သတင်းနှင့် လှုပ်ရှားမှုများ

      ဧရာဝတီတိုင်းဒေသကြီး၊ ဖျာပုံခရိုင် ၊ ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ ဇူလိုင်လ (၂၃) ရက်နေ့၊ နေ့လယ် (၁၂:၀၀) နာရီ အချိန်တွင် ဒေးဒရဲမြို့မဈေးကြီး အတွင်းရှိ ကုန်မျိုးစုံဆိုင်များတွင် ရောင်းချနေသော စားအုန်းဆီများ ရည်ညွှန်းဈေးဖြင့် ဆိုင်းဘုတ်တင် ရောင်းချခြင်းရှိ/မရှိ ကွင်းဆင်းစစ်ဆေးခဲ့ကြပါသည်။

    အဆိုပါစစ်ဆေးရာတွင် မြို့နယ်တာဝန်ခံမှ စားအုန်းဆီခွဲတမ်းရရှိသော လက်လီ/ လက်ကား ကိုယ်စားလှယ်များအနေဖြင့် သက်မှတ်ထားသော စည်းမျဉ်းစည်းကမ်းများနှင့်အညီ စနစ်တကျ ဖြန့်ဖြူး ရောင်းချရန်၊ စားသုံးသူများ ထင်ယောင်ထင်မှားမဖြစ်စေရေးအတွက် ဈေးနှုန်းဆိုင်းဘုတ်များကို သတ်မှတ်ရည်ညွှန်းဈေးအလိုက် မြင်သာထင်သာရှိသော နေရာများ တွင် ချိတ်ဆွဲရောင်းချမှု ရှိ/ မရှိ တို့ကို လိုက်လံစစ်ဆေးခဲ့ရာ စားအုန်းဆီ အရောင်းဆိုင်များ အနေဖြင့် သတ်မှတ်ထားသော စည်းကမ်း များနှင့်အညီ ရောင်းချနေမှုများအား ကွင်းဆင်း စစ်ဆေးခဲ့မှုအရ သတင်းရရှိပါသည်။

(Doca ဧရာဝတီ)

         ပုသိမ်ခရိုင်၊ သာပေါင်းမြို့နယ်၊ ၂၂.၇.၂၅ ရက်နေ့တွင် မြန်မာ့စီးပွားရေးဘဏ်ရှေ့၌ မြို့နယ်ကုန်ဈေးနှုန်းတည်ငြိမ်လျော့ကျရေးကော်မတီ အတွင်းရေးမှူး စားသုံးသူရေးရာဦးစီးဌာနမှ မြို့နယ်ဦးစီးမှူးသည် မြို့နယ်ဆီကုန်သည်နှင့် ဆီလုပ်ငန်းရှင်များအသင်းနှင့် ပူးပေါင်း၍ သာပေါင်းမြို့နယ်ရှိ ပင်စင်စားအငြိမ်းစားဝန်ထမ်း (၄၄၀) ဦးအား (၁) ဦးလျှင် (၅၀) ကျပ်သားနှုန်းဖြင့်  ပိဿာချိန် (၂၂၀) အား (၅၀) ကျပ်သားလျှင် (၃၃၅၀) ကျပ်ဖြင့် ရောင်းချခဲ့ကြောင်း သိရှိရပါသည်။

DOCA(ဧရာဝတီ)

        ရေကြည်မြို့နယ်၊ နွားရေတိုက်ကျေးရွာတွင် ဓာတုလွတ်ပေါ်ဆန်းစိုက်တောင်သူဦးကံဝင်း၏ လယ်တွင် လက်တွေ့ပျိုးထောင်ပြသခြင်းနှင့် ဓာတုလွတ်ပေါ်ဆန်းစိုက်တောင်သူများနှင့် တွေ့ဆုံပွဲကို (၂၀.၇.၂၀၂၅)ရက်နေ့၊ နေ့လယ် (၁၄:၀၀) နာရီတွင် နွားရေတိုက်ဘုန်းတော်ကြီးကျောင်းတွင် ကျင်းပခဲ့ ပါသည်။

    ထိုအခမ်းအနားသို့ စီမံအုပ်ချုပ်ရေးအဖွဲ့ ဥက္ကဋ္ဌ ၊ စိုက်ပျိုးရေးသုတေသနဌာနမှ ဒုတိယညွှန်ကြားရေးမှူး ဒေါ်ဖြူပြာလွင်၊ ရေကြည်မြို့နယ်စိုက်တိုးမြင့်အဖွဲ့ ဥက္ကဋ္ဌနှင့် အဖွဲ့ဝင်များ၊ ဓာတုလွတ်စိုက် တောင်သူများ တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

      ရေကြည်မြို့နယ်၊ ကုန်ဈေးနှုန်းတည်ငြိမ်ကျဆင်းရေးကော်မတီသည် ကုန်ဈေးနှုန်းကြီးမြင့်မှု မရှိစေရေး၊ ကုန်ဈေးနှုန်းတည်ငြိမ်ကျဆင်းစေရန်နှင့် ပြည်သူများစားဝတ်နေရေးပြေလည်စေရေး တစ်ဖက်တစ်လမ်းမှ အထောက်အကူဖြစ်စေရန် ရည်ရွယ်၍ ကြက်ဥနှင့် စားအုန်းဆီများအား သက်သာသောဈေးနှုန်းဖြင့် ဝယ်ယူစားသောက်နိုင်စေရန် ရေကြည်မြို့မစည်ပင်ဈေးရှေ့တွင် (၂၄.၇.၂၅) ရက်နေ့တွင် ကုန်ဈေးနှုန်းတည်ငြိမ်ကျဆင်းရေးကော်မတီအဖွဲ့ဝင်များနှင့် ပူးပေါင်း၍ ကြက်ဥတစ်လုံးလျှင် (၃၅၀) ကျပ်ဖြင့် ကြက်ဥအလုံးရေ (၅၀၀) ခန့်၊ စားအုန်းဆီ (၅၀) ကျပ်သားတစ်ဗူးလျှင် (၃၅၀၀) ကျပ်နှုန်းဖြင့် ပိဿာ (၁၁၀) အား ရောင်းချပေးကြောင်း သိရှိရပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ ဖျာပုံခရိုင် စားသုံးသူရေးရာဦးစီးဌာနမှ ခရိုင်ဦးစီးမှူး ဦးထွေးသိမ်း ဦးဆောင်၍ ထုတ်လုံဌာနခွဲ တာဝန်ခံ ဒေါ်ကေသွယ်ဝင်းနှင့် ဝန်ထမ်းတို့သည် ၂၀၂၅ ခုနှစ်၊ ဇူလိုင်လ (၂၄) ရက်နေ့၊ နေ့လယ် (၁၄:၀၀) နာရီအချိန်တွင် Online Sale စနစ်ဖြင့် ရောင်းချသည့် လုပ်ငန်းရှင်များအား အသိပညာပေး ဟောပြောခဲ့ပါသည်။

      ခရိုင်ဦးစီးမှူး ဦးထွေးသိမ်းက Online Sale စနစ်ဖြင့် ရောင်းချသည့် လုပ်ငန်းရှင်များအား မိမိတို့ကုန်စည်များကို မှတ်ပုံတင်ဆောင်ရွက်ထားပြီး ရောင်းချမည်ဆိုပါက ယုံကြည်မှု၊ အာမခံချက်၊ တာဝန်ယူမှု၊ တာဝန်ခံမှုရှိပြီး ဈေးကွက်ပိုမိုကျယ်ပြန့် ချဲ့ထွင်နိုင်မည်ဖြစ်သည်။ စားသုံးသူများအနေဖြင့် ပိုမိုယုံကြည်စိတ်ချစွာ သုံးစွဲလာမည်ဖြစ်ပြီး စားသုံးသူကာကွယ်ရေးအနေဖြင့်လည်း အွန်လိုင်းစနစ်ဖြင့်ရောင်းချခြင်း မှတ်ပုံတင်ဆောင်ရွက်ထားရန်လိုအပ်ကြောင်း၊ မှတ်ပုံတင်ထားခြင်းမရှိပဲ ရောင်းချ၍ စားသုံးသူနစ်နာဆုံးရှုံးမှုဖြစ်ပေါ်လာက  ကုန်သွယ်ရေးဦးစီးဌာနသို့ အသိပေးပြီး ကုန်သွယ်ရေးဦးစီးဌာနမှ လုပ်ထုံးလုပ်နည်းနှင့်အညီ အရေးယူ ဆောင်ရွက်သွားမည်ဖြစ်ကြောင်း အွန်လိုင်းစနစ်ဖြင့် ရောင်းချနေသော လုပ်ငန်းရှင်များအား  အသိပညာပေး ပြုလုပ်ခဲ့မှုအပေါ် သတင်းရရှိပါသည်။

(Doca ဧရာဝတီ)