ပြည်တွင်းကုန်သွယ်မှုသတင်း

    ပဲခူးတိုင်းဒေသကြီး ၊ နတ်တလင်းခရိုင်၊ ဇီးကုန်းမြို့နယ်ရှိ ပွဲရုံများတွင် ယခုဩဂုတ်လ (ဒုတိယပတ်)တွင် ရောင်းဝယ်နေသောမတ်ပဲဈေးနှုန်းများမှာ ပိဿာ(၂၀)တစ်တင်းလျှင် (၇၅၅၀၀) ကျပ်ဈေးဖြစ်သဖြင့် ယခုဇူလိုင်လ (တတိယပတ်)ဈေးနှုန်းဖြင့်နှိုင်းယှဉ်ပါက ဈေးနှုန်းပြန်လည်မြင့်တက်လာသည်ကို တွေ့ရပါသည်။

    ယခင် ဇူလိုင်လ (တတိယပတ်)တွင် အရောင်းအဝယ်ဖြစ်ခဲ့သော မတ်ပဲဈေးမှာပိဿာ(၂၀)  တစ်တင်းလျှင်(၇၄၀၀၀)ကျပ် ဖြစ်ခဲ့ပြီး စတုတ္တပတ်တွင် တစ်တင်းလျင်(၇၃၅၀၀) ကျပ် ထိဈေးကျ ဆင်းခဲ့ပါသည်။ ယခုဩဂုတ်လ ပထမပတ်တွင် ရောင်းဝယ်ခဲ့သောဈေးနှုန်းမှာ ပိဿာ(၂၀) တစ်တင်းလျှင်  (၇၄၅၀၀ )ကျပ်ဖြစ်ခဲ့ပြီး ယခုဒုတိယပတ်တွင် (၇၅၅၀၀)ကျပ်ဖြင့် အရောင်း အဝယ်  ဖြစ်နေကြောင်း သိရှိရပါသည်။

 ဇူလိုင်လ (တတိယပတ်)ဈေးနှုန်း ပိဿာ(၂၀)တစ်တင်းလျှင်(၇၄၀၀၀)ကျပ်ဈေး နှင့် ဩဂုတ်လ(ဒုတိယပတ်)ဈေးနှုန်း (၇၅၀၀၀)ကျပ်ကို နှိုင်းယှဉ်ပါက ဈေးနှုန်းအနည်းငယ်အမြင့်ဖြင့်သာ ရောင်းဝယ်နေသည်ကို တွေ့ရပြီး ရောင်းဝယ်မှုအနေဖြင့် ရန်ကုန်ဝယ်လက်သို့ ပုံမှန်တစ်ရက်လျှင်  ပိဿာ (၂၀)ဝင်အိတ်၊ အိတ်(၂၀၀-၂၅၀)အထိ တင်ပို့နေရကြောင်း သိရှိရပါသည်။

DOCA(ပဲခူး)

    မြန်မာနိုင်ငံတွင် ခရမ်းချဉ်ပင်ကို နေရာအနှံအပြားတွင်စိုက်ပျိုးကြပါသည်။ ပြည်ခရိုင်အနေဖြင့် ခရမ်းချဉ်ကို မိုးရာသီတွင် စိုက်ပျိုးခြင်းမရှိဘဲ၊ ဆောင်းရာသီတွင်သာ စိုက်ပျိုးကြပါသည်။ မြန်မာဟင်းအမျိုးမျိုးချက်ပြုတ်ရာတွင် ထည့်သွင်း၍ ချက်ပြုတ်ကြပါသည်။ ခရမ်းချဉ်သီးကို ဟင်းလိမ်မာသီးဟူ၍လည်း ခေါ်ဆိုကြပါသည်။

    ယခုလို မိုးရာသီတွင် ပြည်ဒေသ၍ ခရမ်းချဉ်သီးများစိုက်ပျိုးခြင်းမရှိသဖြင့် စားသုံးသူများ စားသုံးရန်အတွက် ခရမ်းချဉ်သီးများကို ရှမ်းပြည်နယ်ဘက်မှ မှာယူတင်သွင်းရောင်းချကြောင်း သိရပါသည်။ စားသုံးသူများအနေဖြင့်လည်း ခရမ်းချဉ်သီးကို ဟင်းချက်ရာတွင် ဟင်းအနှစ်အဖြစ်လည်းချက်၍ စားသုံးကြသဖြင့် ဝယ်ယူစားသုံးမှုများရှိကြပါသည်။ ပြည်ဈေးကွက်တွင် ရောင်းချလျက်ရှိသော ရှမ်းပြည်နယ်ဘက်မှ ဝင်ရောက်လာသော ကိုင်းခရမ်းချဉ်သီးအဝိုင်းများမှာ ဩဂုတ်လပထမပတ်တွင် တစ်ပိဿာကို (၄၀၀၀)ကျပ်၊ ရိုးရိုးခရမ်းချဉ်သီးတစ်ပိဿာလျှင် (၂၄၀၀)ကျပ်ဖြင့် ဈေးများတွင်ရောင်းချလျက်ရှိပါသည်။ ခရမ်းချဉ်သီးများထွက်ပေါ်ချိန်မဟုတ်သဖြင့် ဈေးနှုန်းများ မြင့်တက်လာကြောင်း သိရပါသည်။ မိုးတွင်းတွင် ထွက်ပေါ်လာသော ခရမ်းချဉ်သီးမှာ ဈေးကောင်းသဖြင့် မိမိတို့ ပြည်ခရိုင်တွင်စိုက်ပျိုးနိုင်မည်ဆိုပါက အခြားပြည်နယ်များမှ ဝယ်ယူစရာမလိုဘဲ ဒေသတွင်း ဖူလှုံစွာစားသောက်နိုင်မည်ဖြစ်ပြီး ဈေးနှုန်းချိုသာစွာဖြင့်လည်း ဝယ်ယူစားသုံးနိုင်မည်ဖြစ်ကြောင်း ရေးသားလိုက်ရပါသည်။

DOCA(ပဲခူး)

    မြန်မာနိုင်ငံရှိ ကျေးလက်ဒေသအချို့တွင် တစောင်းပင်ကို ခြံစည်းရိုးအပင်အဖြစ် စိုက်ပျိုးကြပါသည်။ ထိုတစောင်းပင်မှ ထွက်ရှိလာသောတစောင်းဖူးသည် ကြာဖူးနှင့်ဆင်သဖြင့် တချို့က ပဒုမ္မာဖူး၊ ရွှေကြာဖူးဟူ၍ခေါ်ဆိုကြပါသည်။ တစောင်းဖူးကို မိုးရာသီတွင်သာဖူးကြသဖြင့် ရာသီစာအဖူးတစ်မျိုး ဖြစ်ပါသည်။ ထိုတစောင်းဖူးကို အချို့ကအရံဟင်းတစ်ခွက်အဖြစ်ကြော်၍ အဆင်ပြေ သလိုချက်၍လည်း စားသောက်ကြပါသည်။ အရသာမှာ မှိုအရသာကို ချိုသောအရသာရှိပါသည်။ တစောင်းဖူးကိုချက်ပြုတ်၍ စားသုံးပေးခြင်းဖြင့် ဆီးချိုရောဂါကို ကာကွယ်ပေးနိုင်ပြီး သွေးတိုးရောဂါကို သက်သာစေပါသည်။

   တစောင်းဖူးကို ချက်ပြုတ်၍စားသောက်မည်ဆိုလျှင် အဖူးကိုထက်ခြမ်းခွဲ၍ အထဲက ဝတ်ဆံများကို ဖယ်ရှားရပါသည်။ အချို့ကပွင့်ချပ်ကိုလည်း အချွဲဓါတ်ရှိ၍ ဖယ်၍ချက်ပြုတ်ကြပါသည်။ တစောင်းဖူးကိုချက်ပြုတ်ရာတွင် မချွဲအောင် သင်ပြီးသားများကို တစ်နေလောက်နေပြပြီးမှ ချက်ပြုတ်ကြပါသည်။ ထို့ကြောင့် တစောင်းဖူးကို စားဖူးသူများက ဝယ်ယူ၍ စားသောက်ကြသဖြင့် ဈေးကွက်တွင် ချိုးယူ၍ရောင်းချကြပါသည်။ ပြည်ဒေသရှိဈေးများသို့ အနီးတဝိုက်ရှိ ကျေးရွာများမှ တစောင်းဖူးများကိုလာရောက်ရောင်းချကြသဖြင့်ဈေးမှာ အဖူး(၅)ဖူးပါ တစ်စည်းလျှင် (၁၀၀) ကျပ်ဖြင့် ရောင်းချကြောင်း သိရပါသည်။ အစောင်းဖူးကို အခြားအသီးအရွက်များကဲ့သို့ စိုက်ပျိုးရန်မလိုဘဲ ခြံစည်းရိုးအဖြစ် စိုက်ပျိုးကြသဖြင့် မိမိအိမ်အတွက် အကာအရံ အတားအဆီးလည်းရသလို ရရှိလာသည့် အဖူးများကိုလည်း ဈေးကွက်တင်ရောင်းချကြသဖြင့် မိသားစု ဝင်ငွေများလည်းရရှိကြောင်း သိရပါသည်။ ထိုကြောင့် ခြံစည်းရိုးမှ ဝင်ငွေများရရှိနိုင်သဖြင့် စိုက်ပျိုးရန်သင့်တော်သော အဖူးဖြစ်ပါကြောင်း တင်ပြလိုက်ရပါသည်။

DOCA(ပဲခူး)

    ပြည်ခရိုင်၊ ပေါက်ခေါင်းမြို့နယ်၊ မတောင့်တကျေးရွာတွင် နွေစပါးများကို ယခင်ဇွန်လကုန်ပိုင်းမှစ၍ နွေစပါးများရိတ်သိမ်းချွေလှေ့ကြောင်း သိရပါသည်။ ထိုကျေးရွာတွင် ယခုနွေစပါး စိုက်ပျိုးသူတောင်သူများအနေဖြင့် ယခုနွေစပါး ရာသီချိန်တွင် စပါးများအထွက်နှုန်း ကောင်းမွန်သဖြင့် လယ်ကောင်းရင်ကောင်းသလို တစ်ယောက်စိုက်ကို (၅၀)တင်းထွက်ရှိ၍ တစ်ဧကလျှင် တင်း(၂၀၀)ခန့် ထွက်ရှိသည်ဟု သိရပြီး လယ်အနည်းငယ်ညံ့လျှင် တစ်ဧကကို အောက်ထစ် စပါးတင်း (၁၃၀)ခန့်ထွက်သဖြင့် ယခင်နှစ်ထက် စပါးအထွက်နှုန်းကောင်းသည်ဟု နွေစပါးစိုက် တောင်သူတစ်ဦးထံမှ သိရှိရပြီး အကျိုးအမြတ်များစွာရရှိကြောင်း သိရပါသည်။ ယခင်နှစ်တွင် နွေစပါး တစ်ဧက အထွက်နှုန်းမှာ တင်း(၁၀၀)ခန့်သာရရှိခဲ့ပြီး ယခုနှစ်တွင် နွေစပါးပေါ်ခါနီးတွင် မိုးအနည်းငယ်ရွာသွန်း၍ ရာသီဥတု ကောင်းမွန်သဖြင့် နွေစပါးအထွက်နှုန်းကောင်းသည်ဟု သိရပါသည်။ စိုက်ပျိုးသည့် စပါးမျိုးများမှာ ထိုင်းနှံကောက်မျိုး၊ ဗီယက်နန်မျိုးနှင့် GW-11 မျိုးတို့ဖြစ်ပြီး ယခု အချိန် လယ်သမားများအနေဖြင့် စက်များဖြင့်ရိတ်သိမ်းခြွေလှေ့ကြ၍ လူအင်အား ပင်ပန်းခြင်းမရှိဘဲ ရိတ်သိမ်းခြွေလှေ့သည့် လယ်ကွင်းနှင့် ရွာထိပ်တွင် ဧရာဝတီတိုင်းနှင့် ရန်ကုန်ဘက်မှ စပါးကုန်သည်ပွဲစားများက (၁၂)ဘီးကား (၁၆)ဘီးများဖြင့် စပါးအစိုအတိုင်း လာရောက်ဝယ်ယူကြကြောင်း သိရပါသည်။

        စပါးများဝယ်ယူရာတွင် ဈေးနှုန်းအနေဖြင့် စပေါ်ချိန်ဇွန်လကုန်အချိန်က စပါးအစို  ပေါင်(၅၀) တင်း(၁၀၀)လျှင် (၁၁)သိန်း၊ (၁၂)သိန်းအထိဈေးပေါက်နေပြီး ယခုအချိန် ဩဂုတ်လ ပထမပတ်တွင် စပါးအစို ပေါင်(၅၀)တင်း(၁၀၀)လျှင် (၁၅၀၀၀၀၀)ကျပ်ဖြင့် ဝယ်ယူကြကြောင်း သိရပါသည်။ ယခင်နှစ်တွင် နွေစပါးဈေးမှာ ပေါင်(၅၀)တင်း(၁၀၀)လျှင် (၉၈၀၀၀၀)ကျပ်ဖြင့် အရောင်းအဝယ်ဖြစ်ခဲ့သဖြင့် ယခုနှစ်တွင် ထိုကျေးရွာရှိ နွေစပါးစိုက်တောင်သူများအနေဖြင့် အထွက်နှုန်းလည်းကောင်း ဈေးလည်းကောင်းသဖြင့် တောင်သူများနွေစပါးကြောင့် အကျိုးအမြတ်များရရှိကြသဖြင့် နောင်လာ မည့်နှစ်များတွင်လည်း နွေစပါးများကို ထပ်မံတိုးချဲ့၍ စိုက်ပျိုးသွားမည်ဖြစ်ကြောင်း သိရပါသည်။

DOCA(ပဲခူး)

   မွန်ပြည်နယ်၊ စားသုံးသူရေးရာဦးစီးဌာန၊ ချောင်းဆုံမြို့နယ်တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးဦးစီးဌာနတို့နှင့်ပူးပေါင်း၍ (၁၆-၈-၂၀၂၃) ရက်နေ့တွင် ချောင်းဆုံမြို့နယ်၊ ချောင်းဆုံအနောက်ရပ်ကွက်၊ မဟာကန်တော်ကြီးအရှေ့ ပျံကျဈေးဝင်းအတွင်း စားသုံးသူများကို သက်သာသောဈေးနှုန်းဖြင့် အခြေခံစားသောက်ကုန်များရောင်းချပေးခဲ့ကြောင်း သိရှိရပါသည်။

   ထိုသို့ ရောင်းချပေးရာတွင် ဆန်တစ်ပြည်လျှင် (၂၇၀၀) ကျပ်၊ ဝက်သားတစ်ပိဿာလျှင် (၁၃၅၀၀) ကျပ်၊ အမဲသားတစ်ပိဿာလျှင် (၁၅၀၀၀) ကျပ်၊ ကြက်သားတစ်ပိဿာလျှင် (၉၀၀၀) ကျပ်၊ ဆီတစ်ပိဿာလျှင် (၅၀၀၀) ကျပ်၊ ကြက်ဥတစ်လုံးလျှင် (၂၈၀) ကျပ်၊ ပိန်းဥတစ်ပိဿာလျှင် (၃၈၀၀) ကျပ်၊ မုန်လာဥတစ်ပိဿာလျှင် (၈၀၀) ကျပ်၊ ပဲတောင့်တစ်ပိဿာလျှင် (၂၈၀၀) ကျပ်၊ ကန်စွန်းရွက်တစ်ပိဿာလျှင် (၄၀၀) ကျပ်၊ ခဝဲသီးတစ်ပိဿာလျှင် (၈၀၀) ကျပ်၊  ဘူးသီးတစ်လုံးလျှင် (၅၀၀) ကျပ်၊ ရွှေဖရုံသီးတစ်လုံးလျှင် (၆၀၀) ကျပ်တို့ဖြင့်ရောင်းချပေးခဲ့ကြောင်း သိရှိရပါသည်။

DOCA(မွန်)