ပြည်တွင်းကုန်သွယ်မှုသတင်း

    စစ်ကိုင်းတိုင်းဒေသကြီး၊ ကန့်ဘလူမြို့နယ်သည် စိုက်ပျိုးရေးလုပ်ငန်းကိုအဓိကလုပ်ကိုင်ပြီး လယ်ယာထွက်ကုန်သီးနှံများကို စိုက်ပျိုးကြသကဲ့သို့ ဥယျာဉ်ခြံထွက်သီးနှံများကိုလည်း တစ်နိုင်တစ်ပိုင်စိုက်ပျိုးကြကြောင်း သိရသည်။ မြန်မာနိုင်ငံ၌ စိုက်ပျိုးလျက်ရှိသော နဂါးမောက်မျိုးများမှာ အပြင်အခွံအနီရောင်နှင့် အတွင်းသားအဖြူရောင်ရှိသောမျိုး၊ အပြင်ခွံအနီရောင်နှင့်အတွင်းသား အနီရောင်ရှိသောမျိုး၊ အပြင်ခွံအဝါ ရောင်နှင့်အတွင်းသားအဖြူရောင်ရှိသောမျိုးတို့ဖြစ်ကြသည်။

     ကန့်ဘလူမြို့နယ် ဆိတ်ဖူးမြောင်ကျေးရွာ၊ အင်ကြင်းစုကျေးရွာနှင့် အခြားကျေးရွာများတွင် နဂါးမောက်သီးများကို မိသားစုတစ်နိုင်တစ်ပိုင်စိုက်ပျိုးကြရာ ယခုအချိန်သည် နဂါးမောက်သီးများ ခူးဆွတ်ရာသီဖြစ်သောကြောင့် ဈေးကွက်အတွင်းရောင်းချနေကြောင်း၊ နဂါးမောက်သီးသည် မေလမှ အောက်တိုလာလအထိ ၇-၈ကြိမ်ခန့်ခူးဆွတ်ရပြီး တစ်နှစ်လျှင် ၅-၆ လခန့် ဝင်ငွေရရှိနိုင်သော စီးပွားရေးတွက်ခြေကိုက်သည့် ဥယျာဉ်ခြံထွက် သီးနှံတစ်ခုဖြစ်ကြောင်း၊  ဇူလိုင်လ စတုတ္ထပတ် အတွင်း ကန့်ဘလူမြို့ သစ်သီးဈေးကွက်တွင် ရောင်းချနေသော နဂါးမောက်သီး ဈေးနှုန်းများမှာ အသေးတစ်လုံးလျှင် (၅၀၀မှ ၁၀၀၀)ကျပ်နှင့် အကြီးတစ်လုံးလျှင် (၁၅၀၀)ကျပ်ဖြင့် အရောင်းအ ဝယ်ဖြစ်လျက်ရှိကြောင်း သစ်သီးဆိုင်များမှ သိရှိရပါသည်။

DOCA(စစ်ကိုင်း)

  ကျောက်ဆည်မြို့နယ်အတွင်း ပင်တလည်ကျေးရွာတွင် ပန်းမျိုးစုံစိုက်ပျိုးသည့်အနက် မေမြို့ပန်းများလည်း စိုက်ပျိုးလျက်ရှိကြောင်း ၊ မေမြို့ပန်းများသည် အစုလိုက်၊အခိုင်လိုက်ပွင့်သော ပန်းဖြစ်ပြီး အရောင်အားဖြင့် အဖြူ၊အနီ၊ပန်းရောင်၊ဗေဒရောင် ဟူ၍ ရှိကြပြီး ရိုးစိမ်းအဖြူ၊ ကျောက်နီ၊ ချင်းမိုင် စသည်ဖြင့် အပွင့်အရောင် ပန်းပွင့်ပုံကို မူတည်၍ အခေါ်အဝေါ် အမျိုးမျိုး ရှိကြပါသည်။ မည့်သည့်မြေအမျိုးအစားတွင်မဆို ရှင်သန်နိုင်သော်လည်း ပန်းပွင့် အထွက်ကောင်းစေရန် ၊ အရည်အသွေးကောင်းမွန်၍ပန်းအရောင်များလှပစေရန်အတွက် သဘာဝမြေသြဇာများကြွယ်ဝသော မြေဖြစ်ရန်လိုအပ်ပြီး ရေမဝပ်စေဘဲ ခြောက်သွေ့သော ရာသီဥတုတွင် ပုံမှန်ရေလောင်းပေးရန် လိုအပ်ပါသည်။ ပန်းမျိုးစေ့များအား ပန်းများအများဆုံး ထွက်ရှိရာ ပြင်ဦးလွင်မြို့မှ မှာယူရကြောင်း၊ ပျိုးထောင်ပြီး ပျိုးသက်(၆)ပတ်ခန့်ရှိသော ပျိုးပင်များကို စိုက်ဘောင်များသို့ ပြောင်းရွေ့စိုက်ပျိုးရ ကြောင်း၊ ပျိုးပင်များကို မေလဆန်းတွင် စတင်စိုက်ပျိုးပါက ဇွန် ၊ ဇူလိုင်များတွင် ပန်းပင်များကို စတင်နှုတ်ယူရောင်းချနိုင်ပြီဖြစ်ပြီး အပင်အရေအတွက်၊ အရွယ်အစား ၊အရောင်ကိုလိုက်၍ ဈေးများ ကွာခြားချက်ရှိကြောင်း၊ မေမြို့ပန်းအရိုင်းစည်းတစ်စည်းလျှင်(၃၀၀၀/-)ကျပ်၊ (၁၀)ပင် တစ်စည်းလျှင် (၁၀၀၀/-)ကျပ်နှုန်းဖြင့် ဈေးများအတွင်းရောင်းချလျှက်ရှိကြောင်း၊ တစ်ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခ အပါအဝင် (၁၀)သိန်းကျပ်ခန့်ကုန်ကျကြောင်း၊ အကျိုးအမြတ်အနေဖြင့် (၈)သိန်းကျပ်ခန့်အမြတ်ရရှိကြောင်း ၊ မေမြို့ပန်းစိုက်ပျိုးခြင်းဖြင့် စီးပွားဖြစ် ဝင်ငွေတိုးကာ စားဝတ်နေရေးပြေလည်သောကြောင့် မေမြို့ပန်းများ စိုက်ပျိုးသင့်ပါကြောင်း ရေးသားတင်ပြအပ်ပါ သည်။

DOCA(မန္တလေး)

  ကျောက်ဆည်ခရိုင်၊ကျောက်ဆည်မြို့နယ်တွင် သီးနှံမျိုးစုံစိုက်ပျိုးဖြစ်ထွန်းလျှက်ရှိရာ စားဖို ဆောင်သီးနှံများဖြစ်သော ကြက်သွန်နီ၊ငရုတ်တို့အပြင် ဘူးပင်များကိုစီးပွားဖြစ် စိုက်ပျိုးလာကြပါ သည်။ဘူးပင်ကို ကျောက်ဆည်မြို့နယ် ၊ ပင်တလည်ကျေးရွာနှင့်ပေါင်လောင်ကျေးရွာများ၌ မြစ်ဘေး တလျှောက်တွင် စိုက်ပျိုးကြပါသည် ။ စိုက်ပျိုးမည်ဆိုပါက မြေဆွေး၊မြေဆီများကို သမအောင် ရောမွှေပြီး စိုက်ဘောင်ပြုလုပ်၍ စိုက်ပျိုးရပါသည်။ အများဆုံး စိုက်ပျိုးသည့် ဘူးမျိုးများမှာ ဘူးသပိတ်၊ဘူးလည်လှ၊ဘူးရှည် မျိုးများကိုစိုက်ပျိုးကြကြောင်း၊ဘူးပင်သည်နှစ်ပတ်လည်စိုက်ပျိုး၍ရ သောအပင်ဖြစ်ပြီး (၁)ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သား အပါအဝင် စုစုပေါင်း (၉၀၀၀၀၀/-)ကျပ်ခန့်ကုန်ကျကြောင်း၊ ဘူးပင်စိုက်ပျိုးပြီး(၇၅-၉၀)ရက်အကြာတွင် အသီးများစတင် ခူးဆွတ်၍ရကြောင်း၊ဘူးသီးကို မနုမရင့် အနေတော်အနေအထားတွင်ခူးဆွတ်ကြပါသည်။ဘူး(၁)ဧက အထွက်နှုန်းအနေဖြင့်(၂၀၀၀-၂၅၀၀)လုံးခန့်ထွက်ရှိကြောင်း၊ ဘူးသီးစျေးနှုန်းအနေဖြင့် ဘူးသီးအနေ အထားပေါ်မူတည်၍ ဖောက်သည်စျေးတစ်လုံးလျှင်(၈၀၀-၁၀၀၀)ကျပ်အထိရောင်းချရကြောင်း ၊ လက်လီစျေးအနေဖြင့် ဘူးသီးတစ်လုံးလျှင်(၁၃၀၀-၁၅၀၀)ကျပ် စျေးနှုန်းများရှိကြောင်း ၊ အကျိုး အမြတ်အနေဖြင့် (၁၆၀၀၀၀၀/-)ဝန်းကျင်ခန့်မြတ်ကြောင်း ၊ ကုန်စိမ်းပွဲစားများမှ စိုက်ခင်းအထိ လာရောက်ဝယ်ယူကြကြောင်း ၊ ပွဲစားများမှ ဘူးသီးများကို ခရီးသည်တင်ကားများဖြင့် ရန်ကုန်၊ မော်လမြိုင်၊ညောင်တုန်းနှင့်မန္တလေးမြို့ရှိစျေးများသို့ ပို့ဆောင်ရောင်းချကြကြောင်း ၊ ဘူးသီးစိုက်ပျိုး ခြင်းဖြင့် ဘူးညွန့်ပါရောင်းချရကြောင်း ၊ ဘူးညွန့် တစ်စည်းလျှင်(၅၀၀/-)ကျပ်စျေးနှုန်းဖြင့်ရောင်းချရ သောကြောင့် မိသားစုအပိုဝင်ငွေရရှိကြောင်း၊ဘူးပင်စိုက်ပျိုးပြီးစျေးကောင်းရသောကြောင့် တောင်သူများအကျိုးအမြတ်များကြောင်း ၊ ဘူးစိုက်ပျိုးသော ပင်တလည်ကျေးရွာမှ တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

 မန္တလေးတိုင်းဒေသကြီး ၊ မြစ်သားမြို့နယ်တွင် ပဲတီစိမ်း(မိုးကြို/မိုး)ကို ၂၀၂၅-၂၀၂၆ ဘဏ္ဍနှစ်တွင် မြစ်သားမြို့နယ်တွင် (၁၀၈၇၁)ဧက စိုက်ပျိုးနိုင်ခဲ့ကြောင်း သက်ဆိုင်ရာဌာန၏ စာရင်းများအရ သိရှိရပါသည် ။ ပဲတီစိမ်းမျိုးအနေဖြင့် ရေဆင်း-၁၁ ၊ ရေဆင်း-၁၂ မျိုးများကိုသာ အများဆုံးစိုက်ပျိုးကြပြီး (၁)ဧကလျှင် မျိုးစေ့(၅-၆)ပြည်ခန့်ကုန်ကျကြောင်း ၊ မျိုးစေ့ စျေးနှုန်း အနေဖြင့် (၁)ပြည်လျှင် (၆၀၀၀/-)ကျပ်နှုန်းဖြင့် ဝယ်ယူစိုက်ပျိုးရပြီး (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၈၀၀၀၀၀/-)ကျပ်ဝန်းကျင် ကုန်ကျကြောင်း သိရှိရပါ သည်။ ပဲတီစိမ်း (မိုးကြို/မိုး)ကို မတ်လတွင် စတင်စိုက်ပျိုးကြပြီး ယခုအချိန်တွင် အချို့ပဲတီစိမ်း စိုက်ခင်းများမှာ ရိတ်သိမ်းပြီးစီးပြီး အချို့မှာ ရိတ်သိမ်းရန်အနည်းငယ်သာကျန်ကြောင်း ၊ အထွက်နှုန်း အနေဖြင့် (၁၅-၂၀)တင်းခန့် ထွက်ရှိကြောင်း ၊ ယခင်နှစ် ပဲတီစိမ်းစျေးနှုန်းအနေဖြင့် တစ်တင်းလျှင် (၈၀၀၀၀/-)ကျပ်စျေးနှုန်းရှိခဲ့ပြီး ပေါ်ကာစအချိန်တွင် ပဲတီစိမ်းတစ်တင်းလျှင်(၁၂၇၀၀၀/-)ကျပ်ရှိရာမှ ယခုအချိန်တွင် ပဲတီစိမ်းအရည်အသွေး၊စျေးကွက်အခြေအနေများကြောင့် တစ်တင်းလျှင်(၁၂၀၀၀၀/-) ကျပ်ဖြင့်အရောင်းအဝယ်ဖြစ်လျှက်ရှိပြီး ပွဲရုံများမှတစ်ဆင့် စျေးကွက်ရှိရာ မန္တလေး၊ရန်ကုန်မြို့များသို့ တင်ပို့ရောင်းချကြကြောင်းသိရှိရပါသည်။ (၁)ဧက အကျိုးအမြတ်အနေဖြင့် သီးနှံအရည်အသွေးပေါ် မူတည်ပြီး (၁၀၀၀၀၀၀-၁၆၀၀၀၀၀)ကျပ် ဝန်းကျင်မြတ်ကြောင်း ၊ ယခုနှစ်တွင် ပဲတီစိမ်းစျေးနှုန်းများ ကောင်းမွန်သောကြောင့် တောင်သူများအနေဖြင့် အကျိုးအမြတ်များ ပိုမိုရရှိကြောင်း ပဲတီစိမ်း စိုက်ပျိုးသော တောင်သူတစ်ဦး၏ပြောကြားချက်အရသိရှိရပါသည်။

DOCA(မန္တလေး)

 ဝါသီးနှံအား မြန်မာနိုင်ငံတွင် မိုးကြိုရာသီ ၊ မိုးရာသီ နှင့် မိုးနှောင်းရာသီများတွင် စိုက်ပျိုး လျက်ရှိရာ မန္တလေးတိုင်းဒေသကြီး ၊ မြစ်သားမြို့နယ်တွင် မိုးကြိုဝါများ စတင်ထွက်ပေါ်လျှက်ရှိပါ သည်။ယခင်နှစ်တွင် မိုးကြိုဝါအား(၁၀၁၀)ဧက စိုက်ပျိုးနိုင်ခဲ့သော်လည်း ယခုနှစ်တွင်(၂၁၂၅)ဧက စိုက်ပျိုးနိုင်ခဲ့ကြောင်း သက်ဆိုင်ရာဌာန၏စာရင်းများအရသိရှိရပါသည်။ မိုးကြိုဝါအား ဖေဖော်ဝါရီလ လယ်မှမတ်လအတွင်းစတင်စိုက်ပျိုးပြီး တောင်သူများမှာ Raca နှင့် B 31 မျိုးများကို စိုက်ပျိုးကြ သော်လည်း တောင်သူအများစုမှာ အထွက်နှုန်းကောင်းမွန်ပြီး ပိုးမွှားအန္တရာယ်ဒဏ်ခံနိုင်ရည်ရှိသည့် Raca မျိုးကို  အများဆုံး စိုက်ပျိုးကြပါသည် ။ Racaမျိုးကို အချို့ တောင်သူများက ကုမ္ပဏီထံမှ ဝယ်ယူပြီးစိုက်ပျိုးကြသော်လည်း အချို့မှာ ယခင်နှစ် ဝါသီးနှံပေါ်ချိန်တွင် ဝါကောက်ပြီးမျိုးအဖြစ် ပြန်လည်အသုံးပြုကြပါသည်။ ဝါစိုက်ပျိုးမှုအနေဖြင့် (၁)ဧကလျှင် ပျိုးထုတ်ဝယ်ယူ၍ စိုက်ပျိုးပါက မျိုးစေ့ထုတ် (၂)ထုတ်ကုန်ကြပြီး ယခင်ဝါသီးနှံပေါ်ချိန်၌ ကောက်ယူထားသော မျိုးစေ့အား အသုံးပြုပါက (၅)ပိဿာခန့် ကုန်ကျကြောင်း ၊ မျိုးစေ့ (၁)ထုတ်လျှင် (၅၀၀၀၀/-)ကျပ်နှင့် မျိုးစေ့ (၁)ပိဿာလျှင် (၄၀၀၀/-)ကျပ် ကုန်ကျကြောင်း ၊ မျိုးစေ့ထုတ်ဖြင့် စိုက်ပျိုးပါက (၁) ဧကလျှင် (၁၀၀၀၀၀/-)ကျပ် ကုန်ကျပြီး ဝါကောက်ပြီး ရယူထားသောမျိုးစေ့ စိုက်ပျိုးပါက (၁)ဧကလျှင် (၂၀၀၀၀/-)ကျပ် ကုန်ကျပါသည် ။ (၁)ဧက ကုန်ကျစရိတ်အနေဖြင့် မျိုးစေ့၊ သွင်းအားစု၊ နွားရှဉ်းခ၊ လုပ်သားခအပါအဝင် စုစုပေါင်း (၉၀၀၀၀၀-၁၀၀၀၀၀၀)ကျပ်အထိ ကုန်ကျကြောင်း၊ ဝါထွက်ရှိမှု အနေဖြင့် ယခင်နှစ်တွင် ဝါဖြစ်ထွန်းမှုအပေါ်မူတည်ပြီး (၁)ဧကလျှင် ပိဿာ(၈၀၀-၁၀၀၀)အထိ ထွက်ရှိပြီး ဝါစျေးနှုန်းအနေဖြင့် (၁)ပိဿာလျှင် စတင်ထွက်ရှိချိန်တွင် (၃၀၀၀-၃၅၀၀)ကျပ် ရရှိ၍ လှိုင်လှိုင်ထွက်ပေါ်ချိန်တွင် ဝါအရည်အသွေးကောင်းပါက (၄၀၀၀/-)ကျပ်အထိ ရရှိခဲ့ကြောင်း ၊ ယခုနှစ်တွင်စတင်ထွက်ပေါ်ချိန်၌ဝါ(၁)ပိဿာလျှင်(၃၀၀၀-၃၅၀၀)ကျပ်စျေးနှုန်းရှိပြီး ဝါသီးနှံလှိုင်လှိုင် ထွက်ပေါ်ချိန်တွင် ယခင်နှစ်ကဲ့သို့ စျေးနှုန်းများမြင့်တက်လာနိုင်ပြီး ဝါစိုက်တောင်သူများအတွက် အကျိုးအမြတ်များဖြစ်ထွန်းလာနိုင်ကြောင်း ဝါကုန်သည်များထံမှ သိရှိရပါသည်။

DOCA(မန္တလေး)