သတင်းနှင့် လှုပ်ရှားမှုများ

             ကျောက်ဆည်ခရိုင်စားသုံးသူရေးရာဦးစီးဌာနမှ အောက်တိုဘာလ(၂၈)ရက်နေ့တွင် ကျောက်ဆည်မြို့၊ မြန်မာ့ဆက်သွယ်ရေးလုပ်ငန်း ၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ကျောက်ဆည်မြို့ရှိ Ocean Wave အင်တာနက်ဆက်သွယ်ရေးဝန်ဆောင်မှုလုပ်ငန်းအား သွားရောက်ပြီး တာဝန်ခံနှင့် တွေ့ဆုံကာ အင်တာနက်ဆက်သွယ်ရေး ဝန်ဆောင်မှုပတ်သက်သည့် အချက်များအား ဆွေးနွေး ပြောကြားခဲ့ပါသည်။ ကျောက်ဆည်ခရိုင်၊စားသုံးသူရေးရာ ဦးစီးဌာနမှ ဦး‌စိုးမင်းထွန်း(ဒု-ဦးစီးမှူး)က ရှင်းလင်းပြောကြားရာတွင် စားသုံးသူအခွင့်အရေး များ၊ စီးပွားရေးလုပ်ငန်းရှင်၏ တာဝန်များ ၊ ဝန်ဆောင်မှုနှင့်စပ်လျဉ်း၍ အာမခံချက်ပေးရမည့်အချက်များ၊ ကုန်စည်နှင့်စပ်လျဉ်း၍ အာမခံချက်ပေးရမည့်အချက်များစသည့်စားသုံးသူ ကာကွယ်ရေးဥပဒေပါ အချက်မျာအား လိုက်နာရန် လိုအပ်ကြောင်း၊ နည်းပညာခေတ်တွင် အင်တာနက်သည် ပညာရေး ၊ စီးပွားရေးနှင့်ဆက်သွယ်ရေး ကဏ္ဍအားလုံးအတွက်အရေးကြီးဆုံးသော အင်တာနက်ဝန်ဆောင်မှု တစ်ရပ်အနေဖြင့်ပါဝင်ပါကြောင်း၊ စားသုံးသူများ၏ နေ့စဉ် လူမှုဘဝကိစ္စရပ်များ အဆင်ပြေချောမွေ့ စေရေး ၊ အင်တာနက်လိုင်းများ မကြာခဏပြတ်တောက်ခြင်းများ ၊ အင်တာနက်သုံးစွဲမှုနှင့် ပတ်သက်၍ သက်ဆိုင်ရာ ကုမ္ပဏီများသို့ သုံးစွဲသူပြည်သူများမှ အကြိမ်ကြိမ်ဆက်သွယ်ပြောဆိုခဲ့ သော်လည်း စားသုံးသူများ စိတ်ကျေနပ်မှု ရရှိအောင်ဆောင်ရွက်ပေးနိုင်မှုမရှိခြင်း ကိစ္စရပ်များ မဖြစ် ပေါ်စေရန်လိုအပ်ကြောင်း ၊ ဆက်သွယ်ရေး ကုမ္ပဏီများကပေးအပ်သည့် အင်တာနက်ဝန်ဆောင်မှု များနှင့် ပတ်သက်၍ လိုအပ်သော သတင်းအချက်အလက်များ ပြည့်စုံမှန်ကန်စွာ နှင့် ရှင်းလင်း ကြိုတင်အသိပေးဆောင်ရွက်သွားရန် နှင့် ဝန်ဆောင်မှုကို  ကြော်ငြာရာတွင် ဝန်ဆောင်မှု စည်းမျဉ်း စည်းကမ်း (Terms and Conditions) များအား အင်္ဂလိပ် ၊ မြန်မာနှစ်ဘာသာဖြင့် ဖော်ပြထားရှိရန် ၊ ဝန်ဆောင်မှုများအပေါ် စားသုံးသူများမှ စိတ်ကျေနပ်မှု မရှိပါက အော်ပရေတာများ၏ Call Center သို့ အလွယ်တကူခေါ်ဆို၍ Complain ပြုလုပ်နိုင်စေရေး စီစဉ်ထားရှိရန်စသည့်အချက်များနှင့် ဆက်သွယ်ရေးညွှန်ကြားမှုဦးစီးဌာနမှ လိုင်စင် ရရှိသည့်လုပ်ငန်းများနှင့် မိုဘိုင်းအော်ပရေတာများသို့ အင်တာနက်ဝန်ဆောင်မှုနှင့်ပတ်သက်သည့် ညွှန်ကြားထားသည့်အချက်များအတိုင်း ဆောင်ရွက် သွားရန် လိုအပ်ကြောင်း အသေးစိတ်ပြောကြားခဲ့ပါသည်။

DOCA (မန္တလေး)

            မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ ပြင်ဦးလွင်ခရိုင်တာဝန်ခံရုံး၌ အောက်တိုဘာလ(၂၈) ရက်နေ့တွင် အွန်လိုင်းအသုံးပြု၍  စားသုံးသူရေးရာဟောပြောပွဲ ကျင်းပပြု လုပ်ခဲ့ပါသည်။ ဟောပြောပွဲတွင် ခရိုင်တာဝန်ခံ ဦးသက်လွင်ထူး(ဦးစီးအရာရှိ)က အွန်လိုင်းမှတစ်ဆင့် ဝယ်ယူခြင်း နှင့်စပ်လျဉ်း၍ အွန်လိုင်းမှတ်ပုံတင်ရာတွင် ပေးသွင်းရမည့် မှတ်ပုံတင်ကြေးများ၊ အွန်လိုင်းမှတစ်ဆင့် ဈေးဝယ်ယူရာတွင် အားနည်းချက် အားသာချက်များ၊ မှတ်ပုံတင်ရမည့် ကုန်စည်/ဝန်ဆောင်မှု အမျိုးအစားများ၊ လိမ်လည်မှု အမျိုးအစား(၂)မျိုး၏အကြောင်းအရာများ၊အွန်လိုင်းဝန်ဆောင်မှုနှင့်စပ်လျဉ်းသည့်စားသုံးသူများ၊သိသင့်သိထိုက်သည့်အကြောင်းအရာများ၊အွန်လိုင်းဖြင့်ရောင်းချပါက www.doca. ecomreg.gov.mm သို့ ဝင်ရောက် လျှောက်ထားနိုင်ကြောင်း၊  မှတ်ပုံတင် လျှောက်ထားမှုမရှိဘဲ အွန်လိုင်းစနစ်ဖြင့်ရောင်းချပါက အရေးကြီးကုန်စည်နှင့်ဝန်ဆောင်မှု ဥပဒေအရအရေးယူခံရ မည်ဖြစ်ကြောင်း၊ စားသုံးသူများ၏ အခွင့်အရေးနှင့်  တာဝန်များနှင့် စားသုံးသူများ နစ်နာဆုံးရှုံးမှုများ ဖြစ်ပေါ်လာပါကတိုင်ကြားနိုင်သည့် နည်းလမ်းများအား ပြောကြားခဲ့ကြောင်း၊ ၎င်းဟောပြောပွဲသို့ လုပ်ငန်းရှင်(1၂)ဦး တက်ရောက် ခဲ့ကြောင်း သတင်းရရှိပါသည်။

DOCA (မန္တလေး)

           ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်တွင် စားသုံးသူပြည်သူများ ဝယ်ယူသုံးစွဲရာတွင် ဆန်ဈေးနှုန်းကြီးမြင့်မှုမရှိစေရေးနှင့် ပေးချေရသောတန်ဘိုးနှင့်အညီ အရည်အသွေးပြည့်ဝသော ဆန်များရောင်းချနိုင်စေရန် ရည်ရွယ်၍ တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့်အညီ စားသုံးသူရေးရာဦးစီးဌာန၊ ခရမ်းမြို့နယ်တာဝန်ခံသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍ စည်ပင်သာယာမြို့မဈေးနှင့် ဈေးပြင်ပတွင် ရောင်းချနေသော ဆန် လက်လီ/လက်ကား အရောင်းဆိုင်များအား နိုဝင်ဘာလ(၁၀)ရက်နေ့၊ နံနက်(၁၀:၃၀)နာရီအချိန်တွင် ကွင်းဆင်းစစ်ဆေးခဲ့ကြောင်း သိရှိရပါသည်။

          ထိုသို့ ကွင်းဆင်းစစ်ဆေးရာတွင် စည်ပင်သာယာမြို့မဈေးအတွင်းရှိ ဆန်လက်လီရောင်းချသော ဦးချစ်ညွှန့်၏ ကရင်ကန်ဆန်ဆိုင်၊ ဦးအောင်ဝင်း၏ ပြည့်ဝဆန်ဆိုင်နှင့် ဈေးပြင်ပတွင် ရောင်းချသော ဒေါ်နှင်းမိုးဇော်၏ ဒေါ်သောင်းသောင်းဆန်ဆိုင်၊ ဦးသိန်းဝင်းအောင်၏ ရွှေခြင်္သေ့ ဆန်ဆိုင်နှင့် ဒေါ်ရီရီ၏ ငြိမ်းဆန်ဆိုင်များတွင် ရောင်းချလျက်ရှိသော ဆန်ကြမ်း၊ ဆန်ချော တစ်ပြည်၊ တစ်အိတ်ဈေးနှုန်းများ၊ ယခင်ပတ်၊ ယခုပတ်ဈေးနှုန်းများအား ကောက်ခံစစ်ဆေးရာတွင် ယခင်ပတ်နှင့် ယခုပတ်ဈေးနှုန်းများ ကွာခြားမှုမရှိဘဲ ဆန်ဈေးနှုန်းမှာ တည်ငြိမ်လျက်ရှိသည်ကို စစ်ဆေးတွေ့ရှိရပြီး မြို့နယ်တာဝန်ခံမှ ဆန်ဆိုင်ပိုင်ရှင်များအား  ဝယ်ယူဈေးထက် အမြတ်ရာခိုင်နှုန်းကြီးမြင့်စွာ ရောင်းချခြင်းမပြုလုပ်ရန်နှင့် ဆန်တန်(၂၅)တန်နှင့်အထက် သိုလှောင်ထားပါက မြန်မာဆန်စပါး အွန်လိုင်း( MyRo) www.myro.com.mmတွင် ဆန်စပါး သိုလှောင်ရုံမှတ်ပုံတင်လက်မှတ်လျှောက်ထား၍ ကုန်ရ၊ ကုန်ထုတ်၊ ကုန်လက်ကျန်စာရင်းများအား လစဉ် လဆန်း(၁)ရက်နေ့မှ (၇)ရက်နေ့အတွင်း စာရင်းထည့်သွင်း ဆောင်ရွက်ကြရန် အသိပေးခဲ့ကြောင်း သိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ဦးစီးမှူးရုံးမှ ဦးမြင့်နိုင် (ဦးစီးအရာရှိ)နှင့် အဖွဲ့သည် အွန်လိုင်းစနစ်ဖြင့်ရောင်းချခြင်းလုပ်ငန်းများ အွန်လိုင်းမှတ်ပုံတင်ရာတွင် ဖော်ပြထားသည့်အချက်များ ကိုက်ညီမှု ရှိ/မရှိ၊ လုပ်ငန်း လိပ်စာမှန်ကန်မှု ရှိ/ မရှိတို့ကို  (၁၃.၁၁.၂၀၂၅) ရက်နေ့၊ နေ့လယ်(၁၅:၀၀)နာရီအချိန်တွင် ဇမ္ဗူသီရိမြို့နယ်၊ ကံ့ကော်အိမ်ရာ၊ အိမ်အမှတ် ၂၂  ရှိ  “Mom’s Choice   (မေ့မေ့ရွေးချယ်ရာ)” မိခင်နှင့် ကလေးအသုံးအဆောင်ပစ္စည်းများ ရောင်းချခြင်း လုပ်ငန်းသို့ သွားရောက်စစ်ဆေးခဲ့ကြောင်း သိရှိရပါသည်။

          ကွင်းဆင်းစစ်ဆေးရာတွင် စစ်ဆေးရေးအရာရှိက လုပ်ငန်းရှင်များကို လိုအပ်သည်များ မေးမြန်းခြင်း၊ မြေပြင်ကွင်းဆင်းစစ်ဆေးရမည့်အချက်(၁၈)ချက်နှင့် ကိုက်ညီမှု ရှိ/မရှိ စစ်ဆေးခြင်း၊ စီးပွားရေးလုပ်ငန်းရှင်များ လိုက်နာရမည့် တာဝန်ဝတ္တရားများနှင့် စားသုံးသူကာကွယ်ရေးဥပဒေပါ အခန်း(၁၇)ရှိ ကုန်စည်(သို့မဟုတ်) ဝန်ဆောင်မှုအပေါ် တာဝန်ရှိမှုနှင့် ပတ်သက်၍ လည်းကောင်း တရားမဝင်ကုန်ပစ္စည်းများ ရောင်းချမှုမရှိစေရေး အသိပညာပေးဟောပြောခဲ့‌ကြောင်း သိရှိရပါသည်။

DOCA (ပြည်ထောင်စုနယ်မြေ)

    စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ဦးစီးမှူးရုံးမှ ဦးတင်စိုးနိုင် (ဦးစီးမှူး)နှင့် အဖွဲ့သည် အွန်လိုင်းစနစ်ဖြင့်ရောင်းချခြင်း လုပ်ငန်းများ အွန်လိုင်းမှတ်ပုံတင်ရာတွင် ဖော်ပြထားသည့်အချက်များ ကိုက်ညီမှု ရှိ/မရှိ၊ လုပ်ငန်း လိပ်စာမှန်ကန်မှု ရှိ/မရှိတို့ကို (၁၃.၁၁.၂၀၂၅) ရက်နေ့၊ နေ့လယ်(၁3:0၀) နာရီအချိန်တွင် ပုဗ္ဗသီရိမြို့နယ်၊ အောင်သုခရပ်ကွက်၊ နယ်မြေ ၆၊ အိမ်အမှတ် ၆/၇၅ ရှိ “May Lin” အလှကုန်ပစ္စည်းနှင့် လူသုံးကုန်ပစ္စည်းများရောင်းချခြင်းလုပ်ငန်းသို့ သွားရောက် စစ်ဆေးခဲ့ကြောင်း သိရှိရပါသည်။

          ကွင်းဆင်းစစ်ဆေးရာတွင် စစ်ဆေးရေးအရာရှိက လုပ်ငန်းရှင်များကို လိုအပ်သည်များ မေးမြန်းခြင်း၊ မြေပြင်ကွင်းဆင်းစစ်ဆေးရမည့်အချက်(၁၈)ချက်နှင့် ကိုက်ညီမှု ရှိ/မရှိ စစ်ဆေးခြင်း၊ စီးပွားရေးလုပ်ငန်းရှင်များ လိုက်နာရမည့် တာဝန်ဝတ္တရားများနှင့် စားသုံးသူကာကွယ်ရေးဥပဒေပါ အခန်း(၁၇)ရှိ ကုန်စည်(သို့မဟုတ်) ဝန်ဆောင်မှုအပေါ် တာဝန်ရှိမှုနှင့် ပတ်သက်၍ လည်းကောင်း တရားမဝင်ကုန်ပစ္စည်းများ ရောင်းချမှုမရှိစေရေး အသိပညာပေးဟောပြောခဲ့‌ကြောင်း သိရှိရပါသည်။

DOCA (ပြည်ထောင်စုနယ်မြေ)