သတင်းနှင့် လှုပ်ရှားမှုများ

         တောင်ငူခရိုင်၊ ရေတာရှည်မြို့နယ်ရှိ ဝက်အူချောင်း လုပ်ငန်းသည် အတော်အသင့် နာမည်ရနေသော လုပ်ငန်းတစ်ခုဖြစ်ပါသည်။ ဝက်အူချောင်း ပြုလုပ်ရာတွင် လိုအပ်သော ကုန်ကြမ်းများမှာ ဝက်သား၊ ဆိတ်အူ၊ သကြား၊ဆား၊ ယမ်းစိမ်း၊ အချိုမှုန့် နှင့် အခြောက်ခံမီးဖိုတို့ ဖြစ်ပါသည်။

        လိုအပ်သော ကုန်ကြမ်းများအား မန္တလေးမြို့နှင့် ဒေသတွင်း ရေတာရှည်မြို့နယ်တို့မှ ဝယ်ယူ ရရှိပါသည်။ ဝက်အူချောင်းပြုလုပ်ပုံအဆင့်ဆင့်မှာ ဝက်သားပိဿာချိန် (၂၀)ကို အရိုးများ ဖြတ်ထုတ်၍ ဓားဖြင့် နုတ်နုတ်စင်းပြီး ကြေမွသွားအောင် အသားကြိတ်စက်ဖြင့် ထပ်မံကြိတ်ရပါသည်။ ကြိတ်ပြီးသား ဝက်သားများကို အချိုမှုန့်၊ ဆား၊ သကြား၊ ယမ်းစိမ်းတို့ဖြင့် အချိုးကျ သမအောင်နယ်ပြီး ဆားရည် စိမ်ထားသော ဆိတ်အူထဲသို့ အသားညှစ်စက်ဖြင့် သွပ်သွင်း၍ အခြောက်ခံရန် အခြောက်ခံမီးဖိုထဲသို့ အပူပေးပြီးလျင် ရောင်းတန်းဝင် ဝက်အူချောင်းများ ရရှိပြီဖြစ်ပါသည်။

       ရောင်းတန်းဝင် ဝက်အူချောင်းများအား ပလတ်စတစ်အကြည် အထူစားဖြင့် ၁၀ ကျပ် သားနှင့် ၂၅ ကျပ်သားအထုပ်လေးများ ထုပ်၍ ဈေးကွက်အတွင်း ဖြန့်ဖြူးရောင်းချကြောင်း သိရှိရပါသည်။

     ဈေးနှုန်းအနေဖြင့် ဝက်အူချောင်း (၁၀) ကျပ်သား အထုပ်သေး (၁) ထုပ်လျှင် ၄၀၀၀ ကျပ်နှုန်းနှင့် (၂၅)ကျပ်သား အထုပ်ကြီး (၁)ထုပ်လျှင် (၁၀၀၀၀) ကျပ်နှုန်းဖြင့် ရောင်းချပါသည်။ ဒေသတွင်း တောင်ငူမြို့နယ်၊ ရေတာရှည်မြို့နယ်နှင့် အခြားတိုင်းဒေသများမှ လာရောက်လည်ပတ် ကြသော ဧည့်သည်များမှလည်းဝယ်ယူကြပါသည်။ ရေတာရှည်မြို့နယ်ရှိ ဝက်အူချောင်းမှာ နာမည်ကျော်ကြားသော ဝက်အူချောင်းဖြစ်သောကြောင့် ဒေသတွင်းစားသုံးသူများမှ မိမိတို့အမျိုးအဆွေများရှိရာ အခြားတိုင်းဒေသများသို့ သွားရောက်လည်ပတ်ရာတွင်လည်း လက်ဆောင်အဖြစ်ဝယ်ယူကြကြောင်း  သိရှိရပါသည်။

DOCA(ပဲခူး)

       ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးသည် မြို့နယ်စီမံအုပ်ချုပ်ရေးအဖွဲ့ဥက္ကဌ ဦးစောမင်းသူဦးဆောင်၍ မြို့နယ်အထွေထွေအုပ်ချုပ်ရေးဦးစီး ဌာန၊ မြို့နယ်ရဲတပ်ဖွဲ့မှူးရုံး၊ မြို့နယ်လူဝင်မှု ကြီးကြပ်ရေးနှင့်ပြည်သူ့အင်အားဦးစီးဌာန၊ မြို့နယ် စည်ပင်သာယာရေးအဖွဲ့၊ မြန်မာ့စီးပွားရေးဘဏ်တို့မှ တာဝန်ရှိသူများပါဝင်သော ပူးပေါင်းအဖွဲ့ နှင့်အတူ အောက်တိုဘာလအတွင်း ဖြူးမြို့ပေါ်ရှိ အသေးစားအိမ်တွင်းမှုလုပ်ငန်းများသို့ ကွင်းဆင်း လေ့လာ ရာတွင် ပူးပေါင်းပါဝင် ဆောင်ရွက်ခဲ့ပါ သည်။

       မြို့နယ်စီမံအုပ်ချုပ်ရေးအဖွဲ့ ဥက္ကဌ ဦးဆောင်သော ပူးပေါင်းအဖွဲ့သည် ဖြူးမြို့ ပဲခူးလမ်း တောင်ပိုင်းရှိ အေးအေးခိုင် ပဲချောင်းနှင့်မုန့်ကြိုးလိမ်လုပ်ငန်းသို့ သွားရောက်ကြည့်ရှု လေ့လာခဲ့ရာ လုပ်ငန်းရှင် ဒေါ်အေးအေးခိုင်က ပဲချောင်းနှင့် မုန့်ကြိုးလိမ်ထုတ်လုပ်ပုံ၊ ဖြန့်ဖြူး ရောင်းချမှု အခြေအနေများကို ရှင်းလင်းတင်ပြပါသည်။ အေးအေးခိုင်ပဲချောင်းနှင့် မုန့်ကြိုးလိမ် လုပ်ငန်းသည် ပုဂံ ညောင်ဦး ဒေသမှ ပဲချောင်းပြုလုပ်သည့်နည်းပညာဖြင့် ဖြူးမြို့တွင် လွန်ခဲ့သည့် ၁၀ နှစ်ခန့်က စတင် လုပ်ကိုင်ခဲ့ရာ ယခုအခါ ဒေသတွင်း အောင်မြင်နေသည့် လုပ်ငန်းတစ်ခုဖြစ်ပါသည်။

      ဆက်လက်၍ ပူးပေါင်းအဖွဲ့သည် ဖြူးမြို့၊ ထန်းကုန်းရပ်ကွက် လမ်း ၃၀ ရှိ ခြင်္သေ့မင်း မြေပဲယိုလုပ်ငန်းသို့သွားရောက်လေ့လာရာ လုပ်ငန်းရှင် ဒေါ်သောင်းကြည်က မြေပဲယို၊ သကြား မြေပဲယိုနှင့် နှမ်းယိုထုတ်လုပ်ဖြန့်ဖြူးရောင်းချမှု အခြေအနေများကို ရှင်းလင်းတင်ပြပါသည်။ ခြင်္သေ့ မင်း မြေပဲယိုလုပ်ငန်းသည် မိရိုးဖလာ လုပ်ကိုင်ခဲ့သည့် လုပ်ငန်းတစ်ခုဖြစ်ပြီး ဒေသတွင်း အောင်မြင်နေသည့် စားသောက်ကုန်ထုတ်လုပ်ငန်းဖြစ်ပါသည်။

       ထို့နောက် ပူးပေါင်းအဖွဲ့သည် ဖြူးမြို့နယ်၊ ရွာတန်းရှည်ကျေးရွာအုပ်စု၊ ခြံကြီးမြိုင်ရှိ ဦးစိုးလင်း၏ ဆံပင်ရောင်းဝယ်ရေးလုပ်ငန်းသို့‌ ရောက်ရှိလေ့လာရာ ပိုင်ရှင်ဦးစိုးလင်းက ရောင်းဝယ် ဖောက်ကားမှုအခြေအနေများကို ရှင်းလင်းတင်ပြပါသည်။ မြို့နယ်စီမံအုပ်ချုပ်ရေးအဖွဲ့ ဥက္ကဌနှင့် တာဝန်ရှိသူများသည် သက်ဆိုင်ရာလုပ်ငန်းရှင်များ၏ အခက်အခဲများကို မေးမြန်းဆွေးနွေးပြီး သက်ဆိုင်ရာဌာနများအလိုက် ကူညီဆောင်ရွက်ပေးနိုင်မည့် အခြေအနေများကို ပြောကြားခဲ့ကြောင်း သိရှိရ ပါသည်။

DOCA(ပဲခူး)

          စစ်ကိုင်းတိုင်းဒေသကြီး၊စားသုံးသူရေးရာဦးစီးဌာန ကန့်ဘလူခရိုင် အနေဖြင့် စားသုံးသူကာကွယ်ရေးအသိပညာပေးဟောပြောပွဲကို စက်တင်ဘာလ (၂၀)ရက်၊ နံနက် ( ၁၁ : ၀၀)နာရီတွင် ကန့်ဘလူခရိုင်စီမံကိန်းဦးစီးရုံး၌ ကျင်းပသည်။

        စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံ ဦးမျိုးဝင်းသန်းက စားသုံးသူရေးရာ ဦးစီးဌာန၏ မျှော်မှန်းချက်နှင့်ရည်မှန်းချက်များ၊ စားသုံးသူ၏အခွင့်အရေးများ ၊ စားသုံးသူကာကွယ်ရေးဥပဒေအခန်း(၁၈)ပါကုန်အညွှန်းအမှတ်အသားဖော်ပြခြင်းနှင့်စပ်လျဉ်းသည့် အသိပညာဗဟုသုတများနှင့် ဝန်ဆောင်မှုလုပ်ငန်းများအကြောင်းတို့အား ရှင်းလင်းဆွေးနွေး ဟောပြောခဲ့သည်။

          အဆိုပါအသိပညာပေးဟောပြောပွဲသို့ ခရိုင်စီမံကိန်းဦးစီးရုံးမှ ဝန်ထမ်း(၆)ဦး တက်ရောက်ခဲ့ပြီး တက်ရောက်လာသူများအား အသိပညာပေး လက်ကမ်းစာစောင်များ ဖြန့်ဝေခဲ့ကြောင်း သတင်းရ ရှိသည်။

DOCA(စစ်ကိုင်း)

           စစ်ကိုင်းတိုင်းဒေသကြီးအတွင်း ငှက်‌ပျောကို အများအပြား စိုက်ပျိုးကြသော်လည်း မုံရွာခရိုင်၊ ဘုတလင်မြို့နယ်အတွင်းရှိ အုဌ်အိုင်ကျေးရွာ၊ ချပ်ခလေး၊ ခိုးချောင်း၊ အောင်ဆန်းမြင့် ကျေးရွာနှင့် ဂွေးပင်ကျင်း ကျေးရွာများတွင် မြန်မာ့ကျောက်စိမ်းဖီးကြမ်း ငှက်ပျောကို ဧက (၂၀၀၀)ကျော် စိုက်ပျိုးထားကြောင်း သိရှိရပါသည်။

          မြန်မာ့ကျောက်စိမ်း ဖီးကြမ်းငှက်ပျောကို စီးပွားဖြစ်စိုက်ပျိုးကြပြီး အစေ့မှ မစိုက်ပျိုးကြဘဲ  အပင်အတက်များကို တူးဖော်၍စိုက်ပျိုးကြပါသည်။ ငှက်ပျောစိုက်ပျိုးရာ၌ တစ်ကျင်းထဲတွင် ငှက်ပျောပင်နှစ်ပင် စိုက်ပြီး တစ်ပင်နှင့်တစ်ပင်ကို တစ်တောင်ထွာစီခြား၍ စိုက်ပျိုးကြကြောင်း၊ စတင်စိုက်ပျိုးပြီး(၈)လအကြာတွင် အခိုင်စထွက်ကာ တစ်နှစ်အကြာတွင် ငှက်ပျောခိုင်များကို စတင်ခုတ်ယူရောင်းချ၍ ရပြီဖြစ်ကြောင်း၊ အမျိုးအစားအားဖြင့် ရွှေငှက်ပျောနှင့် ခွံဝါ ငှက်ပျောမျိုးများကို စိုက်ပျိုးကြပြီး တစ်ဧကလျှင် အပင်(၈၀၀) စိုက်ပျိုးကြောင်း၊ တစ်ဧကကုန်ကျစရိတ် (၁၅)သိန်းခန့် ကုန်ကျပြီး ငှက်ပျောထွက်ရှိ ရောင်းရငွေမှာ တစ်ဧကလျှင် ငွေကျပ်(၃၀-၄၅) သိန်းခန့် ပြန်လည် ရရှိကြောင်း၊ ရန်ကုန်၊ မန္တလေး၊ ဖားကန့်ဒေသများသို့ အများဆုံး တင်ပို့ရောင်းချကြပြီး မုံရွာမြို့နှင့် ရွှေဘိုမြို့များမှလည်း လာရောက်ဝယ်ယူနေကြောင်း၊ အနီးအနားရှိ ဝယ်လက်များက ငှက်ပျော စိုက်ခြံများအထိ လာရောက်ကာ ကိုယ်တိုင်ခုတ်ယူ၊ ကိုယ်တိုင်သယ်ယူစနစ်ဖြင့် ဝယ်ယူကြသော ကြောင့် ငှက်ပျောစိုက်တောင်သူများ ပို၍အဆင်ပြေကြကြောင်း၊ လက်ကား‌ဈေးတစ်ဖီးဈေးလျှင် ကျပ်(၆၀၀-၇၀၀)နှုန်းဖြင့် ရောင်းချရပြီး လက်လီ တစ်ဖီးလျှင် ကျပ် (၈၀၀-၉၀၀)အထိ ရောင်းချ ရကြောင်း ဘုတလင်မြို့နယ်မှ မြန်မာကျောက်စိမ်းဖီးကြမ်း ငှက်ပျောစိုက် တောင်သူတစ်ဦးထံမှ သိရှိ ရပါသည်။

DOCA(စစ်ကိုင်း)

         စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံးမှ ဒုတိယညွှန်ကြားရေးမှူး ဦးဆောင်၍ မုံရွာခရိုင်ဦးစီးမှူး၊ ဒုတိယခရိုင်ဦးစီးမှူးနှင့် ဝန်ထမ်း(၂)ဦးတို့သည် (၁၉.၁၀.၂၀၂၂) ရက်နေ့၊ နံနက်(၁၀)နာရီအချိန်တွင် မုံရွာမြို့၊ ပြည်တော်သာရပ်ကွက်ရှိ မြို့နယ်ဆန်စက် လုပ်ငန်းရှင်များအသင်းဥက္ကဌ အောင်သုခဆန်စက်ပိုင်ရှင်ဦးမြင့်ဆွေနှင့် တွေ့ဆုံဆွေးနွေးခဲ့ကြ ပါသည်။

        ထိုသို့ တွေ့ဆုံဆွေးနွေးရာတွင် အသင်းဥက္ကဌမှ မြို့နယ်ဆန်စက်အသင်းကို (၂.၅.၂၀၁၀) ခုနှစ်တွင် အသင်းဝင်(၁၃)ဦးဖြင့် စတင်တည်ထောင်ခဲ့ကြောင်း၊ အသင်းဝင်ဆန်စက်များအနေဖြင့် ပုံမှန်လည်ပတ်လျက်ရှိပြီး မိမိတို့ အောင်သုခစက်မှာ ၂၄ နာရီ လည်ပတ်နိုင်ကြောင်း၊ ကုန်ကြမ်းဖြစ်သော စပါးကို ကလေး၊ မော်လိုက်၊ဖောင်းပြင်၊ယင်းမာပင်၊ ပုလဲ၊ ဘုတလင်၊ ချောင်းဦး မြို့နယ်များမှ ဝယ်ယူရရှိပြီး ထွက်ရှိသော ဆန်များကို ဒေသတွင်းစားသုံးကြပြီး မန္တလေးသို့လည်း တင်ပို့ရကြောင်း၊ စက်များကို ပြန်လည်မွမ်းမံပြီး လိုအပ်သောပစ္စည်းများ ဝယ်ယူ၍ နိုင်ငံခြား Export တင်ပို့နိုင်ရန် ကြိုးပမ်းဆောင်ရွက်လျှက်ရှိပါကြောင်း ဆွေးနွေး ပြောကြားခဲ့ပြီး ဆန်စက် လုပ်ငန်းရှင်များကြုံတွေ့နေရသောအခက်အခဲများကို ပြောကြားခဲ့ပြီး ဆန်စက်ကဏ္ဍဖွံ့ဖြိုးတိုးတက်ရေး အတွက် ပံ့ပိုးကူညီပေးရမည့်အချက်များအား မေးမြန်းဆွေးနွေးခဲ့ကြောင်း သိရှိရပါသည်။

DOCA(စစ်ကိုင်း)