ပန်းတနော်ဆန်ရောင်းချသည့် ဆန်ဆိုင်များ၏ ဆန်ဈေးကွက်ဖြစ်ပေါ်မှုအခြေအနေအား ကွင်းဆင်းစစ်ဆေး
ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်အတွင်း ဆန်ပြတ်လပ်မှုရှိ/မရှိနှင့် စားသုံးသူပြည်သူများ ဈေးနှုန်းသက်သာစွာဝယ်ယူနိုင်ရေး ဆန်ဆိုင်နှင့် ဆန်သိုလှောင်ရုံများကို (၄-၉-၂၀၂၄)ရက်နေ့၊ နံနက်(၁၀း၀၀)နာရီအချိန်တွင် ဆန်အရောင်း ဆိုင် (၁၀)ဆိုင်သို့ သွားရောက်ကွင်းဆင်းကြည့်ရှုစစ်ဆေးခဲ့သည်။
ထိုသို့ကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ ဦးအောင်ကျော်သက်နှင့် စစ်ဆေးရေးအဖွဲ့က ပန်းတနော်မြို့ဆန်ဆိုင်မှရောင်းချသော ဆန်တစ်အိတ်ဈေးနှုန်းနှင့် တစ်ပြည်ဈေးနှုန်းကိုမေးမြန်းစစ်ဆေးခြင်း၊ ဆန်သိုလှောင်ထားရှိမှုအခြေအနေများကိုစစ်ဆေးခြင်း၊ ဆန်သိုလှောင်မှုကို စနစ်တကျမှတ်ပုံတင်ထားရှိမှုကို စစ်ဆေးခြင်းများပြုလုပ်ခဲ့ကြပါသည်။
ပန်းတနော်မြို့နယ်တွင် ဆန်များပြတ်လပ်မှုမရှိဘဲ သင့်တင်မျှတသော တည်ငြိမ်သောဆန်ဈေးကွက်ဈေးနှုန်းဖြင့် ပြည်သူများအား ရောင်းချနေကြောင်း၊ တချို့သော ဆန်သိုလှောင်ထားသောဆန်ဆိုင်များမှာ မှတ်ပုံတင် Online Registration စနစ် (MyRO) တွင် မှတ်ပုံတင်ထားပြီးဖြစ်ကြောင်း၊ ဆန်ဆိုင်တို့တွင်ရောင်းချနေသော ဆန်အမျိုးအစားအလိုက် ဈေးနှုန်းများ၊ ဆန်ဝယ်ယူရရှိမှုခြေအနေများ၊ သိုလှောင်ထားရှိသောဆန်အိတ်အရေအတွက်များ၊ နေ့စဉ်ရောင်းချမှုအခြေအနေများ၊ ဈေးနှုန်းကပ်၍ ရောင်းချနေမှုကိုစစ်ဆေးတွေ့ရှိရပြီး အဆိုပါစစ်ဆေးမှုတွင် ပန်းတနော်မြို့နယ်၊ အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြန်မာနိုင်ငံရဲတပ်ဖွဲ၊ ပန်းတနော်ဆန်စက်နှင့် ဆန်ကုန်သည်များအသင်းမှ အဖွဲ့ဝင်များ၊ ကုန်ဈေးနှုန်းတည်ငြိမ်ကျဆင်းရေးအဖွဲ့ဝင်များ ပူးပေါင်းပါဝင်စစ်ဆေးခဲ့ကြောင်းသိရှိရပါသည်။
DOCA(ဧရာဝတီ)
