သတင်းနှင့် လှုပ်ရှားမှုများ

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်၊ လေးမျက်နှာမြို့နယ်တာဝန်ခံသည် (၁၇.၁၀.၂၀၂၂)ရက်နေ့ နံနက် (၁၀:၀၀)နာရီအချိန်တွင် မြို့ပေါ်ရပ်ကွက်ရှိ အလှကုန်ပစ္စည်း အရောင်းဆိုင်နှင့် ကုန်မျိုးစုံဆိုင်များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါ သည်။

       ထိုသို့ကွင်းဆင်းစစ်ဆေးခဲ့ရာတွင် ဈေးကွက်အတွင်းရောင်းချနေသော ကုန်စည်များသည် ဝယ်ယူ စားသုံးသူမိဘပြည်သူများအား ဘေးအန္တရာယ်မဖြစ်စေရန်နှင့် ကုန်စည်များပေါ်တွင် ကုန်အညွှန်းအမှတ် အသားများကို မြန်မာဘာသာဖြင့် (သို့) မြန်မာဘာသာနှင့် အခြားဘာသာတွဲလျက် ဖော်ပြထားသောကုန်စည်များကို ရောင်းချခြင်းရှိ/မရှိ စစ်ဆေးခဲ့ပြီး၊ ဆိုင်ပိုင်ရှင်များ လိုက်နာရမည့်အချက်များ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း အသိပညာပေးဆွေးနွေးခဲ့ပြီး၊ ကုန်မျိုးစုံဆိုင်(၄)ဆိုင်အား စစ်ဆေးခဲ့ကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်၊  ဟင်္သာတမြို့နယ်တာဝန်ခံသည် (၁၇.၁၀.၂၀၂၂) ရက်နေ့ နံနက်(၁၁:၃၀) နာရီအချိန်တွင် သုံးပင်ကွင်းရပ်ကွက်၊ ဓမ္မာရုံ၌  စားသုံးသူ ပြည်သူ (၈) ဦးအား စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့သည်။

       ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးမိုးကျော်မှ စားသုံးသူရေးရာဦးစီး ဌာန၏ လှုပ်ရှားမှုများအကြောင်း၊ စားသုံးသူကာကွယ်ရေးဥပဒေကို ၂၀၁၉ခုနှစ် မတ်လ(၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဌာန်းခဲ့ကြောင်း၊ ဥပဒေတွင်ပါရှိသော စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များအကြောင်း၊ အခန်း(၁၈)ပါ ကုန်အညွှန်းအမှတ်အသား ဖော်ပြခြင်း ကိစ္စရပ်များအကြောင်း၊ ရောင်းချနေသောကုန်စည်များတွင် ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ မည်သည့်စီးပွားရေး လုပ်ငန်းရှင်မဆို ပုဒ်မ(၄၁) ပုဒ်မခွဲ(ခ)နှင့်(ဆ)တို့ပါ ကုန်အညွှန်းဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု(သို့)တစ်ခု ထက်ပို၍ တွဲလျှက်ဖြစ်စေ ရေးသားဖော်ပြရမည့် ကုန်ပစ္စည်းကိုသာ စားသုံးသူများလက်ဝယ်အရောက် ဘေးကင်းလုံခြုံမှု ရှိစေရေးအတွက် ဖြန့်ဖြူးရောင်းချရမည်ဖြစ်ကြောင်း၊  ပြစ်မှုနှင့်ပြစ်ဒဏ်များအကြောင်း နှင့် စားသုံးသူပြည်သူများအနေဖြင့် နစ်နာဆုံးရှုံးမှုဖြစ်ပေါ်လာပါက တိုင်ကြားနိုင်ရန်အတွက် (Consumer Information and Complaint Center) CICC ရုံးခန်းများ ဖွင့်လှစ်ထားရှိမှု အခြေအနေကို လည်ကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်းစသည်တို့ကို အသိပညာပေးဟောပြောဆွေးနွေးခဲ့ပြီး၊ တက်ရောက်သူများမှလည်း သိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များ ပေးဝေခဲ့ကြကြောင်းသိရှိရပါသည်။

DOCA(ဧရာဝတီ)

   ရခိုင်ပြည်နယ် စားသုံးသူရေးရာဦးစီးဌာန တောင်ကုတ်ခရိုင်ဦးစီးမှူးရုံးမှ ဒေါ်ခင်မေဝင်း(ဒု-ဦးစီးမှူး) နှင့် ဝန်ထမ်းများသည် မြို့နယ်ထွေအုပ်၊ မြို့နယ်ရဲတပ်ဖွဲ့၊ မြို့နယ်စည်ပင်၊ မြို့နယ်ကျန်းမာရေးတို့ပါဝင်သော  ပူးပေါင်းအဖွဲ့ဖြင့် (၁၇-၁၀-၂၀၂၂)ရက်နေ့တွင် တောင်ကုတ်မြို့ပေါ်ရှိ အခြေခံပညာအထက်တန်းကျောင်း  (အမှတ် ၁-၂-၃-၄)များ၏ ကျောင်းမုန့်ဈေးတန်းသို့သွားရောက်၍ ကျောင်းသား/သူများ ဘေးအန္တရာယ် ကင်းရှင်းစွာ စားသုံးနိုင်ရန်အတွက် ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

     ထိုသို့ဆောင်ရွက်ရာတွင် ခရိုင်ဦးစီးမှူးရုံးမှ ဒေါ်ခင်မေဝင်း(ဒု-ဦးစီးမှူး)မှ ဈေးဆိုင်ရောင်းချသူ များအား စားသောက်ကုန်များရောင်းချရာတွင် သန့်ရှင်းစွာပြုလုပ်ရောင်းချရေး၊ ယင်နားစားများ မရောင်းချရန်၊ ဘေးဉပါဒ်ဖြစ်စေနိုင်သော ဓါတုဆေးဝါးများ၊ ဆိုးဆေးများပါဝင်သော စားသောက်ကုန်များ မရောင်းချရန်၊ စားသောက်ကုန်များတွင် နိုင်ငံခြားဘာသာဖြင့်ဖော်ပြထားသော အများသူငှာ ဖတ်ရှု၍ နားမလည်နိုင်သော စားသောက်ကုန်များအား မရောင်းချကြရန်နှင့် ကုန်အညွှန်းအမှတ် အသားများကို မြန်မာဘာသာဖြင့်ဖော်ပြထားသော စားသောက်ကုန်ပစ္စည်းများကိုရောင်းချကြရန်၊ သို့မှသာ ကျောင်းသား/သူ ကလေးများအနေဖြင့် ကုန်အညွှန်းအမှတ်အသားများကိုဖတ်ရှုပြီး ဘေးအန္တရာယ်ကင်းရှင်းစေသော ကုန်စည်များကို ‌ရွေးချယ်ဝယ်ယူစားသုံးနိုင်မည်ဖြစ်ပါကြောင်း၊ ၎င်းအပြင် ၂၀၁၉ စားသုံးသူကာကွယ်ရေးဉပဒေအရ ကုန်ပစ္စည်းများ၏ ကုန်အညွှန်းအမှတ်အသား များကို မြန်မာဘာသာဖြင့်ဖြစ်စေ၊ မြန်မာဘာသာ(သို့)အခြားဘာသာဖြင့် တွဲလျက်ဖော်ပြထားသော ကုန်စည်များကိုသာ ဦးစားပေးရောင်းချကြရန်၊ အကယ်၍ ဈေးဆိုင်ရှင်များအနေဖြင့် ဉပဒေ ပြဌါန်းချက်အတိုင်း လိုက်နာဆောင်ရွက်မှုမရှိပါက လက်လီဝယ်ယူရောင်းချသူများဖြစ်စေကာမှု ၂၀၁၉ စားသုံးသူကာကွယ်ရေးဉပဒေနှင့်အညီ အရေးယူဆောင်ရွက်နိုင်ပါကြောင်း အသိပညာပေး ဆွေးနွေးခဲ့ပြီး မြို့နယ်ကျန်းမာရေးဦးစီးဌာနမှ ကျန်းမာရေးမှူးမှ စားသောက်ကုန်များကို ကျန်းမာရေးနှင့် ညီညွတ်စွာ ရောင်းချနိုင်ရေးအတွက် ဆွေးနွေးပြောကြားခဲ့ပြီး အသိပညာပေးခြင်းနှင့် ဈေးကွက်စောင့် ကြည့်စစ်ဆေးခြင်း ဆောင်ရွက်ခဲ့ပါကြောင်း သိရှိရပါသည်။

DOCA(ရခိုင်)

နေပြည်တော်၊ (၂၁-၁၀-၂၀၂၂)

             တရုတ်ပြည်သူ့သမ္မတနိုင်ငံ၊ ကုန်ပစ္စည်းအရည်အသွေးကြီးကြပ်ရေး၊ အကောက်ခွန်အထွေထွေအုပ်ချုပ်ရေးအာဏာပိုင်အဖွဲ့ (General Administration of Customs of the People’s Republic of China- GACC) နှင့် မြန်မာနိုင်ငံ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန (MOALI) တို့အကြား မြန်မာနိုင်ငံမှ ပြောင်းကို တရုတ်ပြည်သူ့သမ္မတနိုင်ငံသို့ တင်ပို့ရန် အပင်ကျန်းမာရေးဆိုင်ရာ လိုအပ်ချက် သဘောတူစာချုပ်ကို ၂၀၂၂ ခုနှစ်၊ ဇန်နဝါရီလ ၃၁ ရက်နေ့တွင် လက်မှတ်ရေးထိုးခဲ့ပါသည်။ အဆိုပါ သဘောတူစာချုပ်ပါအချက်အရ ပြောင်းသည် မြန်မာနိုင်ငံမှ ထုတ်လုပ်သည့် ပြောင်းဆံဖြစ်ပြီး စိုက်ပျိုးရန်မဟုတ်ဘဲ ပြုပြင်ကြိတ်ခွဲရန်သာ တရုတ်နိုင်ငံသို့ တင်ပို့ခြင်းဖြစ်ပါသည်။

            တရုတ်နိုင်ငံ GACC သို့ (Sanitary and Phytosanitary Protocol-SPS Protocol) ပါ သတ်မှတ်ချက်များနှင့်အညီ ပြောင်းဆံတင်ပို့နိုင်ရေး အဆိုပြုလျှောက်ထားလာသည့် ကုမ္ပဏီများ ၏ သိုလှောင်ရုံ/ အခြောက်ခံစက်/ နေလှန်းကွင်းများ စစ်ဆေးခဲ့မှုအပေါ် စိစစ်ရွေးချယ် ဆောင်ရွက် နိုင်ရေး Working Task Force အဖွဲ့အား အဖွဲ့ခေါင်းဆောင်အဖြစ် စိုက်ပျိုးရေးဦးစီးဌာန၊ ဒုတိယ ညွှန်ကြားရေးမှူးချုပ်က လည်းကောင်း၊ အဖွဲ့ဝင်များအဖြစ် စားသုံးသူရေးရာဦးစီးဌာနနှင့် မြန်မာ ကုန်သွယ်မှု မြှင့်တင်ရေးအဖွဲ့တို့မှ ဒုတိယညွှန်ကြားရေးမှူးချုပ်၊ သက်ဆိုင်ရာဦးစီးဌာနများမှ ညွှန်ကြားရေးမှူးနှင့် မြန်မာကုန်ပစ္စည်းစစ်ဆေး‌ရေးနှင့် စမ်းသပ်မှုလုပ်ငန်းလီမိတက်(MITS)၊ ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ်၊ မြန်မာနိုင်ငံ ပဲမျိုးစုံ၊ ပြောင်းနှင့် နှမ်းကုန်သည်များအသင်းနှင့် မြန်မာနိုင်ငံ ပြောင်းလုပ်ငန်းအသင်း တို့မှ ပါဝင်၍ အဖွဲ့ဝင်(၉)ဦးဖြင့် ဖွဲ့စည်းခဲ့ပြီး စနစ်တကျဆောင်ရွက်ခဲ့ကြပါသည်။

             မြန်မာနိုင်ငံမှ ပြောင်းကို တရုတ်နိုင်ငံ GACC သို့ တင်ပို့နိုင်ရေး မှတ်ပုံတင်ခွင့်ရရှိရေးအတွက် စိတ်ပါဝင်စားမှု အဆိုပြုလွှာများ ခေါ်ယူခဲ့ရာ စုစုပေါင်း ကုမ္ပဏီ(၁၄၃)ခု လျှောက်ထားလာ ပြီး အဆိုပြုလျှောက်ထားလာသည့် ကုမ္ပဏီများ၏ သိုလှောင်ရုံ/ အခြောက်ခံစက်/ နေလှန်းကွင်း များအား စိုက်ပျိုးရေးဦးစီးဌာန၊ စားသုံးသူရေးရာဦးစီးဌာနမှ တာဝန်ရှိသူများနှင့် မြန်မာကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းလီမိတက်(MITS) မှ စစ်ဆေးရေးမှူးများက SPS Protocol ပါ သတ်မှတ်ချက်များနှင့်ကိုက်ညီမှု ရှိ/မရှိ မြေပြင်ကွင်းဆင်းစစ်ဆေးသည့် လုပ်ငန်းစဉ် များ လုပ်ဆောင်ခဲ့ကြပါသည်။

             SPS Protocol ပါ သတ်မှတ်ချက်များနှင့်ကိုက်ညီမှုရှိ/မရှိ စစ်ဆေးရာတွင် အပိုင်း(၂)ပိုင်း ဖြင့် စစ်ဆေးခဲ့ပြီး အပိုင်း(က)မှာ ကုန်ကြမ်းနှင့် ကုန်ချောသိုလှောင်ရုံ စက်ရုံအတွင်း ထားရှိမှုနှင့် အပိုင်း(ခ)မှာ လုပ်သားကျန်းမာရေးနှင့် တစ်ကိုယ်ရည်သန့်ရှင်းရေးစစ်ဆေးမှုတို့ဖြစ်ပါသည်။ ထိုသို့ မစစ်ဆေးမီ လုပ်ငန်းရှင်များအား SPS Protocol ပါ သတ်မှတ်ချက်များနှင့်စပ်လျဉ်း၍ အသိပညာ ပေး ရှင်းလင်းခဲ့ပါသည်။ အဆိုပါ SPS Protocol ပါ သတ်မှတ်ချက်များနှင့်ကိုက်ညီမှုရှိ/မရှိအပြင် သိုလှောင်ရုံ၊ အခြောက်ခံစက်၊ နေလှန်းကွင်းများမှာ ကိုယ်ပိုင် ပိုင်ဆိုင်မှု ဟုတ်/မဟုတ်၊ အငှား/ အကျိုးတူဖြစ်ပါက အငှားစာချုပ်ခိုင်မာမှုရှိ/မရှိတို့အပြင် နိုင်ငံသားပိုင်ကုမ္ပဏီ/ နိုင်ငံခြားသားပိုင် ကုမ္ပဏီ စသည်ဖြင့်လည်း စိစစ်ခဲ့ကြပါသည်။ စိစစ်ပြီးဖြစ်သည့် ကုမ္ပဏီများစာရင်းအား စိုက်ပျိုး ရေး၊ မွေးမြူရေးနှင့် ဆည်မြောင်းဝန်ကြီးဌာနမှတစ်ဆင့် နိုင်ငံခြားရေးဝန်ကြီးဌာန၊ ထိုမှတစ်ဆင့် တရုတ်နိုင်ငံ GACC တွင်မှတ်ပုံတင်ခွင့် ရရှိနိုင်ရေးပေးပို့ခဲ့ပါသည်။

             ယခုအခါ သတ်မှတ်ချက်များနှင့်ကိုက်ညီမှုရှိသည့် ကုမ္ပဏီ (၁၁၂) ခု၏ သိုလှောင်ရုံ (၁၃၃) လုံးနှင့် အခြောက်ခံစက် (၅၉) စက်တို့အား တရုတ်နိုင်ငံ GACC Website ဖြစ်သည့် http://www. customs.gov.cn/ dzs/2747042/ 3995819/ls/ 3997385/index.html တွင် ဖော်ပြ ထားသည်ကိုတွေ့ရှိရကြောင်းနှင့် အဆိုပါကုမ္ပဏီများအနေဖြင့် တရုတ်နိုင်ငံ(GACC)သို့ ပြောင်းဆံများ တင်ပို့နိုင်ပြီဖြစ်ကြောင်း လေ့လာသိရှိရပါသည်။

DOCA(ITQM)

    ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီး ဌာန၊ တာချီလိတ်ခရိုင်ဦးစီးမှူးရုံးမှ ဝန်ထမ်းများသည် ၂၀၂၂ခုနှစ်၊ အောက်တိုဘာလ(၁၈)ရက်နေ့၊ နံနက်(၁၀:၀၀)အချိန်တွင် အသေးစားစက်မှု လက်မှုဦးစီးဌာနမှ ဝန်ထမ်းများနှင့်ပူးပေါင်း၍ တာချီလိတ်မြို့နယ်၊ တော်ကော့ရပ်ကွက်အတွင်းရှိ ဂျုံခေါက်ဆွဲလုပ်ငန်း(၃)ခုတို့ကို ထုတ်ကုန်များလုံခြုံစိတ်ချရမှုရှိစေရန်အတွက် စစ်ဆေးခြင်းများ ဆောင်ရွက်ခဲ့ပါသည်။

    ထိုသို့စစ်ဆေးရာတွင် ယုန်တံဆိပ်၊ ကျောက်စိမ်းတံဆိပ်နှင့် ငါးစုံတွဲတံဆိပ် ဂျုံခေါက်ဆွဲတို့ တွင် ကုန်အညွှန်းအမှတ်အသားနှင့်ပတ်သက်၍ ပြည့်စုံစွာဖော်ပြထားသည်ကို စစ်ဆေးတွေ့ရှိရပါ သည်။ ထို့နောက် စစ်ဆေးရေးမှူးနှင့်ဌာနဆိုင်ရာဝန်ထမ်းများသည် လုပ်ငန်းရှင်များအား စားသုံးသူ များ ဘေးအန္တရာယ်ကင်းရှင်းစေရေးကို အလေးထားဆောင်ရွက်ရန်၊ ကုန်ကြမ်းများမှစ၍ စနစ်တကျ သိုလှောင်ရန်၊ သက်ဆိုင်ရာဌာနများ၏လုပ်ငန်းလိုင်စင်နှင့် ထောက်ခံချက်များပြုလုပ်ရန်၊ စားသုံးသူ ကာကွယ်ရေးဥပဒေအခန်း(၁၀)ပါ “စီးပွားရေးလုပ်ငန်းရှင်၏တာဝန်များ”ကိုလိုက်နာဆောင်ရွက်ရန် ဆွေးနွေးလမ်းညွှန်ခဲ့ကြပါသည်။

DOCA(ရှမ်း)