သတင်းနှင့် လှုပ်ရှားမှုများ

     ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ညောင်လေးပင်ခရိုင်ဦးစီးမှူးရုံးအနေဖြင့်   ကုန်ဈေးနှုန်းတည်ငြိမ်ရေးလုပ်ငန်းများ၊ စားသုံးသူကာကွယ်ရေးလုပ်ငန်းများကို  အားတက် သရောဆောင်ရွက်လျက်ရှိရာ ၁၀.၁၂.၂၀၂၅ ရက်နေ့တွင် ညောင်လေးပင်ခရိုင်ဦးစီးမှူးရုံးမှ အငယ်တန်းစာရေး ဦးနေမျိုးဝင်းသည် ပြွန်တန်ဆာမြို့၊ အမှတ် (၂) အခြေခံပညာ အထက်တန်းကျောင်း၌ ကျင်းပသော လူငယ်စကားဝိုင်း၌ စားသုံးသူကာကွယ်ရေး အသိပညာပေး ဟောပြောခဲ့ကြောင်း သတင်းရရှိပါသည်။

      အငယ်တန်းစာရေး ဦးနေမျိုးဝင်းသည် မိတ်ဖက်ဌာနဖြစ်သော ပြန်ကြားရေးနှင့် ပြည်သူ့ ဆက်ဆံရေးဦးစီးဌာနနှင့်အတူ လူငယ်စကားဝိုင်း၌ ကျောင်းသား၊ ကျောင်းသူများအား စားသုံးသူ ကာကွယ်ရေး ဥပဒေပါ အချက်အလက်များအကြောင်း၊ စားသုံးသူ အခွင့်အရေး (၈)ချက်၊ စားသုံးသူ ပြည်သူများ၏ အခွင့်အရေးနှင့် တာဝန်များ၊ စီးပွားရေးလုပ်ငန်းရှင်များ၏ တာဝန်များ၊ ကုန်အညွှန်းအမှတ်အသား ဖော်ပြချက်နှင့်စပ်လျဉ်း၍ သိကောင်းစရာများကို ဟောပြောခဲ့ ပါသည်။ အဆိုပါ လူငယ်စကားဝိုင်းသို့ ဆရာ/ ဆရာမ ၁၅ဦး နှင့် ကျောင်းသား/ ကျောင်းသူ ၅၀၀ဦး တက်ရောက် နားထောင်ခဲ့ကြောင်း သတင်းရရှိပါသည်။

DOCA(ပဲခူး)

    စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ရေတာရှည်မြို့နယ် တာဝန်ခံဦးဇော်ဇော်ထွေး နှင့် ဝန်ထမ်း(၁)ဦးသည် ဒီဇင်ဘာလ ၁၅  ရက်နေ့ နံနက်ပိုင်းတွင် ရေတာရှည်မြို့နယ်၊ မြို့လှ ဈေးအတွင်းရှိ ကုန်စုံဆိုင်များတွင် မြို့လှမြို့ပေါ်ရပ်ကွက်နေ ပြည်သူများကိုလည်းကောင်း၊ ငါးကြီးကွေ့ ကျေးရွာအုပ်စု၊ ထောက်ကြံကွင်းကျေးရွာနေပြည်သူများအား စားအုန်းဆီ ဆီဝယ်ယူခွင့် စာအုပ်ဖြင့် ဖြန့်ဖြူးရောင်းချနေမှုအား မြေပြင်ကွင်းဆင်းစစ်ဆေးခြင်းကို ဆောင်ရွက်ခဲ့ပါသည်။

       ကွင်းဆင်းစစ်ဆေးရာတွင် မြို့နယ်တာဝန်ခံ ဦးဇော်ဇော်ထွေးက အဆိုပါကျေးရွာ/ ရပ်ကွက် နေပြည်သူများ၏ အိမ်ထောင်စုများအား ဆီဝယ်ယူခွင့်စာအုပ်ဖြင့် ရောင်းချနေမှုကို သတ်မှတ်ရည်ညွှန်း ဈေးဖြင့်ရောင်းချရန်၊ ခွဲတမ်းရရှိထားသော စားအုန်းဆီရောင်းချရာတွင် အများပြည်သူများမြင်သာအောင် ဈေးနှုန်းဗွီနိုင်းချိတ်ဆွဲထားရန်၊ အလေးချိန်ပြည့်ဝမှန်ကန်စွာ ရောင်းချရန်၊ ဈေးနှုန်း မြှင့်တင် ရောင်းချခြင်းများမရှိစေရန်၊ ဈေးကစားရန် ရည်ရွယ်ချက်ဖြင့် သိုလှောင်ထားခြင်းများ မပြုရန် နှင့် အိမ်ထောင်စုများအား ဖြန့်ဖြူးရောင်းချနေသော စားအုန်းဆီများ အရည်အသွေးတို့အား ကွင်းဆင်းစစ်‌ဆေးခဲ့ပါ သည်။

          အထက်ပါစည်းကမ်းချက်များနှင့် မှန်ကန်မှု မရှိပါက အရေးကြီးကုန်စည်နှင့် ဝန်ဆောင်မှု ဥပဒေ အရ အရေးယူဆောင်ရွက်သွားမည်ဖြစ်ကြောင်း ရေတာရှည်မြို့နယ်၊ မြို့လှဈေးအတွင်းရှိ လက်လီ/လက်ကား ဖြန့်ဖြူးရောင်းချသည့် ဆီဆိုင်ပိုင်ရှင်များအား အသိပေးဆွေးနွေး ပြောကြားခဲ့ပါသည်။

DOCA(ပဲခူး)

       စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံသည် မြို့နယ်စည်ပင်သာယာရေး အဖွဲ့နှင့် မွေးမြူရေးနှင့်ကုသရေးဦးစီးဌာနတို့နှင့်အတူ ဈေးကွက်အတွင်း ရောင်းချနေသော ကုန်စည် များဝယ်ယူ သုံးစွဲရာတွင် စားသုံးသူနစ်နာဆုံးရှုံးမှုများ မဖြစ်စေရေးအတွက် ကုန်ဈေးနှုန်းတည်ငြိမ်ရေး ကုန်စည်များ အလေးချိန်မှန်ကန်မှုရှိစေရန် ဒီဇင်ဘာလ ၁၅  ရက်နေ့ နံနက်ပိုင်းတွင် စားသုံးသူ ရေးရာဦးစီးဌာန၊ မြို့နယ်တာဝန်ခံဦးဆောင်၍ ကွင်းဆင်းဆောင်ရွက်ခဲ့ပါသည်။

          အဆိုပါအဖွဲ့သည် တောင်ငူမြို့ရှိ မြို့မဈေးကြီး နှင့် ဘုရင့်နောင်ဈေးတွင် ရောင်းချလျှက်ရှိ သော အခြေခံစားသောက်ကုန်ဆိုင်များ၊ဝက်သားဆိုင်၊ ဆိတ်သားဆိုင် နှင့် ကြက်သားဆိုင်များသို့ မြို့နယ် စည်ပင်သာယာရေး အဖွဲ့မှ သတ်မှတ်ထားသော ဈေးနှုန်းများအတိုင်း ပြည်သူများသို့ ရောင်းချပေးခြင်း ရှိ/မရှိကို ကွင်းဆင်း စစ်ဆေးခဲ့ပါသည်။

တာဝန်ရှိသူများ ကွင်းဆင်းစစ်ဆေးရာတွင် ကုန်စည်များ ဈေးနှုန်းအဆမတန်ကြီးမြင့်မှုများ မဖြစ်ပေါ်စေရေးအတွက် ဈေးနှုန်းမြှင့်တင်ဖြန့်ဖြူးခြင်းများမပြုရန် နှင့် သင့်တင့်မျှတသော ဈေးနှုန်း များဖြင့်ရောင်းဝယ်မှုပြုကြရန်၊ မူလလေလံဆွဲစဉ်က လေလံဈေးနှုန်းအတိုင်းသာရောင်းချရန်၊ ဈေးနှုန်း မြှင့်တင်ရောင်းချပါက စည်ပင်ဥပဒေအတိုင်း အရေးယူဆောင်ရွက်သွားမည်ဖြစ်ကြောင်း နှင့် ကွင်းဆင်း စစ်ဆေးခြင်းများကိုလည်း စဉ်ဆက်မပြတ် ဆောင်ရွက်သွားမည်ဖြစ်ကြောင်းကို ဆိုင်ပိုင်ရှင်များအား အသိပေး ပြောကြားခဲ့ပါသည်။

DOCA(ပဲခူး)

    မြန်မာဆန်စပါးအွန်လိုင်း (MyRO)ကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာန စားသုံးသူရေးရာဦးစီးဌာနနှင့် မြန်မာနိုင်ငံဆန်စပါးအသင်းချုပ်တို့ ပူးပေါင်းဆောင်ရွက်လျက်ရှိပြီး (My RO)တွင် မှတ်ပုံတင်သက်တမ်း တစ်နှစ်ပြည့်မြောက်ပြီးသော သိုလှောင်ရုံများ သက်တမ်းပြန်လည် တိုးနိုင်ရေးနှင့် www.myro.com.mm တွင် လစဉ် လဆန်း(၁)ရက်နေ့မှ (၇)ရက်နေ့အတွင်း လုပ်ငန်း ရှင်များအနေဖြင့် မိမိတို့သိုလှောင်ရုံများ၏ ကုန်ရ၊ ကုန်ထုတ်၊ ကုန်လက်ကျန်များကို ဖြည့်သွင်းနိုင်ရေး ပခုက္ကူခရိုင်ဦးစီးမှူးရုံးအနေဖြင့် တွန်းအားပေး ဆောင်ရွက်လျက်ရှိပါသည်။

          မကွေးတိုင်းဒေသကြီး၊ ပခုက္ကူခရိုင်တွင် လက်ရှိအချိန်ထိ (MyRO) တွင် မှတ်ပုံတင်ထားသော ဆန်သိုလှောင်ရုံ (၄၉)လုံးရှိပြီး (၃၂)လုံးသည် တစ်နှစ်ပြည့်မြောက်၍ သက်တမ်းတိုး ဆောင်ရွက်ပြီး ကြောင်း၊ ကျန်ရှိသော သိုလှောင်ရုံများကို တစ်နှစ်ပြည့်မြောက်လျှင် သက်တမ်းတိုး ဆောင်ရွက် နိုင်ရေး အကြောင်းကြားထားပြီးဖြစ်ကြောင်း၊ လစဉ် လဆန်း(၁)ရက်နေ့မှ (၇)ရက်နေ့အတွင်း သိုလှောင်ရုံ များ၏ ကုန်ရ၊ ကုန်ထုတ်၊ ကုန်လက်ကျန်များအား မပျက်မကွက် မှန်ကန်စွာ ဖြည့်သွင်းရန်နှင့် မြေပြင် လက်ကျန်နှင့် ကိုက်ညီမှုရှိရန်လိုအပ်ကြောင်း၊ နည်းပညာအခက်အခဲရှိသော ဆန်လုပ်ငန်းရှင်များအနေဖြင့် ခရိုင်ဦးစီး မှူးရုံးသို့လာရောက်၍ လချုပ် ဆန်လက်ကျန်စာရင်းများ ပေးပို့ရန် လိုအပ်ပြီး ရ၊ ထုတ်၊ ကျန် စာရင်းများ (MyRO) တွင် လစဉ် ဖြည့်သွင်းပေးလျက်ရှိကြောင်း၊ ဆန်ကုန်သည်များ Group တွင် အသိပေး အကြောင်းကြားပြီး ဖြစ်ကြောင်း သတင်းရရှိပါသည်။

DOCA(မကွေး)

      ၂၀၂၅-၂၀၂၆ခုနှစ် ပဲရာသီတွင် ဥရောပသမဂ္ဂနိုင်ငံများသို့ ပဲပင်ပေါက်ဖောက်ရန်အတွက် မြန်မာ့ပဲများတင်ပို့နိုင်ရေးတောင်သူနည်းပညာပေး သင်တန်းသို့ ပဲခူးတိုင်းဒေသကြီး၊ စားသုံးသူရေး ရာဦးစီးဌာနနှင့် စိုက်ပျိုးရေးဦးစီးဌာနတို့ ပူးပေါင်းစီစဥ်မှုဖြင့် (၁၆.၁၂.၂၀၂၅)ရက်နေ့၊ နံနက်(၉:၀၀) နာရီအချိန်တွင် ပဲခူးခရိုင်၊ ကဝမြို့နယ် ၊ အုန်းနှဲကျေးရွာရှိ ဇွဲလင်းအထွေထွေရောင်းဝယ်ရေးခန်းမ၌ EUသို့Bean Sprouting အတွက် မြန်မာပဲများတင်ပို့ရာတွင် EUနိုင်ငံများမှ သတ်မှတ်ချက်စံချိန်၊ စံညွှန်းအရည်အသွေးများ ကိုက်ညီစေရေး၊ သီးနှံအရည်အသွေးမြင့်မားစေရေးတို့အတွက် ကောင်းမွန် သောစိုက်ပျိုးနည်းစနစ်ဖြင့် စိုက်ပျိုးနိုင်ပြီး ပိုးသတ်ဆေးဓာတ်ကြွင်းကင်းစင်စေရေးအတွက် တောင်သူနည်းပညာပေးသင်တန်းပြုလုပ်ခဲ့ရာ သင်တန်းဖွင့်ပွဲကို စားသုံးသူရေးရာဦးစီးဌာန၊ စိုက်ပျိုး ရေးဦးစီးဌာန၊ ကြေးတိုင်နှင့်မြေစာရင်းဦးစီးဌာန၊ သမဝါယမဦးစီးဌာန၊ စက်မှုလယ်ယာဦးစီးဌာနနှင့် မြန်မာ့လယ်ယာဖွံ့ဖြိုးရေးဘဏ်တို့မှ ဌာနဆိုင်ရာအကြီးအကဲများ တက်ရောက်ခဲ့ကြပြီး ကဝမြို့ နယ်ကျေးရွာ(၃၂)ရွာမှ ပဲတီစိမ်းစိုက်တောင်သူ(၁၉၀)ဦးတက်ရောက်ခဲ့ပါသည်။

          အဆိုပါ တောင်သူအသိပညာပေးသင်တန်းသို့  ပဲခူးတိုင်းဒေသကြီး၊ စားသုံးသူ ရေးရာဦးစီးဌာန တိုင်းဒေသကြီးဦးစီးမှူးမှ တက်ရောက်အဖွင့်အမှာစကားပြောကြားရာတွင် တောင်သူအသိပညာပေး သင်တန်းဖွင့်လှစ်ရခြင်း၏ ရည်ရွယ်ချက်အား ရှင်းလင်းဆွေးနွေးခဲ့ပြီး EUနိုင်ငံများသို့ မြန်မာ့ပဲ များတင်ပို့ရာတွင် မြန်မာ့ပဲများ ပြည်ပစျေးကွက်ခိုင်မာမှုရှိစေရေး၊ EUနိုင်ငံများ၏ သတ်မှတ်ချက် စံချိန်စံညွှန်း အရည်အသွေးများ အတိုင်းတင်ပို့နိုင်ရေး၊ ပဲခူးတိုင်းဒေသကြီး ကဝမြို့နယ်မှ ပဲတီစိမ်း များကို EUနိုင်ငံသို့ တင်ပို့ရန် အတွက်ဝယ်ယူမည့်ကုမ္ပဏီအလိုက် ဝယ်ယူမည့်အခြေအနေများအား ရှင်းလင်းပြောကြားပြီး စိုက်ပျိုးရေးဦးစီးဌာနကျွမ်းကျင်ပညာရှင်တစ်ဦးဖြစ်သော Drဒေါ်ခင်မာလာမြင့် မှပဲတီစိမ်း၊ မတ်ပဲများဖျက်ပိုးဘက်စုံ ကာကွယ်နှိမ်နှင်းနည်းများနှင့် ပိုးသတ်ဆေးဓာတ်ကြွင်း ကင်းစင် ရေးနည်းလမ်းများကိုလည်းကောင်း၊ Drဒေါ်ခင်အေးပွင့်ခိုင်မှ ပဲတီစိမ်းသီးနှံများကို ပန်းတိုင်အထွက် နှုန်းရရှိစေရေးအတွက်  ဘက်စုံပေါင်းကာကွယ်နှိမ်နှင်းနည်းများနှင့် ပေါင်းသတ်ဆေး ဓာတ်ကြွင်း ကင်းစင်ရေးကိုလည်းကောင်း၊ ဒေါ်အေးအေးမြင့် (လက်ထောက်ညွှန်ကြားရေးမှူး)မှ ဘက်စုံသီးနှံ ကာကွယ်နှိမ်နှင်းနည်းများ ၊ PMနှင့်ပိုးသတ်ဆေးဓာတ်ကြွင်းလျော့ချမည့် နည်းလမ်းများကို လည်းကောင်း၊ ဒေါ်ကြည်ဆန်း(ဦးစီးအရာရှိ)မှ ပဲတီစိမ်းသီးနှံ GAPစိုက်ပျိုးရေးနည်းစနစ် နည်းလမ်းများကို လည်းကောင်း သင်တန်းပို့ချခဲ့ကြောင်း သိရှိရပါသည်။

DOCA(ပဲခူး)