ပြည်တွင်းကုန်သွယ်မှုသတင်း

      ပြည်ကုန်စည်ဒိုင်တွင် ပဲမျိုးစုံအရောင်းအဝယ်ဖြစ်လျှက်ရှိပြီး မတ်ပဲ၊ ပဲစင်းငုံ၊ ကုလားပဲ၊ ပဲကြီး၊ ဘိုကိတ်၊ စားတော်ပဲသီးနှံများမှာ အရောင်းအဝယ်သွက်လျက်ရှိပါသည်။

မတ်ပဲ

          ပြည်ကုန်စည်ဒိုင်တွင် ယခုနှစ် ဇူလိုင်လတွင် မတ်ပဲဈေးနှုန်းအေးနေပြီး ပဲတစ်တင်းကို (၉၅၀၀၀-၉၅၅၀၀-၉၆၅၀၀)ကျပ်ဖြင့် ဈေးနှုန်းအေးလျက်ရှိနေခဲ့ပါသည်။ ဇူလိုင်စတုတ္ထပတ်တွင် မတ်ပဲတစ်တင်းကို (၉၆၅၀၀)ကျပ်ဖြင့် ဈေးအေးနေခဲ့ပြီး တစ်ရက်ကိုအိတ် (၂၅၀)ခန့် အဝယ်ရှိခဲ့ပါသည်။ ယခင်နှစ်ဇူလိုင် စတုတ္ထပတ်တွင် မတ်ပဲတစ်တင်းကို (၁၀၉၀၀၀-၁၀၉၅၀၀)ကျပ်ဖြင့် အရောင်းအဝယ်ရှိခဲ့ပါသည်။ ယခင်နှစ်နှင့် ယခုနှစ် မတ်ပဲဈေးကိုကြည့်လျှင် ယခင်နှစ်ဈေးကပိုမိုမြင့်နေခဲ့ကြောင်း သိရှိရပါသည်။

ပဲစင်းငုံ

          ယခုနှစ် ဇူလိုင် စတုတ္ထပတ်တွင် ပဲစင်းငုံတစ်တင်းကို (၈၇၀၀၀-၈၈၀၀၀)ကျပ်ဖြင့် ရန်ကုန်အဝယ်ရှိပြီး တစ်ရက်ကို အိတ်(၂၀၀)ခန့် အရောင်းအဝယ်ဖြစ်ခဲ့ပါသည်။ ယခင်နှစ်ဇူလိုင် စတုတ္ထပတ်တွင် ပဲစင်းငုံတစ်တင်းကို (၁၃၆၆၀၀-၁၃၇၀၀၀)ကျပ်ဖြင့် ရန်ကုန်အဝယ် တစ်ရက်ကို အိတ် (၂၀၀)ခန့်အရောင်းအဝယ်ရှိပါသည်။ ယခင်နှစ်ပဲစင်းငုံတစ်တင်းဈေးက ယခုနှစ်ထက် ပိုမိုကောင်းမွန်ခဲ့ပါသည်။ ပဲတစ်တင်းကို (၄၉၀၀၀-၅၀၀၀၀)ကျပ်ခန့် ယခင်နှစ်ကဈေးပိုရခဲ့ပါသည်။

ကုလားပဲ

          ပြည်ကုန်စည်ဒိုင်တွင် ယခုနှစ်ဇူလိုင် စတုတ္ထပတ်တွင် ကုလားပဲ(ဟော်လန်)တစ်တင်းကို (၉၀၀၀၀)ကျပ်၊ မြကြေးမှုံတစ်တင်းကို (၉၅၀၀၀)ကျပ်ဖြင့် မြို့တွင်းခွဲစက်သမားများနှင့် နယ်စုံ အဝယ်တစ်ရက်ကို (၂၀၀)ခန့်ရှိပါသည်။ ယခင်နှစ်ဇူလိုင် စတုတ္ထပတ်တွင် ကုလားပဲ (ဟော်လန်) တစ်တင်းကို (၈၅၀၀၀-၈၆၀၀၀)ကျပ်၊ မြကြေးမှုံတစ်တင်းကို (၈၇၅၀၀-၈၈၀၀၀)ကျပ်ဖြင့် မြို့တွင်း ခွဲစက်သမားများအဝယ်ရှိခဲ့ပါသည်။ ကုလားပဲတစ်တင်းကို ယခုနှစ်ဈေးက ယခင်နှစ်ထက် ပိုမို ကောင်းမွန်ခဲ့ပါသည်။

ပဲကြီး

          ယခုနှစ်ဇူလိုင် စတုတ္ထပတ်တွင် ပဲကြီး(ရွှေကျွန်း)တစ်တင်းကို (၁၀၅၀၀၀)ကျပ်၊ (ကုန်းပဲ) တစ်တင်းကို (၉၅၀၀၀)ကျပ်ဖြင့် မြို့တွင်းပဲကြော်သမားနှင့် ရန်ကုန်အဝယ် တစ်ရက်ကိုအိတ် (၂၅၀/၃၀၀)ခန့် အဝယ်ရှိပါသည်။ ယခင်နှစ်ဇူလိုင် စတုတ္ထပတ်တွင် ပဲကြီး(ရွှေကျွန်း)တစ်တင်းကို (၈၉၀၀၀)ကျပ်၊ (ကုန်းပဲ)တစ်တင်းကို (၈၄၀၀၀)ကျပ်ဖြင့် မြို့တွင်းပဲကြော်သမားများ အဝယ်ရှိ ခဲ့ပါသည်။ ယခင်နှစ်နှင့် ယခုနှစ် ပဲကြီးဈေးကိုနှိုင်းယှဉ်ကြည့်လျှင် ယခုနှစ် ပဲကြီး(ရွှေကျွန်း) တစ်တင်းကို (၁၆၀၀၀)ကျပ်၊ (ကုန်းပဲ)တစ်တင်းကို (၁၁၀၀၀)ကျပ်ခန့် ဈေးပိုရခဲ့ ပါသည်။

ဘိုကိတ်

          ယခုနှစ်ဇူလိုင် စတုတ္ထပတ်တွင် ဘိုကိတ်ပဲတစ်တင်းကို (၇၀၀၀၀)ကျပ်ဖြင့် မြို့တွင်းအဝယ် လက်လီရော လက်ကားပါ အရောင်းအဝယ်ရှိပြီး လက်လီတစ်ရက်ကိုအိတ် (၅၀/၁၀၀)ခန့် လက်ကားအဝယ်တစ်ရက်ကိုအိတ် (၂၀၀)ခန့် ရှိခဲ့ပါသည်။ ယခင်နှစ်ဇူလိုင် စတုတ္ထပတ်တွင် ဘိုကိတ်ပဲတစ်တင်းကို (၉၂၀၀၀-၉၃၀၀၀)ကျပ်ဖြင့် မြို့တွင်းအဝယ်နှင့် ရန်ကုန်အဝယ်ရှိခဲ့ပါသည်။ ယခင်နှစ် ဘိုကိတ်ပဲဈေးက ပိုမိုကောင်းမွန်ခဲ့ကြောင်း သိရှိရပါသည်။

စားတော်ပဲ

          ယခုနှစ်ဇူလိုင် စတုတ္ထပတ်တွင် စားတော်ပဲ(ကျွန်း)တစ်တင်းကို (၁၉၀၀၀၀-၁၉၅၀၀၀) ကျပ်ဖြင့် မြို့တွင်းအဝယ် တစ်ရက်ကို အိတ် (၂၅)ခန့် အဝယ်ရှိပါသည်။ ယခင်နှစ် ဇူလိုင် နောက်ဆုံးပတ်တွင် စားတော်ပဲ(ကျွန်း)တစ်တင်းကို (၁၀၆၀၀၀-၁၀၇၀၀၀)ကျပ်ဖြင့် မြို့တွင်း အဝယ်ရှိခဲ့ပါသည်။ ယခုနှစ် စားတော်ပဲ(ကျွန်း)ဈေးက ယခင်နှစ်ထက်ပိုမိုကောင်းမွန်ပြီး တစ်တင်း လျှင် (၈၄၀၀၀-၈၅၀၀၀)ကျပ်ခန့် ဈေးပိုရခဲ့ကြောင်း သိရှိရပါသည်။ ယခင်နှစ်ဇူလိုင် စတုတ္ထပတ်တွင် စားတော်ပဲ(ကျွန်း)တစ်တင်းဈေးမှာ ပိုမိုမြင့်နေကြောင်း သိရှိရပါသည်။

          ပြည်ကုန်စည်ဒိုင်တွင် ပဲမျိုးစုံအရောင်းအဝယ်ရှိပြီး မတ်ပဲ၊ ပဲစင်းငုံ၊ ဘိုကိတ် ပဲတစ်တင်း ဈေးမှာ ယခင်နှစ်ကဈေးမှာ ပိုမိုကောင်းမွန်ခဲ့ပြီး ကုလားပဲ၊ ပဲကြီး၊ စားတော်ပဲ တစ်တင်းဈေးမှာ ယခင်နှစ်ထက်စာလျှင် ယခုနှစ်မှာ ဈေးပိုမိုကောင်းခဲ့လေ့လာသိရှိရပါသည်။

DOCA(ပဲခူး)

     ပြည်မျိုးစုံဈေးကွက်တွင် ပြည်ပသို့ပါတင်ပို့နိုင်သော ပဲကြီးသီးနှံသည် နှစ်စဉ်ဈေး ကောင်းရနေပြီး ယခုနှစ်တွင် ပို၍ပင်ဈေးကောင်းရသော သီးနှံတစ်မျိုးဖြစ်ပါသည်။ နှစ်စဉ်လိုလို ပဲဈေးကွက်မှာ ဈေးအမြင့်ဖြင့်ရောင်းဝယ်ခဲ့သော ပဲကြီးများ၏ဈေးနှုန်းများ၏ ကာလတူဖြစ် ပေါ်ခဲ့သော ဈေးများကိုလေ့လာကြည့်ရာတွင် အောက်ပါ အတိုင်းတွေ့ရှိရပါသည် -

ခုနှစ်             လအမည်                ပဲအမျိုးအစား                     ဈေးနှုန်း(ကျပ်)         

၂၀၂၀ခုနှစ်      ဇူလိုင်လ                 ရွှေကျွန်း                           ၂၅၀၀၀

                                                ကမ်းနား                           ၂၄၀၀၀

၂၀၂၁ခုနှစ်      ဇူလိုင်လ                 ရွှေကျွန်း                           ၂၈၀၀၀

                                                ကမ်းနား                           ၂၈၀၀၀

၂၀၂၂ခုနှစ်      ဇူလိုင်လ                 ရွှေကျွန်း                           ၇၀၀၀၀

                                                ကမ်းနား                           ၇၀၀၀၀

၂၀၂၃ခုနှစ်      ဇူလိုင်လ                 ရွှေကျွန်း                           ၉၈၀၀၀

                                                ကမ်းနား                           ၉၇၀၀၀

၂၀၂၄ခုနှစ်      ဇူလိုင်လ                 ရွှေကျွန်း                           ၈၄၀၀၀

                   ဇူလိုင်လ                 ကမ်းနား                           ၈၉၀၀၀

၂၀၂၅ခုနှစ်      ဇူလိုင်လ                 ရွှေကျွန်း                           ၁၀၅၀၀၀

                   ဇူလိုင်လ                 ကမ်းနား                           ၉၅၀၀၀

     ၂၀၂၀ ခုနှစ် ဇူလိုင်လတွင် ရွှေကျွန်းတစ်တင်း (၂၅၀၀၀)ကျပ်၊ ကမ်းနားတစ်တင်း ၂၄၀၀၀ကျပ်၊ ၂၀၂၁ခုနှစ် ဇူလိုင်တွင် အတွင်း ပဲကြီး(ရွှေကျွန်း)တစ်တင်း (၂၈၀၀၀)ကျပ်၊ (ကမ်းနား)တစ်တင်း (၂၈၀၀၀)ကျပ်ဖြင့် ယခင်နှစ်ရဲ့ဈေးအတိုင်းရောင်းဝယ်ခဲ့ကြပေမယ့် မတ်ပဲနှင့်၊ ပဲတီစိမ်းသီးနှံများမှာ ဈေးနှုန်းများ လျော့ကျခဲ့ပြီး ကျပ် (၃)သောင်းအောက်ဖြင့်သာ ရောင်းဝယ်ခဲ့ကြရသောကြောင့် ပဲကြီးသီးနှံဈေးနှုန်းသည် အဆိုပါနှစ်တွင် အခြားပဲများဈေးအေးခဲ့ပေမယ့် ပဲကြီးသီးနှံကတော့ ဈေးကွက်အတွင်း ဈေးလျော့ကျသွားခြင်းမရှိဘဲ ဈေးအမြင့်ဖြင့်သာ ရောင်းဝယ် နေခဲ့ကြပါသည်။

    ၂၀၂၂ ခုနှစ်၊ ဇူလိုင်လတွင် ပဲသီးနှံ ဈေးအားလုံးလိုလို ဈေးမြင့်တက်လာခဲ့ကြပြီး ပဲကြီးသီးနှံက လည်း ယခင်နှစ်ရဲ့ဈေးထက် တစ်ဆသာသာခန့် ဈေးနှုန်းများမြင့် တက်လာတာကြောင့် တစ်တင်းကျပ် (၆)သောင်းအထက်ရရှိခဲ့ကာ ပဲဈေးကွက်မှာ ဈေးအမြင့်ဆုံးရရှိသည့် ပဲသီးနှံဖြစ် ခဲ့ပါသည်။

    ၂၀၂၃ ခုနှစ်တွင် ပြည်ပဝယ်လိုအား ပဲသီးနှံအားလုံးလိုလို ဈေးမြင့်တက်လာခဲ့ကြပြီး ပဲကြီးသီးနှံမှာ တစ်တင်းကျပ် (၉)သောင်းကျော်အထိ ဈေးကောင်းရ လာခဲ့ကာ ပဲစိုက်တောင်သူများ အကျိုးအမြတ်ပိုရနိုင်မည့် နှစ်ဟု သိရှိရပါသည်။ ၂၀၂၄ ခုနှစ်၊ ဇူလိုင်လတွင် ပဲကြီးမှာဝယ်လို အားနည်းလာ၍ဈေးမှာ (၈)သောင်းကျပ်ကျော် သာရောင်းဝယ်မှုရှိ၍ ဈေးအနည်း ငယ်ပြန်ကျလာ ပါသည်။

    ၂၀၂၅ ခုနှစ် ဇူလိုင်လတွင် မြို့တွင်းပဲကြော်ဖိုသမားများနှင့် ရန်ကုန်ဝယ်လက်သမားများက ဝယ်ယူမှုရှိလာသဖြင့် ပဲကြီး(ရွှေကျွန်း)မှာ ကျပ်(၁)သိန်းကျော်အထိ ဈေးရလာသလို ပဲကြီး (ကုန်းပဲ)မှာ (၉)သောင်းကျော်အထိဈေးရရှိလာခဲ့ပါသည်။

    ပဲကြီးသီးနှံသည် မိုးနှောင်းကာလ ဇူလိုင်လ၊ ဩဂုတ်လများတွင်စတင်စိုက်ပျိုးလာကြပြီး မြန်မာလအနေဖြင့် တော်သလင်းလအကုန်မှီ အပြီးစိုက်ပျိုးကြသည်ဟု သိရပါသည်။ တော်သလင်း လကျော်မှ စိုက်ပျိုးသည့် ပဲကြီးသီးနှံသည် အောင်မြင်ဖြစ်ထွန်းမှုနည်းပါးပြီး အထွက်နှုန်း မကောင်း ဟု တောင်သူများအနေဖြင့် သိရှိထားကြသည့်အတွက် တော်သလင်းအမီ စိုက်ပျိုးကြကြောင်း သိရပါသည်။ မိုးစပါးစိုက်ပျိုးသည့် ဒေသများတွင် မိုးစပါးစိုက်ပျိုးစဉ်ကာလ လယ်ကန် သင်းဘောင် များတွင် ပဲကြီးသီးနှံအား စိုက်ပျိုးကြပါသည်။ ပဲကြီးသီးနှံသည် မြေအမျိုးအစားအားလုံးတွင် စိုက်ပျိုးဖြစ်ထွန်းနိုင်သော်လည်း နုန်းမြေကိုပို၍ ကြိုက်နှစ်သက်ကြောင်းသိရပါသည်။ မိုးစပါး စိုက်ပျိုး၍ မရနိုင်သောဒေသများတွင် ပဲကြီးသီးနှံကို ဇူလိုင်လတွင်စတင်စိုက်ပျိုးကြပြီး နိုဝင်ဘာလ အတွင်း ပန်းပွင့်ကာ ဇန်နဝါရီလတွင် ပဲကြီးသီးနှံများ စတင်ခူဆွတ်နိုင်ပြီဖြစ်ပါသည်။ ဒါ့ကြောင့် ဈေးကွက်အတွင်းသို့ ပဲကြီးသီးနှံအသစ်များ နှစ်ဆန်းပိုင်းကာလမှစ၍ ဝင်ရောက်လာကာ ဖေဖော်ဝါရီ၊ မတ်လများတွင် ပဲအထွက်လှိုင်ချိန်ဖြစ်၍ ဈေးကွက်သို့လည်း ပဲကြီးသီးနှံများ ဝင်ရောက်မှုများ ပြားလာခဲ့ကြောင်း သိရပါသည်။ ပဲကြီးသီးနှံအား ပဲကြော်ဖိုလုပ်ငန်းသမားများ အဓိကထား ဝယ်ယူသို့လှောင်ကြပါသည်။ ပြည်ခရိုင်အတွင်း ပဲကြီးသီးနှံမှာ မတ်ပဲ၊ ပဲတီစိမ်း၊ ကုလားပဲ၊ ပဲစင်းငုံ စသည့်ပဲများကဲ့သို့ စိုက်ပျိုးမှုမများဘဲ ပဲကြီးသီးနှံသည် နှစ်စဉ်ဈေး ကောင်းရနေသည့်အတွက် စိုက်ပျိုးထုတ်လုပ်သူတောင်သူများ အနေဖြင့် တိုးချဲ့စိုက်ပျိုး သင့်သလို မိုးစပါးအပြီး မတ်ပဲ စိုက်ပျိုးသည့် လယ်ကန်သင်းများတွင်လည်း နေရာလွတ်မပေးဘဲ စိုက်ပျိုးခြင်းဖြင့် မိုးစပါး၊ မတ်ပဲ သီးနှံများမှ ဝင်ငွေရရှိသလို ပဲကြီးသီးနှံကလည်း ထပ်ဆောင်း၍ အပိုဝင်ငွေရရှိသော သီးနှံတစ်မျိုး ဖြစ်ပါကြောင်း ရေးသားတင်ပြလိုက်ရပါသည်။

DOCA(ပဲခူး)

     ပိန်းပန်းပင်များသည် အရွက်၊ အပွင့်၊ အရောင်၊ အရွယ်အစားမျိုးစုံရှိကြပါသည်။ ပိန်းပန်းပင်များသည် ပူနွေးစိုစွတ်သော ရာသီဥတုကိုကြိုက်နှစ်သက်ပါသည်။ သဘာဝအလျှောက် ပိန်းပန်းပင်များသည် ရာသီတစ်ရာသီတွင်သာ ပွင့်လေ့ရှိကြသော်လည်း ယခုအခါတွင် ရာသီဥတုမရွေး ပန်းများပွင့်စေရန်အတွက် ပြုပြင်ပြီးစိုက်ပျိုးလာကြပါသည်။ ပိန်းပန်းများ၏ မူလမျိုးများမှာ အနီရောင်၊ ပန်းရောင်၊ အညိုရောင်၊ အဖြူရောင်တို့ဖြစ်ပါသည်။

    ပိန်းပန်းပင်များအား စိုက်ပျိုးရာတွင် တိုက်ရိုက်နေရောင်ခြည်မထိသည့် အပူချိန်မျိုးကို နှစ်သက်ပါသည်။ ပတ်ဝန်းကျင်မှာ စိုစွတ်သော အခြေအနေကိုပို၍ကြိုက်နှစ်သက်ပါသည်။ ပိန်းပန်းပင်များသည် ပုံမှန်အားဖြင့် သုံးလလျှင်တစ်ကြိမ်ပွင့်တက်ပါသည်။ ပွင်းလင်းရာသီတွင် ကောင်းစွာပွင့်ပြီး ယခုလိုမိုးရာသီရောက်လျှင် အပင်များမှ အပင်ပွားအမြစ်ပိုများထွက်လာပါသည်။ အပင်ပွားအမြစ်များထွက်ပေါ်လာလျှင် အပင်ပွားများအားဖြတ်တောက်ပြီး မျိုးပွားစိုက်ပျိုးရန်အတွက် အကောင်းဆုံးဖြစ်ပါသည်။ ပိန်းပန်းများသည် မိုးတွင်းရာသီဖြစ်သည့်အတွက် အပွင့် ထွက်နှုန်းနည်းပါးသဖြင့် ဈေးကွက်အတွင်း ရောင်းချရာတွင် ဈေးအနည်းငယ်မြင့်တက်ပါသည်။ ပန်းပွင့်အရောင်းအဝယ်ထက် ပျိုးပင်များမှာ အရောင်းအဝယ်သွက်ပါသည်။ ပိန်းပန်းများအား ပန်းအိုးများဖြင့် မျိုးပွားပြီး အိုးအသေး၊ အကြီးအလိုက်ဈေးနှုန်းပေးရပါသည်။ မျိုးပန်းအိုး ဈေးနှုန်းအနေဖြင့် တစ်အိုးလျှင် (၅၀၀၀-၁၀၀၀၀)ကျပ်အထိ ရှိပါသည်။ ပိန်းပန်းပျိုးပင်များအား ပြင်ဦးလွင်၊ မန္တလေးမြို့များမှဝယ်ယူပြီး တစ်ဆင့်ပြန်လည်ရောင်းချပါသည်။ ပြည်ဈေးကွက်အတွင် ရောင်းချသော ပိန်းပန်းများသည် ရွှေတောင်မြို့၊ ကျီးသဲမြို့နှင့် ပြည်မြို့နယ် အတွင်းရှိ မှော်ဇာကျေးရွာများမှ ထွက်ရှိသော ပိန်းပန်းများဖြစ်ပါသည်။ မိုးတွင်းကာလဖြစ်သည့်အတွက် ပိန်းပန်းများအထွက်နည်းပါးသည့်အတွက် ပိန်းပန်းအကြီး တစ်ပွင့်လျှင် (၇၀၀-၅၀၀)ကျပ် ဖြစ်ကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်တွင် မိုးစမုံနက်နှမ်းအသစ်များ ဈေးကွက်သို့ စတင်ထိုးဖောက် ဝင်ရောက်လာတာတွေ့ရပါသည်။ ဝင်ရောက်သည့် အိတ်အရေအတွက်မှာ ပေါ်ခါစဖြစ်၍ တစ်နေ့လျှင် အိတ် (၅၀/၁၀၀)ခန့် သာ ပန်းတောင်းဘက်မှ ဝင်ရောက်လာခဲ့ပါသည်။ ဈေးနှုန်း အနေဖြင့် ယခုဇူလိုင်လကုန်ပတ်တွင် မိုးစမုံနက်နှမ်း တစ်တင်းလျှင် (၂၅၀၀၀၀)ကျပ်ဖြင့် ဈေးဖွင့်၍ အရောင်းအဝယ်ဖြစ်ပြီး တစ်နေ့လျှင် အိတ်(၅၀)ကျော် ဖြစ်လျှက်ရှိပါသည်။ ယခင်လဖြစ်သော ဇွန်လကုန်ပတ်တွင် စမုံနက်နှမ်းတစ်တင်းလျှင် (၂၀၀၀၀၀)ကျပ်ဖြင့် ရောင်းဝယ်ခဲ့သဖြင့် တစ်တင်း လျှင် (၅၀၀၀၀)ကျပ်ခန့် ဈေးမြင့်လာခဲ့ပါသည်။ နှမ်းနီမှာထွက်ပေါ်လာခြင်းမရှိသေး၍ ယခင် လှောင်နှမ်းလက်ကျန်များနှင့်သာ အရောင်းအဝယ်ဖြစ်လျက်ရှိပြီး ဈေးနှုန်းအနေဖြင့် ယခင်လကအတိုင်း ဈေးငြိမ်နေပြီး တစ်တင်းလျှင် (၁၂၀၀၀၀)ကျပ်ဖြင့် တစ်နေ့လျှင် အိတ် (၅၀)ခန့် အရောင်းအဝယ်ဖြစ်လျက်ရှိပါသည်။ နှမ်းနက်မှာလည်း ယခုလတွင် ဝယ်လိုအားရှိလာ၍ တစ်တင်းလျှင် (၂၂၀၀၀၀)ကျပ်ဖြင့် ယခင်လနှင့်ယှဉ်လျှင် တစ်တင်းလျှင် (၅၀၀၀၀)ကျပ်ခန့် ဈေးမြင့်လာပြီး အရောင်းအဝယ်မှာ နေ့စဉ် အိတ်အနည်းငယ်သာဖြစ်လျက်ရှိပါသည်။

     မိုးနှမ်းများသည် ‌နောက်လထဲတွင် အများအပြားထွက်ပေါ်လာမည်ဖြစ်ပြီး နှမ်းများ အထွက်လှိုင်ချိန်တွင် ဈေးအနည်းငယ်ကျဆင်းလာနိုင်မည်ဟု ခန့်မှန်းသိရှိရပါသည်။

DOCA(ပဲခူး)

         ရာသီပေါ် သရေစာလည်းဖြစ် ဆေးဖက်လည်းဝင်တဲ့ အစားအစာလို့ပြောလိုက်ရင် ယခုအချိန်မှာတော့ ကျွဲခေါင်းသီးကို ထည့်ပြောရပါလိမ့်မည်။ အရောင်အဆင်းက ကျွဲခေါင်းသီးရဲ့ အရောင်လိုမဲနေတဲ့ ကျွဲခေါင်းသီးဟာ မူရင်းအရောင်ကတော့ မမဲပါဘူး။ ကျွဲခေါင်းသီးပင်သည် ရေတွင် ပေါလောပေါ်နေသော အပင်ငယ်တစ်မျိုး ဖြစ်ပါ သည်။ ရေအောက်ရှိ အရွက်နှင့် ရေပေါ် ရှိအရွက် တို့သည် မတူညီကြချေ။ ရေအောက်ရှိအရွက်များသည် အညှာချင်းဆိုင်ပေါက်၍ အမြစ်နှင့် တူကြသည်။ ရေပေါ်ရှိ အရွက်များမှာမူ ရိုးတံရင်း၌ စုပေါက်ကြသည်။ အသီးတွင် အဖုများထွက်နေ၍ ကျွဲဦးခေါင်းပုံနှင့်တူသည်။ အခွံသည် အစိမ်းပုပ်ရောင်ရှိ၍ အတွင်းသားမှာ ဖြူသည်။ မြန်မာ နိုင်ငံအောက်ပိုင်း မြို့ကြီးများရှိ ရေကန်များတွင် ကျွဲခေါင်းသီးပင်များကို ပြုစုစိုက်ပျိုးကြပါသည်။ ဇွန်လမှ ဩဂုတ်လအထိ မိုးတွင်းအချိန်၌ ကျွဲခေါင်းသီးကို ရောင်းချလေ့ရှိပါသည်။ အသီးကို အစိမ်းလိုက်ဖြစ်စေ၊ ပြုတ်၍ ဖြစ်စေ၊ အခွံနွှာပြီးလျှင် စားကြသည်။ အတွင်းသား အရသာမှာ ချိုအေး၍ အရည်ရွှမ်းသည်။ ကျွဲခေါင်းသီးမှာ ကောင်းကျိုးတွေရှိပေမဲ့ တန်ဆေးလွန်ဘေးဆိုတဲ့အတိုင်းပဲ အလွန်အကျွံမစားသင့်ပါ။ ရာသီပေါ်ဖြစ်တဲ့ ကျွဲခေါင်းသီးကို ရန်ကုန်မှဝယ်ယူ၍ ပြည်မြို့တွင် ပြန်လည်ရောင်းချပြီး ကျွဲခေါင်းသီးတစ်ပိဿာလျှင် ကျပ် (၁၈၀၀၀)၊ ကျွဲခေါင်းသီး တစ်ဆယ်သားလျှင် ကျပ် (၂၀၀၀) အထိ ဈေးကောင်းပေးဝယ်၍ စားသုံးသူများမှ ရာသီပေါ်လည်းဖြစ် သရေစာလည်းဖြစ် ဆေးဖက်လည်းဝင်တာကြောင့် ဝယ်ယူစားသုံးကြပါသည်။ လက်လီရောင်းချသော အထမ်းသည်များ အနေဖြင့် ပြည်မြို့အတွင်း တစ်နေ့လျှင် မိုးမရွာပါက နှစ်ပိဿာမှ သုံးပိဿာအထိ ရောင်းချရကြောင်း သိရှိရပါသည်။

DOCA(ပဲခူး)