သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ ချောက်ခရိုင်၊ ချောက်မြို့နယ်တာဝန်ခံ ဒေါ်မြတ်မြတ်မိုး (ဌာနခွဲစာရေး) နှင့် ဒေါ်ချိုဝေလွင် (ဒု-ဦးစီးမှူး)တို့သည် သက်ဆိုင်ရာ ရပ်ကျေးဥက္ကဌ၊ ကျောင်းအုပ်ကြီးများနှင့် ချိတ်ဆက်ပြီး စားသုံးသူများ အသိပညာတိုးပွားရေး၊ ဘေးအန္တရာယ်ကင်းရှင်းစေရေး၊ ဌာနပုံရိပ်မြှင့်တင်နိုင်‌ရေးတို့အတွက် (၇.၉.၂၀၂၂)ရက်နေ့တွင် ချောင်းတက်ကျေးရွာ အထက(ခွဲ) ကျောင်း၌ ဆရာ/ဆရာမ (၁၂)ဦး၊ ကျောင်းသား/သူ (၁၉၃)ဦးတို့အား လည်းကောင်း၊ (၁၄.၉.၂၀၂၂)ရက်နေ့ တွင် စမ်းစု (ကား) ကျေးရွာ အထက(ခွဲ)ကျောင်း၌ ဆရာ/ဆရာမ(၁၇)ဦး၊ ကျောင်းသား/သူ (၁၅၇) ဦးအား လည်းကောင်း၊ (၁၆.၉.၂၀၂၂)ရက်နေ့တွင် ကိုင်းထောက်ကန်ကျေးရွာရှိ အလက(ခွဲ)ကျောင်း၌ ဆရာ/ ဆရာမ (၁၁)ဦး၊ ကျောင်းသား/သူ (၁၃၆)ဦး တို့အား လည်းကောင်း စားသုံးသူကာကွယ်ရေးဦးစီးဌာန၏ မျှော်မှန်းချက်/ ရည်မှန်းချက်များ စားသုံးသူများ ရရှိနိုင်မည့် အခွင့်အရေး(၈)ချက်၊ တာဝန်(၄)ချက် စားသုံးသူများ ကုန်စည်/ဝန်ဆောင်မှုများ ဝယ်ယူစားသုံး/ အသုံးပြုရာတွင် သတိပြုရမည့် စားသုံးသူ ကာကွယ်‌ရေး ဥပဒေ-၂၀၁၉ အခန်း(၁၈)ပါ ကုန်အညွှန်းအမှတ်အသားတွင် ပြည့်စုံစွာပါဝင်ရမည့် အချက် များအား အသေးစိတ်ရှင်းလင်းဆွေးနွေးခဲ့ပါသည်။

       အသိပညာပေးဟောပြောပွဲအပြီးတွင် စမ်းစု(ကား) ကျေးရွာရှိ အိမ်ဆိုင်များ၊ ကိုင်းထောက်ကန် ကျေးရွာရှိ အိမ်ဆိုင်များအား စားသုံးရန်မသင့် တားမြစ်ထားသော ကုန်စည်များ၊ သက်တမ်းလွန် မှိုတက်နှင့် ကုန်အညွှန်းအမှတ်အသားပြည့်စုံစွာ မပါဝင်သော ကုန်စည်များ ရောင်းချမှု ရှိ/မရှိ စျေးကွက် စောင့်ကြည့်စစ်ဆေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) လက်ကမ်းစာစောင်များ ဖြန့်ဝေပေးခဲ့ပါသည်။

DOCA(မကွေး)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ ဒု-ဦးစီးမှူး ဒေါ်မွန်မွန်သက်သည် (၂၅.9.2022) ရက်နေ့တွင် ပွင့်ဖြူ မြို့နယ် ဇီးကိုင်အုပ်စု ဝဲထောင်ကျေးရွာ၌  ပြည်တွင်းကုန်သွယ်မှု ဖွံ့ဖြိုးတိုးတက်စေရေးအတွက် မိုးစပါးစိုက်တောင်သူ ဦးရဲစိုးနှင့်တွေ့ဆုံမေးမြန်းခဲ့ရာ ယခုနှစ် စပါးစိုက်ပျိုးရာသီတွင် ဓါတ်မြေဩဇာ ဈေးနှုန်းကြီးမြင့်သည့်အတွက် သဘာဝမြေဩဇာကို သုံးစွဲစိုက်ပျိုးကြောင်း ကုန်ကျစရိတ် သက်သာပြီး အကျိုးအမြတ်များစွာ ရရှိကြောင်း သိရှိခဲ့ရပါသည်။ ဝဲထောင့်ကျေးရွာသည့် မုန်းချောင်း နဘေးတွင် တည်ရှိကာ အိမ်ခြေ(၇၀၀)ခန့်ရှိပြီး လူဦးရေမှာ(၃၅၀၀)ခန့်ရှိသောရွာကြီးတစ်ရွာဖြစ်ကြောင်း နှစ်စဉ် မုန်းချောင်းရေကျပြီး မြေနုကျွန်းများနှင့် လယ်မြေများပေါ်တွင် စပါး၊ ထောပတ်ပဲ၊ စားတော်ပဲ၊ မြေပဲများ  စိုက်ပျိုးလျက်ရှိကြောင်း လယ်မြေများတွင် မိုးရာသီ၌ ဧရာပဒေသာစပါးစိုက်ပျိုးပြီး ယာမြေနု ကျွန်းများတွင် ဆောင်းရာသီ၌ မြေပဲ၊ ထောပတ်ပဲ၊ စတော်ပဲများတွင် နေကြာသီးနှံညှပ်၍ စိုက်ပျိုးကြောင်း လယ်မြေများမှာ မိုးကောင်းသောက်လယ်များဖြစ်သော်လည်း ရေလိုအပ်ချိန်တွင် မုန်းချောင်းမှ ရေသွင်းနိုင်သည့်အတွက် စပါးအထွက်ကောင်းကြောင်းသိရှိရပါသည်။ တောင်သူဦးရဲစိုး အနေဖြင့် ယခုနှစ်တွင် ဧရာပဒေသာစပါး(၅)ဧကကို သဘာဝမြေဩဇာပြုလုပ်သုံးစွဲ၍ စိုက်ပျိုးထားကြောင်း သိရှိရပါသည်။

      စပါးစိုက်ပျိုးရန်အတွက် မိုးဦးကျချိန်တွင် နွေသမန်းကို ထွက်ယက်ပြီး သစ်စိမ်းမြေဩဇာ (ပိုက်ဆံလျှော်)မျိုးစေ့များကို စတင်စိုက်ပျိုးထားပြီးတဖက်မှလည်း ကောက်ရိုးမှော်၊ စပါးခွံ၊ နွားချေး စသည့် စွန့်ပစ်အမှိုက်များကို မြေဆွေးမြေဩဇာအသုံးပြုရန်ကြိုတင် စုဆောင်းထားကြောင်း ရွက်ဖြန်းမြေဩဇာအသုံးပြုရန် ငါး၏အမြီး၊ခေါင်းနှင့် ထန်းလျှက်တို့ဖြင့် ပြုလုပ်ထားသည့် ငါးအမိုင်နိုရွက် ဖြန်းမြေဩဇာကို ကြိုတင် စီစဉ်ဆောင်ရွက်ထားကြောင်း၊ သစ်စိမ်းမြေဩဇာ(20)ရက်သားခန့်တွင် စပါးကိုပျိုးထောင်ရကြောင်း စပါးပျိုးသက်(27)ရက်ခန့်တွင် သစ်စိမ်းမြေဩဇာကို ထယ်ထိုး၊ အပုတ်ခံ ကြောင်း (45)ရက်သားသစ်စိမ်းမြေဩဇာသည် မြေဆီလွှာအတွက် အကောင်းဆုံးဖြစ်ကြောင်း၊ ထယ်ထိုးအပုတ်ခံပြီး(၅) ရက်ခန့်အကြာတွင် ပျိုးပင်သက် (32)ရက်သားရှိသော စပါးပျိုးပင်များကို စိုက်ခင်းသို့ပြောင်းရွှေ့စိုက်ပျိုးကြောင်း မြေဆွေးကျင်းပြုလုပ်ထားသော သဘာဝမြေဩဇာကို စိုက်ခင်းသက်တမ်း(10 မှ 15)ရက်အတွင်း တစ်ကြိမ် ပတ်ဖြန်းကြောင်း စပါးပင်မှို့ကပ်ချိန်တွင် နောက်တစ်ကြိမ်ပတ်ဖြန်းကြောင်း ငါးအမိုင်နိုရွက်ဖြန်း အားဆေးကို စပါးနှံစတင်ထွက်ရှိချိန် စက်တင်ဘာလဆန်းတွင် စတင်ပတ်ဖြန်းကြောင်း ဦးရဲစိုး၏ လယ်မြေများတွင် စိုက်ပျိုးထားသောစပါးခင်းနှင့်ပတ်သတ်၍ စိုက်ပျိုးရေးဦးစီးဌာန၏ အကြံပြုချက်နှင့် နည်းပညာ ဖြန့်ဝေမှုများအရ သဘာဝမြေဩဇာများကို ကိုယ်တိုင်ပြုလုပ်၍ စိုက်ပျိုးရေး ဦးစီးဌာန၏ ညွှန်ကြားချက်အတိုင်း စနစ်တကျ စိုက်ပျိုးခဲ့ကြောင်း နိုဝင်ဘာလခန့်တွင် စပါးများရိတ်သိမ်းမည် ဖြစ်ကြောင်း သိရှိရပါသည်။

   မိုးစပါးစိုက်ပျိုးရန် တစ်ဧက ကုန်ကျစရိတ်အနေဖြင့် သစ်စိမ်းမြေဩဇာ စတင်စိုက်ပျိုးချိန်၊ ပျိုးခင်းပြင်ချိန်မှစိုက်ခင်းထိ မြေပြင်စိုက်ပျိုးစရိတ်မှာ မိမိပိုင်ထွန်စက်ဖြင့် (3)နာရီခန့်မြေ ပြင်ရာတွင် ဒီဇယ်(4.5)လီတာခန့် ကုန်ကျကြောင်း ငွေကြေးအနေဖြင့်(14000)ကျော်ခန့် ရှိကြောင်း၊ ကောက်စိုက်ခ၊ ပျိုနှုတ်ခ၊ ရိတ်သိမ်းခ၊ ကောက်လှိုင်းစီးခ အတွက်အလုပ်သမားဦးရေ(၄၀)ဦးခန့် ငှားရမ်း သုံးစွဲရကြောင်း တစ်ဦးလျှင်နေ့တွက်လုပ်အားခ(3000)ကျပ်နှုန်းပေးရပြီး စုစုပေါင်းလုပ်အားခအနေဖြင့် (၁၂၀000)ကျပ်ခန့် ကုန်ကျကြောင်းသိရပါသည်။ ယခုနှစ်တွင် မိုးရွာသွန်းမှုများသည့်အတွက် ရေတင်ရသည့် ကုန်ကျစရိတ်သက်သာကြောင်း သဘာဝမြေဩဇာပြုလုပ်သုံးစွဲခြင်းကြောင့် မြေဩဇာ  အတွက်ကုန်ကျစရိတ် သက်သာကြောင်း နှံစုတ်ပိုးများ ကျရောက်ပါက ပိုးသတ်ဆေး ဝယ်ယူသုံးစွဲရမှာဖြစ်ကြောင်း၊ ယခု အချိန်ထိ သုံးစွဲရန်မလိုသေးကြောင်း (၁)ဧက ထွက်နှုန်းမှာ တင်း(80 မှ 100)ခန့် ထွက်ရှိမည်ဖြစ် ကြောင်း၊ လယ်ကွင်းအတွင်းမှကောက်လှိုင်းများကို မိမိပိုင်ထွက်စက်ဖြင့် သယ်ယူမည်ဖြစ်ကြောင်း၊ (၁)ဧက ကုန်ကျစရိတ်မှာ(350000)ခန့်ရှိပါကြောင်း အကျိုးအမြတ်အနေဖြင့် ယခုနှစ်တွင် စပါးဈေး နှုန်းမြှင့်တက်မှုကြောင့် (၅)ဧကအတွက်(၂၅)သိန်းခန့် ရရှိမည်ဟု မျှော်မှန်း ကြောင်း သိရပါမည်။

      ဝဲထောင့်ကျေးရွာသည် လယ်မြေနှင့် ယာမြေနုများပေါ်တွင် အမှီပြု၍ နေထိုင်ကျသော တောင်သူ များဖြစ်ကြောင်း စပါးစိုက်ဧကလည်း များသောကြောင့် ဆန်ထွက်ရှိမှုမှာလည်း များပြားကြောင်း စားသုံးပြီးပိုလျှံသော စပါးများကိုဒေသကုန်သည်များလာရောက်ဝယ်ယူ လျက်ရှိပါကြောင်း၊ သဘာဝ မြေဩဇာကို သုံးစွဲခြင်းဖြင့် ကုန်ကျစရိတ်သက်သာပြီး စားသုံးသူများအနေဖြင့် ဘေးအန္တရာယ်ကင်းရှင်း ပြီး လုံခြုံစိတ်ချစွာ စားသုံးနိုင်ပါကြောင်း၊ အခြားကျေးရွာများလည်း ဝဲထောင့်ကျေးရွာကဲ့သို့ သစ်စိမ်း သဘာဝမြေဩဇာကိုသုံးပြီး စိုက်ပျိုးခြင်းဖြင့်  ကုန်ကျစရိတ်သက်သာ၍ အထွက်နှုန်းအနေဖြင့် လျော့နည်း ခြင်းမရှိသောကြောင့် သဘာဝမြေဩဇာကို ပြုလုပ်သုံးစွဲစိုက်ပျိုးခြင်းဖြင့် အကျိုးအမြတ် များစွာ ရရှိပြီးဘေးအန္တရာယ် ကင်းရှင်းမည်ဖြစ်ပါကြောင်းမြေနုကျွန်းများတွင်လည်း မြေပဲနှင့်နေကြာကို သီးထပ် သီးညှပ်စိုက်ပျိုးသွားမည်ဖြစ်ကြောင်း သိရှိရသည့်အတွက် ဒေသခံတောင်သူများလည်း ဝင်ငွေ တိုးပွား ပြည်တွင်းစားသုံးဆီဖူလုံရေးအတွက်လည်း အထောက်အကူပြုမည်ဖြစ်ပါကြောင်း ရေးသား တင်ပြလိုက်ရပါသည်။

DOCA(မကွေး)

         (၂၇.၉.၂၀၂၂)ရက်နေ့ နံနက်(၀၇း၀၀)နာရီမှ (၁၀း၀၀)နာရီအထိ ချောက်ခရိုင်၊ ချောက်မြို့ မြို့နယ်အားကစားကွင်းတွင် အလယ်ပိုင်းတိုင်းစစ်ဌာနချုပ် ကျောက်ပန်တောင်းတပ်နယ်မှ စားသုံးသူ ပြည်သူများအား သက်သာသောစျေးနှုန်းဖြင့် အခြေခံစားကုန်များဖြစ်သော ဆန်(၁)ပြည်( ၁၆၀၀)ကျပ် ၊ ကြက်သွန်နီ(၁)ပိဿာ (၂၈၅၀)ကျပ်၊ ကြက်ဥ(၁)လုံး (၁၅၀)ကျပ် ကြက်သား(၁)ပိဿာ (၆၅၀၀)ကျပ် ၊ အမဲသား(၁)ပိဿာ (၁၀၀၀၀)ကျပ်၊ ဝက်သား(၁)ပိဿာ (၁၀၀၀၀)ကျပ်၊ နွားနို့(၁)ဗူး (၁၂၀၀)ကျပ်၊ ဘူးသီး(၁)လုံး၊ (၅၅၀)ကျပ်၊ ကန်စွန်းရွက်(၁)စီး (၁၀၀)ကျပ်နှုန်းများဖြင့် ရောင်းချခဲ့ကြောင်းနှင့် ကုမ္ပဏီများမှ ဖြန့်ဖြူးရောင်းချသော စားသုံးဆီများအား ချောက်မြို့၊ ဆီကုန်သည်နှင့် ဆီလုပ်ငန်းရှင် များအသင်းမှ စားသုံးဆီ(၁)ပိဿာ(၅၆၀၀)ကျပ်နှုန်းဖြင့် ပြည်သူတစ်ဦးလျှင် (၁)ပိဿာနှုန်းဖြင့် ရောင်းချခဲ့ကြောင်း သိရှိရပါသည်။

     ထိုအခြေခံစားကုန် ဟင်းသီးဟင်းရွက်၊ အသား၊ အမယ်စုံနှင့်စားအုန်းဆီရောင်းချနေမှုအား စားသုံးသူရေးရာဦးစီးဌာန၊ ချောက်မြို့နယ်တာဝန်ခံ ဒေါ်မြတ်မြတ်မိုး၊ အထွေထွေအုပ်ချုပ်ရေးဦးစီးဌာန၊ ခရိုင်/ မြို့နယ်ဝန်ထမ်းများ ၊ မြို့နယ်စည်ပင်သာယာရေးအဖွဲ့မှ ဝန်ထမ်းများနှင့် လူမူရေးအသင်းအဖွဲ့များမှ ပူးပေါင်းကူညီဆောင်ရွက်ခဲ့ကြောင်း သိရှိရပါသည်။

DOCA(မကွေး)

     ကယားပြည်နယ်၊စားသုံးသူရေးရာဦးစီးဌာန၊ လွိုင်ကော်ခရိုင်ဦးစီးမှူးရုံးမှ ဝန်ထမ်းများသည် ၂၀၂၂ခုနှစ် ၊ စက်တင်ဘာလ(၂၇)ရက်နေ့၊နံနက်(၀၈:၀၀)နာရီအချိန်တွင် လွိုင်ကော်မြို့၊သီရိမင်္ဂလာ ဈေးအတွင်း ရှိအသား/ငါး/ကြက်ဥ/ဘဲဥရောင်းချနေသောဆိုင်များသို့ အသား/ ငါး / ကြက်ဥ /ဘဲဥများသန့်ရှင်း လတ်ဆက်မှုရှိ/မရှိနှင့်သန့်ရှင်းသော ရောင်းချခြင်းစနစ်ရှိ/မရှိခရိုင်ငါးလုပ်ငန်းဦးစီးဌာန၊ခရိုင်မွေးမြူရေးနှင့် ကုသရေးဦးစီးဌာန၊ မြို့နယ်စည်ပင်သာယာရေးအဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာနနှင့် မြန်မာနိုင်ငံရဲတပ်ဖွဲ့တို့ဖြင့် ပူးပေါင်း၍ကွင်းဆင်းစစ်‌ဆေးဆောင်ရွက်ခဲ့ပါသည်။  

      ထို့သို့ကွင်းဆင်းစစ်ဆေးရာတွင် ဈေးအတွင်းရှိအသား/ငါးများမှာ မျက်မြင်အခြေအနေအရ သန့်ရှင်းလတ်ဆက်မှုရှိပြီး ယင်လုံဇာများဖြင့် ဖုံးအုပ်ရောင်းချနေသည်ကို စစ်ဆေးတွေ့ရှိရပါကြောင်း၊ဒေသငါးများသာမကအခြားဒေသမှငါးများပါ မှာယူတင်သွင်းရောင်းချနေသည်ကို တွေ့ရှိရကြောင်း၊ ရောင်းချသောဈေးသည်များအနေဖြင့် အလေးချိန်မှန်ကန်စွာရောင်းချရန်လိုအပ်ကြောင်း၊ ဈေးအတွင်းသို့လာရောက်စစ်ဆေးမှသာယင်လုံဇာများဖြင့်ရောင်းချခြင်းမျိုးမပြုလုပ်ဘဲ လာရောက် စစ်ဆေးခြင်းမရှိသည့် ပုံမှန်ရက်များ၌လည်း ယင်ကောင်မလာစေရန် ဖုံးအုပ်ရောင်းချသင့်ပါကြောင်း၊ ငါးများမှာယူတင်သွင်းရာတွင် စနစ်တကျသယ်ယူပို့ဆောင်ရန်လိုအပ်ကြောင်း ၊သန့်ရှင်းလတ်ဆက်မှုမရှိသော အသား၊ငါး၊ဥများနှင့် ကူးစက်ရောဂါရနေသောအသား/ငါးများအား ရောင်းချခြင်းမပြုရန် အသား/ငါး/ကြက်ဥ/ဘဲဥများ ရောင်းချနေသောဆိုင်(၄၂)ဆိုင်အား ဝိုင်းဝန်းအသိပညာပေး စစ်ဆေး ဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

       မန္တလေးတိုင်း‌ဒေသကြီး၊ စားသုံးသူရေးရာဦးစီးဌာန ၊ မိတ္ထီလာခရိုင်ဦးစီးမှူး၏ ကြီးကြပ်မှုဖြင့် မလှိုင်မြို့နယ်တာဝန်ခံ ဦးဆောင်သော ဝန်ထမ်းများသည် ၂၀၂၂ခုနှစ် စက်တင်ဘာလ (၂၆)ရက်နေ့ ၊နံနက်(၉း၃၀)အချိန်တွင် မလှိုင်မြို့၊ အ.ထ.က ဆည်တို ကျောင်းတွင် စားသုံးသူအကာအကွယ်ပေးရေးဆိုင်ရာ  အသိပညာပေး ဟောပြောပွဲ ကျင်းပပြုလုပ်ခဲ့ပါသည်။

      ဟောပြောပွဲတွင် မလှိုင်မြို့နယ်တာဝန်ခံ ဦးရဲမြင့်ဆန်း စားသုံးသူရေးရာဦးစီးဌာနသည် ယခင်နှစ်များက  အသိပညာပေးဟောပြောပွဲများ ၊ ဈေးကွက်စောင့်ကြည့်စစ်ဆေးခြင်းများ ပြုလုပ်ခဲ့ သော်လည်း Covid-၁၉ ရောဂါကူးစက်မှု အခြေအနေများကြောင့်CICC Meiktila Facebook Pageတွင် Onlineမှ လည်းကောင်း၊ ပြန်ကြားရေးနှင့်ပြည့်သူဆက်သွယ်ရေးဦးစီးဌာနနှင့် ပူးပေါင်း၍ Talk Show အစီအစဉ်များဖြင့် လည်းကောင်း၊ စားသုံးသူအသိပညာပေးရေး လုပ်ငန်းများဆောင်ရွက်ပေးခဲ့ပါကြောင်း၊ စားသုံးသူများအနေဖြင့် မိမိတို့အခွင့်အရေးများဆုံးရှုံးနစ်နာမှုများ ဖြစ်ပေါ်လာပါက တိုင်ကြားနိုင်ပါ‌ကြောင်း၊ တိုင်ကြားမှုများကိုလည်း စားသုံးသူကာကွယ်ရေးဥပဒေနှင့်အညီ ဖြေရှင်း ဆောင်ရွက်ပေးလျှက်ရှိ ကြောင်း ဆွေးနွေးပြောကြားပေးခဲ့ပြီး ဟောပြောပွဲကိုဖွင့်လှစ်ပေးခဲ့ပါသည်။ 

   ဆက်လက်၍ မလှိုင်မြို့နယ်တာဝန်ခံမှ  စားသုံးသူကာကွယ်ရေးဥပဒေကို မြန်မာနိုင်ငံတွင် ၂၀၁၄ခုနှစ်၊မတ်လ(၁၄)ရက်နေ့တွင် စတင်ပြဌာန်းခဲ့ပြီး ၊ စားသုံးသူကာကွယ်ရေး ဥပဒေသစ်ကို ၂၀၁၉ခုနှစ်၊မတ်လ(၁၅)ရက်နေ့တွင်အခန်း(၂၅)ခန်း၊ ပုဒ်မ(၈၄)ခုပါဝင်သော ဥပဒေအသစ်ကို ပြင်ဆင် အတည်ပြုပြဌာန်းခဲ့ကြောင်း၊ စားသုံးသူများအနေဖြင့် မိမိအခွင့်အရေး များသိရှိမှသာကုန်စည်(သို့) ဝန်ဆောင်မှုများအပေါ်ဆုံးရှုံးနစ်နာမှုများ ဖြစ်ပေါ်‌လာပါကအရေးဆို တိုင်ကြားနိုင်မည်ဖြစ်ပါကြောင်း၊ အခန်း(၉)ပါစားသုံးသူအခွင့်အရေးနှင့် တာဝန်များနှင့် အခန်း(၂၄)ပါ ပြစ်မှုပြစ်ဒဏ်များကို တိုင်ကြားမှု ဥပမာများဖြင့် စားသုံးသူများသိရှိနားလည်စေရန် စားသုံးသူကာကွယ်ရေးဥပဒေပါ စားသုံးသူအခွင့် အရေး၊ လိုက်နာရမည့်တာဝန်များနှင့် ပတ်သက်၍ အကျယ် တဝင့်ဆွေးနွေးပြောကြားခဲ့ပါသည်။ ၎င်းအပြင်အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသား ပြဌာန်းချက်နှင့် ပတ်သက်၍ မြန်မာဘာသာဖြင့် ပြည့်စုံစွာဖော်ပြထားသည့် ကုန်ပစ္စည်းများကိုသာ ရွေးချယ်ဝယ်ယူအသုံးပြုသင့် ကြောင်းနှင့် ကုန်အညွှန်းအမှတ် အသားနှင့်ပတ်သက်၍ သိသင့်သိထိုက် သည့်ဗဟုသုတများကို ပြောကြားခဲ့ပြီး စားသုံးသူအခွင့်အရေး နစ်နာဆုံးရှုံးမှုများရှိပါက DOCA Applicationeနှင့် www.doca.gov.mmတွင် ဝင်ရောက် တိုင်ကြားနိုင်ကြောင်း ဆွေးနွေး ခဲ့ပါသည်။  ဟောပြောပွဲတွင် ကျောင်းသား၊ ကျောင်းသူ(၁၈၀)ဦး၊ ဆရာ/ဆရာမ(၁၅)ဦး စုစုပေါင်း(၁၉၅)ဦးတက် ရောက်ခဲ့ပြီး လက်ကမ်းစာစောင်များလည်း ဖြန့်ဝေခဲ့ပြီး ဟောပြောပွဲ နံနက်(၁၁း၀၀) နာရီတွင် ရုတ်သိမ်းခဲ့ပါသည်။  

DOCA(မန္တလေး)