ပြည်တွင်းကုန်သွယ်မှုသတင်း

      ခရမ်းချဉ်သီးသည် ကျန်းမာရေးနှင့်ညီညွတ်သော သီးနှံတစ်မျိုးဖြစ်၍ ဓာတ်တိုးဆန့်ကျင် ပစ္စည်းအများအပြားပါဝင်ကြောင်း သိရသည်။ ဓာတ်တိုးခြင်းကိုဖြစ်စေပြီး ကင်ဆာ၊ ဆီချို၊ နှလုံးရောဂါနှင့် အခြားနာတာရှည်ရောဂါများဖြစ်စေသော ပစ္စည်းများမှ ကင်းဝေးစေနိုင်ပါသည်။ ခရမ်းချဉ်သီးဖြင့် ပြုလုပ်ထားသော စားစရာများစားသုံးခြင်းဖြင့် ကင်ဆာရောဂါနှင့်နှလုံးရောဂါဖြစ်ခြင်းတို့မှ ကာကွယ်ပေးနိုင်ကြောင်း၊ ခရမ်းချဉ်သီးတွင် ဗီတာမင်အေနှင့်စီ ကြွယ်ဝစွာပါဝင်ကြောင်း သိရသည်။ အကောင်းဆုံးမှာ သဘာဝအတိုင်းရင့်မှည့်သောခရမ်းချဉ်သီးကို စားသုံးသင့်သည်။ ခရမ်းချဉ်သီးကို ချက်ပြုတ်လျှင် လိုင်ကိုမင်းဓာတ်မြင့်မားစေနိုင်သောကြောင့် ဟင်းချက်ရာတွင်ထည့်သွင်း အသုံးပြုသင့်ပါသည်။ ခရမ်းချဉ်သီးမှာပါဝင်သော အမျှင်ဓာတ်များသည် ဝမ်းချုပ်ခြင်းကိုလည်းကင်းဝေး စေနိုင်သောကြောင့် ဝမ်းချုပ်တတ်သူများအတွက် ပုံမှန်စားသုံးသင့်ပါသည်။ ခရမ်းချဉ်သီးကို ပန်ထွေဖျော်၍သော်လည်းကောင်း၊ ပုဇွန်ခြောက်နှင့်ငါးပိချက် ချက်၍သော်လည်းကောင်း၊ အသုပ် အမျိုးမျိုးတွင်လည်းကောင်း၊ ယိုပြုလုပ်၍သော်လည်းကောင်း အများဆုံးစားသုံးလျက်ရှိပါသည်။ ခရမ်းချဉ်သီးကို မြင်းခြံမြို့နယ်အတွင်းရှိ ကျေးရွာများ၌ စိုက်ပျိုးထွက်ရှိသလို ပခုက္ကူမြို့နှင့် ပုပ္ပားမြို့တို့မှထွက်ရှိသော အသီးများကိုလည်းဝယ်ယူရောင်းချကြကြောင်း သိရသည်။ မြင်းခြံမြို့ ဈေးများတွင်ရောင်းချနေသော ခရမ်းချဉ်သီးဈေးနှုန်းများမှာ ယခင်မတ်လနောက်ဆုံးပတ်၌ တစ်ပိဿာလျှင်(၈၀၀)ကျပ်မှ(၁၀၀၀)ကျပ်ထိရှိခဲ့ပြီး၊ ယခုဧပြီလ ပထမပတ်တွင် တစ်ပိဿာလျှင် (၁၅၀၀)ကျပ်မှ(၂၀၀၀)ကျပ်ထိ ဈေးနှုန်းများရှိ၍ ယခင်တစ်ပတ်နှင့်နှိုင်းယှဉ်လျှင် တစ်ပိဿာကို (၇၀၀၊ ၁၀၀၀)ကျပ်ထိ ဈေးနှုန်းများမြင့်တက်ခဲ့ကြောင်း သိရသည်။

DOCA(မန္တလေး)

    အညာဒေသသည် ဆီထွက်သီးနှံဖြစ်သည့် မြေပဲနှင့်နှမ်းကို သုံးရာသီအလိုက်စိုက်ပျိုးကြပြီး ဆီကြိတ်ခွဲစားသုံးကြသလို မုန့်ပဲသရေစာအဖြစ်လဲစားသုံးကြလျက်ရှိပါသည်။ မုန့်ပဲသရေစာများ ပြုလုပ်စားသုံးရာတွင် နှမ်းကိုယိုထိုး၍စားသုံးမှုမှာလည်း လူကြိုက်များပြီး အလှူအတန်း၊ မင်္ဂလာဆောင်၊ ဘုရားပွဲနှင့်အခြားပွဲလမ်းသဘင်များတွင် ဧည့်သည်များအတွက် ဧည့်ခံစရာမုန့်တစ်မျိုး လည်းဖြစ်သလို ဒေသထွက်လက်ဆောင်မုန့်တစ်မျိုးလည်းဖြစ်ပါသည်။ မြန်မာ့ဓလေ့ အစားအစာ ဖြစ်သော နှမ်းပျစ်(ခေါ်)နှမ်းကပ်ယိုကို မြင်းခြံမြို့နယ်အတွင်း ပြုလုပ်ရောင်းချကြသလို အခြားဒေသ များမှလည်း မှာယူရောင်းချလျက်ရှိပါသည်။

     မြင်းခြံမြို့တွင် ရောင်းချလျက်ရှိသော နှမ်းပျစ်(ခေါ်)နှမ်းကပ်ယိုကို (၁၅၀၀)ကျပ်တန်အထုပ် များဖြင့် ထုတ်လုပ်ရောင်းချလျက်ရှိပြီး နှမ်းကပ်ယိုကိုပြုလုပ်ရာတွင် နှမ်းကိုလှော်၍ ထန်းလျက် ဖြင့်ရောကာ ပုံသဏ္ဍာန်အရွယ်အစားမျိုးစုံ ပြုလုပ်ရောင်းချလျက်ရှိကြောင်း၊ နှမ်းကပ်ယိုမှာ နှမ်းနံ့ မွှေးမွှေးလေးဖြင့် ထန်းလျက်၏ချိုမြသောအရသာရှိ၍ ကလေးလူကြီးကြိုက်နှစ်သက်ကြပြီး ဧည့်ခံ မုန့်နှင့်ဒေသထွက်လက်ဆောင်မုန့်တစ်မျိုးဖြစ်သည့်အတွက် အရောင်းသွက်ကြောင်း မြင်းခြံမြို့ရှိ နှမ်းကပ်ယိုလုပ်ငန်းရှင်များနှင့် ရောင်းချသော ဈေးဆိုင်များမှသိရသည်။

DOCA(မန္တလေး)

     ကန်စွန်းရွက်သည် လူအတန်းအစားမရွေးကြိုက်နှစ်သက်သော အရွက်တစ်မျိုးဖြစ်ပြီး ရေရရှိသောနေရာများတွင် လွယ်ကူစွာပေါက်ရောက်ရှင်သန်နိုင်သည်။ ကန်စွန်းရွက်များကို လယ်ကန် သင်း၊လယ်ကွက်၊ အင်းအိုင်၊ ချောင်းမြောင်းနှင့်အခြားရေရရှိသော နေရာများတွင် သဘာဝအလျောက် ပေါက်ရောက်မှုများမှရရှိနိုင်သလို တစ်နိုင်တစ်ပိုင်သော်လည်းကောင်း၊ စီးပွားဖြစ်သော်လည်းကောင်း သီးသန့်စိုက်ပျိုးခြင်းများမှလည်း ထွက်ရှိကြ၍ရာသီချိန်ခါမရွေး စားသုံးရသောသီးနှံတစ်မျိုးဖြစ်ပါသည်။ ကန်စွန်းရွက်မှာ ဗမာကန်စွန်းရွက်နှင့် တရုတ်ကန်စွန်းရွက်(စိုက်ပျိုးရေး)ဟူ၍ အများအားဖြင့် သိရှိကြပြီး ဗမာကန်စွန်းရွက်ကို ကြိုက်နှစ်သက်မှုများသော်လည်း မိုးတွင်းရာသီကာလမှသာ အများဆုံးထွက်ပေါ်ရရှိသဖြင့် စိုက်ပျိုးရေးကန်စွန်းရွက်ကိုသာ အားပြုစားသုံးကြပါသည်။ မြင်းခြံမြို့နယ် အတွင်းရှိ ကျေးရွာများတွင်ကန်စွန်းရွက်များကို စိုက်ပျိုးကြကြောင်း သိရှိရပါသည်။ ၂၀၂၅-ခုနှစ်၊ ဧပြီလပထမပတ်အတွင်း ကန်စွန်းရွက်(၁)စည်းလျှင်(၁၀၀)ကျပ်၊ ကန်စွန်း(၆)စည်းလျှင်(၅၀၀)ကျပ် ဖြင့်ရောင်းချကြောင်း၊ ကန်စွန်းရွက်များကို အိမ်ရှင်မများ ဟင်းချက်ရာတွင်လည်းကောင်း၊ စားသောက်ဆိုင်များနှင့်အထောင်းစုံရောင်းချသော ဆိုင်များမှလည်းကောင်း ဝယ်ယူကြသဖြင့် ကန်စွန်းရွက်များအရောင်းအဝယ် သွက်လျက်ရှိကြောင်း ကုန်စိမ်းရောင်းချသူတစ်ဦးထံမှ သိရှိရသည်။

DOCA(မန္တလေး)

    မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်တွင် စားသုံးဆီဖူလုံ ပိုလျှံရေးအတွက် အရေးကြီးသီးနှံတစ်မျိုးဖြစ်သည့် ဆောင်းနေကြာစိုက်ပျိုးခဲ့ရာ တစ်မြို့နယ်လုံး အနေဖြင့် လျာထားဧက(၆၅၀၇)ဧက ရှိသည့်အနက် အမှန်စိုက်ပျိုးဧက(၆၅၄၃)ဧက စိုက်ပျိုးနိုင်ခဲ့ပြီး ဖေဖော်ဝါရီနောက်ဆုံးပတ်တွင် (၆၅၄၃)ဧက ရိတ်သိမ်းခဲ့ကြ၍ (၂၂.၃၇)တင်းနှုန်းထွက်ရှိပြီး စုစုပေါင်း အထွက်တင်း(၁၄၆၃၆၇)တင်းထွက်ရှိခဲ့သည်။ လျာထားဧကထက်(၃၆)ဧက ပိုမိုစိုက်ပျိုးနိုင်ခဲ့သည်။ ဆောင်းနေကြာကို နိုဝင်ဘာလတွင် စတင်စိုက်ပျိုး၍ ဇန်နဝါရီလနောက်ဆုံးပတ်နှင့် ဖေဖော်ဝါရီလ တို့တွင် စတင်ရိတ်သိမ်းကြကြောင်း သိရပြီး ပုပ္ပားမြောက်ဘက်ခြမ်းရှိ ကျေးရွာများ၊ မြောက်တော ကျေးရွာ၊ ကြက်ပစ်၊ လက်ပံပျားကျေးရွာ၊ တောင်ဦး၊ စင်မြင့်၊ ဗြိစင်အင်း စသည့်ကျေးရွာများတွင် အဓိက အားထားစိုက်ပျိုးကြကြောင်း၊ ဆောင်းနေကြာတစ်တင်းလျှင်(၅၀၀၀၀/၅၅၀၀၀)ကျပ်ဖြင့် ကျေးရွာအတွင်းရှိ ဆီစက်များသို့ ရောင်းချကြောင်း၊ အချို့ကိုမိမိအိမ်စားသုံးရန်ဆီကြိတ်ခွဲကြ ကြောင်း၊ နေကြာတစ်ဧကစိုက်ပျိုးလျှင် ကုန်ကျစရိတ်အနေဖြင့်(၇၂၂၀၀၀)ကျပ်ခန့် ကုန်ကျနိုင် ကြောင်းနှင့် တောင်သူအနေဖြင့်နေကြာတစ်ဧကလျှင် အကျိုးအမြတ်မှာ(၄၀၀၀၀၀)ကျပ် နီးပါး အကျိုးအမြတ် ရရှိနိုင်ကြောင်း၊ ကျောက်ပန်းတောင်းမြို့ အညာတောင်သူများသည် နေကြာသီးနှံကို စိုက်ပျိုးမှု အနေဖြင့် ဆင်းရွှေကြာ-၂ ၊ ရေဆင်း-၁ စပ်မျိုးနေကြာမျိုးကို အဓိကစိုက်ပျိုးကြကြောင်း နေကြာစိုက်တောင်သူများထံမှ သိရှိရသည်။

DOCA(မန္တလေး)

နေပြည်တော်၊ ဧပြီလ ၂၇

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်း ဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံ တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျ စရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိပါ သည်။

              ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက် နှင့် ဈေးနှုန်းဖြစ်ပေါ်မှုများအရ ၂၀၂၅ ခုနှစ်၊ ဧပြီလ ၂၈ ရက်နေ့မှ မေလ ၄  ရက်နေ့အထိ ရန်ကုန်အထိုင်ဈေးအခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင်၆,၇၃၅ ကျပ် ဖြစ်ကြောင်း ထုတ်ပြန်ကြေညာထားပါသည်။

              ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်း အပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည် ဖြစ်ကြောင်း အသိပေးထုတ်ပြန်ထားသည်။

              အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန ၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။