သတင်းနှင့် လှုပ်ရှားမှုများ

      ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့ (၂၄.၁၀.၂၀၂၂)ရက်နေ့ နံနက် (၁၁:၀၀) အချိန်တွင် နတ်မော်ကျေးရွာရှိ အ-ထ-က ကျောင်းတွင် ကျောင်းသား၊ ကျောင်းသူများနှင့် ဆရာ၊ ဆရာမ (၃၅၀)ဦးအား စားသုံးသူကာကွယ်ရေး အသိပညာပေးဟောပြော ဆောင်ရွက်ခဲ့ပါသည်။

     ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးမိုးကျော်နှင့် အဖွဲ့သည် စားသုံး သူကာကွယ်ရေး ဥပဒေကို ၂၀၁၉ခုနှစ် မတ်လ(၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဌာန်းခဲ့ ကြောင်း၊ စားသုံးသူကာကွယ်ရေးဥပဒေ အခန်း(၉)ပါ စားသုံးသူအခွင့်အရေးနှင့်တာဝန်များ အကြောင်း၊ ဝန်ဆောင်မှုနှင့် စပ်လျဉ်း၍ အာမခံချက်ပေးခြင်းများအကြောင်း၊ ကုန်အညွှန်းအမှတ်အသားဖော်ပြ ခြင်းအကြောင်း၊ စားသုံးသူဆိုသည်မှာ ကုန်စည်သို့မဟုတ် ဝန်ဆောင်မှုကို ကုန်သွယ်ရောင်း ချခြင်းပြုရန် သို့မဟုတ် အသက်မွေးဝမ်းကျောင်းပြုရန် မဟုတ်ဘဲ ကိုယ်တိုင်သုံးစွဲမှု အတွက်သော် လည်းကောင်း၊ အခြားသူအတွက်သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည် ချေးငှားခြင်းပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုလိုကြောင်းနှင့် ကျောင်းသား၊ ကျောင်းသူများအားအသင့်စားမုန့်အမျိုးမျိုးတို့ကို ဝယ်ယူစားသုံးရာတွင် ထုတ်လုပ်သည့် ရက်စွဲနှင့် သက်တမ်းကုန်ဆုံးသည့်ရက်စွဲများ အဓိကဖက်ရှု့ ရမည်ဖြစ်ကြောင်း စသည်တို့ကို အသိပညာ ပေးဟောပြောခဲ့ပြီး စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များ ပေးဝေခဲ့ကြကြောင်း သိရှိရပါ သည်။

DOCA(ဧရာဝတီ)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေဖြင့် စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကော်မတီကိုဖွဲ့စည်းကာ ပြည်ပမှတင်သွင်းလာသည့် စားသုံးဆီများ သတ်မှတ်အရည်အသွေး စံချိန်စံညွန်းများနှင့်ပြည့်မီစေရေး၊ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများအား ဈေးနှုန်းတည်ငြိမ်စွာဖြင့် ဝယ်ယူစားသုံးနိုင်စေရေးအတွက် ကြီးကြပ်ထိန်းကျောင်း ဆောင်ရွက်လျက် ရှိသည့်အပြင် အခြေခံလက်ကားရည်ညွှန်းဈေးနှုန်းကိုလည်း အပတ်စဉ် ထုတ်ပြန်ပေးလျက်ရှိပါသည်။

          စားသုံးသူရေးရာဦးစီးဌာန ခရိုင်ဦးစီးမှူးရုံးနှင့် မြို့နယ်တာဝန်ခံများအနေဖြင့်လည်း စားသုံးဆီတင်သွင်းသည့်ကုမ္ပဏီများမှ စားအုန်းဆီများကို ဖြန့်ဖြူးရောင်းချခဲ့သည့်အပေါ် မိမိတို့ခရိုင်၊ မြို့နယ်အတွင်း ဝယ်ယူရရှိသည့် လက်ကားကုန်သည်များအနေဖြင့် စားအုန်းဆီများကို ရန်ကုန်အထိုင်ဈေး ရည်ညွှန်း လက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များ ထပ်ပေါင်း၍ ၂ရာခိုင်နှုန်းအမြတ်ထက် မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချသွားရမည်ဖြစ်ပြီး လက်လီဈေးကွက်အတွင်း ဖြစ်သင့်ဖြစ်ထိုက်သည့်ဈေးနှုန်းများဖြင့် ရောင်းချစေရေး၊ ဈေးနှုန်းအဆမတန်မြှင့်တင်ရောင်းချခြင်းများ မပြုလုပ်စေရေးတို့ကို စိစစ်ကြပ်မတ်ဆောင်ရွက်လျက်ရှိပြီး စားသုံးသူပြည်သူများ ဘေးအန္တရာယ် ကင်းရှင်းရေးအတွက် သန့်ရှင်းသော အဝါရောင် Drumအသုံးပြုမှုရှိ/မရှိ၊ အချိန်အတွယ်မှန်ကန်မှုနှင့် ရောင်းချသည့်ဈေးနှုန်းမှန်ကန်မှုရှိ/မရှိ ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိရာ အောက်တိုဘာလ (၂၅)ရက်နေ့၊ နံနက်(၁၁:၃၀)နာရီအချိန်တွင် ရွှေဘိုမြို့၊ အမှတ်(၄)ရပ်ကွက်၊ အနောက် ဈေးရပ်ရှိ အေးရွှေစင် စားသုံးဆီရောင်းဝယ်ရေးဆိုင်အား  ဈေးကွက်စောင့်ကြည့်စစ်ဆေးခဲ့ပါသည်။

           ထိုသို့စစ်ဆေးရာတွင် အေးရွှေစင်စားသုံးဆီအရောင်းဆိုင်အနေဖြင့် မြေပဲဆီနှင့် စားအုန်းဆီများကို အမှတ်တံဆိပ်မပါရှိဘဲ ပိဿာချိန်ဖြင့်သာ ရောင်းချလျက်ရှိပြီး သန့်ရှင်းသော အဝါရောင် Drumများ အသုံးပြု၍ အချိန်အတွယ်မှန်ကန်စွာှနှင့်  ဈေးနှုန်းမှန်ကန်စွာ ရောင်းချလျက်ရှိသည်ကို စစ်ဆေးတွေ့ရှိရကြောင်း သတင်းရရှိပါသည်။

DOCA(စစ်ကိုင်း)

      ရခိုင်ပြည်နယ် စားသုံးသူရေးရာဦးစီးဌာနမှ မင်းပြားမြို့နယ်တာဝန်ခံ ဦးမောင်သန်းဝင်း    (ဒု-ဦးစီးမှူး)သည်   (၂၅-၁၀-၂၀၂၂)ရက်နေ့  နံနက်(၁၀:၀၀)နာရီအချိန်တွင် မင်းပြားမြို့နယ် အုပ်ချုပ်ရေး မှူးရုံးတွင် တည်းခိုခန်းလုပ်ငန်းလုပ်ကိုင်နေသော လုပ်ငန်းရှင်(၈)ဦးတို့အား ဝန်ဆောင်မှုလုပ်ငန်းနှင့် ပတ်သက်၍ စားသုံးသူပြည်သူများ နစ်နာဆုံးရှုံးမှုမရှိစေရေးအတွက် တွေ့ဆုံဆွေးနွေး ခဲ့ပါသည်။

        ထိုသို့ဆွေးနွေးရာတွင် မင်းပြားမြို့နယ်တာဝန်ခံ ဦးမောင်သန်းဝင်း(ဒု-ဦးစီးမှူး)က တည်းခိုခန်း လုပ်ငန်းလုပ်ကိုင်နေသော လုပ်ငန်းရှင်များအနေဖြင့် မိမိတို့ကြော်ငြာထားသည့် ဝန်ဆောင်မှုများကို စားသုံးသူများထံ အပြည့်အဝပေးကြရမည်ဖြစ်ကြောင်း၊ ကြော်ငြာထားသည့်အတိုင်း ဝန်ဆောင်မှုများကို စားသုံးသူများထံ မပေးဆောင်နိုင်ပါက ၂၀၁၉ ခုနှစ် စားသုံးသူကာကွယ်ရေးဉပဒေအရ စားသုံးသူများက တိုင်ကြားလာလျှင် တည်ခိုးခန်းလုပ်ငန်းရှင်များ အနေဖြင့် တာဝန်ယူဖြေရှင်းပေးရမည်ဖြစ်ကြောင်း၊ စားသုံးသူကာကွယ်ရေးဉပဒေ အခန်း(၁၃)၊ ပုဒ်မ(၂၆)ပါ စီးပွားရေးလုပ်ငန်းရှင်သည် စားသုံးသူအပေါ် ဝန်ဆောင်မှုပေးခြင်းနှင့် စပ်လျဉ်း၍ ဖော်ပြရမည့် အချက်(၅)ချက်တို့အား အသေးစိတ်ရှင်းလင်းဆွေးနွေး ခဲ့ကြောင်း သတင်းရရှိပါသည်။

DOCA(ရခိုင်)

       ရခိုင်ပြည်နယ် စားသုံးသူရေးရာဦးစီးဌာန ၊ စစ်တွေခရိုင်ဦးစီးမှူး ဦးမောင်လှဝင်းနှင့်  မြို့နယ် ဦးစီးမှူး  ဦးသိန်းအောင်တို့သည် (FDA ၊ ကျန်းမာရေး၊ စည်ပင်၊ ထွေ/အုပ် ၊ ပညာရေး) စသော မိတ်ဖက် ဌာနများနှင့် ပူးပေါင်း၍ စစ်တေွမြို့ ၊ မောလိပ်ရပ်ကွက်၊ အ ထ က (ခွဲ) စာသင်ကျောင်း၌ (၂၁-၁၀-၂၀၂၂) ရက်နေ့ နံနက်(၁၀:၀၀)နာရီမှ (၁၂:၃၀) နာရီထိ စားသုံးသူကာကွယ်ရေး၊ အစားအသောက် ဘေးအန္တရာယ် ကင်းရှင်းရေးနှင့် ပတ်သက်၍ အသိပညာပေးဟောပြောပွဲ ကျင်းပပြုလုပ်ခဲ့ပါသည်။

     အဆိုပါ အသိပညာပေးဟောပြောပွဲတွင် အ ထ က (ခွဲ) ကျောင်းအုပ်ဆရာမကြီး ဒေါ်အေးအေးနိုင် မှ ကျောင်းသူ/ကျောင်းသားများသို့ အဖွင့်အမှာစကားပြောကြားပြီး အစားအသေက်နှင့်ဆေးဝါးကွပ်ကဲ ရေးဦးစီးဌာန(FDA)ဒေါ်အေးအေးမြင့်(ဒု-ကြီးကြပ်ရေးမှူး)မှ ဓါတုဆိုးဆေး(၄)မျိုး နှင့် ဓါတုတာရှည်ခံ ဆေး(၄)မျိုး၏ အဓိပ္ပာယ်ဖွင့်ဆိုချက်နှင့် သတ်မှတ်ပမာဏထက် ပိုမိုသုံးစွဲသော အစားအသောက်များ အား သုံးစွဲမှုမပြုလုပ်ရန်နှင့် ၎င်းဌာနမှထုတ်ပြန်ထားသည့် စားသုံးရန် မသင့်သော အစားအသောက် များအား ဝယ်ယူစားသုံးရန်မပြုရေးအား Power Point ဖြင့်ပြသဟောပြောဆွေးနွေးပါသည်။

   ၎င်းနောက် စားသုံးသူရေးရာဦးစီးဌာန စစ်တွေခရိုင်ဦးစီးမှူး ဦးမောင်လှဝင်းနှင့် စစ်တွေ မြို့နယ်ဦးစီးမှူး ဦးသိန်းအောင်တို့မှ စားသုံးသူရေးရာဦးစီးဌာန၏ မျှော်မှန်းချက်(Vision) စားသုံးသူ များလုံခြုံစိတ်ချရမှုရှိစေရန် ၊ ရည်မှန်းချက်(Mission)(၄)ရပ်အား ချပြဆွေးနွေးပြီး ရည်မှန်းချက်ပါ (၁) စားသုံးသူအခွင့်အရေးနှင့် အကျိုးစီးပွားကာကွယ်ရေးဆောင်ရွက်ရန်ဖြစ်သည့် စားသုံးသူကာကွယ်ရေးဥပဒေ(၂၀၁၉) ၊ အခန်း(၉) စားသုံးသူ၏အခွင့်အရေး(၈)ချက်နှင့် တာဝန်(၄)ချက်အား ဥပမာပေး၍ ချပြဆွေးနွေးခြင်း ၊ (၂) ထုတ်ကုန်များလုံခြုံစိတ်ချရမှုရှိစေရေး ဆောင်ရွက်ဖြစ်သည့် စားသုံးသူကာကွယ်ရေးဥပဒေ၊ အခန်း(၁၈) ပုဒ်မ(၄၁၊ ၄၂၊ ၄၃) ပြဌာန်းချက်ပါ အချက်များအား ဥပမာပေး၍ ချပြဆွေးနွေးပြီး (၃) ကုန်စည်နှင့်ဝန်ဆောင်မှုများ၏ အရည်အသွေးစီမံခန့်ခွဲမှုနှင့် သုတေသနဖွံ့ဖြိုးမှုလုပ်ငန်းများ ဆောင်ရွက်ရန်နှင့် (၄) ပြည်တွင်းကုန်သွယ်မှုဖွံ့ဖြိုးမှုနှင့် သုတေသန လုပ်ငန်းများဆောင်ရွက်ရန်ကိစ္စရပ်များအား အကျယ်တဝင့် ချပြဆွေးနွေးပြီး ၊ စားသုံးသူအခွင့်အရေး များအရ စားသုံးသူနစ်နာဆုံးရှုံးမှုနှင့်စပ်လျဉ်း၍ ကိစ္စရပ်များ ပေါ်ပေါက်ပါက တိုင်ကြားနိုင်သည့် အခွင့်အရေးရှိသည့်အတွက် စားသုံးသူသတင်းအချက်အလက်ပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာ (CICC)များဖွင့်လှစ်ထားပါကြောင်းနှင့် ကုန်စည်(သို့မဟုတ်) ဝန်ဆောင်မှုနှင့် စပ်လျဉ်းသည့် အသိပညာဗဟုသုတများ အခွင့်အရေးများနှင့် လိုအပ်သော အချက်အလက်များကို သိရှိလေ့လာနိုင်ခွင့်ရှိစေရေးအတွက် Website ဖြစ်သည့်  www.doca.gov.mm နှင့် doca myanmar mobile appilication တွင် ဝင်ရောက်လေ့လာနိုင်ရေးနှင့် တိုင်ကြားနိုင်သည့် နည်းလမ်းများအား ချပြဆွေးနွေး‌ဟောပြောခဲ့ပါကြောင်း သတင်းရရှိပါသည်။

DOCA(ရခိုင်)

         စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ခရိုင်ဦးစီးမှူးရုံးအနေဖြင့် ၂၀၂၂ခုနှစ်၊ အောက်တိုဘာလ စတုတ္တပတ်တွင် စားသုံးသူကာကွယ်ရေး အသိပညာပေးဟောပြော ပွဲကို (၂၆-၁၀-၂၀၂၂) ရက်နေ့တွင် ပုဗ္ဗသီရိမြို့နယ်၊ အခြေခံပညာအလယ်တန်းကျောင်း၊ ရွာတော်၌ နံနက် (၁၀း၃၀)နာရီအချိန်တွင် ကျင်းပပြုလုပ်ခဲ့ပါသည်။ ပထမဦးစွာ ကျောင်းအုပ်ဆရာမကြီး ဒေါ်မွန်မွန်သက်မှ အဖွင့်အမှာ စကားပြောကြားပြီး စားသုံးသူရေးရာဦးစီးဌာန၊ နေပြည်တော်ခရိုင် ဦးစီးမှူးရုံးမှ  ဦးမြင့်နိုင်၊ ဦးစီးမှူးက စားသုံးသူများနစ်နာဆုံးရှုံးမှုများနှင့် ပတ်သက်၍ စားသုံးသူရေးရာ ဦးစီးဌာနတွင် တိုင်ကြားနိုင်သော ဖုန်းနံပါတ်များ၊ Call Center ဖုန်းနံပါတ်နှင့် Website လိပ်စာတို့ကို အသိပေးပြောကြားခဲ့ပြီး ဦးစိန်ဝင်း၊ ဒု-ကြီးကြပ်ရေးမှူးက စားသုံးသူကာကွယ်‌ရေး ဥပဒေပေါ်ပေါက် လာပုံ၊ ဥပဒေတွင် ပါဝင်သော စားသုံးသူအဓိပ္ပာယ်နှင့် စားသုံးသူအခွင့်အရေး၊ တာဝန်များအကြောင်းတို့ကို ရှင်းလင်းပြောကြားခဲ့ပါသည်။ ထို့နောက်တက်ရောက်လာကြသော ကျောင်းသား/သူ၊ ဆရာ/ဆရာမ စုစုပေါင်း (၁၉၅)ဦးခန့် တက်ရောက်ခဲ့ပြီး ဟောပြောပွဲကို (၁၂း၀၀)နာရီအချိန်တွင် ရုတ်သိမ်းခဲ့ကြောင်း  သတင်းရရှိပါသည်။

DOCA(ပြည်ထောင်စုနယ်မြေ)