ပြည်တွင်းကုန်သွယ်မှုသတင်း

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်တွင် ကွမ်းရွက်များကို ဧရာဝတီတိုင်းဒေသကြီး၊ ကနောင်၊ မြန်အောင်၊ ပဲခူးတိုင်း၊ ပေါက်ခေါင်း၊ ပေါင်းတလည်၊ စစ်ကိုင်းတိုင်းဒေသကြီး၊ မုံရွာမြို့တို့ရှိကွမ်းခြံများမှ တိုက်ရိုက်ဝယ်ယူရောင်းချကြောင်း၊ ကွမ်းသီးများကို ထားဝယ်မှတိုက်ရိုက်တင်ပို့သည့် ပြည်မြို့ရှိ ကွမ်းဒိုင်မှတစ်ဆင့် မှာယူရောင်းချကြောင်း၊ ကွမ်းစားထုံးကို မကွေးမှဝယ်ယူရောင်းချပြီး နှပ်ဆေးနှင့်ဗမာဆေးကို မုံရွာနှင့်ပခုက္ကူမှ ဝယ်ယူရောင်းချကြောင်းသိရှိရပါသည်။

        မင်းလှမြို့နယ်တွင် ကွမ်းသီး၊ ကွမ်းရွက် လက်လီ/ လက်ကားရောင်းချသည့်ဆိုင် (၁၀)ဆိုင်ခန့်ရှိပြီး ကွမ်းစိမ်းနှင့်ကွမ်းရွက်ဝါ(၂)မျိုးရှိသည့်အနက် ကွမ်းရွက်ဝါကို ပိုအစားများကြကြောင်း သိရှိရပါသည်။ ကွမ်းရွက်ဈေးနှုန်းအနေဖြင့် ၂၀၂၄ခုနှစ်၊ မတ်လ(တတိယပတ်)တွင် ကွမ်းရွက်ဝါ(၁)ပိဿာ လျှင် ကွမ်းရွက် အကြီး၊ အသေးနှင့် ဝယ်ယူတင်သွင်းရသည့်နေရာဒေသအလိုက် ကျပ်(၆၀၀၀-၇၀၀၀)၊ ကွမ်းသီးခြမ်း(၁)ပိဿာလျှင် ကျပ်(၇၅၀၀)၊ ကွမ်းသီးစိပ်(၁)ပိဿာလျှင် ကျပ်(၇၀၀၀)၊ ကွမ်းစားထုံး (၁)လီတာ(၁)ဘူးလျှင် ကျပ်(၉၀၀)၊ ကွမ်းစားနှပ်ဆေး(၁)ထုပ်လျှင် ကျပ်(၅၀၀-၆၀၀)၊ ဗမာဆေး(၁) ထုပ်လျှင် ကျပ်(၃၀၀-၅၀၀) စသည့်ဈေးနှုန်းများဖြင့် ရောင်းချလျက်ရှိကြောင်း သိရှိရပါသည်။

       အရောင်းအဝယ်အနေဖြင့် (၁)ရက်လျှင် ကွမ်းရွက်ပိဿာချိန်(၁၀)ပိဿာနှင့်အထက်ရောင်းချရပြီး ကွမ်းသီး၊ ကွမ်းစိပ်မှာ (၅)ပိဿာမှ (၆)ပိဿာထိပုံမှန်ရောင်းချရကြောင်း၊ ကွမ်းသီး၊ ကွမ်းရွက်ဈေးနှုန်းမှာ မတည်ငြိမ်သော်လည်း ယခုမတ်လ(တတိယပတ်)တွင် ကွမ်းသီးဈေးနှုန်းနှင့် အခြားကွမ်းပစ္စည်းဈေးနှုန်းများမှာ တည်ငြိမ်နေပြီး ကွမ်းရွက်ဈေးနှုန်းမှာ သယ်ယူရသည့်လမ်းပန်းဆက်သွယ်ရေးကောင်းမွန်လာသည့်အပြင် ကွမ်းခြံများမှာလည်း ကွမ်းရွက်များလှိုင်လှိုင်ထွက်ရှိနေသောကြောင့် မတ်လ(တတိယပတ်)တွင် အကျဈေးနှုန်းဖြင့် အရောင်းအဝယ်ဖြစ်လျက်ရှိကြောင်း အထက်မင်းလှ-သရက်ကားလမ်းဘေးရှိ ကွမ်းသီး၊ ကွမ်းရွက်ရောင်းချသည့် ကွမ်းဆိုင်ပိုင်ရှင်တစ်ဦးထံမှသိရှိရပါသည်။

DOCA(မကွေး)

     မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့သည် စိုက်ပျိုးရေးဒေသဖြစ်သော်လည်း စပါးစိုက်ဧကနည်းပြီး ဆန်မှာ အခြားဒေသတိုင်းများမှ ဝယ်ယူတင်သွင်းရသော ဒေသဖြစ် ပါသည်။ မင်းလှမြို့သို့ စစ်ကိုင်းတိုင်းဒေသကြီး၊ ရွှေဘိုမြို့နယ်၊ ရေဦးမြို့နှင့် မကွေးတိုင်း၊ မကွေး၊ မင်းဘူး၊ စလင်း၊ ဆင်ဖြူကျွန်းနှင့် ဧရာဝတီတိုင်း၊ ဖျာပုံ၊ ပုသိမ်၊ မြောင်းမြ၊ မြန်အောင်၊ ကြံခင်း၊ ဟင်္သတတို့မှ ကုန်လမ်း၊ ရေလမ်းတို့ဖြင့် ဆန်အိတ်များဝင်ရောက်လျက်ရှိကြောင်းသိရှိရပါသည်။

     ၂၀၂၄ခုနှစ်၊ မတ်လ(တတိယပတ်)တွင် အထက်မင်းလှမြို့၌ အရောင်းအဝယ်ဖြစ်လျက်ရှိသော ဆန်ဈေးနှုန်းများမှာ ဧရာပဒေသာဆန် ရွှေပိုးအိမ်(၂၄)ပြည်ပါ(၁)အိတ်လျှင် ကျပ်(၁၇၀၀၀၀)၊ စိန်ရတီ(စိမ်း) ကျပ်(၁၆၀၀၀၀)၊ စိန်ရတီ(နီ) ကျပ်(၁၇၀၀၀၀)၊ ကုန်းဇောင်း(အလွတ်) ကျပ် (၁၅၆၀၀၀)၊ မနောသုခ ကျပ်(၁၁၅၀၀၀)၊ ပေါ်ဆန်း(ရွှေဘို) ကျပ်(၁၆၈၀၀၀)၊ ပေါ်ဆန်း(ဖျာပုံ)(၁) အိတ်လျှင် ကျပ်(၁၆၈၀၀၀)၊ ရက်(၉၀) ကျပ်(၁၁၉၀၀၀)၊ ပေါင်းဆန် ကျပ်(၆၀၀၀၀)၊ ဧရာပဒေသာ(သစ်) ကျပ်(၁၄၇၀၀၀) ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိကြောင်း အထက်မင်းလှမြို့၊ အမှတ်(၉)ရပ်ကွက်နေ ဆန်ရောင်းချသည့်ဆန်ကုန်သည်တစ်ဦးထံမှသိရှိရပါသည်။ ယခင် မတ်လ(ဒုတိယပတ်)ဈေးနှုန်းတို့နှင့်နှိုင်းယှဉ်ပါက ယခုအပတ်တွင် ဆန်အဟောင်း(၁)အိတ်လျှင် ကျပ် (၃၀၀၀မှ ၅၀၀၀)ခန့်ဈေးနှုန်းမြင့်တက်လျက်ရှိပြီး ဆန်သစ်ဈေးနှုန်းများမှာ တည်ငြိမ်လျက်ရှိကြောင်းသိရှိရပါသည်။

DOCA(မကွေး)

      မုံရွာခရိုင်အတွင်းရှိ စားသုံးသူပြည်သူများ စားသုံးဆီပြတ်လပ်မှုမရှိစေရေး၊ ဈေးနှုန်းချိုသာ၍ အရေအတွက်၊ အလေးချိန်နှင့် အရည်အသွေး ပြည့်ဝမှန်ကန်စွာရရှိနိုင်ရေးအတွက် စားသုံးသူရေးရာဦးစီးဌာန၊ မြန်မာနိုင်ငံဆီကုန်သည်များနှင့် ဆီလုပ်ငန်းရှင်များအသင်း၊  မုံရွာခရိုင်၊ စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်းတို့ပူးပေါင်း၍ စားအုန်းဆီများဖြန့်ဖြူးရောင်းချပေးလျက်ရှိကြောင်းသိရသည်၊၊

     စားအုန်းဆီများရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ ထုတ်ပြန်ပေးလျက်ရှိသော စားအုန်းဆီတစ်ပိဿာရည်ညွှန်းဈေးအပေါ်အခြေခံ၍ သယ်ယူပို့ဆောင်ခပါ ကုန်ကျစရိတ်တွင် အမြတ် ၂ရာခိုင်နှုန်းတွက်ချက်၍ ရောင်းချပေးခြင်းဖြစ်ပြီး လူတစ်ဦးလျှင် ၁ပိဿာနှုန်းရောင်းချပေးကြောင်းသိရသည်။

      မုံရွာခရိုင်အတွင်း (၁-၃-၂၀၂၄) ရက်နေ့မှ (၈-၃-၂၀၂၄) ရက်နေ့ထိ စားအုန်းဆီပိဿာချိန် (၁၁၅၅၀) ပိဿာခန့်ကို တစ်ပိဿာလျှင် ၅၇၀၀ကျပ်ဖြင့်လည်းကောင်း၊ (၁၁-၃-၂၀၂၄) ရက်နေ့မှ (၂၂-၃-၂၀၂၄) ရက်နေ့ထိ စားအုန်းဆီပိဿာချိန် (၁၉၂၅၀) ပိဿာခန့်ကို တစ်ပိဿာလျှင် ၅၇၅၀ကျပ်ဖြင့်လည်းကောင်း၊  (၂၅-၃-၂၀၂၄) ရက်နေ့မှ (၂၉-၃-၂၀၂၄) ရက်နေ့ထိ စားအုန်းဆီပိဿာချိန် (၉၂၄၀) ပိဿာခန့်ကို တစ်ပိဿာလျှင် ၅၈၅၀ကျပ်ဖြင့်လည်းကောင်း စုစုပေါင်းပိဿာချိန် (၄၀၀၄၀) ပိဿာခန့်အား လူစည်ကားရာရပ်ကွက်များ၊ ဈေးများအပြင်ဌာနဆိုင်ရာများ၊ တပ်ရင်းတပ်ဖွဲ့များ၊ မြို့စွန်ရပ်ကွက်များသို့ပါ ဈေးကားများဖြင့် လှည့်လည်ရောင်းချလျက်ရှိကြောင်း မုံရွာခရိုင်စားသုံးဆီကုန်သည်များနှင့် စားသုံးဆီလုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)

   ၃.၄.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

      ပဲတီစိမ်းသည် ဈေးကွက်ရရှိနေသော ဆောင်းသီးနှံတစ်ခုဖြစ်ပြီး ၎င်းကို စပါးရိတ်သိမ်းပြီး သီးထပ်သီးနှံအဖြစ်လည်း ကိုင်း၊ လယ်မြေများပေါ်တွင် စိုက်ပျိုးကြသည်။ ယခုအခါ ပဲတီစိမ်းများကိုရိတ်သိမ်းနေပြီဖြစ်ပြီး ၎င်းမှာ ဈေးကွက်ရနေသော ဆောင်းသီးနှံတစ်ခုဖြစ်သည်။ ဘီးလင်းမြို့နယ်တွင် ယခင် (၂၀၂၂-၂၀၂၃) ခုနှစ်၌ ပဲတီစိမ်းစိုက်ဧက ၁၇၂၀၀ဧကစိုက်ပျိုးခဲ့ပြီး ယခု (၂၀၂၃-၂၀၂၄) ခုနှစ်တွင် ၁၇၈၄၀ဧကပိုမိုစိုက်ပျိုးနိုင်ကြောင်းသိရသည်။

     မွန်ပြည်နယ်၊ ကျိုက်ထိုခရိုင်၊ ဘီးလင်းမြို့နယ်အတွင်း ပဲတီစိမ်းများ စတင်လှိုင်လှိုင်ထွက်ပေါ်နေပြီဖြစ်သည်။ (၂၀-၃-၂၀၂၄) ရက်နေ့တွင် ပဲတီစိမ်းတစ်တင်းဈေးနှုန်းမှာ (၇၃၀၀၀)ကျပ် ဈေးပေါက်နေခဲ့ပြီး ယခင်နှစ် အလားတူအချိန်တွင် ပဲတီစိမ်းဈေးနှုန်း (၆၀၀၀၀)ကျပ်ဈေးပေါက်ခဲ့သည်။ ဘီးလင်းမြို့နယ်တွင် ကျေးရွာအုပ်စု(၅၁)အုပ်စုရှိပြီး နှင်းပုလဲ၊ ရွှေလှေ၊ ညောင်ပလ္လင်၊ လိပ်ခုံး၊ ကျောက်ရေတွင်း၊ တောင်ကြီး၊ ဝင်းက၊ ကင်းရွာ၊ ပေါက်တော၊ မရမ်းကုန်း၊ ဇုတ်ကလိကျေးရွာများတွင် ယခုနှစ် ပဲတီစိမ်းအထွက်နှုန်းမှာ တစ်ဧကလျှင် ပျမ်းမျှအားဖြင့် (၁၈)တင်းနှုန်းထွက်ကြောင်း၊ ပဲတီစိမ်းများကို ပဲခူး၊ ဒိုက်ဦးမြို့များသို့ တင်ပို့ရောင်းချနေကြောင်း ‌တောင်သူများထံမှသိရပြီး၊ ပဲတီစိမ်းအထွက်တိုးအောင် စိုက်ပျိုးလာနိုင်သည်နှင့်အမျှ တောင်သူများဝင်ငွေတိုးပြီး လူနေမှုအဆင့်မြင့်မားလာနိုင်ကြောင်းကို အကြံပြုဆွေးနွေးခဲ့ကြောင်းသိရှိရပါသည်။

DOCA(မွန်)