သတင်းနှင့် လှုပ်ရှားမှုများ

             စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ စားသုံးသူများလုံခြုံစိတ်ချရမှုရှိစေရေးမျှော်မှန်းချက်နှင့်အညီ တိုင်း/ခရိုင်ဦးစီးမှူးတို့၏ လမ်းညွှန်မှုဖြင့် ဒု-ခရိုင်ဦးစီးမှူးနှင့် ဝန်ထမ်းများသည် စားသုံးသူကာကွယ်ရေး ဥပဒေပါပြဌာန်းချက်များအား သိရှိလိုက်နာဆောင်ရွက်နိုင်စေရန် စီးပွားရေးလုပ်ငန်းရှင်များနှင့် တွေ့ဆုံ ဆွေးနွေးအသိပညာပေးခြင်း၊ ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း၊ ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်လာစေရေးအတွက် စိုက်ပျိုးမွေးမြူသူ တောင်သူများ၊ စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်း၊ သတင်းအချက်အလက်ဖြန့်ဝေပေးခြင်းလုပ်ငန်းများ ဆောင်ရွက်လျက်ရှိပါသည်။

          စားသုံးသူရေးရာဦးစီးဌာန၊ မင်းဘူးခရိုင်ဦးစီးမှူး လ/ထ ညွှန်ကြားရေးမှူး ဒေါ်စုစုထွန်းနှင့် ဝန်ထမ်းများသည် စားသုံးသူများ ဘေးအန္တရာယ်ကင်းရှင်းပြီး ထုတ်ကုန်များလုံခြုံစိတ်ချရမှုရှိစေရေးအတွက် ရည်ရွယ်၍ ၂၀၂၂ ခုနှစ်၊ စက်တင်ဘာလ(၂၈)ရက်နေ့ နံနက်(၁၀း၀၀)နာရီ အချိန်တွင် မင်းဘူးမြို့၊ထောက်ရှာပင်ကျေးရွာရှိ “အောင်”မန်ကျည်းယို ထုတ်လုပ်သည့် လုပ်ငန်းရှင်နှင့် တွေ့ဆုံဆွေးနွေးအသိပညာပေးခြင်း ဆောင်ရွက်ခဲ့ပါသည်။

          လုပ်ငန်းရှင်မှ မုန့်ထုတ်လုပ်ရောင်းချဖြန့်ဖြူးသည့် လုပ်ငန်းကို လုပ်ကိုင်ခဲ့ရာတွင် နှစ် (၂၀)ခန့် သက်တမ်းရှိပြီဖြစ်ပါကြောင်း၊ ခရိုင်ဦးစီးမှူးမှ အသိပညာပေးပြောကြားရာတွင် စီးပွားရေးလုပ်ငန်းရှင်အနေဖြင့် ကုန်စည်များထုတ်လုပ်ဖြန့်ဖြူး ရောင်းချရာတွင် စီးပွားရေးလုပ်ငန်းရှင်များ သိရှိလိုက်နာဆောင်ရွက်စေရန်အတွက် စားသုံးသူကာကွယ်ရေးဥပဒေ(၂၀၁၉)ပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များနှင့်အခန်း(၁၈) ကုန်အညွှန်းအမှတ်အသားဆိုင်ရာ ပြဌာန်းချက်များနှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ်(၂/၂၀၁၉)အရ အသင့်စားမုန့်အမျိုးမျိုးတွင်ပါရှိရမည့် အချက်များ၊ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ အခြားဘာသာတစ်ခု (သို့)တစ်ခုထက်ပို၍ တွဲလျက်ဖြစ်စေ ဖော်ပြရမည်ဖြစ်ကြောင်း အသေးစိတ်ရှင်းလင်း ဆွေးနွေးခဲ့ပြီး လုပ်ငန်းရှင်များအနေဖြင့် မိမိတို့ ထုတ်လုပ်သော ကုန်စည်များတွင် ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြနိုင်ရန်နှင့် ကုန်အမှတ်တံဆိပ်ဖော်ပြရာတွင် လုပ်ငန်းရှင်များ ကုန်ကျစရိတ်ဆုံးရှုံးမှုမရှိစေရန် စားသုံးသူရေးရာဦးစီးဌာနမှ ကူညီ၍ ကုန်အမှတ်တံဆိပ် စိစစ်ခွင့်ပြုချက်ရရှိစေရေးအတွက် တိုင်းရုံးသို့ ဆက်လက်တင်ပြဆောင်ရွက်ပေးသွားမည်ဖြစ်ကြောင်း၊ အခြားဌာနများ၏ ခွင့်ပြုချက်လိုင်စင်များ လုပ်ဆောင်ရန်လိုအပ်ပါကလည်း သက်ဆိုင်ရာဌာနများနှင့် ချိတ်ဆက်၍ ကူညီဆောင်ရွက်ပေးမည်ဖြစ်ကြောင်း ရှင်းလင်းဆွေးနွေးခဲ့ပြီး စားသုံးသူကာကွယ်ရေးအသိပညာပေးလက်ကမ်းနှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ကြေငြာချက်အမှတ် (၂/၂၀၁၉)ပါ အသိပညာပေးလက်ကမ်းစာစောင်များကို ဖြန့်ဝေခဲ့ပါကြောင်းသတင်းရရှိပါသည်။

DOCA(မကွေး)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ဖျာပုံခရိုင်ကျိုက်လတ်မြို့နယ်တာဝန်ခံရုံးမှ မြို့နယ်တာဝန်ခံဦးတင်စိန်သည် (၂၈.၉.၂၀၂၂)ရက်နေ့(၀၉:၀၀)နာရီအချိန်တွင် ဆီကုန်သည်နှင့် ဆီလုပ်ငန်းရှင်အသင်း  (ယာယီ)မှ စားအုန်းဆီများအထူးဈေးနှုန်းဖြင့်  ရောင်းချနေမှုကို  သွားရောက် ကွင်းဆင်းစိစစ်ခဲ့ပါသည်။

    ထိုသို့ကွင်းဆင်းစစ်ဆေးရာတွင် ကျိုက်လတ်မြို့နယ်ဆီကုန်သည်နှင့်ဆီလုပ်ငန်းရှင်အသင်း (ယာယီ) အနေဖြင့် စားသုံးသူပြည်သူများ သက်သာသောဈေးနှုန်းဖြင့် သုံးစွဲနိုင်ရေးအတွက် မြို့မဈေးကြီးအတွင်းရှိ ဝေဖြိုးကုန်မျိုးစုံဆိုင်နှင့် ဒေါ်အေးမော်ဦးကုန်မျိုးစုံဆိုင်(၂)ဆိုင်မှ စားအုန်းဆီ(၁)ပိဿာလျှင် (၅၁၀၀)ကျပ်နှုန်းဖြင့် တစ်ဦးလျှင် (၅၀)ကျပ်သားဖြင့် စားအုန်းဆီများကို ဖြန့်ဖြူးရောင်းချပေးခဲ့ကြောင်း သိရှိရပါသည်။

DOCA(ဧရာဝတီ)

           စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် တိုင်း/ခရိုင်/မြို့နယ်များမှ ဝန်ထမ်းများသည် စားသုံးသူပြည်သူများ ကုန်စည်နှင့်ဝန်ဆောင်မှုများ ဝယ်ယူသုံးစွဲရာတွင် ဘေးအန္တရာယ်ကင်းရှင်းရေး၊ ကျန်းမာရေးနှင့်စိတ်ကျေနပ်မှုရရှိစေရေး ဘေးကင်း လုံခြုံစိတ်ချရမှုရှိသော ကုန်ပစ္စည်းများကို ထုတ်လုပ်၊ ဖြန့်ဖြူး၊ ရောင်းချနိုင်စေရန် ရည်ရွယ်၍ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ပြည့်စုံစွာဖော်ပြလာရေး စိစစ်ဆောင် ရွက်ခြင်းနှင့် ဈေးကွက်စောင့်ကြည့်စစ်ဆေးခြင်း လုပ်ငန်းများကို ကျယ်ကျယ်ပြန့်ပြန့် ဆောင်ရွက် လျက်ရှိပါသည်။

          ထိုသို့ဆောင်ရွက်ရာတွင် ၂၀၂၂ခုနှစ် စက်တင်ဘာလတွင် မကွေးတိုင်းဒေသကြီးအတွင်းရှိ မြို့ပေါ်ကုန်စုံဆိုင်၊ စတိုးဆိုင်များ၌ ရောင်းချလျက်ရှိသော ကုန်စည်များတွင် စားသုံးသူကာကွယ်ရေး ဥပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသားဖော်ပြချက်များနှင့် မြန်မာနိုင်ငံစားသုံးသူ ကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)အရ ကုန်စည်အုပ်စု(၈)ခု၊ ကုန်စည် အမျိုးအစား(၄၄)မျိုးတို့တွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာ ဖော်ပြထားခြင်း ရှိ/မရှိ ဈေးကွက်စောင့်ကြည့်စစ်ဆေးခြင်းကို စည်ပင်သာယာဈေးတွင် (၂၃)ကြိမ်၊ ကျောင်းမုန့် ဈေးတန်းတွင်(၁)ကြိမ်၊ ရပ်ကွက်/ကျေးရွာတွင် (၁၃)ကြိမ်၊ စုစုပေါင်း(၃၇)ကြိမ် ဆောင်ရွက်ခဲ့ကြောင်းသိ ရပါသည်။

          ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ လုပ်ငန်းရှင်(၃)ဦးမှ တင်ပြလာသော စုစုပေါင်းကုန်အမှတ်တံဆိပ် (၃)ခု၊ ကုန်စည် (၃)မျိုးတို့အား စားသုံးသူကာကွယ်ရေးဥပဒေနှင့် ကိုက်ညီမှုရှိ/မရှိ စိစစ်၍ ကိုက်ညီမှုရှိကြောင်း အတည်ပြုပြန်ကြားခြင်းများ ဆောင်ရွက်ခဲ့ကြောင်း သိရှိရပါသည်။

          ဤသို့ဈေးကွက်စောင့်ကြည့်စစ်ဆေးခြင်းနှင့် ကုန်အညွှန်းအမှတ်အသားများ စိစစ်ဆောင်ရွက်  ခြင်းအားဖြင့် စားသုံးသူပြည်သူများ ဘေးကင်းလုံခြုံမှုရှိသော ကုန်စည်များ ရွေးချယ်ဝယ်ယူသုံးစွဲနိုင် ခြင်း၊ စီးပွားရေးလုပ်ငန်းရှင်များမှလည်း ကုန်စည်များကို အရည်အသွေးပြည့်မီပြီး သတ်မှတ်စံချိန် စံညွှန်းနှင့် ကိုက်ညီမှုရှိသည့် ကုန်စည်များထုတ်လုပ်ဖြန့်ဖြူးရောင်းချလာခြင်းဖြင့် ဈေးကွက်ဝေစုများပိုမိုရရှိကာ ဒေသတွင်းစီးပွားရေး ပိုမိုဖွံ့ဖြိုးတိုးတက်လာမည်ဖြစ်ပါကြောင်း ရေးသားတင်ပြလိုက်ရပါသည်။

DOCA(မကွေး)

     တနင်္သာရီမြို့နယ်၊ ချောင်းကြီးရပ်ကွက်၊ ပြည်ထောင်စုလမ်းမပေါ်ရှိ တနင်္သာရီတံတား စစ်ဆေးရေးဂိတ်တွင် စစ်ဆေးရေးပူးပေါင်းအဖွဲ့မှ စာရွက်စာတမ်း၊ အထောက်အထားမပြနိုင်သော အေးခဲအသားမျိုးစုံအား ဖမ်းဆီးရမိပြီး မြိတ်မြို့နယ်၊ အကောက်အခွန်ဦးစီးဌာနမှူးရုံး သို့လာရောက် အပ်နှံခဲ့ကြောင်းသိရှိရပါသည်။

     အဆိုပါအေးခဲ့အသားများကို အကောက်အခွန်ဦးစီးဌာနမှ အကောက်အခွန်အမှုတွဲအမှတ်- သ-မ/၂၀၂၂(၀၀၃)ဖြင့် အမှုဖွင့်အရေးယူဆောင်ရွက်ခဲ့ပြီး မြိတ်မြို့၊ ကလွင်ရပ်၊ စည်ပင်အမှိုက်စွန့် ကန်၌ ၂၀၂၂ခုနှစ်၊ စက်တင်ဘာ (၂၉)ရက်နေ့တွင် စားသုံးသူရေးရာဦးစီးဌာန၊ အကောက်အခွန်ဦးစီး ဌာန၊ စည်ပင်သာယာရေးအဖွဲ့၊ မြန်မာနိုင်ငံရဲတပ်ဖွဲ့၊ မြို့နယ်စီမံခန့်ခွဲရေးအဖွဲ့တို့ပါဝင်သော ပူးပေါင်း အဖွဲ့ဖြင့် စုစုပေါင်း(၄၀၆)Kg၊ ခန့်မှန်းတန်ဖိုး ကျပ်(၁၅၀၀၀၀၀ိ/-)ရှိ အေးခဲအသားများအား မြေမြုပ် ဖျက်စီးခဲ့ကြောင်း သိရှိရပါသည်။

DOCA(တနင်္သာရီ)

       (၂/၂၀၂၂)ကြိမ်မြောက် ရခိုင်ပြည်နယ် စားသုံးသူရေးရာကော်မတီအစည်းအဝေးကို စက်တင်ဘာလ(၂၈)ရက်၊ နေ့လယ် (၂:၀၀)နာရီအချိန်တွင် ရခိုင်ပြည်နယ်အစိုးရအဖွဲ့ရုံး၊ အစည်းအဝေးခန်းမ(၂)တွင် ကျင်းပပြုလုပ်ခဲ့ပါသည်။

       အစည်းအဝေးတွင် ရခိုင်ပြည်နယ် စားသုံးသူရေးရာကော်မတီဉက္ကဌ ပြည်နယ်အစိုးရအဖွဲ့၊ စီးပွားရေးရာဝန်ကြီး ဦးစံရွှေမောင်က အဖွင့်အမှာစကားပြောကြားပြီး ပြည်နယ်စားသုံးသူရေးရာ ကော်မတီအတွင်းရေးမှူး ရခိုင်ပြည်နယ် စားသုံးသူရေးရာဦးစီးဌာန ပြည်နယ်ဦးစီးမှူး ဦးတင်ဇော်ထွန်းက (၁/၂၀၂၂)ကြိမ်မြောက် အစည်းအဝေးဆုံးဖြတ်ချက်များအား ဆောင်ရွက် ထားရှိမှုအခြေအနေ၊ ၂၀၂၂ခုနှစ် (ဇူလိုင်မှစက်တင်ဘာလ)ထိ စားသုံးသူကာကွယ်ရေးဆိုင်ရာ အသိပညာပေးဟောပြောပွဲများကျင်းပခြင်း၊ စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်း၊ ထုတ်ကုန်လုံခြုံစိတ်ချရမှုဆိုင်ရာ ဈေးကွက်စောင့်ကြည်စစ်ဆေးခြင်း၊ ကုန်အညွှန်းအမှတ်အသား စိစစ်ခြင်းများ ဆောင်ရွက်ထားရှိမှုအခြေအနေ၊ ၂၀၂၂-ခုနှစ် (အောက်တိုဘာလမှဒီဇင်ဘာလ)ထိ စားသုံးသူကာကွယ်ရေးလုပ်ငန်းများ လျာထားချက်ပြည့်မီအောင် ဆက်လက်ဆောင်ရွက်မည့် အစီအစဉ်စသည်တို့အား အမှာစာများဖြင့် ရှင်းလင်းဆွေးနွေးတင်ပြခဲ့ရာ တက်ရောက်လာသည့် ကော်မတီအဖွဲ့ဝင်များက အမှာစာများအား အတည်ပြုမှတ်တမ်းတင်၍ လိုအပ်သည်များကို ဝိုင်းဝန်းအကြံပြုဆွေးနွေးခဲ့ကြပြီး အစည်းအဝေးဆုံးဖြတ်ချက်များ ချမှတ်ခဲ့ကြပါသည်။ ထို့နောက် ကော်မတီဉက္ကဌက နိဂုံးချုပ်အမှာစကားပြောကြားကာ အစည်းအဝေးကို နေ့လည်(၃:၃၀)နာရီ အချိန်တွင် ရုတ်သိမ်းခဲ့ပါသည်။

     အဆိုပါအစည်းအဝေးသို့ ပြည်နယ်စားသုံးသူရေးရာကော်မတီဉက္ကဌ၊ ဒု-ဉက္ကဌ၊ အတွင်းရေးမှူး၊ အဖွဲ့ဝင်(၆)ဦး၊ ပြည်နယ်ဦးစီးမှူးရုံးမှ ဝန်ထမ်း(၇)ဦး၊ စုစုပေါင်း(၁၆)ဦး တက်ရောက်ခဲ့ကြောင်း သတင်းရရှိပါသည်။

DOCA(ရခိုင်)