ပြည်တွင်းကုန်သွယ်မှုသတင်း

   ဧရာဝတီတိုင်းဒေသကြီးအတွင်းရှိ ဟင်္သာတမြို့နယ်သည် ဆီထွက်သီးနှံများ စိုက်ပျိုးရာ ဒေသအဖြစ် ထင်ရှားပြီး ဒေသခံတောင်သူများအနေဖြင့် နှမ်းနက် (စမုံ) နှင့် နှမ်းဖြူ (ဂျပန်) စသည့် နှမ်းမျိုးစုံကို စိုက်ပျိုးလျက်ရှိသည်။ ထွက်ရှိလာသော နှမ်းသီးနှံများကို ဒေသတွင်း သာမက ရန်ကုန်မြို့နှင့်ပဲခူးမြို့ရှိ ပွဲရုံများသို့ပါ တင်ပို့ရောင်းချလျက်ရှိရာ နှမ်းဈေးကွက်သည် ဟင်္သာတမြို့နယ်အတွက် အရေးပါသော စီးပွားရေးလုပ်ငန်းတစ်ခုဖြစ်သည်။

   ၂၀၂၅ ခုနှစ်၊ ဧပြီလစတုတ္ထပတ်အတွင်း ဟင်္သာတမြို့နယ်တွင် နှမ်းနက် (စမုံ) တစ်တင်း လျှင် (၂၁၂,၀၀၀) ကျပ်၊ နှမ်းဖြူ (ဂျပန်) တစ်တင်းလျှင် (၁၀၇,၀၀၀) ကျပ် ဈေးနှုန်းဖြင့် အရောင်း အဝယ်ဖြစ်ခဲ့သော်လည်း မေလ ပထမပတ်တွင် နှမ်းနက် တစ်တင်း (၂၃၀,၀၀၀) ကျပ် အထိ မြင့်တက်လာခဲ့သည်။ နှမ်းဖြူဈေးနှုန်းမှာ (၁၀၇,၀၀၀) ကျပ်တင်းဖြင့် မပြောင်းလဲသေးသော် လည်း နှမ်းနက်ဈေးနှုန်း တစ်တင်းလျှင် ယခင်ထက် (၁၈,၀၀၀) ကျပ် ပိုမိုမြင့်တက်လာကြောင်း ဒေသခံ သီးနှံကုန်သည်တစ်ဦးထံမှ သိရသည်။

   ဟင်္သာတမြို့နယ်အတွင်း နှမ်းဈေးနှုန်းများ မြင့်တက်လာခြင်းသည် ပြည်တွင်းပြည်ပ ဈေးကွက် ဝယ်လိုအားပေါ်မူတည်နေပြီး ဒေသခံတောင်သူများအတွက် ပိုမိုကောင်းမွန်သော ဝင်ငွေအခွင့်အလမ်းများ ဖြစ်ထွန်းစေပြီး နှမ်းစိုက်ပျိုးထုတ်လုပ်မှုနှင့် ရောင်းဝယ်ဖောက်ကားမှု များ ပိုမိုတိုးတက်လာခြင်းသည် ဒေသ၏ စိုက်ပျိုးရေးဖွံ့ဖြိုးတိုးတက်မှုကို အထောက်အကူ ပြုလျက်ရှိပါသည်။

DOCA(ဧရာဝတီ)

   ဧရာဝတီတိုင်းဒေသကြီးအတွင်းရှိ ပုသိမ်မြို့နယ်များတွင် ကျေးရွာဒေသများတွင် စိုက်ပျိုးရေးနှင့် မွေးမြူရေးလုပ်ငန်းများကို အဓိကလုပ်ကိုင်ကြပြီး ရာသီအလိုက် စားဖိုဆောင် သီးနှံများကို စိုက်ပျိုးထုတ်လုပ်လျက်ရှိသည်။ ထိုသို့ထွက်ရှိလာသော သီးနှံများအနက် ခရမ်းချဉ် သီးများကို မိသားစုစားသုံးပြီး ပိုလျှံပါက ဒေသခံများက မြို့နယ်စည်ပင်သာယာဈေးများသို့ ရောင်းချကြသဖြင့် ဒေသထွက် လတ်ဆတ်သော ခရမ်းချဉ်သီးများ ဈေးကွက်တွင် အလုံးအရင်း ဖြင့် ဝင်ရောက်လာနေသည်။

    ယခုမေလ ပထမအပတ်အတွင်း ဧရာဝတီတိုင်းဒေသကြီးအတွင်း ရောင်းချနေသော ဒေသထွက် ခရမ်းချဉ်သီးဈေးနှုန်းမှာ ကိုင်းခရမ်းချဉ်သီး အလုံးအကြီး/အသေး ပေါ်မူတည် ၍ တစ်ပိဿာလျှင် (၅၀၀၀) ကျပ်၊ ၅၀ ကျပ်သားလျှင် (၂၅၀၀) ကျပ် ၊ ရိုးရိုးမြေပုံသီး တစ်ပိဿာ လျှင် (၄၀၀၀) ကျပ်၊ ၅၀ ကျပ်သားလျှင် (၂၀၀၀) ကျပ်  ဈေးနှုန်းတို့ဖြင့် အရောင်းအဝယ် ဖြစ်ထွန်းနေကြောင်း ဒေသခံကုန်သည်များထံမှ သိရသည်။ ဒေသခံများအနေဖြင့် ဈေးသက်သာ ပြီး လတ်ဆတ်သော ဒေသထွက်ခရမ်းချဉ်သီးများကိုသာ ဦးစားပေး ဝယ်ယူလျက်ရှိကြောင်း သိရှိရသည်။ ဧရာဝတီတိုင်းဒေသကြီး ၊ ပုသိမ်မြို့နယ်အတွင်း စိုက်ပျိုးထုတ်လုပ်မှု ကောင်းမွန်ပြီး ဈေးကွက်တွင် ဝင်ရောက်နိုင်မှုကြောင့် ဒေသခံများအတွက် ဝင်ငွေရရှိစေကာ စားသုံးသူများ အနေဖြင့်လည်း အရည်အသွေးကောင်းမွန်သော ခရမ်းချဉ်သီးများကို ဈေးနှုန်းသင့်တင့်စွာ ရရှိစေနေသည်။

DOCA(ဧရာဝတီ)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်း လမ်းပန်း ဆက်သွယ်ရေး အခက်ခဲများကြောင့်  ကုန်ဈေးနှုန်းများ အနည်းငယ်မြင့်တက်လျက်ရှိရာမှ အသားငါး ဈေးနှုန်းများထဲမှ ငါးဈေးနှုန်းသည်လည်း မြင့်တက်လျက်ရှိပါသည်။

    တီလားဗီးယားငါးကို ကန့်ဘလူခရိုင်၊ ကန့်ဘလူမြို့နယ်အတွင်းရှိ သိန်ရင်ဆည်၊ လင်ဗန်းဆည် နှင့် ကျွန်းလှမြို့နယ် သဖန်းဆိပ်ဆည်အတွင်းမှ ထွက်ရှိသည့် ဒေသထွက်ရေချိုငါးများကို   ဝယ်ယူရောင်းချ ကာ  ဈေးကောင်း ရရှိပြီး အရောင်းအဝယ် ဖြစ်လျက်ရှိကြောင်း သိရသည်။

      ယခု ၂၀၂၅ ခုနှစ်၊ မေလ ပထမအပတ်တွင် ကန့်ဘလူမြို့၏ တီလားဗီးယားငါး ဈေးနှုန်းများ အနေဖြင့် တီလားဗီးယားငါး(အကြီး) တစ်ပိဿာလျှင်(၁၂၀၀၀)ကျပ်၊ တီလားဗီးယားငါး(အလတ်) တစ်ပိဿာလျှင်(၁၀၀၀)ကျပ်နှင့် တီလားဗီးယားငါး(အသေး)တစ်ပိဿာလျှင်(၈၀၀၀)ကျပ်၊ ဈေးနှုန်း အသီးသီးတို့ဖြင့် အရောင်းအဝယ်ဖြစ်လျက်ရှိကြောင်း ငါးအရောင်းအဝယ်လုပ်ကိုင်သူထံမှ သိရပါသည်။

DOCA(စစ်ကိုင်း)

   စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့၊ မိုးမလင်းဈေးတွင် နေ့စဉ် လာရောက် ဈေးရောင်းသူများ၊ ဈေးဝယ်သူများနှင့်စည်ကားသိုက်မြိုက်လျက်ရှိပြီး ရာသီပေါ်သီးနှံများ၊ အခြား ဒေသမှဝင်ရောက်သည့် စားသောက်ကုန်ပစ္စည်းများကို ရောင်းချပေးလျက်ရှိရာ ယခုအခါတွင် သရက် သီးစိမ်းများကို ဒေသထွက်ဖြစ်သည့် ကန့်ဘလူမြို့ပေါ်ရပ်ကွက်အသီးသီး နှင့် ကန့်ဘလူမြို့နယ် အတွင်းရှိ ကျေးရွာအချို့တို့မှ လာရောက်ရောင်းချလျက်ရှိကြောင်း သိရသည်။

   ရှေးအဆိုရှိသည့်အတိုင်း အသားမှာဝက်၊ အရွက်မှာလဖက်၊ အသီးမှာသရက်ဆိုသည့်အတိုင်း စိန်တစ်လုံးသရက်သီးမှည့်သည် အခြားသရက်သီးမှည့်များနှင့် မတူသော အသားနုညံ့သော အမျှင် ကင်းသော၊ အနံ့အရသာမှာ ချိုမွှေးသော၊ အသီးလုံးအပြင်ဘက်တွင် အဝါရောင်ဝင်းဝါတောက် ပသော ၊ အထားခံသော အခြားသရက်သီးနှင့်မတူညီသော ဂုဏ်သတ္တိများရှိသည့်သရက်သီးဖြစ်ပြီး စိန်တစ်လုံးသရက်သည် နေရာတိုင်းတွင်စိုက်မရဘဲ သဘာဝအပူပိုင်းဒေသတွင်သာ စိုက်ပျိုးကြ ပါသည်။ စိန်တစ်လုံးသရက်သည် ယခုလို မေလဆန်းပိုင်းတွင် ဈေးကွက်အတွင်းသို့ရောက်ရှိပြီး လူကြိုက်များကာ ဈေးကောင်းရရှိပြီး အရောင်းသွက်လျက်ရှိကြောင်း သိရပါ သည်။

    ၂၀၂၅ ခုနှစ်၊ မေလ ပထမပတ်အတွင်း ကန့်ဘလူမြို့၊ မိုးမလင်းဈေးတွင် ရောင်းချနေသည့်  စိန်တစ်လုံးသရက်သီးမှည့်ဈေးနှုန်းများမှာ သရက်သီး အကြီး တစ်လုံးလျှင် (၅၀၀)ကျပ်၊ သရက်သီး အသေး တစ်လုံးလျှင်(၃၅၀)ကျပ်၊ (၁၀၀၀)ဖိုး (၃)လုံးတို့ဖြင့် ရောင်းချလျက်ရှိကြောင်း စိန်တစ်လုံး သရက်သီးမှည့် ရောင်းချသည့် လုပ်ငန်းရှင်များထံမှ သတင်းရရှိသည်။

DOCA(စစ်ကိုင်း)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ သစ်သီးမျိုးစုံရောင်းဝယ်ရေးဆိုင်များတွင် ရာသီပေါ် ဖရဲသီးများလည်း အရောင်းအဝယ်ဖြစ်လျက်ရှိကြောင်း၊ ဒေသထွက် သီးနှံအပြင် မန္တလေး နှင့်ပြင်ဦးလွင်မြို့များမှလည်း ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။ ဖရဲသီး သည် အရည်ရွှန်း၍ ချိုပြီး အေးမြသောသီးနှံဖြစ်၍ ဝယ်ယူစားသုံးမှုများကြောင်း၊ အသီးကို စိပ်၍သော် လည်းကောင်း၊ ဖျော်ရည်လုပ်၍သော်လည်းကောင်း စားသုံးမှုများကြောင်း သိရှိရသည်။

            ဈေးနှုန်းအနေဖြင့် ၂၀၂၅ခုနှစ်၊ ဧပြီလ(ပထမပတ်)တွင် သကြားဖရဲသီးတစ်လုံးလျှင် အလုံး ကြီး ကျပ်(၆၀၀၀)၊ အလုံးလတ် ကျပ်(၅၀၀၀)၊ အလုံးသေး ကျပ်(၃၀၀၀)ဈေးဖြင့် အရောင်းအဝယ်ဖြစ်ကြောင်း၊ ယခင်မတ်လ(စတုတ္ထပတ်)နှင့် နှိုင်းယှဉ်ပါက ဈေးငြိမ်၍ အရောင်းအဝယ် ဖြစ်ကြောင်း၊ ပူပြင်းသော နွေဦးရာသီရောက်ရှိချိန်ဖြစ်၍ အရည်ရွှန်းပြီး ချိုလေးသောအရသာရှိသည့် သကြားဖရဲသီးကို ဝယ်ယူစားသုံးမှုများ၍ အရောင်းအဝယ်သွက်ကြောင်း မြို့ပေါ်ရှိ သစ်သီးအရောင်း ဆိုင်များမှ သိရှိရပါသည်။

DOCA(မကွေး)