှတသော ဈေးနှုန်းများဖြင့် ရောင်းချနိုင်ရန်နှင့် မြန်မာဆန်စပါးအွန်လိုင်း (Myanmar Rice Online) (MyRo)တွင် မှတ်ပုံတင်ထားခြင်း ရှိ/မရှိနှင့် မှတ်ပုံတင်ထားခြင်းမရှိပါက သက်ဆိုင်ရာ မြို့နယ်အလိုက် စားသုံးသူရေးရာဦးစီးဌာနရုံးများနှင့် ချိတ်ဆက်၍ မှတ်ပုံတင်ခြင်း ဆောင်ရွက်နိုင်ရေးကိစ္စရပ်များကို အသိပညာပေးဆွေးနွေးကာ အလေးချိန်ပြည့်ဝမှန်ကန်စွာ ရောင်းချခြင်းရှိ/ မရှိတို့ကို ကွင်းဆင်းစစ်ဆေးခြင်းများပြုလုပ် ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

          ကလေးမြို့နယ်တွင် စပါးဝယ်ယူသယ်ဆောင်မှုများနှင့်ပတ်သက်၍ စပါးများကြိတ်ခွဲရောင်းချ မှုပြုလုပ်သည့် ဆန်စက်များသို့သွားရောက်၍ ဆန်စပါးဝယ်ယူရောင်းချမှုအခြေအနေများ မြေပြင် ကွင်းဆင်းလေ့လာရာတွင် လက်ရှိစပါးပေါက်ဈေး ဧရာမင်းစပါး(သစ်)(၁၆)ပြည်တစ်တင်း ၂၁၀၀၀ ကျပ်၊ ဆင်းသုခစပါး(သစ်)(၁၆)ပြည်တစ်တင်း ၁၇၀၀၀ကျပ်၊ ဧရာမင်းဆန်(၂၄)ပြည် တစ်အိတ်လျှင် ၈၀၀၀၀ကျပ်၊ ဆင်းသုခ(၂၄)ပြည်တစ်အိတ်လျှင် ၆၀၀၀၀ကျပ် ဈေးနှုန်းဖြင့်သာ ဈေးကွက်အတွင်း ဖြန့်ဖြူးရောင်းချလျက်ရှိပြီး တောင်သူများစပါးစိုက်ပျိုးရာတွင် ပျိုးပင်မှစ၍ စပါးထွက်သည်အထိ စပါးတစ်တင်း၏ ကုန်ကျစရိတ်များတွက်ချက်ရာတွင် ယခုစပါးပေါက်ဈေးထက် စရိတ်စကများ ကြီးမြင့်သည့်အတွက် လယ်ယာလုပ်ကိုင်ဆောင်ရွက်ရာတွင် အရှုံးပေါ်နေကြောင်း၊ နောင်နှစ်များတွင် စပါးများယခုပေါက်ဈေးနှင့်သာ ရောင်းချရမည်ဆိုပါက လယ်ယာလုပ်ငန်းများ ဆက်လက်လုပ်ကိုင် ဆောင်ရွက်ရန် အခက်အခဲများစွာ ရှိလာနိုင်ပါကြောင်း တောင်သူများထံမှလေ့လာသိရှိရပါသည်။

စပါးများဝယ်ယူခြင်းနှင့်ပတ်သက်၍ ကလေးမြို့နယ်၏မြောက်ပိုင်းဒေသများ ရာဇဂြိုလ်၊ ခုံသာအစရှိသည့်ကျေးရွာများရှိ တောင်သူများထံသို့ ပွဲစားများမှ သွားရောက်ဝယ်ယူ၍ ဆန်စက်ရုံသို့ ပို့ဆောင်ကြိတ်ခွဲကာဆန်၊ စပါးများကို မြို့နယ်တွင်းသာ ဖြန့်ဖြူးရောင်းချလျက်ရှိပြီး စပါးများ သွားရောက်ဝယ်ယူရာတွင်လည်း လမ်းခရီးကုန်ကျစရိတ်များကြီးမြင့်နေပါကြောင်း၊ စပါးများ ဝယ်ယူရာတွင်လည်း ပွဲစားများအနေဖြင့် တောင်ပိုင်းလမ်းများဖြစ်သည့် နတ်ချေင်း၊ နတ်မြောင်း စသည့်ကျေးရွာများ လမ်းမဖွင့်သည့်အတွက် စပါးများဝယ်ယူ၍မရပါ ယခုလတွင် မြောက်ပိုင်းလမ်း များလည်းမဖွင့်၍ စပါးများဝယ်ယူ၍မရပါကြောင်း၊ ကုန်စည်စီးဆင်းမှုအနေဖြင့် ဆန်များစပါးများကို တိုင်းဒေသကြီး/ ပြည်နယ်ကျော်၍ ပြင်ပသို့ သယ်ယူဖြန့်ဖြူးရောင်းချခွင့်များ မရရှိသည့်အတွက် ဆန်စပါးဈေးကွက် အခြေအနေမှာ တည်ငြိမ်လျက်ရှိပြီး ဈေးကွက်တွင်ဝယ်/သယ်/သို/ကြိတ်/ဖြန့် ဟန်ချက်ညီစွာလုပ်ဆောင်နိုင်မှသာ အလုပ်သမား၊ တောင်သူ၊ ကုန်သည်၊ စက်ပိုင်များ တွက်ချေ ကိုက်နိုင်မည်ဖြစ်ပါကြောင်း ဆန်စက်ပိုင်များထံမှ လေ့လာသိရှိရပါသည်။

DOCA(စစ်ကိုင်း)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ ဆောင်ပုဒ် ဖြစ်သည့် “စားသုံးသူအခွင့်အရေးဦးစားပေး” ဆိုသည့်အတိုင်း စားသုံးသူပြည်သူများသည် စားသုံးသူအခွင့် အရေးနှင့် ပတ်သက်သည့် အသိပညာဗဟုသုတများရရှိစေရန် ကျောင်း၊ ဈေး၊ ရပ်ကွက်၊ ကျေးရွာ  များ၊ ဌာနဆိုင်ရာရုံးများ၊ တက္ကသိုလ်/ကောလိပ်များ၊ တပ်ရင်းတပ်ဖွဲ့များကို စားသုံးသူ ကာကွယ်ပေးရေး အသိ ပညာပေးဟောပြောပွဲများဆောင်ရွက်ခြင်း၊ ဈေးကွက်အတွင်း စားသုံးသူ များအနေဖြင့် ကုန်စည် နှင့်ဝန် ဆောင်မှုများကို အသုံးပြုရာတွင် ဘေးအန္တရာယ် ကင်းရှင်း စေရန်နှင့် ထုတ်ကုန်များ လုံခြုံစိတ်ချရမှုရှိစေရန် ဈေးကွက်မရောက်မီနှင့် ဈေးကွက် ရောက်ပြီးသော ကုန်စည်များကို ဈေးကွက်စောင့်ကြည့်စစ်ဆေးခြင်း များ ဆောင်ရွက်လျက်ရှိရာ စားသုံးသူ များ၏အခွင့်အရေး (၈)ချက်အနက် ကုန်စည် (သို့မဟုတ်) ဝန်ဆောင် မှုများနှင့် ပတ်သက်သည့် အသိပညာဗဟုသုတများနှင့် လိုအပ်သောအချက်အလက်များကို သိရှိလေ့လာ နိုင်ရန်၊ နစ်နာဆုံးရှုံးမှုများကို ရှင်းလင်းတင်ပြနိုင်ရန်၊ တိုင်ကြားနိုင်ခြင်းကို သိရှိစေရန် ရည်ရွယ်၍ ရွှေဘိုမြို့ နယ်အတွင်းရှိ ပြည်သူများအား စားသုံးသူကာကွယ်ရေး ဉပဒေ ၂၀၁၉ပါ အကြောင်းများကို သိရှိလေ့လာ နိုင်စေရန် စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ ဒု-ခရိုင်ဦးစီးမှူး  ဦးဆောင်၍ ၂၀၂၅ခုနှစ်၊ ဖေဖော်ဝါရီလအတွင်း စားသုံးသူကာကွယ်ရေးအသိပညာပေးဆွေးနွေးပွဲ (၂) ကြိမ် ဆောင်ရွက်ခဲ့ပါ သည်။

          (၁၄.၂.၂၀၂၅)ရက်နေ့တွင် ရွှေဘိုမြို့၊ အမှတ်(၁၀)၊ ဂေါက်ကွင်းလမ်းရှိ  မြို့ပြနှင့်အိမ်ရာ ဖွံ့ဖြိုးရေးဦး စီးဌာန၊ ဝန်ထမ်းအိမ်ရာတွင် တန်ဖိုးမြှင့်စားသောက်ကုန်ထုတ်လုပ်မှုနည်းပညာသင်တန်းရှိ သင်တန်း သား/သင်တန်းသူများနှင့် (၁၉.၂.၂၀၂၅)ရက်နေ့တွင် ရွှေဘိုမြို့၊ စည်ပင်သာယာရုံးခန်းမတွင် ဈေးသူ/ ဈေး သားများအား စားသုံးသူကာကွယ်ရေးဉပဒေ၊ စားသုံးသူအခွင့်အရေးနှင့် လိုက်နာရ မည့်တာဝန်များ၊ အခန်း (၁၈)ပါကုန်အညွှန်းအမှတ်အသားဖော်ပြခြင်းအကြောင်းနှင့် ကုန်အညွှန်း အမှတ်အသားဖော်ပြခြင်းနှင့် စပ် လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြား ချက်အမှတ် (၂/၂၀၁၉) ပါအ ကြောင်းများ၊ စားသုံးသူအခွင့် အရေးနှင့် အကျိုး စီးပွားနစ်နာ ဆုံးရှုံးမှု များရှိပါက တိုင်ကြားနိုင်ကြောင်းနှင့် တိုင်ကြားနိုင်သည့်နေရာများ၊ ဌာနနှင့် သက်ဆိုင်သော အကြောင်း များကို မေးမြန်းစုံစမ်းနိုင်သည့်Concumer Call Center NO 1535 အကြောင်း၊ တိုင်ကြားစာများကို စိစစ်ညှိနှိုင်းဖြေရှင်းပေးသည့် အကြောင်းများကို အသေးစိတ် ရှင်းလင်း ဆွေးနွေးခဲ့ပြီး လက်ကမ်းစာ စောင်များ ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၅ခုနှစ်၊ ဖေဖော်ဝါရီလ(၂၄)ရက်နေ့ နံနက်( ၀၈:၀၀ ) နာရီအချိန်တွင် လွိုင်ကော်မြို့ အလက-ဒေါတမ အခြေခံပညာအလယ်တန်းကျောင်း ကျောင်းမုန့်ဈေးတန်း၌ ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးရာတွင် အ.လ.က-ဒေါတမ ကျောင်းဝန်းအတွင်းရှိ ကျောင်း မုန့်ဈေးတန်းများ၌ ရောင်းချနေသော မုန့်များမှာ မြန်မာနိုင်ငံစားသုံးသူကာကွယ်ရေးကော်မရှင်၏ ( ၂/ ၂၀၁၉ ) ပါ ကုန်အညွှန်းအမှတ်အသားသတ်မှတ်ချက်များနှင့် ကိုက်ညီမှုရှိသော မုန့်များ ရောင်းချ နေသည်ကို စစ်ဆေးတွေ့ရှိရပြီး၊ မြန်မာမုန့်များရောင်းချသူများမှာလည်း မုန့်များအား တစ်ခါသုံး လက်အိတ် များသုံးစွဲခြင်း၊ ယင်လုံဇကာများဖုံးအုပ်၍ ရောင်းချနေသည်ကို စစ်ဆေးတွေ့ရှိ ရပါသည်။

          ကျောင်းမုန့်ဈေးတန်း၌ မုန့်ရောင်းချနေသူများအနေဖြင့် အစားအသောက်များကိုင်တွယ်ရာတွင် သန့်ရှင်းသပ်ရပ်စွာကိုင်တွယ်ရောင်းချကြရန်၊ မြန်မာနိုင်ငံစားသုံးသူကာကွယ်ရေးကော်မရှင်၏ (၂/၂၀၁၉) ပါ ကုန်အညွှန်းအမှတ်အသားသတ်မှတ်ချက်နှင့် ကိုက်ညီမှုရှိသည့်မုန့်များသာ ဝယ်ယူရောင်းချကြရန် အသိပညာပေး ကွင်းဆင်းစစ်ဆေးဆောင်ရွက်ခဲ့ကြောင်းသတင်းရရှိပါသည်။

DOCA(ကယား)