ပြည်တွင်းကုန်သွယ်မှုသတင်း

    မန္တလေးသစ်သီးစျေးကွက်တွင် မတ်လနောက်ဆုံးပတ်အတွင်း ရာသီစာစပျစ်သီးများဝင်ရောက်လျက်ရှိပြီး အရောင်းသွက်လျက်ရှိကြောင်း သိရပါတယ်။ မန္တလေးတိုင်းဒေသကြီး၊ ရမည်းသင်းခရိုင်၊ စစ်ကိုင်းတိုင်းဒေသကြီးနှင့်အခြားဒေသများမှလည်း ဝင်ရောက်ကြောင်း သိရပါတယ်။ ရမည်းသင်းခရိုင်တွင် စားစပျစ်နှင့်ဝိုင်စပျစ်(၂) မျိုးလုံးစိုက်ပျိုးလျက်ရှိပြီး၊အီတလီ No(3)၊ BQ ၊ BK ၊ RG စပျစ်မျိုးများ၊ရိုးရိုးအချွန်၊ ပန်း‌ရောင်အချွန်မျိုးနှင့် ဂျပန်(စိမ်း)တို့ စိုက်ပျိုးကြောင်း  သိရပါတယ်။ စပျစ်သီးအား အသီးအတိုင်း စားသုံးခြင်း၊ အခြောက် ခံခြင်း၊ယိုထိုးခြင်း၊ ဝိုင်၊ ဖျော်ရည်နှင့်စားသောက်ကုန်တို့တွင် စပျစ်သီးခြောက်များထည့်၍ စားသုံးကြောင်း သိရပါတယ်။ ဒေသအသီးသီးမှ သစ်သီးဝင်ရောက်မှုအနေဖြင့် မန္တလေးမြို့၊စျေးချိုစျေး၊ ၂၉ လမ်းနှင့် ၃၁ လမ်းကြား၊ ၈၄ လမ်းနေရာရှိ သစ်သီးပွဲရုံများသို့ ဝင်ရောက်ကြောင်း သိရပါတယ်။ မန္တလေး စျေးကွက်တွင် ၂၀၂၅ ခုနှစ် မတ်လနောက်ဆုံးပတ်အတွင်း ဝင်ရောက်မှုများသည့် စပျစ်သီး‌စျေး မှာ တစ်ပိဿာလျှင် စပျစ်သီးအလုံးဝိုင်း (ကြီး) ၁၂၀၀၀ ကျပ်နှင့် ၁၄၀၀၀ ကျပ်၊စပျစ်သီးအချွန်မျိုး ၁၁၀၀ဝ ကျပ်နှင့် ၁၂၀၀၀ ကျပ်၊ စပျစ်သီး (လုံးသေး) ၈၀၀၀ ကျပ်နှင့် ၁၀၀၀၀ ကျပ် စျေးတို့ဖြင့်  ရောင်းချလျက်ရှိပြီး၊ နွေဦးရာသီချိန်ရောက်ပြီဖြစ်၍ ရာသီစာစပျစ်သီးများအရောင်းသွက်လျက်ရှိကြောင်း  သိရပါတယ်။

DOCA(မန္တလေး)

    မတ်လနောက်ဆုံးပတ်အတွင်း  မန္တလေးမြို့၊သီရိမာလာစျေးတွင်   ငါး၊ ပုဇွန်နှင့် ရေထွက်ပစ္စည်းများ အရောင်းသွက်လျက်ရှိကြောင်း သိရပါတယ်။ ရေထွက်ပစ္စည်းဝင်ရောက်မှုမှာ မန္တလေးတိုင်းဒေသတွင်းရှိ မွေးမြူရေးကန်များမှ တီလားဗီးယားငါး(ဂျပန်ငါး)၊ ငါးကြင်းများ၊ ရေချိုငါးမျိုးစုံနှင့် ပုဇွန်များ၊ရန်ကုန်တိုင်းဒေသကြီးနှင့် မြန်မာပြည်အောက်ပိုင်းမှထွက်ရှိသောငါး၊ပုဇွန်၊ ဂဏန်းများနှင့်ရေထွက်ပစ္စည်းများဝင်ကြောင်း  သိရပါတယ်။ မန္တလေးစျေးကွက်ဝင်ရောက်မှာ တစ်ရက်ခြားလျှင် ကား(၁၀ဘီး)၃စီးနှင့်၄စီးအကြားဝင်ရောက်မှုနှင့်ခေါက်တိုကန်တာ ကားအနေဖြင့် တစ် ရက်လျှင် ၅ စီးနှင့်၆စီးအကြား ဝင်ကြောင်း သိရပါတယ်။ ၂၀၂၅ ခုနှစ်မတ်လနောက်ဆုံးပတ်အတွင်း ဖြစ်ပေါ်ခဲ့သည့် တစ်ပိဿာ စျေးနှုန်းများမှာ  ငါးသလောက် ၂၀၀၀ဝိ/- နှင့် ၃၅၀၀ဝိ/-၊ငါးကြင်း ဖြူ  ၁၂၀၀ဝိ/- နှင့် ၁၆၀၀ဝိ/-၊ ငါးကြင်းမျက်စံနီ ၁၂၀၀ဝိ/- နှင့် ၁၄၀၀ဝိ/- ၊ ငါးအုံတုံ၁၀၀၀ဝိ/-  နှင့် ၁၄၀၀ဝိ/- ၊ငါးမြစ်ချင်း ၊ငါးပတ်နှင့်ငါးရံ့များမှာ ၁၃၀၀ဝိ/- နှင့်၁၆၀၀ဝိ/-၊တီလားဗီးယား(ဂျပန်ငါး)  ၈၀၀ဝိ/- နှင့် ၁၀၀၀ဝိ/-၊ ကတ်ကတစ်ငါး  ၃၀၀၀ဝိ/- နှင့် ၃၃၀၀ဝိ/- စျေးတို့ဖြင့် ရောင်းချလျက်ရှိပြီး၊အရွယ်အစား အလိုက် အနည်းငယ်စျေး ကွာခြားမှုရှိကြောင်း  သိရပါတယ်။  မွေးမြူရေးပုဇွန် စျေးမှာ အမျိုးအစားအလိုက် တစ်ပိဿာလျှင်၁၀၀၀ဝိ/-နှင့်၁၃၀၀ဝိ/၊ပုဇွန်ကြားနှင့်ရေချိုပုဇွန်တုတ် မှာ ၃၅၀၀ဝိ/-   နှင့် ၅၀၀၀ဝိ/-၊  ပြည်ကြီးငါး  ၃၀၀၀ဝိ/-  နှင့်  ၅၀၀၀ဝိ/-၊ ဂဏန်း ၁၀၀၀ဝိ/- နှင့် ၁၂၀၀ဝိ/-၊ ကင်းမွန် ၂၀၀၀ဝိ/-နှင့် ၂၅၀၀ဝိ/- ၊  ရေဘဝဲ၂၀၀၀ဝိ/-နှင့် ၄၅၀၀ဝိ/- စျေးတို့ဖြစ်ပေါ် လျက်ရှိကြောင်း သီရိမာလာစျေးရှိ ငါးရောင်းချသူတစ်ဦး၏ပြောပြချက်အရ သိရပါတယ်။

DOCA(မန္တလေး)

     ဂေါ်ဖီထုပ်စိုက်ပျိုးချိန်၊ထွက်ရှိချိန်သည် မျိုးစေ့အမျိုးအစား၊ ရာသီဥတု၊ စိုက်ပျိုးနည်း စနစ်နှင့် ဒေသကိုလိုက်၍ ၆၀ ရက်မှ ၁၂၀ ရက်ထိကွာခြားသည်။ မြန်မာနိုင်ငံတွင် ဂေါ်ဖီထုပ်ကို အဓိကအားဖြင့် ဆောင်းရာသီ၌ စိုက်ပျိုးလေ့ရှိပြီး အောက်တိုဘာလ၊ နိုဝင်ဘာလ၊ ဒီဇင်ဘာလများ တွင် စိုက်ပျိုးပြီး ဇန်နဝါရီလ၊ ဖေဖော်ဝါရီလနှင့် မတ်လဆန်းများတွင် ရိတ်သိမ်းထွက်ပေါ်ကြောင်း သိရသည်။ အေးမြသော ရာသီဥတုကို ကြိုက်နှစ်သက်သော ဂေါ်ဖီထုပ်များကို ရှမ်းပြည်နယ်၊ ချင်းပြည်နယ်၊ ကချင်ပြည်နယ်များတွင် အဓိကစိုက်ပျိုးပြီး၊ အပူပိုင်းဒေသများဖြစ်သော မကွေး၊ မန္တလေး၊ စစ်ကိုင်းတိုင်းတို့တွင် ဆောင်းရာသီ၌စိုက်ပျိုးကြသည်။ မြင်းခြံမြို့နယ် အေးမြသီတာဈေးရှိ ကုန်စိမ်းဈေးတွင် ဂေါ်ဖီထုပ်တစ်ထုပ်လျှင်  ယခုလ ၁၅၀၀ ကျပ်မှ ၂၀၀၀ ကျပ်ဖြင့် ရောင်းဝယ်လျက်ရှိကြောင်း၊ ယခင်လတွင် ဂေါ်ဖီထုပ်တစ်ထုပ်လျှင် ၁၀၀၀ ကျပ်မှ ၁၅၀၀ ကျပ်နှုန်းဖြင့် ရောင်းချခဲ့သဖြင့် ယခင်လထက်  ၅၀၀ ကျပ်ခန့် ဈေးနှုန်းမြင့်တက်ခဲ့ကြောင်း၊ ဖေဖော်ဝါရီနှင့်မတ်လများတွင် ဂေါ်ဖီထုပ်ဈေးကွက်ပိုမိုကောင်းမွန်လေ့ရှိသဖြင့် နှစ်စဉ်ဆောင်းနှောင်းပိုင်းကာလများတွင် ဝယ်လို အားမြင့်မာကြောင်း သိရှိရသည်။ မြင်းခြံမြို့နယ်ဈေးကွက်တွင် ရောင်းချနေသော ဂေါ်ဖီထုပ်များကို ပုပ္ပါး၊ ပြင်ဦးလွင်မြို့နှင့် မန္တလေးမြို့များမှ တင်သွင်းရောင်းချကြကြောင်း ကုန်စိမ်းအရောင်းအဝယ် လုပ်ကိုင်သူတစ်ဦး၏ ပြောပြချက်အရ သိရှိရသည်။

DOCA(မန္တလေး)

    ကျောက်ပန်းတောင်းမြို့နယ်တွင် ကျေးရွာခွဲပေါင်း(၃၃၉)ရွာရှိသည့်အနက်မှ စပေါင်းကုန်း ကျေးရွာသည် ပွင့်လင်းရာသီ၌ မြေထည်လုပ်ငန်းများကို လုပ်ကိုင်လေ့ရှိသော ကျေးရွာတစ်ရွာ ဖြစ်ပါသည်။ မြေထည်လုပ်ငန်းမှ ထွက်ရှိသောပစ္စည်းများမှာ ရေအိုး၊ အတာသင်္ကြန်အိုး၊ ဆားအိုး၊ ဟင်းအိုးပြင်ခွက်ဝင်အိုး၊ ဟင်းအိုးပြင်ပြည်ဝင်အိုး၊ ကောက်ညှင်းပေါင်းအိုး၊ ထန်းရည်မြူအိုး၊ ဘုရားပန်းအိုးတို့အား ပြုလုပ်ရောင်းချလျက်ရှိပါသည်။ ယခုအချိန်အခါသည် မြန်မာလူမျိုးတို့၏ နှစ်သစ်သို့ ကူပြောင်းတော့မည် တန်ခူးလရာသီ သို့ရောက်ရှိလာပြီဖြစ်သည့်အတွက် မြန်မာဓလေ့ထုံးလမ်းအစဉ်အလာရကျင်းပလေ့ရှိသော သင်္ကြန်ပွဲတော်နှင့်အတူ အတာသင်္ကြန်အိုးများသည် ဝယ်ယူမှုများလာ သည့်အတွက် တစ်ရက်လျှင်အလုံးရေ(၁၀၀၀)လုံးခန့် ဈေးကွက်အတွင်းသို့ ဝင်ရောက်လျက်ရှိသည်။ အတာသင်္ကြန်အိုးများကို ကျောက်ပန်းတောင်းမြို့မှတစ်ဆင့် ချောက်မြို့နယ် ဂွေးချို၊ ဂွေးပင်၊ ထိန်စမ်း၊ ကန်ရေကြီး၊ ကန်ရေလေးသို့လည်းကောင်း၊ စလေမြို့သို့လည်းကောင်း၊ နတ်မောက်မြို့ နယ်နှင့်တောင်တွင်းကြီး မြို့နယ်များသို့လည်းကောင်း တင်ပို့ရောင်းချလျက်ရှိကြောင်း သိရသည်။ အတာသင်္ကြန်အိုးများကို လက္ကားအနေဖြင့်တစ်လုံးလျှင်(၈၀၀)ကျပ်၊ လက်လီအနေဖြင့်(၁၀၀၀)ကျပ်၊ မုန့်ပြားသလက်အိုးခင်းနှင့် ဟင်းအိုးပြင်ခွက်ဝင်အိုးများသည် လက္ကားအနေဖြင့်(၁၀၀၀)ကျပ်၊ လက်လီ အနေဖြင့်(၁၅၀၀)ကျပ်၊ ကောက်ညှင်းပေါင်းအိုးနှင့်ဟင်းအိုးပြင်ပြည်ဝင်အိုးများသည် လက္ကားဈေးအနေဖြင့်(၁၅၀၀)ကျပ်၊ လက်လီအနေဖြင့်(၂၅၀၀)ကျပ်၊ ဆားအိုးနှင့်ဘုရားပန်းအိုးအလတ်များသည် လက္ကားအနေဖြင့် (၈၀၀)ကျပ်၊ လက်လီအနေဖြင့်(၁၀၀၀)ကျပ်၊ သောက်ရေအိုးတစ်လုံးလျှင် လက္ကား (၄၅၀၀)ကျပ်နှင့် လက်လီ(၅၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(မန္တလေး)

    မန်ကျည်းပင်သည်နွေရာသီဆိုလျှင် အေးမြသည့်အရိပ်ကိုပေးနိုင်ပါသည်။ နွေနေပူမှာ မန်ကျည်းရိပ်အေးအေးလေးတွင်ထိုင်ပြီး အကြမ်းရည်သောက်၍ အညာဓလေ့အတိုင်း ထန်းလျက် လေးစားပြီး စကားပြောကြသည်မှာ အညာဒေသ၏ချစ်စရာဓလေ့တစ်ခုဖြစ်ပါသည်။ မန်ကျည်းပင် သည် အရွက်၊ အသီး၊ အခေါက်၊ အစေ့၊ တစ်ပင်လုံးနီးပါး အသုံးဝင်ပါသည်။ ယခုအခါ နွေရာသီသို့ ရောက်ရှိလာသည့်အတွက် ရာသီစာတစ်ခုအနေဖြင့် မန်ကျည်းရွက်နုနုကို ကြက်သွန်စိမ်း၊ ပုဇွန် ခြောက်၊ မြေပဲမှုန့်၊ ဆီစိမ်း၊ အချို၊ အငန် အရသာထည့်ပြီး သုပ်စားကြသလို ချဉ်ရည်ဟင်း ချက်စားကြသည်များလည်း ရှိပါသည်။ မန်ကျည်းရွက်တွင် ဗီတာမင်အေ၊ ဗီတာမင်စီ၊ ကယ်လ်ဆီယမ်၊ သံဓာတ်၊ အမျှင်ဓာတ်၊ ပိုတက်ဆီယမ်စသည့်  အာဟာရဓာတ်များစွာ ပါဝင်ပါသည်။ ယခုအခါ မန်ကျည်းရွက်များစတင်ပေါ်ထွက်လာပြီဖြစ်ရာ မြင်းခြံမြို့၊ အေးမြသီတာဈေးတွင် မန်ကျည်းရွက် နုနုများကို (၅)ကျပ်သားလျှင်(၁၀၀၀)ကျပ်နှုန်း၊(၁၀)ကျပ်သားလျှင်(၂၀၀၀)ကျပ် နှုန်းဖြင့်အရောင်း အဝယ်ဖြစ်ကြောင်း သိရသည်။

DOCA(မန္တလေး)