ပြည်တွင်းကုန်သွယ်မှုသတင်း

       ပဲစင်းငုံသီးနှံသည် အခြားသောသီးနှံများနှင့်မတူဘဲ (၈)လ၊ (၉)လကြာ စိုက်ပျိုးထားရှိရသော သီးနှံတစ်ခုဖြစ်ပါသည်။ ပဲစင်းငုံကို မြန်မာနိုင်ငံအလယ်ပိုင်းဒေသများတွင် အများဆုံး စိုက်ပျိုးကြသည်ဟု သိရှိရပါသည်။ စိုက်ပျိုးမှုအနေဖြင့် မေလနှင့်ဇွန်လတို့တွင် အများအားဖြင့် စိုက်ပျိုးကြပြီး ဇန်နဝါရီလ နှင့်ဖေဖော်ဝါရီလတို့တွင် ပုံမှန်ရိတ်သိမ်းလေ့ရှိပါသည်။ တစ်ချို့ဒေသများတွင် ဒေသရာသီဥတုနှင့် စိုက်ပျိုးမြေပေါ်မူတည်၍ စောစိုက်ကြသဖြင့် ဒီဇင်ဘာလ နောက်ဆုံးပတ်တွင် စတင်ထွက်ပေါ်လေ့ရှိသည်ဟု သိရပါသည်။

         စိုက်ပျိုးသူ တောင်သူများအနေဖြင့်လည်း ပဲစင်းငုံကို ဟင်းလျာအနေဖြင့် ခွဲခြမ်းခွဲ၍ ပဲထမင်းသော်လည်းကောင်း၊ ဟင်းချိုသော်လည်းကောင်း၊ ပဲကြာဇံအဖြစ်ထုတ်လုပ်၍ သော်လည်းကောင်း၊ ပဲကြော်အဖြစ် လည်းကောင်း အမျိုးမျိုးပြုလုပ်၍ စားသုံးလေ့ရှိပါကြောင်း၊ မရိတ်သိမ်းမီ ပဲအစိုကိုခူးဆွတ်၍ မုန့်ပဲသရေစာအဖြစ် ပြုတ်၍သော်လည်းကောင်း စားသုံးလေ့ရှိကြသည်ဟုသိရပါသည်။ ပဲစင်းငုံမှာ ချိုဆိမ့်သောအရသာရှိပြီး ဘေးဥပဒ်အန္တရာယ်မဖြစ်စေသည့်အပြင် ကျန်းမာသန်စွမ်းခြင်းကို အထောက်အကူပြုကြောင်း သိရှိရသည့်အတွက် စားသုံးသင့်သောပဲတစ်မျိုးလည်း ဖြစ်ပါသည်။ ပဲစင်းငုံကို Value Added တန်ဖိုးမြှင့်ထုတ်ကုန် တစ်ခုအနေဖြင့် စီမံဖော်ဆောင်ပြီး လုပ်ဆောင် နိုင်မည့်ဆိုပါက နိုင်ငံအတွက် ဝင်ငွေများစွာ အထောက်အကူပြုနိုင်သည်ဟု လုပ်ငန်းရှင် တစ်ဦး၏ ပြောကြားမှုအရသိရပါသည်။ ကမ္ဘာပေါ်တွင် အိန္ဒိယနိုင်ငံသည် ပဲတင်သွင်းမှုနှင့်ဝယ်ယူမှုကို အများဆုံးပြု လုပ်သောနိုင်ငံဖြစ်သည့်အားလျှော်စွာ ယခုလဲ မြန်မာနိုင်ငံမှ ပဲတင်သွင်းမှုကို ၂၀၂၂ ခုနှစ်၊ မတ်လ အထိ ထပ်မံသက်တမ်းတိုးမြှင့်ထားသည်ဟု မန္တလေးကုန်သည်များနှင့် စက်မှုလက်မှု လုပ်ငန်းရှင် များအသင်းမှ သိရပါသည်။ ပဲစင်းငုံသီးနှံသည် Export သီးနှံဖြစ်ပြီး ယခုနှစ်တွင် ပဲဈေးကောင်းလျက် ရှိသည့်အတွက် တောင်သူများ အဆင်ပြေလျက်ရှိကြောင်း သိရှိရပါသည်။

         မန္တလေးတိုင်းဒေသကြီး၊ မြင်းခြံခရိုင်အနေဖြင့် ၂၀၂၀ -၂၀၂၁ ခုနှစ်တွင် ပဲစင်းငုံစိုက်ပျိုးမှုမှာ ဧကပေါင်း(၁၂၅၃၄၂)ဧကရှိခဲ့ပြီး ရိတ်ဧကမှာ(၁၂၅၃၄၂)ဧကနှင့် တစ်ဧကလျှင် အထွက်နှုန်းအနေဖြင့်     ပျမ်းမျှ (၈.၇၈)တင်းထွက်ရှိသဖြင့် အထွက်တင်းပေါင်း (၁၁၀၀၅၀၂)တင်း ထွက်ရှိခဲ့ကြောင်း သက်ဆိုင်ရာဌာန၏ စာရင်းများအရ သိရှိရပါသည်။ မြင်းခြံခရိုင်အနေဖြင့် ၂၀၂၁-၂၀၂၂ ခုနှစ်တွင် ပဲစင်းငုံစိုက်ဧကပေါင်း(၁၃၀၃၁၂)ဧကစိုက်ပျိုးခဲ့ပြီး၊ တစ်ဧကလျှင်အထွက်နှုန်း (၇.၆၄)တင်းထွက် ရှိပြီး ယနေ့အထိ ရိတ်ဧက(၄၄၀၃၂)ဧက ရိတ်သိမ်းပြီးဖြစ်၍ အထွက်တင်းပေါင်း (၃၃၆၄၀၄)တင်း ထွက်ရှိပြီးဖြစ်ပါသည်။ မြင်းခြံခရိုင်အတွင်း၌ မြို့နယ်အလိုက် စိုက်ပျိုးမှုအနေဖြင့် နွားထိုးကြီး မြို့နယ်တွင် ပဲစင်းငုံစိုက်ပျိုးထားသော စိုက်ဧက(၇၆၀၈၅)ဧက အများဆုံးစိုက်ပျိုးမှုရှိပါကြောင်း၊ ငါန်းဇွန်မြို့နယ်တွင် စိုက်ဧက(၃၀၂၀၇)ဧက၊ တောင်သာမြို့နယ်တွင် စိုက်ဧက(၁၈၁၅၅)နှင့် မြင်းခြံ မြို့နယ်တွင် (၅၈၆၅)ဧက စိုက်ပျိုးထားရှိပြီးဖြစ်သည့်အတွက် ရိတ်သိမ်းပြီး ပဲစင်းငုံသီနှံများကို ပြည်တွင်းဈေးကွက်သို့ တင်ပို့ရောင်းချလျက်ရှိကြောင်း သိရှိရပါသည်။

         လက်ရှိပဲစင်းငုံဈေးအနေဖြင့် တစ်ပိဿာ ၁၈၅၀/- ၊ ၁၉၀၀/- ၊ ၂၀၀၀/- ၊ ၂၀၅၀ ကျပ်ရှိ ပါသည်။ ပဲအရည်အသွေးပေါ်မူတည်၍ ဈေးနှုန်းအနည်းငယ်ကွာခြားလျက်ရှိကြောင်း သိရှိရပါသည်။ ယခင်နှစ်ကာလတူတွင် ပဲစင်းငုံဈေးသည် (၁၂၀၀-၁၃၀၀)ကျပ် ရှိသည့်အတွက် လက်ရှိဈေးနှင့် နှိုင်းယှဉ်လျှင် တောင်သူများအထိုက်အလျောက် အဆင်ပြေသည်ဟု သိရှိရပါသည်။ ထွက်ရှိသော ပဲစင်းငုံသီးနှံများ၏ အရောင်းအဝယ်ဖြစ်မှုအနေဖြင့်   မြို့ပေါ်ကုန်သည်လုပ်ငန်းရှင်များမှ ဝယ်ယူစု ဆောင်းပြီး မန္တလေးမြို့သို့ တင်ပို့လျက်ရှိကြောင်း သိရှိရပါသည်။ ပေါ်ဦးပေါ်စဖြစ်သည့်အတွက် ပဲစင်းငုံသီးနှံများ အဝင်နည်းသေးသော်လည်း ယခုနှစ်ပဲစင်းငုံစိုက်တောင်သူများ အကျိုးအမြတ် ရရှိကြောင်း သိရပါသည်။

စားသုံးသူရေးရာဦးစီးဌာန(မန္တလေးတိုင်းဒေသကြီး)

             ပဲခူးတိုင်းဒေသကြီးတွင် စိုက်ပျိုးရေးလုပ်ငန်းသုံး ဓာတ်မြေသြဇာ ကုမ္ပဏီများနှင့် အရောင်းဆိုင်များတွင် ဓာတ်မြေသြဇာအမျိုးမျိုး ရောင်းချလျက်ရှိရာ ပဲခူးတိုင်းဒေသကြီး အတွင်းရှိ တောင်သူများအနေဖြင့် ပုလဲဓာတ်မြေသြဇာများဖြစ်သည့် မြင်းပျံ၊ သြဘာ၊ ရွှေနဂါး၊ အာမို ၊ ကောမတ်ဓာတ်မြေသြဇာများအား အများဆုံးအသုံးပြုလျက်ရှိပါသည်။

          ပဲခူးတိုင်းဒေသကြီး၊ သာယာဝတီခရိုင် ၊ လက်ပံတန်းမြို့နယ်တွင် ဓာတ်မြေသြဇာနှင့် ဘိလပ်မြေစျေးများ မြင့်တက်လျက်ရှိပြီး စျေးကွက်အတွင်း အရောင်းအဝယ်အေးလျက် ရှိကြောင်း သိရှိရပါသည်။ ဓာတ်မြေသြဇာစျေးနှုန်းများမှာ ၂၀၂၂ခုနှစ်၊ ဇန်နဝါရီ တတိယအပတ်တွင် ယူရီးယား (မြင်းပျံ) တစ်အိတ်လျှင် ၉၀၀၀၀ကျပ်  ၊ ယူရီးယား (မိုးနဂါး) တစ်အိတ်လျှင် ၈၅၀၀၀ကျပ် ၊ တီစူပါ (သံကွင်း)တစ်အိတ် လျှင် ၆၆၀၀၀ကျပ် ၊ ကွန်ပေါင်း( အာမို) တစ်အိတ်လျှင် ၈၅၀၀၀ကျပ်တို့ဖြင့် စျေးကွက်အတွင်း ရောင်းဝယ်လျက်ရှိကြောင်း  သိရှိရပါသည်။

           ဘိလပ်မြေစျေးနှုန်းများမှာ ကြံ့နှစ်ကောင် (အနီ) တစ်အိတ်လျှင် ၉၀၀၀ကျပ် ၊ အယ်ဖာတစ်အိတ်လျှင် ၉၅၀၀ကျပ် ၊ အပါချီတစ်အိတ်လျှင် ၈၅၀၀ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

စားသုံးသူရေးရာဦးစီးဌာန

ပဲခူးတိုင်းဒေသကြီး

        ပြည်ထောင်စုနယ်မြေ၊ နေပြည်တော်အတွင်း ကြံစိုက်ပျိုးသည့်မြို့နယ် (၆)မြို့နယ် တို့မှာ ပျဉ်းမနား၊ လယ်ဝေး၊ တပ်ကုန်း၊ ဥတ္တရသီရိ၊ ပုဗ္ဗသီရိ၊ ဇေယျာသီရိမြို့နယ်တို့ ဖြစ်သည်။ အဆိုပါ မြို့နယ်များအနက် လယ်ဝေးမြို့နယ်နှင့် တပ်ကုန်းမြို့နယ်တို့တွင် ကြံစိုက်ပျိုးသည့်ဧရိယာ အများဆုံး ဖြစ်သည်။ ယခုအခါ ပြည်ထောင်စုနယ်မြေ၊ နေပြည်တော် အတွင်း၌ လည်ပတ်နေသော သကြားစက် (၃)စက်ရှိပြီး ပျဉ်းမနားမြို့နယ်တွင် ပျဉ်းမနားသကြားစက်၊ တပ်ကုန်းမြို့နယ်တွင် ဒဟတ်ကုန်း သကြားစက်၊ လယ်ဝေးမြို့နယ်တွင် တောင်ဇဉ်အေး(သာဝတ္ထိ)သကြားစက်တို့ဖြစ်ပြီး ဒဟတ်ကုန်း သကြားစက်နှင့် တောင်ဇဉ်အေးသကြားစက်တို့ကို International Gate Ways ကုမ္ပဏီလီမိတက်မှ လည်းကောင်း၊ ပျဉ်းမနားသကြားစက်ကို ယုဇနကုမ္ပဏီလီမိတက်မှလည်းကောင်း တာဝန်ယူ လည်ပတ်လျက် ရှိပါသည်။ တပ်ကုန်းမြို့နယ်၊ ပုဗ္ဗသီရိမြို့နယ်၊ ဇေယျာသီရိမြို့နယ်တို့မှ စိုက်ပျိုး ထွက်ရှိသော ကြံများကို ဒဟတ်ကုန်းသကြားစက်သို့လည်းကောင်း၊ ပျဉ်းမနားမြို့နယ်နှင့် ဥတ္တရသီရိ မြို့နယ်တို့မှ ထွက်ရှိသောကြံများကို ပျဉ်းမနားသကြားစက်သို့လည်းကောင်း၊ လယ်ဝေးမြို့နယ် အတွင်းမှ ထွက်ရှိသောကြံများကိုတောင်ဇဉ်အေး သကြားစက်သို့လည်းကောင်း ရောင်းချလျက် ရှိပါသည်။ ယခု နှစ်တွင် ပျဉ်းမနားသကြားစက်အနေဖြင့် ကြံတန်ချိန်(၂၅၀၀၀)၊ ဒဟတ်ကုန်းသကြားစက် အနေဖြင့် တန်ချိန်(၆၀၀၀၀)၊ တောင်ဇဉ်အေးသကြားစက် အနေဖြင့် တန်ချိန်(၈၀၀၀၀)ဝယ်ယူ သွားမည် ဖြစ် ကြောင်း သိရှိရပါသည်။

          ၂၀၂၁ ခုနှစ် ကြံစိုက်ရာသီတွင် (၁၀၀၂၉)ဧက စိုက်ပျိုးခဲ့ပြီး စိုက်ဧကအားလုံး ရိတ်သိမ်းနိုင်ခဲ့ရာ တစ်ဧကအထွက်နှုန်းမှာ (၂၂)တန်ခန့် ထွက်ရှိသဖြင့် စုစုပေါင်း တန်ချိန်(၂၂၀၆၃၈)ထွက်ရှိမည်ဟု ခန့်မှန်း ရပါသည်။ အထက်ပါစက်ရုံ(၃)ရုံမှ ဝယ်ယူမည့် လျာထားတန်ချိန်မှာ (၁၆၅၀၀၀)တန် ဖြစ်သော ကြောင့် ပိုနေသည့်ကြံများကို မျိုးပွားကြံနှင့် အခြားသုံးဖြစ်သော ကြံသကာချက်ခြင်း၊ ကြံရည် ကြိတ်ခြင်း၊ စားသုံးခြင်းစသည်တို့အတွက် အသုံးပြုရမည်ဖြစ်ကြောင်း ကြံစိုက်ပျိုးသည့် တောင်သူ များထံမှ သိရှိရပါသည်။ ကြံဈေးနှုန်းအနေဖြင့် စက်ရုံအရောက်ဈေးနှင့် ကွင်းဈေးဟူ၍ (၂)မျိုး ခွဲထား သည်။ စက်ရုံအရောက်ဈေးမှာ ကြံတစ်တန်လျှင် (၅၂၅၀၀)ကျပ်ဖြစ်ပြီး ကွင်းဈေးမှာ (၄၃၀၀၀) ကျပ်ဖြင့် ဝယ်ယူလျက်ရှိကြောင်း သိရပါသည်။

          ယခုနှစ်တွင် မိုးရေချိန်လုံလောက်စွာရရှိသောကြောင့် ကြံအထွက်နှုန်းကောင်းသည်ဟု ဆိုနိုင် ပါသည်။ ယခင်နှစ်များတွင် တစ်ဧကလျှင် ကြံတန်ချိန် တန်(၂၀)ခန့်သာ ထွက်ရှိသည်ဟု တောင်သူများ ထံမှ သိရပါသည်။ ၂၀၂၁ခုနှစ် ကြံစိုက်တောင်သူများ၏ တွက်ခြေကိုက်မှုအခြေအနေနှင့်ပတ်သက်၍  ကြံစိုက်ပျိုးမှုတစ်ဧကကုန်ကျစရိတ်မှာ (၇၂၀၀၀၀)ကျပ် ဝန်းကျင်ဖြစ်ပြီး တစ်ဧကအကျိုးအမြတ်မှာ (၄၃၅၀၀၀)ကျပ်ရှိကြောင်း တောင်သူများထံမှ သိရပြီး၊ ကြံရာသီကြိတ်ခွဲထုတ်လုပ်မှုကို ၂၀၂၁ခုနှစ် ဒီဇင်ဘာလ ဒုတိယပတ်မှ ၂၀၂၂ခုနှစ် ဖေဖော်ဝါရီလ ဒုတိယပတ်ထိ စက်ရုံများ လည်ပတ်သွားမည် ဖြစ်ကြောင်း လေ့လာသိရှိရပါသည်။

စားသုံးသူရေးရာဦးစီးဌာန(ပြည်ထောင်စုနယ်မြေ)

              ပဲခူးတိုင်းဒေသကြီးအတွင်း မြို့နယ်များမှ ပဲတီရွှေဝါအသစ်များ ဈေးကွက်အတွင်း အဆက်မပြတ် ဝင်ရောက်လျက်ရှိရာ ယခင်ကာလတူနှစ်များထက် အဖွင့်ဈေးကောင်းပြီး အရောင်းအဝယ်ဖြစ်လျက်ရှိကြောင်း သိရသည်။ ယခုနှစ် အသစ်ပေါ်လာသည့် ပဲတီရွှေဝါများမှာ အရည်အသွေးကောင်းသောကြောင့်  ဈေးကောင်းရရှိနေပြီး ယခင်နှစ် ပဲတီရွှေဝါတစ်တင်းလျှင် ကျပ် ၄၀၀၀၀ခန့်ရှိပြီး ယခုနှစ် ဇန်နဝါရီလ ပဲပေါ်ချိန်တွင် ပဲတီရွှေဝါ တစ်တင်းလျှင် ကျပ် ၄၄၅၀၀ အထိ ရနေကြောင်း သိရသည်။၂၀၂၂ခုနှစ်၊ ဇန်နဝါရီလ ၉ ရက်နေ့ထိရရှိထားသော သတင်းအချက်အလက်များအရ အိန္ဒိယအစိုးရက မတ်ပဲအပါအဝင် ပဲစင်းငုံနှင့် ပဲတီစိမ်းများကို ကန့်သတ်ကုန်စည်အဖြစ်မှ ပယ်ဖျက်ထားကာ ၂၀၂၂ ခုနှစ် မတ်လ ၃၁ ရက်နေ့ အထိလွတ်လပ်စွာ တင်သွင်းခွင့်ပြုထားသည့်အတွက် မြန်မာနိုင်ငံမှ ပဲဈေးကွက်အတွင်း အရောင်းအဝယ်သွက်လာပြီး ဆက်လက်စျေးမြင့်တက်လာနိုင်ကြောင်း သိရှိရပါသည်။

          ပဲခူးတိုင်းဒေသကြီးအတွင်းရှိ ပဲတီရွှေဝါများသည် ရန်ကုန်မှ ကုမ္ပဏီများသို့ အများဆုံး ပို့ဆောင်လျက်ရှိကြောင်းသိရပြီး ယခုနှစ် အထွက်နှုန်းအနေဖြင့် ယခင်နှစ်များကဲ့သို့ ပုံမှန်ထွက်ရှိနေသည့်အတွက် တောင်သူများအနေဖြင့် ယခုပဲပေါ်ချိန်တွင် ဈေးနှုန်းကောင်းများ ရရှိနေခြင်းကြောင့် အကျိုးအမြတ် ရရှိနေကြောင်းသတင်းရရှိပါသည်။

စားသုံးသူရေးရာဦးစီးဌာန

ပဲခူးတိုင်းဒေသကြီး

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဌာနခွဲစာရေး ဒေါ်ဝါဝါကြည်သည် ခရိုင်ဦးစီးမှူး၏ လမ်းညွှန်ချက်ဖြင့် ပြည်တွင်းမွေးမြူရေးကဏ္ဍဖွံ့ဖြိုးတိုးတက်စေရေးအတွက် (၁၃.၁.၂၀၂၂)ရက်နေ့၊ နံနက် (၁၀:၀၀) အချိန်တွင် ပခုက္ကူမြို့နယ်၊ ဆွဲကြီးကျေးရွာရှိ CP ကြက်မွေးမြူရေးလုပ်ငန်းလုပ်ကိုင်သည့် လုပ်ငန်းရှင် ဦးကျော်နိုင်သို့သွားရောက်မေးမြန်းခဲ့ရာ CP ကြက်မျိုးအနေဖြင့် ရာသီဥတုဒဏ်ခံနိုင်သော (Bel Ga) မျိုးကို မွေးမြူကြောင်း၊ တစ်နှစ်ပတ်လုံး(၆)ကြိမ်မွေးမြူပြီး၊ တစ်ကြိမ်မွေးမြူရာတွင် မျက်စိပွင့်စ အရွယ်ကြက်ပေါက်တစ်ကောင်လျှင်(၉၅၀)ကျပ်ဖြင့် အကောင်ရေ(၁၅၀၀)ခန့် မွေးမြူကြောင်း၊ ကြက်ပေါက်စလေး များအား(၂၆)ရက်သားအထိ မီးခန်းထဲတွင် စပါးခွံချ၍ အပူပေးပြီး မွေးမြူရကြောင်း သိရှိရပါသည်။

          ကြက်အစာအနေဖြင့် (၂)ပတ်သားအရွယ်တွင် 6010(အသားတိုးကြက်ငယ်စာ)၊ (၃)ပတ်သား အရွယ်တွင် 6020 (အသားတိုးကြက်လတ်စာ)၊ (၄)ပတ်သားအရွယ်တွင် 6030 (အသားတိုးကြက်ကြီး စာ)တို့အား အရွယ်အစားအလိုက် အစာကျွေးရပါကြောင်း၊ ကြက်အကောင်ရေ(၁၅၀၀)အတွက် (50) ကီလိုဝင် ကြက်အစာအိတ်(၁၅၀)ကျွေးရကြောင်း၊ (၇)ရက်သားမှ ရောင်းချသည့်အချိန်ထိ  ကာကွယ်ဆေး နှင့်ဓာတ်ဆားအားဆေးများကိုလည်း ရေဖျော်စနစ်ဖြင့် ကျွေးမွေးရကြောင်းသိရှိရပါသည်။

          CP ကြက် (Bel Ga)မျိုးကို (၄၅)ရက်သားမှ (၆၀)ရက်သားအတွင်းရောင်းချရကြောင်း၊ ကြက်အကောင်ကြီးထွားမှုပေါ်မူတည်၍ ပိဿာချိန်ထွက်ရှိမှု ကွဲပြားကြောင်း၊ တစ်ကောင်လျှင် ပျမ်းမျှ တစ်ပိဿာငါးဆယ်ကျပ်သားမှ တစ်ပိဿာရှစ်ဆယ်ကျပ်သားအထိရှိကြောင်း၊ ယခုပေါက်ဈေး အနေဖြင့် တစ်ပိဿာလျှင်(၄၂၅၀)ကျပ်ခန့်ဖြင့် ရောင်းချလျက် မြစ်ခြေမြို့နယ်ဒေသတွင်းနှင့် ပခုက္ကူ မြို့ပေါ်သို့ ဖြန့်ဖြူးရောင်းချကြောင်း သိရှိရပါသည်။

    တစ်ကြိမ်မွေးမြူလျှင် မွေးမြူသည့်အချိန်မှ ရောင်းချသည့်အချိန်ထိ သုံးစွဲမှုကုန်ကျစရိတ်မှာ ကြက်ပေါက်အကောင်ရေ (၁၅၀၀)ဝယ်ယူခ ၊ ကြက်စာဖိုး၊ ကာကွယ်ဆေးအားဆေးဖိုး၊ အလုပ်သမား ငှားရမ်းခအပါအဝင် စုစုပေါင်း(၈၁)သိန်းကျပ်ခန့်ကုန်ကျကြောင်း၊ ရောင်းချချိန်တွင် စုစုပေါင်း ပိဿာချိန်(၂၇၀၀)ခန့် ကုန်ချိန်ထွက်ရှိပြီး တစ်ပိဿာလျှင် (၄၂၅၀)ကျပ်ဖြင့် လက်လီရောင်းချသူ များသို့ ဖောက်သည်ပေးခဲ့ရသည့်အတွက် ဝင်ငွေမှာ ကျပ်သိန်း(၁၁၀)ခန့်ဖြစ်ပြီး အကျိုးအမြတ်အနေဖြင့် သိန်း(၂၀)ကျပ်ဝန်းကျင်ခန့်ရရှိသော်လည်း ကနဦးခြံဆောက်လုပ်စရိတ်မှာ သုံးဆယ်ငါးသိန်းမှ သိန်းလေးဆယ်ကြားရှိကြောင်းသိရှိရပါသည်။

          ယခင်နှစ်က CP ကြက်မွေးမြူရေးလုပ်ငန်းလုပ်ကိုင်ခဲ့ရာတွင် ကြက်များပျက်စီးမှုရှိခြင်း၊ ရောင်းချရာတွင် ဈေးနှုန်း/ဈေးကွက် ကောင်းမွန်မှုနည်းခြင်း၊ ကြက်စာဈေးနှုန်းများ ကြီးမြင့်ခြင်းတို့ ကြောင့် အရှုံးပေါ်ခဲ့သော်လည်း ယခုနှစ်တွင် CP  ကြက်မွေးမြူသူများအနေဖြင့်  ဝယ်လိုအားမြင့် တက်လျက်ရှိပြီး ဈေးနှုန်း/ဈေးကွက်ကောင်းမွန်သောကြောင့် အကျိုးအမြတ်ရရှိကြောင်း  သိရှိရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)