သတင်းနှင့် လှုပ်ရှားမှုများ

    မန္တလေးတိုင်းဒေသကြီး၊စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူးရုံးသို့ မိတ္ထီလာမြို့နယ်အတွင်းမှ “ပိုင်”အကြော်စုံလုပ်ငန်း လုပ်ကိုင်သည့် လုပ်ငန်းရှင်တစ်ဦးမှ ကုန်ပစ္စည်းထုတ်လုပ်ရာတွင် ဖော်ပြရ မည့် ကုန်အညွှန်းအမှတ်အသားများနှင့် စပ်လျဉ်း၍ သိရှိလိုသည်များကို (၁၇-၁၀-၂၀၂၂) ရက်နေ့ (၁၃၀၀) နာရီချိန်တွင်   ခရိုင်ဦးစီးမှူးရုံးခန်းတွင် ခရိုင်ဦးစီးမှူး ဦးဇော်မင်းနှင့် လာရောက်တွေ့ဆုံ မေးမြန်းခဲ့ပါသည်။  

     လုပ်ငန်းရှင်သည် မိတ္ထီလာမြို့နယ်ဒေသအတွင်း ငါးမုန့်ကြော်နှင့် ငါးရေခွံကြော်များကို ထုတ်လုပ်နေသူတစ်ဦး ဖြစ်ပါကြောင်း၊ ထုတ်လုပ်သည့် ကုန်ပစ္စည်းအပေါ်တွင် ဖော်ပြရမည့် ကုန်အညွှန်းအမှတ် အသားများအား သိရှိလိုက်နာဆောင်ရွက်နိုင်ရေး ညွှန်ကြားပေးနိုင်ပါရန် လာရောက်တွေ့ဆုံရခြင်းဖြစ် ကြောင်း ပြောကြားရာ ခရိုင်ဦးစီးမှူးမှ စားသုံးသူကာကွယ်‌ရေး ဥပ‌ဒေပါ စီးပွားရေးလုပ်ငန်းရှင်၏ တာဝန်များ၊ အခန်း (၁၅)ပါ ကုန်စည် သို့မဟုတ် ဝန်ဆောင်မှုလုံခြုံ စိတ်ချရမှုအကြောင်း၊ အခန်း (၁၇) ပါ ကုန်စည်နှင့် ဝန်ဆောင်မှုအပေါ် တာဝန်ရှိမှအချက်များ အကြောင်း၊ အခန်း (၁၉) ပါ တိုင်ကြား ခြင်းနှင့် စိစစ်ညှိနှိုင်း ဖြေရှင်းဆောင်ရွက်ခြင်းများအကြောင်း၊ စားသုံးသူကာကွယ် ရေးဥပဒေ (၁၈) ပါ ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်း ရှင်မဆို ပုဒ်မ (၄၁) ပုဒ်မခွဲ (ခ)နှင့် (ဆ) တို့ပါ ကုန်အညွှန်းအမှတ်အသား ဖော်ပြရာတွင် မြန်မာ ဘာသာဖြင့်ဖြစ်စေ၊ မြန်မာဘာသာနှင့်အခြား ဘာသာတစ်ခု (သို့) တစ်ခုထက် ပို၍တွဲလျှက်ဖြစ်စေ ရေးသားဖော်ပြထားသော ကုန်ပစ္စည်းများကိုသာ စားသုံးသူများ ဘေးကင်းလုံခြုံ မှုရှိစေရေးအတွက် ရောင်းချဖြန့်ဖြူးရ မည်ဖြစ်ကြောင်း၊ ကုန်စည်ကြောင့် စားသုံးသူများ ထိခိုက်နစ်နာ မှုရှိပါက တာဝန်ယူ ဖြေရှင်းပေးရမည်ဖြစ်ပြီး အာမခံမှုနှင့်အညီ ဆောင်ရွက်ပေးမှုမရှိပါက စားသုံးသူမှ တိုင်ကြားနိုင်သည့် အခွင့်အရေးရှိပြီးဌာနနှင့် စားသုံးသူကာကွယ် ရေးကော်မတီတို့၏ စီမံခန့်ခွဲရေး နည်းလမ်းအရအရေးယူနိုင်သည့်အချက်အလက်များကိုအသေးစိတ်ရှင်းလင်းဆွေးနွေးခဲ့ပြီး လုပ်ငန်းရှင် ထုတ်လုပ်သည့် ကုန်ပစ္စည်း နမူနာပေါ်တွင်ဖော်ပြထားသည့် ကုန်အညွှန်းအမှတ်အသားများအား ပြည့်စုံမှုရှိစေရေး လိုအပ်သည်များကို ဖြည့်စွက်ပြောကြား ခဲ့ပါ သည်။

DOCA(မန္တလေး)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊  လပွတ္တာမြို့နယ် တာဝန်ခံဦးမြင့်ဌေးသည် မြို့နယ်မွေးမြူရေးနှင့်ကုသရေးဦးစီးဌာနတို့နှင့်ပူးပေါင်း၍ (၁၉.၁၀.၂၀၂၂) ရက်နေ့ နေ့လယ်(၁၂:၃၀)နာရီက လပွတ္တာမြို့၊ အမှတ်(၂)ရပ်ကွက်၊ မူလွန်ကျောင်း၌ ကျောင်းသား/ ကျောင်းသူ၊ ဆရာ/ဆရာမများအား  စားသုံးသူအသိပညာပေး ဟောပြောပွဲဆောင်ရွက်ခဲ့ပါသည်။

      ထိုသို့ဟောပြောဆွေးနွေးရာတွင် မြို့နယ်တာဝန်ခံမှ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ မိမိတို့ဌာနအနေဖြင့် လက်ရှိဆောင်ရွက်နေသော လုပ်ငန်းတာဝန် များ၊ ရှေ့ဆက်လက်ဆောင်ရွက်ရမည့် လုပ်ငန်းတာဝန်များအား ဦးစွာရှင်းလင်းပြောကြားပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ ၂၀၁၉ ပါ ပြဌာန်းချက်များ၊ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း(၁၈)ပါ ပုဒ်မ(၄၁)ပုဒ်မခွဲ(ခ)နှင့် (ဂ)တို့ပါ ဥပဒေညွှန်ကြားချက်များအား ရှင်းလင်းဆွေးနွေးခဲ့ပြီး ကျောင်းသား၊ ကျောင်းသူများသိရှိ နားလည်နိုင်စေရန်အတွက် အစားအသောက်များတွင် ဓါတုဆိုးဆေးများပါဝင်မှုအကြောင်း၊ သက် တမ်းလွန်အစားအသောက်များအကြောင်း၊ အသေးစိတ်ပြောကြားပြီး ကျောင်းမုန့်ဈေးတန်းတွင် ရောင်းချနေသော မုန့်ဆိုင်များအား ကျောင်းမုန့်ဈေးတန်းစားသုံးသူရေးရာအဖွဲ့ဖြင့် သွားရောက် စစ်ဆေးပြီး ဆိုင်ပိုင်ရှင်များအား ဌာနမှထုတ်ပြန်ထားသော ဥပဒေညွှန်ကြားချက်များအား သိရှိလိုက်နာဆောင်ရွက်ကြရန် သက်တမ်းလွန်မုန့်များရောင်းချခြင်းမပြုကြရန် မုန့်ဆိုင်ပိုင်ရှင်များအား ရှင်းလင်းဆွေးနွေးခဲ့ပါသည်၊ ဟောပြောပွဲသို့ ဆရာ/ဆရာမ၊ ကျောင်းသား/ကျောင်းသူ (၈၆)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင် ဒု-ခရိုင်ဦးစီးမှူး ဦးအောင်ဇော်ဦးနှင့် မအူပင်ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ ခရိုင်ပြန်ကြားရေးနှင့် ပြည်သူ့ဆက်ဆံရေး Communit Center ခန်းမ၌ စားသုံးသူအသိပညာပေး Talk Showကို အောက်တိုဘာလ ၁၈ ရက်နေ့ နေ့လယ် (၁၃:၀၀)နာရီက ကျင်းပပြုလုပ်ခဲ့ ကြပါ သည်။

         ထိုသို့ ကျင်းပပြုလုပ်ရာတွင် ခရိုင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီး အရာရှိ ဒေါ်တင်သူဇာလှိုင်က ခရိုင် စားသုံးသူရေးရာဦးစီးဌာန နှင့် Talk Show ကျင်းပပြု လုပ်ရခြင်း ရည်ရွယ်ချက်နှင့် လုပ်ငန်းဆောင်ရွက်ချက်များ အကြောင်းကိုရှင်းလင်း ပြေားကြားပြီး၊ စားသုံးသူ ရေးရာဦးစီးဌာနမှလည်း စားသုံးသူများအနေဖြင့် အွန်လိုင်းမှတဆင့် ဝယ်ယူသုံးစွဲရာတွင် လိုက်နာရမည့်အချက်များ၊ မိုဘိုင်း(သို့) အွန်လိုင်းငွေကြေးဝန်ဆောင်မှုများ အသုံးပြုရာတွင် စားသုံးသူများအနေဖြင့် သတိပြုရမည့် အချက်များ၊ စားသုံးသူများအနေဖြင့်  ကုန်စည်နှင့် ဝန်ဆောင်မှုကို ဝယ်ယူ အသုံးပြုရာတွင်လည်းကောင်း၊ ထုတ်လုပ်ဖြန့်ဖြူးရောင်းချသည့် လုပ်ငန်းရှင်များကြောင့် နစ်နာဆုံးရှုံးမှုရှိပါက မအူပင်ခရိုင် စားသုံးသူရေးရာဦးစီးဌာနရှိ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ (CICC)သို့ တိုင်ကြားနိုင်မှုနှင့် တိုင်းဒေသကြီးဦးစီးမှူးရုံးနှင့် စားသုံးသူရေးရာဦးစီးဌာန ရုံးချုပ်ရှိ Website နှင့် အခြားတိုင်ကြားနိုင်သည့် နည်းလမ်းများ ဌာန၏ လက်ရှိ လုပ်ဆောင်ချက်များကို ရှင်းလင်း ဆွေးနွေးပြီးပါသည်။

        ဆက်လက် မေးမြန်းရာ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားများ ဆောင်ရွက်နိုင်မှု၊ ဈေးကွက်စောင့်ကြည့် စစ်ဆေးမှုများစသည့် စားသုံးသူရေးရာ အသိပညာပေး အကြောင်းများကို ဆွေးနွေးပြောကြားခဲ့ကြောင်း သတင်းရရှိပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဖျာပုံခရိုင်ဦးစီးမှူးသည် ခရိုင်ဦးစီးမှူးရုံးခန်းတွင် အောက်တိုဘာလ(၁၇)ရက်နေ့တွင် ဖျာပုံမြို့နယ်ဒေါ်ညိမ်းကျေးရွာရှိ နေလှန်းဆားထုတ်လုပ်နေသော စီးပွားရေးလုပ်ငန်းရှင်( ၈ ) ဦး အားစားသုံးသူကာကွယ်ရေးအသိပညာပေးဟောပြောခဲ့ကြောင်းသိရသည်။

        အဆိုပါနေလှန်းဆားထုတ်လုပ်နသော စီးပွားရေးလုပ်ငန်းရှင်များအား ခရိုင်ဦးစီးမှူးကဟောပြောရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနတွင် ကုန်သွယ်ရေးဦးစီးဌာန၊ စားသုံးသူရေးရာဦးစီးဌာန၊ မြန်မာ့ကုန်သွယ်မှုမြှင့်တင်ရေးစီးဌာနနှင့် မူပိုင်ခွင့်ဦးစီးဌာနဆိုပြီးဌာနကြီးလေးခု ရှိပါကြောင်း။ ခရိုင်/မြို့နယ်အဆင့်ဖြစ်၍ ကျန်ဌာနများ၏လုပ်ငန်းများကို စားသုံးသူရေးရာဦးစီးဌာန မှဆောင်ရွက်လျက်ရှိပါကြောင်း၊   ဆားထုတ်လုပ်မှု   လုပ်ငန်းများဖွံ့ဖြိုးတိုးတက်စေရေးအတွက် လို အပ်လျက်ရှိသောအရင်းအနှီးများကိုလည်း  ကိုဗစ်-၁၉ ချေးငွေမှ   ထုတ်ချေးထားပါကြောင်း၊ ဆားကြမ်းထုတ်လုပ်နေမှုမှ ဆားချောထုတ်လုပ်သွားရန် လိုအပ်ပါကြောင်း၊ စားသုံးသူကာကွယ်ရေးဥပဒေ အရ စီးပွားရေးလုပ်ငန်းရှင်များ လိုက်နာရမည့်တာဝန်များရှိပါကြောင်း၊ဆားထုတ်လုပ်သူလုပ်ငန်းရှင် များအသင်းဖွဲ့စည်းရန်လိုအပ်ပါကြောင်း၊ ဖွဲ့စည်းမည်ဆိုပါက ကူညီဆောင်ရွက်ပေးသွားမည်ဖြစ်ကြောင်း ဟောပြောဆွေးနွေးပါသည်။

         ထို့နောက် တက်ရောက်လာကြသော လုပ်ငန်းရှင်များမှ သိလိုသည်များ မေးမြန်းမှုအပေါ်တာဝန်ရှိသူများက ပြန်လည်ဖြေကြားခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရသည်။

DOCA(ဧရာဝတီ)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ဖျာပုံခရိုင်၊ဘိုကလေးမြို့နယ် တာဝန်ခံနှင့် ဝန်ထမ်းတို့သည် မြို့နယ်စည်ပင်သာယာရေးဦးစီးဌာနနှင့် ပူးပေါင်း၍ ၂၀၂၂ခုနှစ်၊ အောက်တိုဘာလ (၁၉)ရက်နေ့၊ နံနက်(၁၀:၀၀)နာရီအချိန်တွင် ဘိုကလေးမြို့မဈေးရှိ ဟင်းသီးဟင်းရွက် အရောင်းဆိုင်များသို့ ကွင်းဆင်း စိစစ်ခဲ့ကြပါသည်။

          ထိုသို့စစ်ဆေးစောင်ရွက်ရာတွင် ဘိုကလေးမြို့၊မြို့မဈေးအတွင်းရှိဟင်းသီးဟင်းရွက်ဆိုင်များ တွင်ရောင်းချနေသောစားသောက်ကုန်များတွင်ဖော်မလင်ပါဝင်သောပဲပြား၊ ဘဲသွေး၊မုန့်ဟင်းခါးဖတ် များဈေးကွက်အတွင်း ရောင်းချခြင်းရှိ/မရှိ ကွင်းဆင်းစစ်ဆေးခဲ့ကြပါသည်။ ထိုနောက်တစ်ဆက် တည်းရက်လွန်ကုန်ပစ္စည်းများ၊ အမှည့်လွန်သစ်သီးများ၊ ဘေးအန္တရာယ်ရှိသောဆိုးဆေးများအသုံးပြု ထားသောသစ်သီးများ၊တာရှည်ခံအသုံးအပြုထားသောကုန်ပစ္စည်းများကို ဈေးကွက်အတွင်းသို့ဝယ် ယူတင်သွင်းရောင်းချခြင်းမပြုကြရန် အသိပေးတိုက်တွန်းခဲ့ပြီး၊ ယခုစစ်ဆေးခဲ့သောကုန်ပစ္စည်းများ ရောင်းချပါကဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း ပြောကြားခဲ့ကြောင်း သိရှိရပါသည်။

DOCA(ဧရာဝတီ)