ပြည်တွင်းကုန်သွယ်မှုသတင်း

     ရန်ကုန်တိုင်းဒေသကြီး၊ သန်လျင်ခရိုင် ခရမ်းမြို့နယ်၌ ယခုနှစ်ဆောင်းသီးနှံ စိုက်ပျိုးရာသီတွင် မျိုးစုံသီးနှံစိုက်ပျိုးထုတ်လုပ်မှုကဏ္ဍဖွံ့ဖြိုးတိုးတက်စေရန်နှင့် ဒေသအတွင်းစားနပ် ရိက္ခာဖူလုံစေရန်အတွက် စိုက်ပျိုးထားရှိသည့် မြေပဲစိုက်ခင်းများမှာ အောင်မြင်ဖြစ်ထွန်းပြီး စတင်ထွက်ပေါ်နေပြီဖြစ်ကြောင်း ယခင်နှစ်ထက်သီးနှံအထွက်နှုန်းများလည်း ပိုမိုကောင်းမွန်လျက်ရှိကြောင်း ခရမ်းမြို့နယ်အတွင်းရှိ တောင်သူများထံမှ သိရှိရပါသည်။

      ခရမ်းမြို့နယ်တွင် ယခုနှစ် ဆောင်းဆီထွက်သီးနှံစိုက်ပျိုးရာသီ၌ မြေပဲသီးနှံစိုက်ပျိုးရေးကို တစ်မြို့နယ်လုံးလျာထားဧက(၆၈၂)ဧကအား ပြည့်မီအောင်စိုက်ပျိုးနိုင်ခဲ့ပြီး အောင်မြင်ဖြစ်ထွန်းမှုများလည်းရှိကြောင်း သိရှိခဲ့ရပြီး ယခုဆိုလျှင် မြေပဲသီးနှံစိုက်ခင်းများအား စတင်နုတ်ယူနေသော အချိန်ကာလဖြစ်သောကြောင့် ဒေသခံတောင်သူများက အလုပ်သမားများ ငှားရမ်းပြီး တစ်ရက်လျှင် လူတစ်ဦးငှားရမ်းခမှာ(၃၀၀၀)ကျပ်ဖြစ်ပြီး လှိုင်လှိုင်နုတ်ယူနေသော အချိန်ဖြစ်သဖြင့် သီးနှံအထွက်နှုန်းအနေဖြင့် တစ်ဧကလျှင် ပျမ်းမျှတင်း(၆၀)ခန့်ထွက်ရှိကြောင်း သိရှိခဲ့ပြီး တစ်ဧကကုန်ကျစရိတ်နှင့် တွက်ကြည့်ပါက မြေပဲစိုက်တောင်သူများအတွက် အကျိုးအမြတ် ရရှိသော သီးနှံဖြစ်ကြောင်း သိရှိရပြီး ခရမ်းမြို့နယ်အတွင်းရှိ ဒေသခံတောင်သူများသည် စိုက်ပျိုးရေးဦးစီးဌာန၏ ကြီးကြပ်မှုဖြင့် နှစ်စဉ်ဆောင်းသီးနှံစိုက်ပျိုးရာသီးတွင် ဈေးကွက်ရှိသည့် ပဲတီစိမ်း၊ ပဲတီရွှေဝါနှင့် ဆီထွက်မြေပဲသီးနှံများကို စီးပွားဖြစ်စိုက်ပျိုးလုပ်ကိုင်ကြကြောင်း သီးနှံစိုက်ခင်းများမှာ ပိုးမွှားကျ ရောက်မှုမရှိသည့်အတွက် အောင်မြင်ဖြစ်ထွန်းလျက်ရှိပြီး ယခင်နှစ် ကထက် အထွက်နှုန်းများ ကောင်းမွန်ခဲ့သည့်အပြင် ဆီကြိတ်ခွဲထုတ်လုပ်ရောင်းချရာတွင်လည်း မြေပဲဆီတစ်ပိဿာ(၁၆၀၀၀) ကျပ်ဖြင့် ဒေသပေါက်ဈေးရောင်းချနေရသဖြင့် ဒေသခံတောင်သူ များ သီးနှံဝင်ငွေအကျိုးအမြတ် ရရှိကာ လုပ်ငန်းအဆင်ပြေလျက်ရှိကြောင်း သိရှိရပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ သန်လျင်ခရိုင် ခရမ်းမြို့နယ်၌ ဆောင်းသီးနှံစိုက်ပျိုးရာသီတွင် ဒေသခံတောင်သူများ သီးနှံဝင်ငွေတိုးပွားစေရန်၊ နိုင်ငံအတွင်းစားနပ်ရိက္ခာဖူလုံစေရန်နှင့် ပြည်ပ ဝင်ငွေတိုးပွားစေရေး ပြည်ပတင်ပို့နိုင်ရန် အလေးထားစိုက်ပျိုးထုတ်လုပ်လျက်ရှိသော ပဲတီစိမ်းနှင့် ပဲတီရွှေဝါတို့အား တစ်မြို့နယ်လုံးအတိုင်းအတာအနေဖြင့် ၂၀၂၃-၂၀၂၄ခုနှစ်တွင် စိုက်ဧက (၁၀၅၀၁၇)ဧက အောင်မြင်စွာဖြစ်ထွန်းပြီး ရာနှုန်းပြည့်စိုက်ပျိုးနိုင်ခဲ့ရာ ယခုအချိန်တွင် ရာနှုန်းပြည့် အောင်မြင်စွာ ရိတ်သိမ်းပြီးစီးကြောင်း လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနမှ သိရှိရပါသည်။

    ခရမ်းမြို့နယ်အတွင်းရှိ ရွာမကြီး(၆၄)ရွာအတွင်းရှိ ပဲစိုက်တောင်သူများအားလုံးသည် ပဲတီစိမ်းနှင့် ပဲတီရွှေဝါတို့အား ရာနှုန်းပြည့်စိုက်ပျိုးထုတ်လုပ်လျက်ရှိပြီး ပဲတီစိမ်းရေဆင်းမျိုးကို အဓိကအားထားစိုက်ပျိုးဖြစ်ထွန်းအောင်မြင်နိုင်ခဲ့ပြီး ယခုဆိုလျှင် ပဲတီစိမ်းနှင့် ပဲတီရွှေဝါစိုက်ဧကများအား ရာနှုန်းပြည့်အောင်မြင်စွာရိတ်သိမ်းနိုင်ခဲ့ပြီး (၁)ဧကအထွက်နှုန်း ပျှမ်းမျှ(၁၆.၆၃)တင်း ထွက်ရှိခဲ့ရာ တစ်မြို့နယ်လုံးအထွက်တင်း စုစုပေါင်း(၁၇၄၆၄၃၂)တင်း ထွက်ရှိခဲ့ကြောင်း သိရှိရပြီး ထွက်ရှိလာသော ပဲတီစိမ်းနှင့်ပဲတီရွှေဝါများအား ခရမ်းမြို့နယ်မှ နယ်ခံပဲအဝယ်ဒိုင် များမှ ဝယ်ယူပေးလျက်ရှိပြီး ပဲ(၁)တင်း ဈေးနှုန်းအနေဖြင့် ပဲတီစိမ်းရေဆင်းမျိုးမှာ (၁)တင်းလျှင် (၇၀၀၀၀)ကျပ်မှ (၇၂၀၀၀)ကျပ်၊ ပဲတီရွှေဝါ(၁)တင်းလျှင် (၇၈၀၀၀)ကျပ်မှ (၈၀၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း ခရမ်းမြို့နယ်အတွင်းရှိ ပဲအဝယ်ဒိုင်များအနေဖြင့် မိမိတို့၏ ကုန်အဝယ်ဒိုင်များမှ ရရှိလာသော ပဲတီစိမ်းနှင့်ပဲတီရွှေဝါတို့အား ရန်ကုန်မြို့ရှိ လှိုင်သာယာ၊ ရွှေပြည်သာ၊ ရွှေလင်ဗန်း စက်မှုဇုန်နှင့် ဒဂုံဆိပ်ကမ်းမြို့နယ်များရှိ ကုမ္ပဏီနှင့်စက်ရုံများသို့ ပြန်လည်တင်ပို့ရောင်းချလျက်ရှိကြောင်း သိရှိရပါသည်။

DOCA(ရန်ကုန်)

      တောင်ငူခရိုင်၊ ဖြူးမြို့၊ နေအိမ်ခြံဝင်းအတွင်းရှိ မြေကွက်လပ်များ၌ တစ်နိုင်တစ်ပိုင်စိုက်ပျိုးရေးဖြစ်သော ကင်ပွန်းချဉ်၊ ဆူးပုတ်၊ ဂွေးတောက်နှင့် ရှောက်ပင်များစိုက်ပျိုးရာမှ အပိုဝင်ငွေရရှိလျက်ရှိပါသည်။

      နွေဦးရာသီ ရွက်သစ်များထွက်ချိန်မှစ၍ ယခုအချိန်အထိ ဆူးပုတ်အခက် ၅ခက်ပါ တစ်စည်းလျှင် ၁၀၀ကျပ်၊ ကင်ပွန်းချဉ်ရွက် အခက် ၅ခက်ပါတစ်စည်းလျှင် ၁၀၀ကျပ်ဖြင့် ဖြူးမြို့စည်ပင်သာယာဈေးသို့ ‌ပေးပို့၍ရောင်းချနေနေပါသည်။

     ထို့တူ ဂွေးတောက်ရွက် ၅ခက်ပါတစ်စည်းလျှင် ၁၀၀ကျပ်၊ ရှောက်ရွက် ၃ခက်ပါ တစ်စည်းလျှင် ၁၀၀ကျပ်ဖြင့် ရောင်းချရပါသည်။ ယခုကာလတွင် ခြံထွက်ဟင်းရွက်ရောင်းချရာ တစ်နေ့အပိုဝင်ငွေ ကျပ်၁၀၀၀၀ခန့်ရရှိကြောင်း ဖြူးမြို့၊ ထန်းကုန်းရပ်ကွက်မှ တစ်နိုင်တစ်ပိုင်စိုက်ပျိုးရေးလုပ်ကိုင်သူတစ်ဦးထံမှသိရှိရပါသည်။

DOCA(ပဲခူး)

    တောင်ငူမြို့တွင် ၂၀၂၄ခုနှစ်၊ မတ်လ၌ ရွှေဘိုပေါ်ဆန်းတစ်အိတ်လျှင် ၁၅၀၀၀၀ကျပ်မှ ယခုလကုန်ပိုင်းတွင် တစ်အိတ်လျှင် ၁၅၅၀၀၀ကျပ်၊ ဖျာပုံပေါ်ဆန်းမှာ ယခင်လတွင် တစ်အိတ်လျှင် ၁၃၅၀၀၀ကျပ်မှ ယခုလကုန်ပိုင်းတွင် ၁၄၀၀၀၀ကျပ်ဖြင့် ဈေးနှုန်းအနည်းငယ်မြင့်တက်လာခဲ့ပြီး ဒေသပေါ်ဆန်းမှာ တစ်အိတ်လျှင် ၁၂၀၀၀၀ကျပ်၊ ဧည့်မထဆန်တစ်အိတ်လျှင် ၈၇၀၀၀ကျပ်မှ ၉၀၀၀၀ကျပ်ဖြင့် ဈေးနှုန်းတည်ငြိမ်နေပါသည်။

       စပါးမှာ ယခင်လကုန်ပိုင်းတွင် တင်း၁၀၀လျှင် ၂၄၀၀၀၀၀ကျပ်ရှိခဲ့ရာမှ ယခုလကုန်ပိုင်းတွင် တင်း၁၀၀လျှင် ၂၁၅၀၀၀၀ကျပ်ဖြင့် ဈေးနှုန်းအနည်းငယ်ကျဆင်းလာခဲ့ပါသည်။ ဆန်ကွဲကြီးတစ်အိတ်လျှင် ၅၆၀၀၀ကျပ်၊ ဆန်ကွဲသေးတစ်အိတ်လျှင် ၄၈၀၀၀ကျပ်၊ ဖွဲနု တစ်အိတ်လျှင် ၁၇၀၀၀ကျပ်ဖြင့် ဈေးနှုန်းတည်ငြိမ်နေပါသည်။

       မတ်ပဲ(၃၀ပိဿာဝင်အိတ်)မှာ ယခင်လကုန်ပိုင်းတွင် တစ်အိတ်လျှင် ၁၄၉၅၀၀ကျပ်ရှိခဲ့ရာမှ ယခုအပတ်တွင် တစ်အိတ်လျှင် ၁၃၈၅၀၀ကျပ်၊  ပဲတီစိမ်းမှာ ယခင်လကုန်ပိုင်းတွင် တစ်အိတ်လျှင် ၁၀၅၀၀၀ကျပ်ရှိခဲ့ရာမှ ယခုအပတ်တွင် တစ်အိတ်လျှင် ၈၅၀၀၀ကျပ်၊ ပဲလွန်းဖြူမှာ ယခင်လကုန်ပိုင်းတွင် တစ်အိတ်လျှင် ၁၁၀၀၀၀ကျပ်ရှိခဲ့ရာမှ ယခုအပတ်တွင် ၉၅၀၀၀ကျပ်ဖြင့် ဈေးနှုန်းကျဆင်း လာကြောင်း တောင်ငူမြို့ရှိ ဆန်၊ စပါး၊ ပဲပွဲရုံများမှသိရှိရပါသည်။

DOCA(ပဲခူး)

      တောင်ငူမြို့၊ ညောင်ပင်ဈေးတွင် ရာသီစာ မန်ကျည်းရွက်နုနှင့် ပဒပ်စာများပေါ်နေပြီဖြစ်ပါသည်။ မန်ကျည်းရွက်ကို ပဒပ်စာနှင့်ရော၍ အချဉ်ရည်ဟင်းအဖြစ်ချက်စားပါက ယခုကဲ့သို့ ပူပြင်း သောနွေရာသီတွင် ခံတွင်းမြိန်စေသောဟင်းတစ်ခွက်ဖြစ်ပါသည်။ ထို့ပြင် မန်ကျည်းရွက်ကို ကြက်သွန်နီပါးပါးလှီးပြီး မြေပဲဆံအားလှော်၍ သုပ်စားနိုင်သည့်အပြင် မျှင်ငါးပိနှင့် ငရုတ်သီးစိမ်းအား မီးဖုတ်ကာ ရောထောင်းပြီး မန်ကျည်းရွက်ထောင်းအဖြစ်လည်းစားသုံး၍ရပါသည်။

          ပဒပ်စာကို ဟင်းချိုဟင်းချက်ရာတွင် ပါဝင်ပစ္စည်းအဖြစ်အသုံးပြုနိုင်သကဲ့သို့ ပဲဟင်းချိုချက်ရာတွင်လည်း ထည့်ခတ်၍အသုံးပြုနိုင်ပါသည်။

     မန်ကျည်းရွက်နှင့် ပဒပ်စာဈေးနှုန်းများအနေဖြင့် ပဒပ်စာ(၃)ပွင့်ပါ အစည်းတစ်စည်းလျှင် (၂၀၀)ကျပ်နှင့် မန်ကျည်းရွက်(၁၀)ကျပ်သားလျှင် (၂၀၀၀)ကျပ်ဖြင့် ရောင်းချလျက်ရှိကြောင်း ညောင်ပင်ဈေးရှိ ဟင်းရွက်သည်များထံမှလေ့လာသိရှိခဲ့ရပါသည်။

DOCA(ပဲခူး)