သတင်းနှင့် လှုပ်ရှားမှုများ

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ပန်းတနော်မြို့နယ် တာဝန်ခံနှင့် ဝန်ထမ်းများသည် (၂၃.၉.၂၀၂၂) ရက်နေ့ နံနက် (၀၉:၀၀)နာရီအချိန် ပန်းတနော် မြို့နယ်စည်ပင်သာယာရေးအဖွဲ့နှင့်အတူ မြို့မဈေးအတွင်းရှိ ‌ရောင်းချနေသော ကုန်စည်များအား ဈေးကွက် စောင့်ကြည့် ကွင်းဆင်း စစ်ဆေးခဲ့ကြပါသည်။

     ထိုသို့ကွင်းဆင်းစစ်ဆေးဆောင်ရွက်ရာတွင် ပန်းတနော်မြို့မဈေးအတွင်း ကုန်မျိုးစုံဆိုင်တွင် ရောင်းချနေသောကုန်စည်များ၌ ကုန်အညွှန်းအမှတ်အသားပြည်စုံစွာ ပါဝင်ခြင်း ရှိ/ မရှိကို စစ်ဆေး ဆောင်ရွက်ခဲ့ကြပါသည်။

      ဆက်လက်၍ ကုန်မျိုးစုံရောင်းချသူပိုင်ရှင်များအား စားသုံးသူကာကွယ်ရေးဥပဒေ အရ ကုန်အညွှန်းအမှတ်အသားနှင့်ပတ်သက်၍ ဥပဒေနှင့်အညီလိုက်နာဆောင်ရွက်စေရေး၊ အလေး ချိန်နှင့် အရည်အသွေးမှန်ကန်စေရေး၊ ဥပဒေ၊ ညွှန်ကြားချက်များနှင့် မညီညွှတ်သော ကုန်စည်များ ရောင်းချနေခြင်း တွေ့ရှိပါက အရေးယူနိုင်ရန်အတွက် ဈေးကွက်စောင့်ကြည့် စစ်ဆေးဆောင်ရွက်ခြင်းဖြစ်ကြောင်း၊ လုပ်ငန်းရှင်၏လိုက်နာရမည့် တာဝန်များ၊ တားမြစ်ချက်များအကြောင်း ပညာပေးဆွေးနွေးခဲ့ပါသည်။ ပန်းတနော်မြို့မဈေးအတွင်းရှိ အခြေခံစားသောက်ကုန်မျိုးစုံ၊ မုန့်မျိုးစုံ၊ လူသုံးကုန်နှင့် စားသုံးဆီ နှင့်စပ်လျဉ်း၍ ဈေးကွက်စောင့်ကြည့်စစ်ဆေးဆောင်ရွက် တွေ့ရှိချက်အရ ကုန်အညွှန်းအမှတ်အသား ပြည်စုံစွာပါဝင် ဖော်ပြချက်များပါရှိသည်ကို စစ်ဆေး တွေ့ရှိခဲ့ကြောင်း သတင်းရရှိပါသည်။

DOCA(ဧရာဝတီ)

       ကယားပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူးသည် ၂၀၂၂ ခုနှစ်၊ စက်တင် ဘာလ( ၁၉ ) ရက်နေ့ နံနက်(၁၀ :၀၀)နာရီအချိန်တွင် ပြည်နယ်အတွင်းမှ ဆန်တင်ပို့မှု၊ တင်သွင်းမှု အခြေအနေများနှင့် စပ်လျဉ်း၍ ပြည်နယ်ဆန်စပါးလုပ်ငန်းရှင်များအသင်းနှင့် တွေ့ဆုံဆွေးနွေး ပွဲတွင် အသင်းဥက္ကဌ၊ ဒု-ဥက္ကဌ ၊ အဖွဲ့ဝင်များ စုစုပေါင်း (၇)ဦးတက်ရောက်ခဲ့ပါတယ်။ 

 အဆိုပါ တွေ့ဆုံဆွေးနွေးရာတွင် ပြည်နယ်ဦးစီးမှူးက ယခုနှစ် စပါးစိုက်ပျိုးမှု၊ ထွက်ရှိမှု အခြေ အနေများ၊ ဒေသထွက်ဆန်အား  ဆန် တင်ပို့နိုင်မှုအခြေအနေများအားလည်းကောင်း၊ အခြားမြို့များမှ ပြည်နယ်အတွင်းသို့ ဆန်တင်သွင်းမှုအခြေအနေများအားလည်းကောင်း၊ ဈေးကွက်အတွင်း၌ ဖြစ်ပေါ် နေသောဈေးနှုန်း/ ဈေးကွက်အခြေအနေများအားလည်းကောင်း၊ ဆန်များ တင်သွင်းရာတွင် ပြည်နယ် အစိုးရအဖွဲ့မှ ညွှန်ကြားထားသည့်အတိုင်း လိုက်နာဆောင်ရွက်ကြရန်နှင့်  သယ်ဆောင်ခွင့် ခွင့်ပြုချက် ရရှိမှသာလျှင် ဆန်များသယ်ဆောင်သင့်ကြောင်းကို ဆွေးနွေးခဲ့ပါသည်။

     ဆန်စပါးလုပ်ငန်းရှင်များ အသင်းအနေဖြင့်လည်း မိမိတို့အနေဖြင့် ဒေသထွက်ဆန်တင်ပို့ရာတွင် မန္တလေးမြို့သို့ အဓိကထား တင်ပို့ရပါကြောင်း၊ ဒေသအခြေအနေအရ အချို့ဆန်စက်များအနေဖြင့် လည်ပတ်မှုမရှိဘဲ ရပ်တန့်ထားရှိရပါကြောင်း၊ အသီးသီးဆွေးနွေးတင်ပြခဲ့ကြပြီး သိရှိလိုသည့် အချက် များအား အသင်းသားများမှ မေးမြန်းခဲ့ရာ ပြည်နယ်ဦးစီးမှူးအနေဖြင့် ပြန်လည် ဆွေးနွေးခဲ့ပါကြောင်း သိရှိရပါတယ်။

DOCA(ကယား)

      မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်မြို့နယ် တာဝန်ခံနှင့် ဝန်ထမ်းများသည် ၂၂.၉.၂၀၂၂ ရက်နေ့တွင် မွန်ပြည်နယ်အစားအသောက်နှင့် ဆေးဝါးကွပ်ကဲရေးဦးစီးဌာန မြို့နယ် အကောက်ခွန်ဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ် စည်ပင်သာယာရေးအဖွဲ့၊ မြို့နယ် အထွေ ထွေအုပ်ချုပ်ရေးဦးစီးဌာနတို့  ပါဝင်သောပူးပေါင်း အဖွဲ့ဖြင့် မော်လမြိုင်မြို့ပေါ်ရှိ ဈေးဆိုင်/စတိုးဆိုင်များတွင် Pepsi (No Sugar)-(245 ml/Can)၊ Pepsi (No Sugar lime Flavour) – (325 ml/Can) Pepsi (ကြက်ကြော်တုံးပုံ)- (325 ml/Can) နှင့် Pepsi (ဂဏန်းနှစ်ကောင်ပုံ) (325 ml/Can) တို့အား ဈေးကွက်စောင့်ကြည့်စစ်ဆေးခြင်း ဆောင်ရွက် ခဲ့ပါသည်။

     ထိုသို့ စောင့်ကြည့်စစ်ဆေးရာ ဈေးကွက်အတွင်း Pepsi (No Sugar)-(245 ml/Can) (၄)လုံး၊ Pepsi (No Sugar lime Flavour) (၃)လုံး၊ Pepsi (ကြက်ကြော်တုံးပုံ) (325 ml/Can) (၂)လုံးအား စစ်ဆေးတွေ့ရှိရသဖြင့် ဆိုင်ပိုင်ရှင်အား အဆိုပါပစ္စည်းများမှာ အစားအသောက်နှင့်ဆေးဝါး ကွပ်ကဲရေးဦးစီးဌာန၏ ထောက်ခံချက်မပါရှိခြင်းကြောင့် ဆက်လက်ရောင်းချခြင်းမပြုရန် ခံဝန်ကတိ လက်မှတ်ရေးထိုးစေခဲ့ပြီး သက်ဆိုင်ရာဌာနများမှ မိမိတို့၏ လုပ်ထုံးလုပ်နည်းများကို ရှင်းလင်း ဆွေးနွေးခဲ့ကြကြောင်း သတင်းရရှိပါသည်။

DOCA(မွန်)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ခရိုင်ဦးစီးမှူးရုံး၊ ဓနုဖြူမြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည်  မိတ်ဖက်အဖွဲ့အစည်းများဖြစ်သော ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အားကစားနှင့် ကာယပညာဦးစီးဌာန၊ တိုင်းရင်းဆေးဦးစီးဌာနတို့ ပူးပေါင်း၍ (၂၀.၉.၂၀၂၂)နေ့လယ် (၁၃:၀၀) နာရီမှ (၁၄:၃၀) နာရီတွင် ဓနုဖြူမြို့ ပြင်ကသာ အ.ထ.ကကျောင်းသို့သွားရောက်၍ သက်ဆိုင်ရာဌာနများ၏ နှင့်အတူ အသိပညာပေးဟောပြောပွဲကို ပူးပေါင်းဆောင်ရွက်ခဲ့ပါသည်။

    အဆိုပါ အခမ်းအနားတွင် ဓနုဖြူမြို့ ပြင်ကသာ အ.ထ.က ကျောင်းအုပ်ဆရာကြီးမှ အဖွင့်အမှာ စကားပြောကြားပြီး စားသုံးသူရေးရာဦးစီးဌာန၊ ဓနုဖြူမြို့နယ်ဦးစီးမှူး ဦးဝင်းမင်းစိုးက စားသုံးသူကာ ကွယ်ရေးဥပဒေပါ စားသုံးသူအခွင့်အရေးများ၊ လေးစားလိုက်နာရမည့် တာဝန်များ၊ စီးပွားရေး လုပ်ငန်း ရှင်၏တာဝန်များ၊ ကုန်စည်နှင့် စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့် အခွင့်အရေးအကြောင်း၊ ဈေးကွက်အတွင်းရှိ ကုန်စည်နှင့်ဝန်ဆောင်မှုများကို ဘေးအန္တရာယ်ကင်း ရှင်းစွာရွေးချယ်ဝယ်ယူတက်စေရန်နှင့် ကုန်အညွှန်းအမှတ်အသား ဖော်ပြချက်အကြောင်း၊ စားသုံးသူများ အမှန်တကယ် နစ်နာဆုံးရှုံမှ ဖြစ်ပေါ်လာပါက စားသုံးသူရေးရာဦးစီးဌာနသို့ တိုင်ကြားနိုင်သည့် နည်းလမ်းများ အကြောင်း၊ လုပ်ငန်းရှင်နှင့် စားသုံးသူအကြား စားသုံးသူနစ်နာဆုံးရှုံးမှု ဖြစ်ပွားခဲ့ဖူးသော အငြင်းပွားမှုကိစ္စရပ်များကို ဥပမာပေးရှင်းလင်းပြီး တိုင်းကြားခြင်းနှင့် စိစပ်ညှိနှိုင်းဖြေရှင်းဆောင် ရွက်ခြင်းအကြောင်း၊  ပြစ်မှု၊ ပြစ်ဒဏ်များအကြောင်းကိုရှင်းလင်းဟောပြောခဲ့ပါသည်။

    ဆက်လက်၍ ပြန်ကြားရေးနှင့် ပြည်သူ့ဆက်ဆံရေးဦးစီးဌာန က လူကုန်ကူးမှုတိုက်ဖျက်ရေး အသိပညာပေးခြင်းအကြောင်း နှင့် အားကစားနှင့်ကာယပညာဦးစီးဌာနက လူငယ်နှင့် အားကစား ဗဟုသုတအကြောင်း၊ တိုင်းရင်းဆေးဦးစီးဌာနမှ ကျန်းမာရေးသိကောင်းစရာများကို ဟောပြော ဆွေးနွေး၍ တက်ရောက်သူ ဆရာ/ဆရာမနှင့် ကျောင်းသား/ ကျောင်းသူ (၁၇၈) ဦးတို့သည် ကျန်းမာရေး လေ့ကျင့်ခန်းများ ပြုလုပ်ဆောင်ရွက်ခဲ့ကြပြီး ကျောင်းမုန့်ဈေးတန်းရှိ ရောင်းချနေသော မုန့်များအား ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရသော မုန့်များကုန်အညွှန်း အမှတ်အသားပြည့်စုံစွာ ပါဝင်မှု ရှိ/မရှိ စစ်ဆေးခဲ့ပြီး၊ မုန့်ဆိုင် (6)ဆိုင်တွင် ရောင်းချနေသောမုန့်များတွင် ဘေးအန္တရာယ်ရှိသော ဆိုးဆေးပါဝင်သော မုန့်များကိုမရောင်းချရန်၊ ကုန်အညွှန်းအမှတ်အသား မပါဝင်သော မုန့်များကို မရောင်းချရန်၊လက်လုပ်မုန့်များကို သန့်ရှင်းစွာ လက်အိတ်များဖြင့် ရောင်းချရန်၊ မြန်မာမုန့်များကို ခြင်၊ ယင် မနားအောင် ဇကာ၊ အုပ်ဆောင်းများဖြင့် ဖုံးအုပ်ထားပြီး ရောင်းချရန် မုန့်ရောင်းချသူများ တစ်ကိုယ်ရည်သန့်ရှင်းရေးကို အထူးဂရုပြုရန် စားသုံးသူ၊ လုပ်ငန်းရှင်၊ အစိုးရဌာနများ ပူးပေါင်းမှ ဘေးအန္တရာယ်ကင်းသော လူမှုပတ်ဝန်းကျင်တွင် အနာဂါတ်လူငယ်များ ကျန်းမာပျော်ရွှင်စွာနေ ထိုင်ကြရမည်ဖြစ်ကြောင်း အသိပညာပေးစစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ခရိုင်ဦးစီးမှူးရုံး၊ ဓနုဖြူမြို့နယ်တာဝန်ခံသည် မိတ်ဖက်အဖွဲ့အစည်းများဖြစ်သော ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ အားကစားနှင့် ကာယပညာဦးစီးဌာန၊ တိုင်းရင်းဆေးဦးစီးဌာနတို့ ပူးပေါင်း၍ (၂၀.၉.၂၀၂၂)နေ့လယ် (၁၁:၄၀) နာရီမှ (၁၂:၁၅) နာရီအထိ ဓနုဖြူမြို့နယ်ရှိ စာသင်ကျောင်းမုန့်ဈေးတန်းများအား ကွင်းဆင်းစစ်ဆေးခဲ့ကြပါသည်။

     ကျောင်းမုန့်ဈေးတန်းတွင် ကျောင်းချနေသော မုန့်များတွင် ကုန်အညွှန်းအမှတ်အသားပြည့်စုံစွာ ပါဝင်မှု ရှိမရှိ ဈေးကွက်စောင့်ကြည့်စစ်ဆေးခဲ့ကြပြီး၊ မုန့်ဈေးတန်းရှိ မုန့်ဆိုင်(၆)ဆိုင်မှ ရောင်းချသူများ အား မိမိတို့ရောင်းချနေသောမုန့်များတွင် ကုန်အညွှန်းအမှတ်အသားပြည့်စုံစွာပါဝင်သော မုန့်များ ထုတ်လုပ်ရက်စွဲ၊ ကုန်ဆုံးရက်စွဲပါဝင်စေရေး၊ စားသုံးရန်မသင့်သော ဆိုးဆေးပါဝင်သော မုန့်များကို ရောင်းချခြင်းမပြုရန်နှင့် မုန့်ရောင်းချသူများ ကျန်းမာရေးစစ်ဆေးမှုပြုလုပ်ရန်၊ တစ်ကိုယ်ရည် သန့်ရှင်းမှုရှိစေရေး အထူးဂရုပြရန်၊ လက်သုပ်မုန့်များကို လက်အိပ်စွပ်ရောင်းချရန်၊ ခြင်၊ ယင် မနားအောင် အုတ်ဆောင်း၊ ဇကာ၊ အဖုံးများဖြင့် စနစ်တကျရောင်းချရန် ၊ FDAဌာနမှ ထုတ်ပြန်ထားသော စားသုံးရန်မသင့်သည့် ကုန်စည်များကိုလည်း လေ့လာမှတ်သားပြီး ရောင်းချခွင့် မပြုကြရန် စားသုံးသူ၊ လုပ်ငန်းရှင်၊ အစိုးရဌာနများ ပူးပေါင်းမှ ဘေးအန္တရာယ်ကင်းသော လူမှုပတ်ဝန်းကျင်တွင် အနာဂတ် လူငယ်များကျန်းမာပျော်ရွှင်စွာ နေထိုင်ကြရမည်ဖြစ်ကြောင်းကို အသိပညာပေး စစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)