ပြည်တွင်းကုန်သွယ်မှုသတင်း

          မော်လမြိုင်မြို့၏ ဇွန်လပထမအပတ်တွင်ဖြစ်ပေါ်နေသော အခြေခံစားကုန် ဈေးနှုန်းများမှာ ပေါ်ဆန်း (စပါး) တင်း (၁၀၀) လျှင် (၇၆၀၀၀၀) ကျပ်၊ ပေါ်ဆန်း (ဆန်) ၂၄ ပြည်ပါ တစ်အိတ်လျှင် (၃၄၅၀၀) ကျပ်၊ ဧည့်မထ (စပါး) တင်း (၁၀၀) (၆၄၄၀၀၀) ကျပ်၊ ဧည့်မထ (ဆန်) ၂၄ ပြည်ပါ တစ်အိတ် (၂၃၅၀၀) ကျပ်၊ စားအုန်းဆီ တစ်ပိဿာ (၃၈၀၀) ကျပ်၊ မြေပဲဆီ တစ်ပိဿာ (၈၅၀၀) ကျပ်၊ ကြက်သွန်နီ တစ်ပိဿာ (၆၀၀) ကျပ်၊ ကြက်သွန်ဖြူ (ရှမ်း) တစ်ပိဿာ (၃၅၀၀) ကျပ်၊ ကြက်သွန်ဖြူ (ကြူဂုတ်) တစ်ပိဿာ (၃၀၀၀) ကျပ်၊ မန်ကျည်းမှည့် တစ်ပိဿာ (၄၅၀၀) ကျပ်၊ ငရုတ်ခြောက် တစ်ပိဿာ (၆၀၀၀) ကျပ် ၊ ပဲနီလေး (မြန်မာ) တစ်ပိဿာ (၄၀၀၀) ကျပ်၊ ကုလားပဲခြမ်း တစ်ပိဿာ (၂၂၀၀) ကျပ်၊ မြေပဲဆံ တစ်ပိဿာ (၃၃၀၀) ကျပ်၊ မွေးမြူရေးကြက်သားတစ်ပိဿာ (၇၀၀၀) ကျပ်၊ ဝက်သား တစ်ပိဿာ (၁၀၀၀၀) ကျပ်၊ ဆိတ်သားတစ်ပိဿာ (၂၅၀၀၀) ကျပ်၊ အမဲသားတစ်ပိဿာ (၁၂၀၀၀) ကျပ်၊ ငါးကြင်း တစ်ပိဿာ (၈၀၀၀) ကျပ်၊ ငါးမြစ်ချင်း တစ်ပိဿာ (၅၀၀၀) ကျပ်၊ ကြက်ဥ/ဘဲဥ တစ်လုံးလျှင် (၁၅၀/၂၂၀) ကျပ်၊ ရာဘာ RSS 3 တစ်ပေါင်လျှင်(၉၁၀) ကျပ်၊ ရွှေ ၁၆’ (၁၅၅၀၀၀၀) ကျပ်၊ ရွှေ ၁၅’ (၁၄၈၀၀၀၀) ကျပ်၊ ရွှေ ၁၄’ (၁၃၃၅၀၀၀) ကျပ်၊ ဓာတ်ဆီ တစ်ဂါလံ (၅၀၄၀) ကျပ်၊ ဒီဇယ် တစ်ဂါလံ (၄၆၅၇) ကျပ် ဖြစ်ပေါ်လျှက်ရှိကြောင်း သိရှိရသည်။

          ယခုအပတ်ဈေးနှုန်းများမှာ ယခင်အပတ်နှင့်နှိုင်းယှဉ်လျှင် စားအုန်းဆီ​ဈေးနှုန်းနှင့် ဓါတ်ဆီ/ဒီဇယ်ဆီဈေးနှုန်းတို့မှာ အနည်းငယ်ကျဆင်းလာပြီး ဧည့်မထ(ဆန်) ၊ ပေါ်ဆန်း (ဆန်) ဈေးနှုန်းတို့မှာ ဈေးအနည်းငယ် မြင့်တက်လာ ကြောင်း တွေ့ရှိရပါသည်။

မွန်ပြည်နယ်(DOCA)

          ရှမ်းပြည်နယ်(တောင်ပိုင်း)တွင် စိုက်ပျိုးထွက်ရှိသော စိန်တလုံးသရက်သီးများသည် ၂၀၂၁ ခုနှစ် မေလနောက်ဆုံးပတ်မှစ၍ ဈေးကွက်သို့ စတင်ဝင်ရောက်နေပြီဖြစ်ကြောင်း သိရှိရပါသည်။ ဈေးကွက်အနေဖြင့် မန္တလေးတိုင်းဒေသကြီး ပုဂံ-ညောင်ဦး၊ ရန်ကုန်၊ နေပြည်တော်များသို့ တင်ပို့ရောင်းချလျက်ရှိကြောင်း၊ ယခုကာလသည် စတင်ထွက်ရှိချိန်ဖြစ်သောကြောင့် တစ်ရက်လျှင် ပျမ်းမျှ စိန်တလုံးသရက်သီး အလုံး(၅,၀၀၀) မှ (၁၀,၀၀၀)ခန့် တင်ပို့ရောင်းချနေကြောင်း၊ စိန်တလုံးသရက်သီးများကို အရွယ်အစား အလိုက် (၂၅)လုံးမှ (၃၆)လုံး ဝင်ဆန့်သည့် ဂျပ်ဖာများဖြင့် ထုပ်ပိုးကြောင်း၊ ဈေးနှုန်းအနေဖြင့် တစ်ဖာလျှင် (၁၀,၀၀၀)ကျပ်မှ (၁၂,၀၀၀)ကျပ်အထိ ရရှိကြောင်း သိရှိရပါသည်။ ဒေသတွင်းတွင် အသီး အရွယ်အစား အရည်အသွေးပေါ်မူတည်၍ တစ်လုံးလျှင် (၁၅၀)ကျပ်မှ (၄၀၀)ကျပ်အထိ ပေါက်ဈေး ရှိကြောင်းသိရှိရပါသည်။

          ရှမ်း(တောင်)မှ ထွက်ရှိသည့် စိန်တလုံးသရက်သီးများသည် မေလနောက်ဆုံးပတ်တွင် စတင် ထွက်ပေါ်ပြီး ဇွန်လဒုတိယပတ်တွင် လှိုင်လှိုင်ထွက်ပေါ်ကာ ဇွန်လနောက်ဆုံးပတ်တွင် ကုန်ဆုံးကြောင်းနှင့် ယခုလက်ရှိအချိန်တွင် Covid-19 ရောဂါအခြေအနေကြောင့် မူဆယ်ဈေးကွက်နှင့် အခြားပြည်ပ ဈေးကွက်များသို့ တင်ပို့နိုင်ခြင်း မရှိသေးပါကြောင်းသတင်းရရှိပါသည်။

ရှမ်းပြည်နယ်(DOCA)

          ပြည်တွင်းစပါး၊ ဆန်ဈေးနှုန်းအခြေအနေ။         ပြည်တွင်းစပါးဈေးနှုန်းအနေဖြင့် ဧည့်မထအုပ်စုဝင် (၄၆) ပေါင်ကိုက် စပါးတင်း(၁၀၀) ဈေးနှုန်းမှာ မြို့ကြီးများအလိုက် ယခုနှစ် ၂၀၂၁ ခုနှစ်၊ ဇန်နဝါရီလ ၂၈ ရက်နေ့တွင် ဖြစ်ပေါ်နေသည့် ဈေးနှုန်းမှာ ယခင်နှစ်ကာလတူများတွင် ဖြစ်ပေါ်ခဲ့သော ဈေးနှုန်းများထက် မြင့်တက်နေကြောင်း တွေ့ရှိရပါသည်။ ဆန်ဈေးနှုန်းအနေဖြင့် လည်း ဧည့်မထ ၂၅ %ဆန် (၁၀၈)ပေါင်ဝင် ဆန်(၁)အိတ်ဈေးနှုန်းမှာ မြို့ကြီးများအလိုက် ယခုနှစ် ၂၀၂၁ ခုနှစ်၊ ဇန်နဝါရီလ ၂၈ ရက်နေ့တွင် ဖြစ်ပေါ်နေသည့် ဈေးနှုန်းမှာ ယခင်နှစ်ကာလတူများတွင် ဖြစ်ပေါ်ခဲ့ သော ဈေးနှုန်းများထက် မြင့်တက်နေကြောင်း တွေ့ရှိရပါသည်။ ၂၀၁၆ ခုနှစ်နောက်ပိုင်း ဈေးနှုန်းပြန်လည် မြင့်တက်ခဲ့ ခြင်းဖြစ်ကြောင်းစိစစ်တွေ့ရှိရပါသည်။ စပါး၊ ဆန်ဈေးနှုန်းများသည် အများအားဖြင့် မိုးစပါးစတင်ထွက်ပေါ်လေ့ရှိသည့် နိုဝင်ဘာလ ဆန်းမှစတင်၍ ကျဆင်းလေ့ရှိပြီး ဖေဖေါ်ဝါရီလကုန်ပိုင်းနှင့် မတ်လဆန်းများတွင် ဈေးနှုန်းပြန်တက်လေ့ ရှိပါသည်။

          ယခုနှစ် မိုးစပါးသစ်ထွက်ပေါ်သည့်အချိန်တွင် အိမ်နီးချင်း တရုတ်နိုင်ငံ ပြည်နယ်(၄)ခု၌ ရာသီဥတု ဖောက်ပြန် မှုကြောင့် စပါးခင်းများပျက်စီးခဲ့၍ ဆန်လိုအပ်ချက်မြင့်မားနေပြီး နှစ်စဉ်တရုတ်နိုင်ငံသို့ ဆန်တင်သွင်း နေသည့် ဗီယက်နမ်နိုင်ငံကလည်း မုန်တိုင်းကြောင့် စပါးခင်းများပျက်စီးခဲ့၍ ဆန်ထွက်ရှိမှု နည်းပါးသည့်အတွက် တရုတ် နိုင်ငံသို့ တင်ပို့နိုင်ခြင်းမရှိသဖြင့် တရုတ်နိုင်ငံသည် လိုအပ်ချက်အရ မြန်မာနိုင်ငံမှ ဆန်နှင့်ဆန်ကွဲ အမြောက်အများ ဝယ်ယူနေခြင်း၊  ဆန်အပြင် ဆန်ကွဲ ဝယ်လိုအားပါကောင်းခဲ့သဖြင့် ဆန်ထွက်ပစ္စည်းဈေး ပိုမိုရရှိခဲ့ပြီး ကြိတ်ခွဲမှု တွက်ခြေကိုက်နေသည့်အတွက် စပါးရရှိရေး စက်ပိုင်များ ဈေးပေးဝယ်ယူမှုရှိခဲ့ခြင်း၊ မန္တလေးတိုင်းဒေသကြီး၊ မတ္တရာ ဘက်မှ ကုန်သည်များကလည်း နယ်ဆင်း၍ စပါးအတိုင်း ဈေးပေးဝယ်ယူမှုရှိခဲ့ခြင်း၊ ဘင်္ဂလားဒေ့ရှ်၊ မလေးရှား၊  ဖိလစ်ပိုင်နိုင်ငံတို့ကလည်း ဆန်ဝယ်ယူရန်မေးမြန်း စုံစမ်းမှုများရှိနေခြင်း၊ မြန်မာနိုင်ငံတွင်လည်း မိုးစပါးစတင် စိုက်ပျိုးချိန်၌ မိုးရေလုံလောက်စွာ မရရှိခဲ့ခြင်း၊ ရိတ်သိမ်းချိန်တွင် မိုးရွာသွန်းမှုကြောင့် စပါးများပျက်စီးမှုရှိသဖြင့် အထွက်နှုန်းလျော့နည်းနိုင်သည့် အခြေအနေတွင်ရှိနေခြင်း တို့ကြောင့် စပါး၊ ဆန်ဈေးများသည် ယခင်နှစ်များထက် မြင့်တက်နေကြောင်း တွေ့ရှိရပါသည်။ လက်ရှိဖြစ်ပေါ်နေသော စပါး၊ ဆန် ဈေးနှုန်းနှင့် နှစ်အလိုက်ဖြစ်ပေါ်ခဲ့သည့် စပါး၊ ဆန်ဈေးနှုန်းနှိုင်းယှဉ်ချက် အခြေအနေမှာ တစ်ဖက်ပါအတိုင်းဖြစ်ပါသည်-

ပြည်ပသို့ ဆန်၊ ဆန်ကွဲ တင်ပို့နိုင်မှုအခြေအနေ

            ပြည်တွင်းစားသုံးပြီး ပိုလျှံသည့်ဆန်များအား ပြည်ပသို့တင်ပို့ခဲ့ရာ ၂၀၁၆-၂၀၁၇ ဘဏ္ဍာနှစ်တွင် နိုင်ငံပေါင်း ( ၅၈)နိုင်ငံသို့ ဆန်နှင့် ဆန်ထွက်ပစ္စည်း တန်ချိန်(၁.၇၅၀) သန်း၊ တန်ဖိုးအားဖြင့်(၅၅၃.၉၆၁) ဒေါ်လာသန်း၊  ၂၀၁၇-၂၀၁၈ ဘဏ္ဍာနှစ်တွင် နိုင်ငံပေါင်း( ၅၉ )နိုင်ငံသို့ တန်ချိန်(၃.၅၉၀)သန်း၊ တန်ဖိုးအားဖြင့်(၁၁၄၂.၁၅၉)ဒေါ်လာသန်း၊  ၂၀၁၈-၂၀၁၉ ဘဏ္ဍာနှစ်တွင် နိုင်ငံပေါင်း(၆၆  )နိုင်ငံသို့ တန်ချိန် (၂.၃၅၆)သန်း၊ တန်ဖိုးအားဖြင့် (၇၀၉.၆၉၃) ဒေါ်လာသန်း၊ ၂၀၁၉-၂၀၂၀  ဘဏ္ဍာနှစ်တွင်  နိုင်ငံပေါင်း( ၆၇ )နိုင်ငံသို့  တန်ချိန်(၂.၅၈၆)သန်း၊    တန်ဖိုးအားဖြင့်    ( ၇၉၄.၃၈၈)ဒေါ်လာသန်း၊ ယခုဘဏ္ဍာနှစ် ၂၀၂၀-၂၀၂၁တွင် (၁၅.၁.၂၀၂၁) ရက်နေ့ထိ နိုင်ငံပေါင်း ( ၃၃ )နိုင်ငံသို့ (၀.၇၂၈)သန်း၊ တန်ဖိုးအားဖြင့်(၂၇၅.၀၇၈)ဒေါ်လာ သန်း တင်ပို့နိုင်ခဲ့၍ နှစ်စဉ်ပျမ်းမျှ (၁.၅)သန်းမှ (၂.၅)သန်းကြား တင်ပို့နိင်ခဲ့ပြီး ၂၀၁၇-၂၀၁၈ ဘဏ္ဍာနှစ်သည် မြန်မာနိုင်ငံ၏ ဆန်တင်ပို့မှု သမိုင်းတလျှောက် နှစ်ပေါင်း(၇၀) ကာလ အတွင်း  စံချိန်တင် တင်ပို့နိုင်ခဲ့သည့် နှစ်တစ်နှစ်ဖြစ်ပါသည်။ ဧည့်မထဆန်ဖြူ တန်းမြင့်ဆန်များအပြင် ဆန်လုံးညို နှင့် ပေါင်းဆန်၊ ကောက်ညှင်းဆန်များ တစ်နှစ်ထက်နှစ်ပိုမို တင်ပို့နိုင်ခဲ့ပြီး ၊ ယခုနှစ်တွင် တန်းမြင့်ဆန်များ ပိုမို တင်ပို့နိုင်သည့်အတွက် ဈေးနှုန်းပိုမိုရရှိသည့်အပြင် တန်းမြင့်ဆန် ကြိတ်ခွဲထုတ်လုပ်ခြင်းကြောင့် ဆန်ကွဲအထွက် များသော်လည်း ဆန်ကွဲသည်လည်း ဈေးကောင်းရရှိနေသဖြင့် နိုင်ငံခြား ဝင်ငွေပိုမိုရရှိသည့် အားသာချက်ရှိကြောင်း တွေ့ရှိရပါသည်။

        ထိုင်းနိုင်ငံသည် နှစ်ဦးပိုင်းတွင် အဆိုးဆုံးမိုးခေါင်မှုဒဏ်ခံခဲ့ရပြီး ဆန်ထုတ်လုပ်မှုထိခိုက်ခဲ့၍ ဆန်ရောင်း အားနည်းခြင်း၊ ဘတ်ငွေစျေးတက်ခြင်းကြောင့် ဆန်စျေးသည် ပြိုင်ဘက် ဗီယက်နမ်၊ အိန္ဒိယနိုင်ငံတို့ထက် ဆန်စျေး ပိုကြီးမြင့်နေခြင်းတို့ကြောင့်  လက်ရှိတွင် ရောင်းလိုအား နည်းနေဆဲဖြစ်ကြောင်း သိရှိရပါသည်။

            ဗီယက်နမ်နိုင်ငံတွင်လည်း မုန်တိုင်းကြောင့် စပါးခင်းများပျက်စီးခဲ့၍ ဆန်ထွက်ရှိမှု နည်းပါးခဲ့ခြင်း၊ ကမ္ဘာ့ကပ်ရောဂါကြောင့် စားနပ်ရိက္ခာဖူလုံရေး စိုးရိမ်မှုများရှိနေခြင်းတို့ကြောင့် လက်ရှိတွင် ဆန်ရောင်းလိုအား ကျဆင်းနေကြောင်း သိရှိရပါသည်။

အိန္ဒိယနိုင်ငံတွင် တောင်ပိုင်းပြည်နယ်များ၌ မိုးကြီးမှုကြောင့် ရိတ်လုနီးပါးစပါးများ ပျက်စီးခဲ့ရသဖြင့် စပါးရိတ်သိမ်းမှု သီတင်းပတ်အနည်းငယ်နောက်ကျခဲ့ပြီး အထွက်နှုန်းကျဆင်းနိုင်ဖွယ်ရှိသော်လည်း ယခင်နှစ် ဆန်လက်ကျန်များရှိနေသေးပြီး အခြားဆန်တင်ပို့နိုင်ငံများနှင့် နှိုင်းယှဉ်ပါက ဈေးနှုန်းလည်း ချိုသာနေသည့် အတွက် ဘင်္ဂလားဒေ့ရှ်နိုင်ငံအပြင် တရုတ်နိုင်ငံနှင့် ဗီယက်နမ်နိုင်ငံများကလည်း ဆယ်စုနှစ်များစွာအတွင်း အိန္ဒိယ ဆန်တင်သွင်းလာကြကြောင်း သိရှိရပါသည်။

            ၂၀၂၀ ခုနှစ်တွင် နိုင်ငံအတော်များများ၌ ကိုဗစ်ကပ်ရောဂါကြောင့် ဝင်ငွေကျဆင်းမှုနှင့် ကုန်စည် ထောက်ပံ့ရေးလမ်းကြောင်း ပြတ်တောက်မှုများ ဖြစ်ပေါ်နေခြင်း၊  ရေကြီးမှု၊ မိုးခေါင်မှုနှင့် မုန်တိုင်းဒဏ်များခံခဲ့ရ သဖြင့် သီးနှံများပျက်စီးခဲ့ခြင်းတို့ကြောင့်  ရိက္ခာဖူလုံမှုကိုစိုးရိမ်ပြီး ဆန်များသိုလှောင်လာကြပါသည်။ လက်ရှိ အခြေအနေတွင် ထိုင်း၊ ဗီယက်နမ်နိုင်ငံများက ဆန်လက်ကျန်နည်းနိုင်သည့် အခြေအနေတွင်ရှိနေသည့်အတွက် ရောင်းလိုအားနည်းနေပြီး၊ ဆန်တင်သွင်းရန် လိုအပ်နေသည့် တရုတ်၊ ဘင်္ဂလားဒေ့ရှ်နှင့် ဖိလစ်ပိုင်နိုင်ငံများသည် ဆန်ရောင်းအားရှိသည့် အိန္ဒိယနှင့် မြန်မာနိုင်ငံမှသာ ဝယ်ယူတင်သွင်းရမည်ဖြစ်၍ ပြည်ပဆန်တင်ပို့မှု မြင့်တက် လာနိုင်သလို  ဆန်ဈေးများလည်း မြင့်တက်လာနိုင်ကြောင်း လေ့လာသိရှိရပါသည်။

မူဆယ်(၁၀၅)မိုင် ကုန်သွယ်ရေးဇုန်သို့ အပတ်စဉ် ဖရဲသီးအမျိုးအစားအလိုက် ဝင်ရောက်မှုနှင့် ဈေးနှုန်း နှိုင်းယှဉ်ချက်

            တရုတ်နိုင်ငံသို့ နယ်စပ်ဂိတ်မှတဆင့် မြန်မာဖရဲသီးများ တင်ပို့ရောင်းချရန်အတွက် မူဆယ်(၁၀၅)မိုင်ကုန်သွယ်ရေးဇုန်သို့ မြန်မာနိုင်ငံဒေသအသီးသီးမှ ဖရဲသီးများ ဝင်ရောက်လျက်ရှိရာ ဖရဲအကြားသီးကို မန္တလေး၊ မြင်းခြံ၊ ဝမ်းတွင်း၊ ကျိုက်ထို၊ ဘီးလင်း၊ ချောင်းဦး၊ သာစည်၊ နဘူးအိုင်တို့မှ လည်းကောင်း၊ ဖရဲအဝိုင်းကြားသီးကို မန္တလေး၊ မြင်းခြံ၊ ချောင်းဦးတို့မှလည်းကောင်း၊ အစေ့မဲ့ဖရဲသီး ကို မြင်းခြံ၊ ဝမ်းတွင်း၊ စစ်ကိုင်းတို့မှလည်းကောင်း အသီးသီး တင်ပို့ခဲ့ကြကြောင်း သိရှိရပါသည်။ ယခုအပတ်တွင် ဖရဲသီးဈေးနှုန်းများမှာ အနည်းငယ်လျော့နည်းပြီး တရုတ်နိုင်ငံ၏ ဝယ်လိုအားကြောင့် အရောင်းအဝယ်မှာ ပုံမှန်ဖြစ်နေကြောင်း သိရှိရပါသည်။ မူဆယ်(၁၀၅)မိုင် ကုန်သွယ်ရေးဇုန် သို့ အပတ်စဉ် ဖရဲသီးဝင်ရောက်မှုနှင့် ဈေးနှုန်းအခြေအနေ နှိုင်းယှဉ်ချက်ကို အောက်ပါအတိုင်း တင်ပြအပ်ပါသည် -

နယ်စပ်ကုန်သွယ်ရေးဖြင့် ဖရဲသီးတင်ပို့မှုအခြေအနေ

          မြန်မာနိုင်ငံမှ ထွက်ရှိသည့် ဖရဲသီးအပါအဝင် သစ်သီးဝလံများကို နယ်စပ်ကုန်သွယ်ရေး လမ်းကြောင်းဖြင့် ပြည်ပနိုင်ငံများသို့ နေ့စဉ် တင်ပို့လျက်ရှိရာ ၂၀၂၀-၂၀၂၁ ဘဏ္ဍာနှစ် (၁-၁၀-၂၀၂၀ ရက်နေ့မှ ၈-၁-၂၀၂၁ အထိ)  စုစုပေါင်း သစ်သီးဝလံတင်ပို့မှုမှာ တန်ချိန်(၅၁၇၀၅၉)တန်၊ တန်ဖိုး အမေရိကန် ဒေါ်လာ (၁၈၈.၃၈၁)သန်း ရှိကြောင်း တွေ့ရှိရပါသည်။ ၎င်းတို့ အနက် ဖရဲသီး တင်ပို့မှုမှာ တန်ချိန် (၁၁၆၀၇၀.၃) တန်၊ တန်ဖိုးအားဖြင့် အမေရိကန်ဒေါ်လာ(၁၁.၄၃၁) သန်း ရှိသည်ကိုတွေ့ရှိ ရပါသည်။ ဖရဲသီးတင်ပို့မှုမှ ရရှိသော ပြည်ပဝင်ငွေသည် သစ်သီးဝလံများအားလုံး တင်ပို့မှု၏ (၆%) ခန့်ရှိပြီး ဒုတိယအများဆုံး ပြည်ပဝင်ငွေရရှိသည့် သီးနှံဖြစ်သည်ကို တွေ့ရှိရပါသည်။ ပြည်ပဝင်ငွေ အများဆုံး ရရှိသည့်သီးနှံမှာ တစ်သျှူး ငှက်ပျောဖြစ်ပြီး သစ်သီးဝလံအားလုံး တင်ပို့မှု၏ (၉၁%)ရှိ သည်ကို  တွေ့ရှိရပါသည်။

သုံးသပ်တင်ပြချက်

          ဇန်နဝါရီလ ဒုတိယအပတ်အတွင်း ဖရဲဈေးနှုန်းအနေဖြင့် တစ်တန်လျှင် ယွမ်(၁၅၀၀)ကျော် အထိသာ ရရှိခဲ့ပြီး ယခင်အပတ်ထက် ဈေးနှုန်းထိုးကျသွားကြောင်း သိရှိရပါသည်။ ထိုသို့ ဈေးနှုန်း ကျဆင်းရခြင်းမှာ တရုတ်ပြည်တွင်း၌ အအေးပိုလာကာ ကားများသွားလာရန် ခက်ခဲခြင်း၊ အချို့ ပြည်နယ်များတွင် Covid-19 ရောဂါပိုးများ တွေ့ရှိရသဖြင့် သွားလာမှုကန့်သတ်ထားသည့် ပြည်နယ် များသို့ ကားများဝင်ရောက်၍ မရခြင်းစသည်တို့ကြောင့် ဖရဲသီးဈေးနှုန်းများ ကျသွားရခြင်း ဖြစ် ကြောင်း သိရှိရပါသည်။

လက်ရှိ ဇန်နဝါရီလ တတိယအပတ်အတွင်း ဖရဲသီးဈေးမှာ ယွမ်(၂၇၀၀)အထိ ပြန်လည်ရရှိ နေပြီဖြစ်ကြောင်း သိရှိရပါသည်။ ဖရဲသီးတင်ပို့မှုမှာ နှစ်သစ်ကူးကာလဖြစ်သဖြင့် ဆက်လက်အရောင်း အဝယ် ဖြစ်နိုင်ကြောင်း သိရှိရပါသည်။ တရုတ်သို့  ဖရဲသီးတင်ပို့မှုကာလမှာ နှစ်စဉ် အောက်တိုဘာလမှ မေလအထိ ဖြစ်ပြီး တရုတ်နိုင်ငံ၌ ဇွန်လမှ အောက်တိုဘာလအတွင်း ဖရဲသီးထွက်ရှိသဖြင့် အဆိုပါ ကာလတွင် တင်ပို့ရန် အဆင်မပြေနိုင်ကြောင်း သိရှိရပါသည်။

ဖရဲသီးတင်ပို့မှုအနေဖြင့် တရုတ်ဈေးကွက်အပြင် UAE(ဒူဘိုင်း)ဈေးကွက်သစ်သို့ ချဲ့ထွင် တင်ပို့နေပြီဖြစ်ရာ ပထမအကြိမ် ၂၀၂၀ ပြည့်နှစ်၊ ဒီဇင်ဘာလ ၁၁ ရက်နေ့တွင် အစေ့မဲဖရဲ (၅)တန် စတင် တင်ပို့နိုင်ခဲ့ပြီး၊ ဒုတိယအကြိမ် ၂၀၂၁ ခုနှစ်၊ ဇန်နဝါရီလ ၁၆ ရက်နေ့တွင် အစေ့မဲဖရဲ (၂၀)တန် တင်ပို့ ခဲ့ကြောင်း၊ တတိယအကြိမ် အစေ့မဲဖရဲ (၂၁)တန် ဆက်လက်တင်ပို့ရန် စီစဉ်ဆောင်ရွက်လျက် ရှိကြောင်း ဖရဲသီးစိုက်ပျိုးထုတ်လုပ်တင်ပို့ရောင်းချသူများအသင်းမှ သိရှိရပါသည်။ UAE(ဒူဘိုင်း) ဈေးကွက်သည် အရည်အသွေးကောင်းမွန်ပါက တစ်နှစ်ပတ်လုံး ဝယ်ယူ/ရောင်းချရန် သဘောတူညီမှု ရရှိခဲ့ကြောင်း မြန်မာနိုင်ငံ သစ်သီးဝလံပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ်တင်ပို့ ရောင်းချသူများအသင်းမှ သိရှိရပါ သည်။

         ထို့ကြောင့်ဖရဲသီးတင်ပို့မည့် တောင်သူများ၊ ကုန်သည်လုပ်ငန်းရှင်များအနေဖြင့် မူဆယ်၌ ဖြစ်ပေါ်နေသည့် ဖရဲဈေးကွက်၊ ဈေးနှုန်းဆိုင်ရာ အခြေအနေများကို စုံစမ်းမေးမြန်း၍ ခူးဆွတ် တင်ပို့ သင့်သည့်အပြင် UAE(ဒူဘိုင်း)ဈေးကွက်သစ်သို့ အရည်အသွေးကောင်းမွန်သည့် အသီးများတင်ပို့နိုင်ရေး၊ တရုတ်ဈေးကွက်တစ်ခုတည်းမမှီခိုဘဲ ဥရောပဈေးကွက်သစ်သို့ ချဲ့ထွင်နိုင်ရေးအတွက် အသင်း အဖွဲ့များ၊ ကုန်သည်လုပ်ငန်းရှင်များ၊ ကုန်စည်ဒိုင်များ၊ သက်ဆိုင်ရာဌာနများက သတင်းအချက်အလက်များ ကျယ်ကျယ်ပြန့်ပြန့် ရရှိနိုင်ရေးအတွက် ကူညီဆောင်ရွက်ပေး သင့်ပါသည်။

        ပန်းနှမ်းသည် မြန်မာနိုင်ငံရှိ ဆီထွက်သီးနှံများအနက် တစ်မျိုးအပါအဝင်ဖြစ်ပြီး ပြည်ပဝင်ငွေ ရှာဖွေပေးသော သီးနှံအမျိုးအစား တစ်မျိုးလည်း ဖြစ်ပါသည်။ ပန်းနှမ်းသည် သမပိုင်းဒေသ သီးနှံအမျိုးအစား ဖြစ်သော်လည်း အပူပိုင်းဒေသ၌လည်း စိုက်ပျိုးဖြစ်ထွန်းသည့် အပင်ဖြစ်သည်။ နေကြာပင် နှင့် မျိုးရင်းတူသော အပင်ဖြစ်ပြီး တစ်ခင်းလုံးဝါထိန် နေအောင်ပွင့်သည်။ တစ်ဧက (7)တင်းမှ (12) တင်း ခန့်အထိ ထွက်၍ အစေ့တစ်တင်းမှ ဆီ(၆)ပိဿာခန့် ရရှိနိုင်သဖြင့် တစ်ဧကစိုက်ပျိုးလျှင် ဆီ(42)ပိဿာ ကျော်ခန့် ရရှိနိုင်ကြောင်း လေ့လာသိရှိရပါသည်။ ပန်းနှမ်းသည် ရေကြမ်း၊ မြေကြမ်း၊ ရာသီဥတု ကြမ်းတမ်းမှုကို ခံနိုင်သည့် အပင်အမျိုးအစားဖြစ်သဖြင့် ပြည်တွင်းဒေသအနှံ့ စိုက်ပျိုးနိုင်သော်လည်း ယခုလက်ရှိတွင် ရှမ်းပြည်နယ်၊ စစ်ကိုင်းတိုင်းဒေသကြီးနှင့် ကချင်ပြည်နယ်တို့တွင် အဓိကစိုက်ပျိုးကြောင်း လေ့လာသိရှိရပါသည်။

ပန်းနှမ်းကို အောက်တိုဘာလနှင့် နိုဝင်ဘာလများတွင် စိုက်ပျိုးပြီး ဇန်နဝါရီလ၊ ဖေဖော်ဝါရီလ နှင့် မတ်လများတွင် ထွက်ရှိကြောင်း လေ့လာသိရှိရပါသည်။ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန၏ စာရင်းအရ 2021 ခုနှစ်၊ ပန်းနှမ်း ရည်မှန်းစိုက်ဧကအနေဖြင့် (343,915)ဧက၊ ရိတ်ဧက (343,915)၊ အထွက်နှုန်း (10.94)တင်း ဖြစ်သည့်အတွက် ပန်းနှမ်းအထွက်တင်းပေါင်း (3,763,310) တင်း ဖြစ်ကြောင်း သိရှိရပါသည်။

(21.1.2021)ရက်နေ့ ပြည်တွင်း စျေးကွက်တွင် ဖြစ်ပေါ်နေသော ပန်းနှမ်းစျေးနှုန်းများမှာ

မန္တလေး     - ၁၀၂၀၈၀၀/- ကျပ်

တောင်ကြီး  - ၉၇၉၈၀၀/- ကျပ် ဖြစ်ကြောင်း လေ့လာသိရှိရပါသည်။ 

           ပန်းနှမ်း ပြည်ပတင်ပို့မှု အခြေအနေမှာ 2019-2020 ဘဏ္ဍာနှစ်တွင် တန်ချိန်(10,797.350) တန်၊ တန်ဖိုးအားဖြင့် အမေရိကန်ဒေါ်လာ (7.002)သန်း တင်ပို့နိုင်ခဲ့ပါသည်။ 2020-2021 ဘဏ္ဍာနှစ် (1.10.2020 မှ 8.1.2021) ရက်နေ့ထိ ပြည်ပနိုင်ငံများသို့ ပန်းနှမ်း တန်ချိန် (152) တန်၊ တန်ဖိုးအား ဖြင့် အမေရိကန်ဒေါ်လာ (0.122)သန်း တင်ပို့နိုင်ခဲ့ကြောင်း လေ့လာသိရှိရပါသည်။

          လက်ရှိအခြေအနေအရ ပန်းနှမ်းကို အိန္ဒိယနှင့် တရုတ်နိုင်ငံတို့က ဝယ်ယူမှုရှိနေသဖြင့် စတင် ထွက်ပေါ်ချိန်မှာပင် စျေးကောင်း ရရှိနေကြောင်း  မန္တလေး ပဲမျိုးစုံစျေးကွက်မှ လေ့လာသိရှိရပါသည်။ ပန်းနှမ်းကို  အိန္ဒိယနိုင်ငံက အများဆုံးဝယ်ယူပြီး တရုတ်နိုင်ငံက ဒုတိယအများဆုံး ဝယ်ယူကြောင်း သိရှိရပါသည်။ ယခုနှစ် ပန်းနှမ်း စတင်ပေါ်ထွက်ချိန်ဖြစ်သည့် ဒီဇင်ဘာလ၌ပင် ယခင်နှစ် အလားတူ ကာလတွင်  သုံးတင်းဝင်တစ်အိတ်လျှင် (၈၀၀၀)ကျပ်ခန့် စျေးပိုမိုရရှိနေကြောင်း လေ့လာသိရှိရပါ သည်။

        ပန်းနှမ်းကို ပြည်ပကဝယ်ယူမှုရှိသကဲ့သို့ ပြည်တွင်း၌ ဆီကြိတ်ပြီး မုန့်လုပ်ငန်းများတွင် ကြော်ဆီ အဖြစ် အသုံးပြုကြောင်း လေ့လာသိရှိရပါသည်။ ပြည်ပနိုင်ငံများတွင် ပန်းနှမ်းကို စားသုံး ဆီအဖြစ် အသုံးပြုခြင်းထက် အလှကုန်ပစ္စည်းနှင့် ဆေးဝါးထုတ်လုပ်သည့် လုပ်ငန်းများတွင် အသုံးပြု ကြောင်း လေ့လာသိရှိရပါသည်။ ပန်းနှမ်းကို အိန္ဒိယနိုင်ငံနှင့် တရုတ်နိုင်ငံများမှ ဝယ်လိုအားကောင်း ပါက ယခင်နှစ်ထက် တင်ပို့မှု ပိုများနိုင်မည်ဖြစ်ကြောင်း လေ့လာသိရှိရပါသည်။

လက်ရှိအခြေအနေတွင် ပန်းနှမ်းများမှာ ရိတ်သိမ်းဆဲဖြစ်သော်လည်း ယခုနှစ်တွင် ရာသီဥတု ကောင်းမွန်သောကြောင့် ပန်းနှမ်းအထွက်နှုန်းမှာ အသင့်အတင့် ကောင်းမွန်နိုင်မည်ဟု ခန့်မှန်းထားကြောင်း လေ့လာသိရှိရပါသည်။