သတင်းနှင့် လှုပ်ရှားမှုများ

       တနင်္သာရီတိုင်းဒေသကြီး၊ မြိတ်ခရိုင်၊ စားသုံးသူရေးရာဦးစီးဌာနမှ တာဝန်ရှိသူများသည် ၂၀၂၄ခုနှစ်၊ ဇူလိုင်လ(၁၇) ရက်နေ့၊ နံနက်(၁၁း၀၀)နာရီအချိန်တွင် မြိတ်မြို့၊ ကန်ဖျားရပ်ရှိ  မုန့်လုပ်ငန်းလုပ်ကိုင်နေသော Li Li မုန့်ဆိုင်သို့သွားရောက်၍ လုပ်ငန်းရှင်အား ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ တွေ့ဆုံဆွေးနွေးခဲ့ကြပါသည်။

       ထိုသို့တွေ့ဆုံဆွေးနွေးရာတွင် ဘေးအန္တရာယ်ကင်းသောစားသောက်ကုန်များကို ဦးစားပေးထုတ်လုပ်နိုင်ရေးနှင့် သန့်ရှင်းလတ်ဆတ်သောထုတ်ကုန်များထုတ်လုပ်နိုင်ရေး၊ သက်တမ်းလွန်ထုတ်ကုန်ပစ္စည်းများမရှိစေရေးအတွက် အထူးဂရုပြုဆောင်ရွက်နိုင်ရေး၊ ကုန်အညွှန်းအမှတ်အသားပြည့်စုံစွာဖော်ပြနိုင်ရေးတို့ကို ဆွေးနွေးပြောကြားခဲ့ပြီး လက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(တနင်္သာရီ)

   ၁၅.၇.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ ရေးမြို့နယ် တာဝန်ခံသည် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် ပူးပေါင်း၍ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနခန်းမ၌ စားသုံးသူ ကာကွယ်ရေး ဥပဒေပါတားမြစ်ချက်များအကြောင်း အသိပညာပေး (Talk Show) ဆွေးနွေးပွဲပြုလုပ်ခဲ့‌ကြောင်း သိရှိရပါသည်။

    အဆိုပါဆွေးနွေးပွဲတွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ တာဝန်ခံ ဒေါ်အိအိဖြိုးက အသိပညာပေး (Talk Show) ပြုလုပ်ရခြင်း၏ ရည်ရွယ်ချက်ကို ရှင်းလင်းပြောကြားပြီး စားသုံးသူရေးရာဦးစီးဌာန၊ ရေးမြို့နယ်တာဝန်ခံ ဒေါ်အိအိဖြိုးက ၂၀၁၉ ခုနှစ် မတ်လ(၁၅)ရက်နေ့တွင် ပြဌာန်းခဲ့သော စားသုံးသူကာကွယ်ရေးဥပဒေ၏ အခန်း(၂၃)ပါတားမြစ်ချက်များဖြစ်သော ပုဒ်မ ၆၂ ၊ ပုဒ်မ ၆၃၊ ပုဒ်မ ၆၄၊ ပုဒ်မ ၆၅၊ ပုဒ်မ ၆၆၊ ပုဒ်မ ၆၇၊ ပုဒ်မ ၆၈ တို့ကို ဖောက်ဖျက်ကျူးလွန်ခြင်းမပြုလုပ်ရန်နှင့် ဖောက်ဖျက်ကျူးလွန်ပါက စားသုံးသူကာကွယ်ရေးဥပဒေအရ အရေးယူဆောင်ရွက်နိုင်သည့် ပြစ်မှုပြစ်ဒဏ်များဆိုင်ရာ အကြောင်းအရာများအား အကျယ်တဝင့် ဆွေးနွေးခဲ့ကြောင်း သိရှိရပါသည်။

DOCA(မွန်)

     မွန်ပြည်နယ်၊ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများသည် ၁၅.၇.၂၀၂၄ ရက်နေ့တွင် မြို့နယ်စည်ပင်သာယာရေးအဖွဲ့၊ မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ ဘီးလင်းမြို့၊ ဘိုးရာဇာရပ်ကွက်၊ မင်္ဂလာဈေးအတွင်းရှိ ကုန်စုံဆိုင်များတွင် ရောင်းချနေသော စားသုံးဆီအမျိုးမျိုးတို့အား ဈေးကွက်စောင့်ကြည့်စစ်ဆေးခဲ့သည်။

    ထိုသို့ ဈေးကွက်စောင့်ကြည့်စစ်ဆေးရာတွင် စားသုံးဆီအမျိုးမျိုးတို့အပေါ်၌ ကုန်အညွှန်းအမှတ်အသားအား မြန်မာဘာသာဖြင့် ပြည့်စုံစွာဖော်ပြခြင်း ရှိ/မရှိ၊ ရောနှောဆီများ ရောင်းချခြင်း ရှိ/မရှိနှင့် ဘေးအန္တရာယ်ရှိသော စားသုံးဆီများ ဈေးကွက်အတွင်း ရောင်းချဖြန့်ဖြူးမှု ရှိ/မရှိတို့ကို စစ်ဆေးခဲ့ရာ ကုန်အညွှန်းအမှတ်အသား ပြည့်စုံစွာ ဖော်ပြထားပြီး စားသုံးသူများ ဘေးအန္တရာယ်ကင်းသော စားသုံးဆီများကိုသာ ရောင်းချနေသည်ကို တွေ့ရှိရကြောင်း သတင်းရရှိပါသည်။

DOCA(မွန်)

     ၁၂.၇.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံသည် ချောင်းဆုံမြို့နယ်ကုလားဘီကျေးရွာရှိ သဘာဝမြေဩဇာလုပ်ငန်းရှင်နှင့် တွေ့ဆုံဆွေးနွေးခဲ့သည်။

    ထိုသို့တွေ့ဆုံရာတွင် ချောင်းဆုံမြို့နယ်တာဝန်ခံက သဘာဝမြေဩဇာထုတ်လုပ်မှု၊ ကုန်ကြမ်းပါဝင်မှု၊ ဖြန့်ဖြူးမှု၊ လုပ်သားအင်အားနှင့်စပ်လျဉ်း၍ ဆွေးနွေးမေးမြန်းခဲ့ရာ လုပ်ငန်းရှင်က ကုန်ကြမ်းများကို ချောင်းဆုံမြို့နယ်ရှိကျေးရွာများတွင် သွားရောက်ဝယ်ယူပြီး ကုန်ကြမ်းအနေဖြင့် ကြက်ချေး၊ ဝက်ချေး၊ နွားချေး၊ စပါးမှုန်၊ ဖွဲနု၊ နေကြာဖတ်များကို သမအောင်ရောစပ်၍ ထုတ်လုပ်ကြောင်း၊ တစ်နေ့လျှင် အိတ်ရေ (၅၀) ခန့်ထုတ်လုပ်ကြောင်း၊ ဖြန့်ဖြူးမှုအနေဖြင့် ချောင်းဆုံမြို့နယ်၊ မော်လမြိုင်မြို့နယ်၊ ထားဝယ်မြို့သို့ တင်ပို့ရောင်းချကြောင်း၊ ဈေးနှုန်းအနေဖြင့် တစ်အိတ်လျှင် ၁၈၀၀၀ ကျပ်ဖြင့် ရောင်းချကြောင်း အလုပ်အကိုင် အခွင့်အလမ်းဖန်တီးပေးမှုအနေဖြင့် လုပ်သား (၆) ဦးအား အလုပ်အကိုင်ဖန်တီးပေးနိုင်ကြောင်း ပြန်လည်ဆွေးနွေးခဲ့သည်။

DOCA(မွန်)

       စားသုံးသူရေးရာဦးစီးဌာနသည် စားသုံးသူများအသုံးပြုလျက်ရှိသည့် ကုန်စည်များနှင့်စပ်လျဉ်း၍ ဘေးအန္တရာယ်ရှိ/မရှိ စောင့်ကြည့်စစ်ဆေးခြင်းနှင့် ကုန်အညွှန်းအမှတ်အသားများတွင် ဖော်ပြရမည့်အချက်များပါဝင်မှုရှိ/မရှိ စောင့်ကြည့်စစ်ဆေးခြင်းများအား စားသုံးသူကာကွယ်ရေးဥပဒေနှင့်အညီ ဆောင်ရွက်လျက်ရှိပါသည်။

         ထိုသို့ ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ရာတွင် ပိုမိုစနစ်တကျဖြစ်စေရန်နှင့် ထိရောက်မှုရှိစေရန်အတွက် ဈေးကွက်စောင့်ကြည့်စစ်ဆေးရန် ဦးစားပေးကုန်စည် (၁၀) မျိုးအနက် ထိခိုက်လွယ်သည့် စားသုံးသူဖြစ်သော ကလေးငယ်များသုံးစွဲသည့် ကလေးတစ်ကိုယ်ရည်သုံးပစ္စည်းအမျိုးမျိုးတို့တွင် ကုန်အညွှန်းအမှတ်အသားများပါဝင်မှုရှိ/မရှိ၊ ကမာရွတ်မြို့နယ်၊ စံရိပ်ငြိမ်(ဂမုန်းပွင့်) တွင် ကလေးတစ်ကိုယ်ရည်သုံးပစ္စည်းများဖြစ်သော  Ko DO Mo (သွားတိုက်ဆေး)၊ Baby Moon (Diber)၊ Baby Mild (Baby Cream)၊ Dnee (ကလေးပေါင်ဒါ)၊ Mammy Poko(Diber)၊ Baby Mild (ပေါင်ဒါ)၊ Baby Mild (Shampoo)၊ 2080 (သွားတိုက်ဆေး)၊ Dancing Baby (Diber) များနှင့် လှိုင်မြို့နယ်၊ လှိုင်ဈေးကြီးတွင် Sweety Pink(Baby Cream)၊ Baby Moon (Diber)၊ Baby Mild (Baby Cream)၊ Mammy Poko(Diber)၊ Lovely Baby (Diber)၊ Baby Mild (ပေါင်ဒါ)၊ Baby Mild (Shampoo) တို့အား ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)