သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန၊ကလေးခရိုင်ဦးစီးမှူးရုံး မှ တာဝန်ရှိသူများသည် (၁၆.၁၂.၂၀၂၂) ရက်နေ့တွင် နယ်မြေအတွင်းရှိ ညောင်ပင်သာ ရပ်ကွက်အတွင်းရှိ ဆေးနှင့်ဆေးပစ္စည်းအရောင်းဆိုင်များသို့ သွားရောက်၍ ဈေးကွက်စောင့်ကြည့်စစ်ဆေးခဲ့ကြောင်း သိရသည်။

          ထိုသို့ သွားရောက်စစ်ဆေးရာတွင် ဈေးကွက်အတွင်းရောင်းချနေသည့် ဆေးနှင့် ဆေး ပစ္စည်းများ သက်တမ်းလွန်ခြင်း ရှိ/မရှိ၊ စံမညီသည့် ဆေးဝါးများ ရောင်းချခြင်းရှိ/ မရှိနှင့် ဆေးနှင့် ဆေးပစ္စည်းများ ပြတ်လတ်မှုရှိ/ မရှိ ကို သွားရောက်စစ်ဆေးခြင်းဖြစ်ကြောင်း၊ ဆေးနှင့် ဆေးပစ္စည်းအရောင်းဆိုင်ပိုင်ရှင် ဒေါ်လုံးသည် မိမိအနေဖြင့် တရားဝင်ကုမ္ပဏီ များမှ တင်သွင်းသည့် ဆေးဝါးများကိုသာ ရောင်းချပြီး သက်တမ်းလွန်နေသည့် ဆေးနှင့်ဆေးဝါး များကို ရောင်းချခြင်း မပြုလုပ်ကြောင်းနှင့် မိမိအနေဖြင့် သက်ဆိုင်ရာဦးစီးဌာနများ၏ လမ်းညွှန်မှာကြားချက်များ အတိုင်းသာ လိုက်နာဆောင်ရွက်၍ ရောင်းချလျက်ရှိကြောင်း သတင်းရရှိပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ တလုတ္ထော်မြို့၊ မရမ်းရပ်ကွက်ရှိ ဓမ္မာရုံတွင် (၁၅.၁၂.၂၀၂၂) ရက်နေ့ နေ့လယ်(၁၄:၀၀) နာရီအချိန်၌ မြို့နယ်တာဝန်ခံက စားသုံးသူပြည်သူ (၁၅၀) ဦးအား စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့သည်။

          ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးမိုးကျော်မှ စားသုံးသူကာကွယ် ရေးဥပဒေကို ၂၀၁၉ခုနှစ် မတ်လ(၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဌာန်းခဲ့ကြောင်း၊ ဥပဒေတွင်ပါရှိသောစားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များအကြောင်း၊ ကုန်အညွှန်းအမှတ်အသားဖော်ပြခြင်း အကြောင်း၊ ရောင်းချနေသောကုန်စည်များတွင် ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ မည်သည့် စီးပွားရေး လုပ်ငန်းရှင်မဆို ပုဒ်မ(၄၁) ပုဒ်မခွဲ(ခ)နှင့်(ဆ)တို့ပါ ကုန်အညွှန်းဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည့် ကုန်ပစ္စည်းကိုသာ စားသုံးသူများလက်ဝယ်အရောက် ဘေးကင်းလုံခြုံမှုရှိစေရေးအတွက် ဖြန့်ဖြူးရောင်းချရမည်ဖြစ်ကြောင်း၊ ပြစ်မှုနှင့်ပြစ်ဒဏ်များအကြောင်းနှင့် စားသုံးသူသတင်းပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာ CICC ရုံးခန်းများ ဖွင့်လှစ်ထားရှိမှု အခြေအနေကိုလည်းကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်း စသည်တို့ကို အသိပညာပေးဟောပြောခဲ့ပြီး၊ တက်ရောက်သူများမှလည်း သိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များ ပေးဝေခဲ့ကြကြောင်း သိရှိရပါသည်။

DOCA(ဧရာဝတီ)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး ဦးစီးမှူး၏လမ်းညွှန်မှုဖြင့် သရက်ခရိုင်၊ ကံမမြို့ရှိဈေးကွက်များတွင် ရောင်းချဖြန့်ဖြူးလျက်ရှိသော ကုန်စည်များဘေးကင်းလုံခြုံ စိတ်ချရမှုရှိစေရေးအတွက် (၁၃.၁၂.၂၀၂၂)ရက်နေ့ နံနက်(၁၀:၀၀)နာရီ အချိန်တွင် သရက်ခရိုင်ဦးစီးမှူးရုံးမှဝန်ထမ်းများနှင့် ကံမမြို့နယ်တာဝန်ခံ ဒေါ်နွဲ့ယဉ်ဝင်း(ဒု-ဦးစီးမှူး) သည် သရက်ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာန၊ ကံမမြို့နယ် အထွေထွေအုပ်ချုပ် ရေးဦးစီးဌာန၊ ရပ်ကွက်အုပ်ချုပ်ရေးမှူး၊ စည်ပင်သာယာရေးအဖွဲ့နှင့် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနပါဝင်သော ဌာနဆိုင်ရာအဖွဲ့စုံဖြင့် ကံမမြို့ပေါ်ရှိ အမှတ်(၁/၃/၄)ရပ်ကွက်များအတွင်း မကွေးတိုင်းဒေသကြီး၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ စားသုံးရန်မသင့်ထုတ်ပြန် ထားသော စားသောက်ကုန်(၁၅)မျိုးအား ဈေးကွက်အတွင်းရောင်းချနေမှု ရှိ/မရှိနှင့် ဌာန၏ ကုန်အညွှန်း အမှတ်အသားဖော်ပြချက်ပြည့်စုံမှု ရှိ/ မရှိတို့အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

        ထိုသို့ဈေးကွက်စောင့်ကြည့်စစ်ဆေးရာတွင် ကုန်စုံဆိုင်ပိုင်ရှင်များအား စားသုံးရန်မသင့်ဟု ထုတ်ပြန်ထားသည့် စားသောက်ကုန်များအား ဈေးကွက်အတွင်းရောင်းချမှုမရှိစေရေး၊ ကံမမြို့နယ် တာဝန်ခံ ဒေါ်နွဲ့ယဉ်ဝင်းမှ စားသုံးသူရေးရာကာကွယ်ရေးဥပဒေ အခန်း(၁၈) ကုန်အညွှန်းအမှတ် အသား ဖော်ပြခြင်းနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်(၂/၂၀၁၉)အရ ကုန်စည်အုပ်စု (၈)အုပ်စုတွင် ပါဝင်သောအချက်များ ပြည့်စုံမှန်ကန်စွာပါရှိစေရေး၊ စီးပွားရေးလုပ်ငန်း ရှင်များ၏တာဝန်များ၊ ကုန်စည်များနှင့်စပ်လျဉ်း၍ အာမခံချက်ပေးခြင်း၊ ကုန်အညွှန်းအမှတ်အသား ဆိုင်ရာပြဌာန်းချက်ပါ ပုဒ်မ(၄၁) ပုဒ်မခွဲ(ခ)နှင့် (ဆ)ပါအချက်များ၊ မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြားဘာသာတစ်ခု(သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြထားသော ကုန်စည်ကိုသာ ရောင်းချဖြန့်ဖြူးရန် အသိပညာပေးဆွေးနွေးခဲ့ကြောင်း သိရှိရပါသည်။

      ဆက်လက်၍ နေ့လယ် (၀၂:၀၀)နာရီအချိန်တွင် ကံမမြို့၊ အမှတ်(၁)ရပ်ကွက်ရှိမင်းကုန်းအလယ်တန်းကျောင်း(ခွဲ)သို့ အသိပညာပေးဟောပြောပွဲပြုလုပ်ရာတွင် မြို့နယ်တာဝန်ခံ ဒေါ်နွဲ့ယဉ်ဝင်းမှ ဌာန၏ ဥပဒေ ဖြစ်ပေါ်လာပုံ၊ ဌာန၏လုပ်ငန်းဆောင်ရွက်ချက်များနှင့် စားသုံးသူများသိရှိစေဖို့ စားသုံးသူအခွင့်အရေး (၈)ချက်အားအကျယ်တဝင့်ပြောကြားခြင်း၊ မင်းတုန်းမြို့နယ်တာဝန်ခံ၊ ဒု-ကြီးကြပ်ရေးမှူး ဦးကျော်ရွှေမှ စားသုံးသူများ မဖြစ်မနေသိရှိရမည့် ကုန်အညွှန်းအမှတ်အသားဆိုင်ရာ အချက်များကို အသေးစိတ် ရှင်းလင်းပြောကြားခြင်း၊ သရက်ခရိုင်ရုံးမှ ဒု-ဦးစီးမှူးဒေါ်ရီရီထွေးမှ စားသုံးသူတို့၏တာဝန်များ၊ အစား အသောက်များဝယ်ယူစားသုံးရာတွင် မဖြစ်မနေဝယ်ယူသတိပြုစားသုံးရမည့် ထုတ်လုပ်ရက်၊ ကုန်ဆုံးရက် များကို သေချာစွာကြည့်ရှုစားသုံးကြပါရန် အသိပညာပေးဟောပြောခြင်းများ ဆောင်ရွက်ခဲ့ပါသည်။ အဆိုပါအသိပညာပေးဟောပြောပွဲသို့ ကျောင်းသား/ကျောင်းသူ(၂၂၄)ဦး၊ ဆရာ/ ဆရာမ(၁၂)ဦး၊ စုစုပေါင်း (၂၃၆)ဦးနှင့် ပြန်ကြားရေးနှင့်ပြည့်သူ့ဆက်ဆံရေးဦးစီးဌာနမှ ဒု-ဦးစီးမှူး အပါအဝင်(၄)ဦး တက်ရောက်ခဲ့ကြောင်း သိရှိရပါသည်။

DOCA(မကွေး)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်း (မကွေးမြို့နယ်တာဝန်ခံ)သည် (၁၂.၁၂.၂၀၂၂)ရက်နေ့ နံနက် (၁၁:၀၀) နာရီတွင် မြို့နယ်အထွေထွေ အုပ်ချုပ်ရေးဦးစီးဌာန၊ စည်ပင်သာယာရေးအဖွဲ့တို့နှင့် ပူးပေါင်းပြီး မကွေးမြို့၊ မြို့မစျေးရှိ ကုန်စုံဆိုင်များတွင် မကွေးတိုင်းဒေသကြီး၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ စားသုံးရန်မသင့်ထုတ်ပြန်ထားသော အစားအသောက် (၁၅)မျိုးအား ဈေးကွက်အတွင်းရောင်းချနေမှုရှိ/မရှိနှင့် ဌာန၏ကုန်အညွှန်းအမှတ်အသား ဖော်ပြချက် ပြည့်စုံမှုရှိ/မရှိ တို့အား စျေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

            ထိုသို့ စျေးကွက်စောင့်ကြည့်စစ်ဆေးရာတွင် စားသုံးရန်မသင့် တားမြစ်ထားသော ကုန်စည်များအပြင် ကုန်စည်များတွင် စားသုံးသူကာကွယ်ရေးဥပဒေ-၂၀၁၉၊ အခန်း(၁၈)တွင် ပြဌာန်းထားသော ကုန်အညွှန်းအမှတ်အသားများ ပြည့်စုံမှန်ကန်စွာ ပါဝင်မှု ရှိ/မရှိ ကိုလည်း အလေးထား စစ်ဆေးခဲ့ပြီး ဆိုင်ရှင်များအား စားသုံးရန်မသင့်သော/ သက်တမ်းလွန်နေသော/ မှိုတက်နေသော/ ကုန်အညွှန်းအမှတ် အသားပြည့်စုံစွာမပါဝင်သော ကုန်စည်များအား ဆိုင်တင်မရောင်းချရန် အသိပညာပေး ဆွေးနွေးခဲ့ပြီး မြန်မာနိုင်ငံစားသုံးသူကာကွယ်‌ရေးကော်မတီ၏ ညွှန်ကြားချက်အမှတ်(၂/၂၀၁၉) လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီမှူးနှင့် သရက်ခရိုင် ဦးစီးမှူးတို့၏ လမ်းညွှန်မှုဖြင့် သရက်ခရိုင်ဦးစီးမှူးရုံးမှ ဒု-ခရိုင်ဦးစီးမှူးဦးအုန်းမြင့်ဦးဆောင်သော ဝန်ထမ်းများသည် (၁၀.၁၂.၂၀၂၂)ရက်နေ့ နံနက်(၀၉:၃၀)နာရီအချိန်တွင် သရက်မြို့၊ တောင်မင်းတည်း ရပ်ကွက်၊ လမ်းမတော်လမ်း၌ ရွှေဟင်္သာအမှတ်တံဆိပ်ဖြင့် မလိုင်လုံးအစို၊ အခြောက် ထုတ်လုပ်သည့် လုပ်ငန်းရှင်အား သွားရောက်တွေ့ဆုံခဲ့ပြီး စားသုံးသူကာကွယ်ရေး ဥပဒေ (၂၀၁၉) အခန်း (၁၈)ပါ ကုန်အညွှန်းမှတ်အသားများ ပြည့်စုံမှန်ကန်စွာ ပါဝင်စေရေးအတွက် အသိပညာပေး ဆွေးနွေးခဲ့ပါသည်။

       ရှေးဦးစွာ ဒု-ခရိုင်ဦးစီးမှူး ဦးအုန်းမြင့်မှ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉)ပါကုန်စည်အုပ်စု(က)ရှိ အစားအသောက်တွင် မြန်မာဘာသာဖြင့် ထည့်သွင်းရမည့် အချက် များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက်သည့်ဥပဒေပြဌာန်းချက်များ၊ စီမံခန့်ခွဲရေး နည်းလမ်းအရအရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များ အကြောင်း၊ ဒု-ကြီးကြပ်ရေးမှူး ဦးကျော်ရွှေမှ စီးပွားရေးလုပ်ငန်းရှင်၏တာဝန်၊ တားမြစ်ချက်များနှင့် ဒု-ဦးစီးမှူး ဒေါ်နွဲ့ယဉ်ဝင်းမှ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ပြည့်စုံမှန်ကန်မှု ရှိ/မရှိကို မိမိတို့ဌာနသို့ တင်ပြစိစစ်လျှောက်ထား နိုင်ပါကြောင်း၊ ကုန်အမှတ်တံဆိပ်စိစစ်ခွင့်ပြုချက်များအား ပြုလုပ် ဆောင်ရွက်ထားစေလိုကြောင်း၊ ကုန်အညွှန်းအမှတ်အသားများ ပြည့်စုံစွာပါရှိမှသာလျှင် စားသုံးသူများအနေဖြင့် စီးပွားရေးလုပ်ငန်းရှင်များအပေါ် ယုံကြည်မှုရရှိလာပြီး အကျိုးစီးပွားများ ပိုမိုရရှိလာနိုင်မည်ဖြစ်ကြောင်းနှင့် ကုန်အညွှန်းအမှတ်အသားများ ပြည့်စုံမှုမရှိသည့်ကုန်စည်များ တွေ့ရှိလာပါက ဥပဒေအရအရေးယူ ဆောင်ရွက်သွားမည်ဖြစ်သဖြင့် လိုက်နာဆောင်ရွက်စေလိုကြောင်း တိုက်တွန်းနှိုးဆော် အသိပညာပေးဆွေးနွေးခဲ့ရာ လုပ်ငန်းရှင်မှ သိရှိလိုက်နာဆောင်ရွက်သွားမည်ဖြစ်ကြောင်း သိရှိရပါသည်။

DOCA(မကွေး)