ပြည်တွင်းကုန်သွယ်မှုသတင်း

    ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်အတွင်းရှိ ကျေးရွာများသည် လယ်ယာ စိုက်ပျိုးရေးလုပ်ငန်းကို လုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာ စိုက်ပျိုးရန်လွယ်ကူသော ရုံးပတီသီးကို မိသားစုအပိုဝင်ငွေရရှိရန်အတွက် တစ်နိုင်တစ်ပိုင်စိုက်ပျိုးရာမှ စီးပွားဖြစ်စိုက်ပျိုးလာ ကြကြောင်း သိရသည်။
    ရုံးပတီသီးကို ရာသီမရွေးစိုက်ပျိုးနိုင်ပြီး ၂ လခန့်အကြာတွင် စတင်ခူးဆွတ်ရောင်းချ ရကြောင်းသိရပါသည်။ စိုက်ပျိုးသောမျိုးများမှာ  ပင်ပုမျိုး၊ ပင်လတ်မျိုး၊ ပင်မြင့်မျိုးများဖြစ်ပြီး ပင်လတ်ရုံးပတီမျိုးများကို အများဆုံးစိုက်ပျိုးလျက်ရှိရာ တစ်ဧက လျှင် မျိုးစေ့ ၁၀ kg ပါ ၁ ထုပ် ကုန်ကျကြောင်း၊ စိုက်ပျိုးမှုအနေဖြင့် တန်းခြား ၂ ပေ၊ ပင်ခြား ၁ ပေခွဲ ထား၍ ဘောင်ခတ်စနစ်ဖြင့် စိုက်ပျိုးရပြီး မျိုး၊ သွင်းအားစု၊ မြေပြုပြင်ခ၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် ၄ သိန်းခန့် ကုန်ကျကြောင်း၊ ရုံးပတီသီးကို ၃ ရက်ခြားတစ်ကြိမ်ခန့် ဆွတ်ခူးရပြီး တစ်ဧကလျှင် ရုံးပတီသီး ပိဿာချိန် ၁၀၀၀-၁၂၀၀ ခန့် ထွက်ရှိကြောင်း၊ ဈေးကွက် အနေဖြင့် စိုက်ခင်းသို့ လာရောက်ဝယ်ယူသော ကုန်စိမ်းပွဲစားများအား ရောင်းချသည့်အပြင် ရန်ကုန်သို့လည်း တင်ပို့ ရောင်းချကြကြောင်း၊ ရုံးပတီသီးသည် စိုက်ပျိုးရလွယ်ကူပြီး အကျိုးအမြတ်ရရှိ သောကြောင့် မိသားစုအပိုဝင်ငွေရရှိကြောင်း သိရသည်။ 

DOCA(ပဲခူး)

   ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်၊ ကြက်ဖြူတောင်ကျေးရွာတွင် ပဲစောင်းခါး သီးစိုက်ပျိုးထားရှိသဖြင့် စားသုံးသူရေးရာဦးစီးဌာန၊ ရွှေတောင်မြို့နယ် တာဝန်ခံ နှင့် ဝန်ထမ်းများသည် (၁၈.၇.၂၀၂၅)ရက်နေ့တွင် သွားရောက်၍ကွင်းဆင်းလေ့လာခဲ့ပါသည်။
   ပဲစောင်းခါးသီးကို ဧပြီလလယ်လောက်တွင် စတင်စိုက်ပျိုးပြီး (၄)လအကြာတွင် စတင်ခူး ဆွတ်ရောင်းချရပါသည်။ ပဲစောင်းခါးသီး စိုက်ဧကတစ်ယောက်စိုက်တွင် အပင်ရေ(၁၀၀၀)ကျော်ရှိပြီး (၂)ရက်ခြားတစ်ခါ ခူးဆွတ်ရပါသည်။ တစ်ခါခူးဆွတ်လျှင် အသီးလှိုင်လှိုင်ပေါ်ချိန်တွင် အတောင့် (၃၀၀၀)ခန့်ခူးဆွတ်ရရှိ၍ အသီးတုန်းချိန်တွင် အတောင့်ရေ(၈၀၀)ခန့်သာခူးဆွတ်ရရှိပါသည်။ အသီး ခူးချိန်မှာ (၅)လခန့် ခူးဆွတ်ရပြီး အသီးတုန်းချိန်တွင် ပဲမြစ်အဖြစ် တူးဖော်ရောင်းချ၍ ရရှိကြောင်း သိရပါသည်။ ရောင်းဈေးအနေဖြင့် ပဲစောင်းခါးသီး(၁)တောင့်လျှင် (၂၀)ကျပ်နှုန်းဖြင့် ပွဲစားများမှ အခင်းအထိ လာရောက်ဝယ်ယူကြပါသည်။ ဈေးကွက်အနေဖြင့် ရွှေတောင်မြို့ရှိ ကုန်စိမ်းဒိုင်နှင့် ရန်ကုန်၊ နေပြည်တော်သို့လည်း တင်ပို့ရောင်းချကြောင်း သိရပါသည်။ ပဲစောင်းခါး သီး အပင်(၁၀၀၀)ကျော်တွင် ကုန်ကျစရိတ်အနေဖြင့် (၃)သိန်းခန့်ကုန်ကျပြီး အကျိုးအမြတ် အနေဖြင့် ပျမ်းမျှ(၆)သိန်းခန့် ရရှိနိုင်ကြောင်း ကွင်းဆင်းလေ့လာသိရှိနိုင်ပါသည်။

DOCA(ပဲခူး)

ယခုမိုးရာသီ ကာလ၏ ဇူလိုင်လတွင် နတ်တလင်းဈေးကွက်၌ ပြောင်းဖူးများပေါများ လျက်ရှိကြောင်း သိရှိရပါသည်။ ပြောင်းဖူးများကို နတ်တလင်းမြို့နယ်တွင် အများအပြား  စိုက်ပျိုး ကြပြီး  သကြားပြောင်းနှင့် ရိုးရိုးပြောင်းဟူ၍ ၂မျိုးစိုက်လေ့ရှိသည်။ နတ်တလင်းမြို့နယ်၌ ပြောင်းဖူးများ ကိုစီးပွားဖြစ်စိုက်ပျိုးခြင်းနှင့် တစ်နိုင်တစ်ပိုင် စိုက်ပျိုးခြင်းများလည်းရှိကြသည်။ ယခုအခါ နတ်တလင်း ဈေးအတွင်း၌ သကြားပြောင်းဖူး (၁)ဖူးလျှင်(  ၅၀၀ ) ကျပ်နှင့် ရိုးရိုးပြောင်းဖူး(၁)ဖူးလျှင် (၂၅၀)ကျပ်ဖြင့် ရောင်းချလျက်ရှိကြောင်းသိရှိရပါသည်။

DOCA(ပဲခူး)

    ကျောက်ဆည်မြို့၊ အေးမြကြည်လင်ဈေးနှင့် မြို့မဈေးအတွင်းသို့ အာလူးအသစ်များ စတင်ဝင်ရောက်လျက်ရှိရာ အားလူသီးကို ရှမ်းပြည်နယ် အောင်ပန်း၊ ကလောဒေသများမှ ဝင်ရောက် လျက်ရှိကြောင်း၊ အာလူးသီး အကြီး၊ အသေး၊ အရော တစ်ပိဿာလျှင် (၃၅၀၀/-) ကျပ်ဖြင့် ရောင်းချ ကြကြောင်း၊ အာလူးဈေးနှုန်းမှာ ဧပြီလမှ ယခု ဇူလိုင်လအထိ ဈေးမာ လျက်ရှိကြောင်း၊ အာလူးသီးကို လူကြိုက်များသောကြောင့် အရောင်းသွက်လျက်ရှိကြောင်း၊ အာလူးစားသုံးခြင်းဖြင့် ကျန်းမာရေး အာဟာရဓာတ် သက်သက်မဟုတ်ဘဲ ကျန်းမာရေးအကျိုး ကျေးဇူးများလည်းရရှိကြောင်း၊ လူတို့အတွက် အစာလည်းဆေး၊ ဆေးလည်းအစာဆိုသည့် အတိုင်း အာလူးစားသုံးခြင်းဖြင့် ဗီတာမင် ဘီစစ်ပါဝင်သောကြောင့် အာရုံကြောကျန်းမာရေး ကောင်းမွန်စေခြင်း၊ စိတ်ဓာတ်ကျခြင်း၊ စိတ်ဖိစီးမှု ဖြစ်ခြင်းတို့မှ ကာကွယ်ပေးကြောင်း လေ့လာသိရှိရပါသည်။ အာလူးဈေးငြိမ်သည့်အတွက် ရှမ်းပြည် ဘက်မှ အာလူးစိုက် တောင်သူဦးကြီးများ အကျိုးအမြတ်ဖြစ်ထွန်းကြောင်း၊ အာလူးရောင်းဝယ်သော သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

   မန္တလေးတိုင်းဒေသကြီး၊ ကျောက်ဆည်ခရိုင်သည် စိုက်ပျိုးရေးကို အဓိကထား လုပ်ကိုင်သော ဒေသတစ်ခုဖြစ်သည့်အပြင် တစ်နိုင်တစ်ပိုင် အိမ်တွင်းမှုလုပ်ငန်းများလည်း လုပ်ကိုင်လျက်ရှိပါသည်။ အိမ်တွင်းလက်မှုလုပ်ငန်းတစ်ခုဖြစ်သော အုန်းတံမြက်စည်း လုပ်ငန်းကိုလည်း ကျောက်ဆည်မြို့နယ်၊ အုန်းခရိုင်ကျေးရွာတွင် လုပ်ကိုင်ရောင်းချ လျက်ရှိပါသည်။ အုန်းတံမြတ်စည်း ပြုလုပ်ရန် အဓိကကုန်ကြမ်းမှာ အုန်းဆံဖြစ်ပြီး အုန်းဆံကို ရွာနှင့် အနီးပတ်ဝန်းကျင်ကျေးရွာများမှ ဝယ်ယူရရှိ ကြောင်း၊ အုန်းဆံကို အုန်းလက်မှ အလယ်အဆံလေးများကို သေချာသင်ကာ တစ်ဆံချင်း ဆွဲထုတ်ရ ကြောင်း၊ ဆွဲထုတ်ပြီးသား အုန်းဆံများကို တစ်ရာစီး စီး၍ရောင်းချကြကြောင်း၊ အုန်းဆံ တစ်ထောင် ကို  (၈၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ တံမြက်စည်းတစ်ချောင်းလျှင် အုန်းဆံ (၅၀၀)ဖြင့် ပြုလုပ်ကြောင်း၊ လက်ကိုင်ဝါးကို ပေါ့ပါးပြီး လှည်းကျင်း၍ ရောင်းရန်အတွက် သနပ်ဝါးကို အသုံးပြု ထားကြောင်း၊ အုံအတွက် လက်ပံသား၊ ကသစ်သားတို့ကို ရေရှည်ခိုင်ခံ့အောင် ပြုလုပ်ရောင်းချ ပေးသောကြောင့် အော်ဒါအမှာများရှိကြောင်း၊ တစ်ရက်လျှင် လူတစ်ဦး တံမြတ်စည်း (၅)ချောင်း ခန့်ပြီးကြောင်း ၊ တစ်နိုင်တစ်ပိုင် ပြုလုပ်ရောင်းချသူများနှင့် စီးပွားဖြစ်တွင်တွင် ကျယ်ကျယ် ရောင်းချပေးသူများလည်းရှိကြောင်း၊ ဈေးကွက်အနေဖြင့် ပတ်ဝန်းကျင် ကျေးရွာများရှိ ကုန်စုံဆိုင် များသို့ အော်ဒါမှာယူမှုများကို ရောင်းချပေးလျက်ရှိကြောင်း၊ မိသားစုစားဝတ်နေရေး ပြေလည်သည့် အပြင် စီးပွားဖြစ် ဝင်ငွေတိုးကြောင်း၊ ယခင်နှစ် တံမြက်စည်း အရှည် တစ်ချောင်းလျှင် (၅၀၀၀/-) ကျပ်၊ အတိုတစ်ချောင်းလျှင်(၂၀၀၀/-) ကျပ်ဖြင့် ရောင်းဝယ်ခဲ့ပြီး၊ လက်ရှိပေါက်ဈေးအနေဖြင့် တံမြက်စည်းအရှည် တစ်ချောင်းလျှင် (၈၀၀၀/-)ကျပ်၊ အတိုတစ်ချောင်းလျှင်(၃၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ သေသပ်လှပပြီး အကြမ်းခံ၊ ခိုင်ခံ့သော အုန်းတံမြက်စည်းများကို ဝယ်ယူသင့်ပါကြောင်း ကုန်ကျစရိတ်သက်သာပြီး မိသားစုဝင်ငွေတိုးသော အုန်းတံမြက်စည်း လုပ်ငန်းကို ပြုလုပ်ရောင်းချသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)