သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ ကြံခင်းမြို့နယ်ဦးစီးမှူးသည် (၅-၉-၂၀၂၄)ရက်နေ့၊ နံနက် (၀၉:၃၀) နာရီအချိန်တွင် အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ ပြည်သူ့ကျန်းမာရေးဦးစီးဌာနတို့နှင့်ပူးပေါင်း၍ ကြံခင်းမြို့နယ်၊ မြို့မဈေးအတွင်းရှိ ဆေးမျိုးစုံအရောင်းဆိုင်များအား ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ပါသည်။

      ထိုသို့ကွင်းဆင်းခဲ့ရာတွင် စားသုံးသူမိဘပြည်သူများဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုးအစားကိုလိုက်၍ကုန်အညွှန်းအမှတ်အသားများပြည့်စုံမှန်ကန်စွာဖော်ပြခြင်းရှိ/မရှိတို့ကိုစစ်ဆေးခဲ့ပြီး၊ အိမ်သုံးဆေးဝါးများ ဈေးကွက်အတွင်းပြတ်လပ်မှုရှိ/မရှိ၊ အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်မရှိသော၊ အရည်အသွေးနှင့် စံချိန်စံညွှန်းစစ်ဆေးမှုခံယူထားခြင်းမရှိသည့် အာမခံချက်မရှိသော တရားမဝင်ဆေးဝါးများကိုရောင်းချခြင်းမပြုရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးနှင့် သတ်မှတ် အရည်အသွေးပြည့်မီသော ကုန်စည်များကိုသာရောင်းချရန်၊ စားသုံးသူဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေးခဲ့ပြီး ဆေးမျိုးစုံအရောင်းဆိုင်(၈)ဆိုင်အား ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြကြောင်းသိရှိရပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့၊ အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့သည် စားသုံးသူရေးရာဦးစီးဌာနနှင့်အတူ (၄-၉-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် မအူပင်မြို့ပေါ်ရှိ ဆေးဆိုင် (၅)ဆိုင်တွင် ရောင်းချနေသောဆေးဝါးများ ပြတ်လပ်မှုရှိ/မရှိ ကွင်းဆင်းစစ်ဆေးခဲ့ကြသည်။

      ထိုသို့ကွင်းဆင်းစစ်ဆေးရာတွင် မြို့နယ်အစားအသောက်နှင့် ဆေးဝါးကြီးကြပ်မှုကော်မတီအဖွဲ့၊ စားသုံးသူရေးရာဦးစီးဌာနမှ ဦးအောင်ဇော်ဦး (ဦးစီးအရာရှိ) တို့သည် မအူပင်မြို့ပေါ်ရှိ မြမြဆေးဆိုင်၊ ဦးကျားဘိုလ်ဆေးဆိုင်၊ မြမြင့်ဇူဆေးဆိုင်၊ ဒေါ်သိန်းညွှန်ဆေးစတိုးဆိုင်၊ မိုးပြည့်စုံဆေးဆိုင်တို့တွင် ဆေးပြတ်လပ်မှုရှိ/မရှိနှင့်၊ ဆေးဝါးဈေးနှုန်းအခြေအနေများ၊ စံမမီဆေးဝါးများရောင်းချမှုရှိ/မရှိ၊ ဆေးရောင်းချမှုဈေးကွက်အခြေအနေများကို စစ်ဆေးဆောင်ရွက်ခဲ့ရာတွင် ကုမ္ပဏီထုတ် ဆေးဝါးများဖြစ်သည့် ဆီးချိုနှင့်ပတ်သက်သောဆေးဝါးများမှာ ဝင်ရောက်မှုနည်းပါးပြီး ယခင်ထက် ဈေးနှုန်းကြီးမြင့်လာသည်ကိုတွေ့ရှိရကြောင်း၊ ဆိုင်ရှင်များအား  မြန်မာနိုင်ငံဆေးနှင့် ဆေးပစ္စည်းလုပ်ငန်းရှင်အသင်းမှ ဆေးဝါးနှင့် ဆေးပစ္စည်းများပြတ်လပ်မှုမရှိစေရေးနှင့် ဆေးဝါးနှင့် ဆေးပစ္စည်းများ လွယ်ကူချောမွေ့စွာတင်သွင်းနိုင်ရန် သွင်းကုန်လိုင်စင်လျှောက်ထားနိုင်ရေးအတွက် ဆောင်ရွက်လျက်ရှိသောကြောင့် ဈေးကွက်တွင် ကုန်ပစ္စည်းပြတ်လပ်သွားမည်ကို မစိုးရိမ်ကြရန်နှင့် ဈေးနှုန်းများမြှင့်တင်ရောင်းချခြင်းမပြုရန် ဆိုင်ရှင်များအားမှာကြားခဲ့ပြီးနောက် ယခုကဲသို့စစ်ဆးခြင်းများကို မြို့နယ်အတွင်းရှိ ဆေးဝါးအရောင်းဆိုင်များအား အခါအား‌လျော်စွာ စစ်ဆေးဆောင်ရွက်သွားမည်ဖြစ်ပြီး အဖွဲ့က ပူးပေါင်းချိတ်ဆက်ဆောင်ရွက်သွားရန် ပြောကြားခဲ့ကြောင်းသိရှိရပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ တာချီလိတ်မြို့နယ်တာဝန်ခံရုံးမှ စစ်ဆေးရေးမှုးနှင့်ဝန်ထမ်းများသည် အသေးစားစက်မှုလက်မှုဦးစီးဌာန၊ စည်ပင်သာယာရေးဌာနတို့မှဝန်ထမ်းများနှင့်ပူးပေါင်း၍ ၂၀၂၄ခုနှစ်၊ စက်တင်ဘာလ(၂)ရက်နေ့ နံနက်(၁၀:၀၀)နာရီအချိန်တွင် မိုင်းယောင်းမြို့နယ်၊ အမှတ်(၇)ရပ်ကွက်အတွင်းရှိ ဆမ်တစ်ကိတ်နှင့် မုန့်မျိုးစုံလုပ်ငန်းအား ထုတ်ကုန်များလုံခြုံစိတ်ချရမှုရှိစေရန်အတွက် ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

    ထိုသို့ ကွင်းဆင်းစစ်ဆေးရာတွင် ဆမ်တစ်ကိတ်နှင့် မုန့်မျိုးစုံတို့သည် စားသုံးသူကာကွယ်ရေး ဥပဒေအခန်း(၁၈)ပါ“ကုန်အညွှန်းအမှတ်အသားဖော်ပြခြင်း”နှင့် ပတ်သက်၍ ပြည့်စုံစွာဖော်ပြ ထားပြီး ထုတ်ကုန်များကို သန့်ရှင်းသပ်ရပ်စွာထုတ်လုပ်ဖြန့်ချိသည်ကို စစ်ဆေးတွေ့ရှိရပါသည်။ ထို့နောက် စစ်ဆေးရေးမှူးနှင့် ဌာနဆိုင်ရာဝန်ထမ်းများသည် လုပ်ငန်းရှင်များအား စားသုံးသူများ ဘေးအန္တရာယ်ကင်းရှင်းစေရေးကို အလေးထားဆောင်ရွက်ရန်၊ ကုန်ကြမ်းများစနစ်တကျသို လှောင်ရန်၊ သက်ဆိုင်ရာဌာနများ၏လုပ်ငန်းလိုင်စင်နှင့် ထောက်ခံချက်များပြုလုပ်ရန်၊ စားသုံးသူကာကွယ်ရေးဥပဒေ အခန်း(၁၀)ပါ “စီးပွားရေးလုပ်ငန်းရှင်၏တာဝန်များ” ကိုလိုက်နာဆောင်ရွက်ရန် ဆွေးနွေးခဲ့ကြောင်း သိရှိရပါသည်။

DOCA(ရှမ်း)

  ရှမ်းပြည်နယ် (အရှေ့ပိုင်း)၊ ကျိုင်းတုံမြို့၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ ဝန်ထမ်းများသည် ၂၀၂၄ ခုနှစ်၊ စက်တင်ဘာလ (၄)ရက်နေ့၊ နံနက် (၀၉:၃၀)နာရီအချိန် တွင် ကျိုင်းတုံမြို့၊ အမှတ် (၄) အခြေခံပညာအထက်တန်းကျောင်း၌ စားသုံးသူကာကွယ်ရေး အသိပညာပေးဟောပြောပွဲကို ကျင်းပပြုလုပ်ခဲ့ပါသည်။ အဆိုပါ ဟောပြောပွဲသို့ တက်ရောက်သည့်  ကျောင်းသား၊ ကျောင်းသူ (၁၁၅)ဦးအား လက်ကမ်းစာစောင်များ ဖြန့်ဝေပေးအပ်ကာ ဟောပြောပွဲအား ကျင်းပပြုလုပ်ခဲ့ကြောင်း သိရှိရပါသည်။

  ယင်းဟောပြောပွဲတွင် ရှမ်းပြည်နယ် (အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ ဦးစီးမှူးဦးအောင်လင်းဦးက စားသုံးသူကာကွယ်ရေးဆိုင်ရာလုပ်ငန်းနှင့် ပတ်သက်၍ ကျောင်းသား၊ ကျောင်းသူများအား အသိပညာပေးဟောပြောခဲ့ပါသည်။ စားသုံးသူကာကွယ်ရေးနှင့် ပတ်သက်၍ စားသုံးသူကာကွယ်ရေးဥပဒေပြဌာန်းချက်ပါ စားသုံးသူ၏ အဓိပ္ပာယ်ဖွင့်ဆိုချက်များ၊ စားသုံးသူအခွင့်အရေးနှင့်တာဝန်များ၊ စီးပွားရေး၏လုပ်ငန်းရှင်၏ တာဝန်နှင့်ဝတ္တရားများ၊ ကုန်စည်တစ်ခုကို ဝယ်ယူမည်ဆိုပါက စစ်ဆေးကြည့်ရှုရမည့် သိသင့်သိထိုက်သည့်အချက်များ၊ ဘေးဥပါဒ်အန္တရာယ်ဖြစ်စေနိုင်သည့် အစားအစာများနှင့် စားသုံးရန် သင့်/ မသင့် သိရှိသင့်သည့် ကုန်အညွှန်းအမှတ်အသားပါအချက်များအား ရှင်းလင်းပြောကြားပြီး ထောက်ခံချက်ရှိသော အစားအစာနှင့် ထောက်ခံချက်မရှိသော အစားအစာများကို ပုံများနှင့်တကွပြသခဲ့ကြောင်း သိရှိရပါသည်။

   ထို့နောက် သိကောင်းစရာများဖြစ်သော ဆိုးဆေး၊ ကြာရှည်ခံဖော်မလင်ဆေးနှင့် ဟင်းချိုမှုန့်၏ ကျန်းမာရေးဆိုင်ရာအန္တရာယ်ရှိမှုများကို ရှင်းလင်းပြောကြားခဲ့ကြောင်း သိရှိရပါသည်။

DOCA(ရှမ်း)

      မအူပင်မြို့ ‌အလတ်စားစက်မှုလက်မှုသင်တန်းကျောင်းတွင် သင်တန်းသားများကို စားသုံးသူရေးရာဦးစီးဌာနမှ စားသုံးသူအခွင့်အရေးနှင့်ပတ်သက်၍ သိကောင်းစရာများအကြောင်းကို ၂၀၂၄ခုနှစ်၊ စက်တင်ဘာလ ၅ရက်နေ့၊ နံနက် (၁၀:၀၀)နာရီအချိန်တွင် သွားရောက်အသိပညာပေးဟောပြောပွဲပြုလုပ်ခဲ့ကြသည်။

       အဆိုပါဟောပြောပွဲတွင် မအူပင်ခရိုင်စားသုံးသူရေးရာဦးစီးဌာမှ ဒေါ်သင်းသင်းထွေး (ရုံးအကူမှူး)က စားသုံးသူအခွင့်အရေးနှင့်တာဝန်များအကြောင်းသိကောင်းစရာများကိုဟောပြောရာ အမေရိကန်သမ္မတ ဂျွန်အက်(ဖ်)ကနေဒီသည် (၁၉၆၂)ခုနှစ်၊ မတ်လ(၁၅)ရက်နေ့တွင် စားသုံးသူအခွင့်အရေးနှင့်ပတ်သက်၍ သိရှိနာလည်းပြီး စားသုံးသူအခွင့်အရေးကိုသိရှိခဲ့ကာ ဖြစ်ပေါ်လာသည့်အကြောင်းအရင်းကိုရှင်းလင်းခြင်း၊ စားသုံးသူကာကွယ်ရေးဥပဒေဖြစ်ပေါ်လာပုံအဆင့်ဆင့်ကိုရှင်းလင်းခြင်း၊ စားသုံးသူအခွင့်အ‌ရေးအပြည့်အဝရရှိစေရန် ဤဥပဒေကိုပြဋ္ဌာန်းခဲ့ခြင်း ဖြစ်ကြောင်းကိုရှင်းလင်းခြင်း၊ စားသုံးသူ၏အဓိပ္ပါယ်၊ စားသုံးသူအခွင့်အရေး (၈)ချက်ကိုရှင်းလင်းခြင်း၊ စားသုံးသူလိုက်နာရမည့်တာဝန်များအကြောင်း၊ စားသုံးသူအခွင့်အရေးနစ်နာဆုံးရှုံးမှုရှိလာပါက တိုင်းကြားလိုရသည့် နည်းလမ်းများအကြောင်းကို အကျယ်တဝင့်ရှင်းလင်းဟောပြောပြီး စားသုံးသူအခွင့်အရေးနှင့်သက်ဆိုင်သော နမူနာပြ Short Vedio များဖြင့် ရှင်းလင်းဟော ပြောခဲ့ပြီး ဟောပြောပွဲသို့ အလတ်စား စက်မှုလက်မှုသင်တန်းကျောင်းမှ သင်တန်းသား (၇၂)ဦးတက်ရောက်ခဲ့ကြောင်းသိရှိရပါသည်။

DOCA(ဧရာဝတီ)