ပြည်တွင်းကုန်သွယ်မှုသတင်း

   ကျောက်ဆည်ခရိုင်အတွင်းရှိ စားဖိုဆောင်သီးနှံများဖြစ်သည့် ဂျင်းများဒေသတွင်း ထွက်ရှိမှုမရှိသည့်အတွက် ရှမ်းပြည်နယ်အောင်ပန်းမှ အများဆုံးဝင်ရောက်လျက်ရှိပါသည်။ ဂျင်းတက်ဈေးနှုန်းအနေဖြင့် ဂျင်းတက်တစ်ပိဿာလျှင်(၃၀၀၀-၃၂၀၀)ကျပ်ဖြင့်ရောင်းချလျက် ရှိကြောင်း၊ ဂျင်းကိုဟင်းလျာများတွင် အနံအရသာတိုးစေဖို့ အသုံးပြုကြကြောင်း၊ အသားများ တွင်အညှီနိုင်စေရန်အတွက် အသုံးပြုကြပါသည်။ ဂျင်းပြုတ်ရည်ကို သောက်သုံးခြင်းဖြင့် တုတ်ကွေးနဲ့ လည်ချောင်းနာ ချောင်းဆိုးခြင်းကို ကာကွယ်ပေးနိုင်တဲ့အတွက်ကြောင့် ကျန်းမာ ရေးကောင်းစေဖို့အတွက် သောက်သုံးသင့်ကြောင်း ရေးသားတင်ပြအပ်ပါသည်။

DOCA(မန္တလေး)

    မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံ စိုက်ပျိုးအောင်မြင်ဖြစ်ထွန်း လျက်ရှိပြီး ဆည်ရေသောက် ဒေသတစ်ခုဖြစ်သောကြောင့် သီးနှံမျိုးစုံ စိုက်ပျိုးလျက်ရှိရာ တစ်နှစ်ပတ်လုံး စိုက်ပျိုး၍ရသော ဝယ်လိုအားရှိသော ချဉ်ပေါင်သီးနှံကိုလည်း စိုက်ပျိုးလျက် ရှိရာ စိုက်ပျိုးသောမျိုးများမှာ ချဉ်ပေါင်လက်ချား၊ ချဉ်ပေါင်ခါးနှင့် ဘီးလပ်ချဉ် ပေါင်မျိုးများကို စိုက်ပျိုးကြပါသည်။ အများဆုံးစိုက်ပျိုးသောမျိုးမှာ ဘီးလပ်ချဉ်ပေါင် မျိုးဖြစ်ပြီး အသီးသီး ချိန်တွင်လည်း ချဉ်ပေါင်ဖူးကိုပါ ရောင်းချရသောကြောင့် ဝင်ငွေနှစ်မျိုး ရရှိကြောင်း ဝါဆိုလ နှင့် သီတင်းကျွတ်လများတွင် အများဆုံးစိုက်ပျိုးကြကြောင်း၊ စိုက်ပျိုးစနစ်အနေဖြင့် ထယ်ထိုး၊ ထယ်မွှေကာ မြေတွင် တစ်တန်းနှင့်တစ်တန်း (၂)ပေခွာပြီး (၄)လက်မခြား၍ အစေ့ချ စိုက်ပျိုး ကြကြောင်း၊ တစ်ဧက စိုက်ပျိုးမှုမျိုးအနေဖြင့် ချဉ်ပေါင်စေ့(၁)ပြည် ကုန်ကျကြောင်း၊ မျိုးစေ့ (၁)ပြည်လျှင်(၅၀၀၀/-)ကျပ် ပေးရကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း ကုန်ကျ စရိတ်(၃၀၀၀၀၀/-)ကျပ်ခန့် ကုန်ကျကြောင်း၊  စိုက်ပျိုးပြီး (၁)လခွဲသားတွင် အရွက်၊ ကိုင်းနှင့် အပင်များခူးညှပ်၍ ရောင်းချနိုင်ပြီဖြစ်ကြောင်း၊ ချဉ်ပေါင်တစ်ဧကအနေဖြင့် အရွက်ပိဿာ (၁၀၀၀)ပိဿာ ထွက်ရှိပြီး၊ အနေတော် အပင်ပေါက် ကလေးများကိုနုတ်၍ အစီး လေးများဖြင့် ရောင်းချပါက တစ်ဧက အစီးပေါင်း(၁၀၀၀၀)စီးခန့် ထွက်ရှိကြောင်း၊ ချဉ်ပေါင် တစ်စီးလျှင်(၁၀၀/-)ကျပ်ဖြင့် လက်ကားရောင်းချပေးကြောင်း၊ ချဉ်ပေါင်ရွက်တစ်ပိဿာလျှင် လက်ကားဈေး(၁၀၀၀/-) ကျပ်ဖြင့် ရောင်းချပေးကြောင်း၊ ဈေးကွက်အနေဖြင့် ကုန်စိမ်းပွဲရုံများနှင့် ကုန်စိမ်းပွဲစားများမှ အခင်းထဲအရောက် လာရောက် ဝယ်ယူသူများရှိသလို ကုန်စိမ်းပွဲရုံများသို့လည်း တိုက်ရိုက်တင်ပို့ ရောင်းချပေးလျက်ရှိကြောင်း၊ တစ်ဧကအကျိုးအမြတ်အနေဖြင့် စိုက်ပျိုးစရိတ်နုတ်ပြီး (၇၀၀၀၀၀/-)ကျပ် ခန့်မြတ်ကြောင်း၊ ချဉ်ပေါင်သီးနှံကို တောင်သူများမှ မိသားစုဝင်ငွေတိုးပြီး စီးပွားဖြစ်သောကြောင့် တိုးချဲ့စိုက်ပျိုး လျက်ရှိကြောင်း တောင်သူတစ်ဦး ပြောကြားချက်အရ သိရှိရပါသည်။ 

DOCA(မန္တလေး)   

    မန္တလေးတိုင်းဒေသကြီး၊ ကျောက်ဆည်ခရိုင်ရှိ စိုက်ပျိုးရေးလုပ်ကိုင်နေကြသော တောင်သူ ကြီးများသည် ပဲ၊ ပြောင်း၊ နှမ်း၊ စပါး၊ ကြက်သွန်၊ ဝါသီးနှံများကိုလည်း ရာသီအလိုက် စိုက်ပျိုးကြပါ သည်။ ထိုသီးနှံများအပြင် စဖိုဆောင်သီးနှံများကိုလည်း စီးပွားဖြစ်စိုက်ပျိုးကြပြီး မြုပ်ခရမ်းသီးပင် များကိုလည်း စိုက်ပျိုးကြကြောင်း သိရှိရပါသည်။ မြုပ်ခရမ်းပင်ကို ကျောက်ဆည်မြို့နယ် ငါးမြွေကုန်း ကျေးရွာနှင့် မင်းစုကျေးရွာများတွင် စိုက်ပျိုးကြပြီး (၅၅၅)မျိုးများကို အဓိကစိုက်ပျိုးကြကြောင်း သိရှိရပါသည်။ မြုပ်ခရမ်းပင် စိုက်ပျိုးမည်ဆိုပါက ပထမဦးဆုံး ပျိုးအရင်ထောင်ရကြောင်း၊ ပျိုးပင်သက် (၁)လခွဲသားအရွယ်တွင် ပြောင်းရွေ့စိုက်ပျိုးရကြောင်း၊ ပြောင်းရွေ့စိုက်ပျိုးပြီး (၂)လ၊ (၃)လအကြာ တွင် မြုပ်ခရမ်းသီးများ စတင်ခူးဆွတ်ရကြောင်း၊ တစ်ဧကတစ်ပတ်အထွက်နှုန်းမှာ ပိဿာ(၂၀၀)မှ (၂၅၀)အထိ ထွက်ရှိကြောင်း သိရှိရပါသည်။ သက်တမ်းအနေဖြင့် (၅)လအထိ မြုပ်ခရမ်းသီးများ ခူးဆွတ်နိုင်ကြောင်း၊ တစ်ဧက သွင်းအားစု ကုန်ကျစရိတ်မှာ (၈၀၀၀၀၀/-) ကျပ်ခန့်ရှိပြီး စတင်ခူး ဆွတ်ချိန်မှ ဖျက်သိမ်းချိန်အထိ မြုပ်ခရမ်းသီးထွက်ရှိမှု စုစုပေါင်း(၂၀၀၀)ပိဿာ ထွက်ရှိကြောင်း သိရှိ ရပါသည်။ မြုပ်ခရမ်းသီး တစ်ပိဿာလျှင် လက်လီဈေးအနေဖြင့် (၁၅၀၀/-) ကျပ်ရှိပြီး ကုန်စိမ်းပွဲ စားများ စိုက်ခင်း ထဲအထိ လာရောက်ဝယ်ယူကြကြောင်း၊ လက်ကားဈေးအနေဖြင့် တစ်ပိဿာလျှင် (၁၀၀၀/-)ကျပ်ဖြင့် အရောင်းအဝယ်ဖြစ်နေကြောင်း၊ တစ်ဧကအကျိုးအမြတ်အနေဖြင့် (၁၂၀၀၀၀၀/-) ကျပ်ခန့်မြတ်ကြောင်း၊ တောင်သူများအနေဖြင့် အကျိုးအမြတ်ရရှိသည့် မြုပ်ခရမ်းသီး(ခေါ်) ခရမ်းကြွပ်သီးကို ပိုမိုစိုက်ပျိုးသင့်ပါကြောင်း ရေသားတင်ပြအပ်ပါသည်။

DOCA(မန္တလေး)

     မန္တလေးတိုင်းဒေသကြီး ၊ ကျောက်ဆည်ခရိုင်သည် အပူပိုင်းဒေသဖြစ်သည့်အလျောက် ထနောင်းပင်၊တမာပင်နှင့်မန်ကျည်းပင်များလည်း‌ အလေ့ကျပေါက်ရောက်လျက်ရှိရာ ၄င်းအပင်များ အနက် မန်ကျည်းပင်များအား မိမိဝိုင်းခြံအတွင်းတွင်လည်း အရိပ်ရအောင် စိုက်ပျိုးကျသူများလည်း ရှိပါသည်  ။  မန်ကျည်းပင်သည် အပင်တစ်ပင်လုံး အသုံးဝင်ကြောင်း ၊ အရွက်နုသည်မှ  အသီး သီးချိန်အထိအသုံးဝင်ပါကြောင်း ၊ မန်ကျည်းသီးစိမ်း နုနုလေးများကိုလည်း ခူး၍ရောင်းချရကြောင်း၊ ခူးယူရောင်းချသူများမှာ ဈေးထဲသို့ ကိုယ်တိုင်လဲရောင်းချကြသလို ကုန်စိမ်းသီးနှံဆိုင်များသို့လည်း ဖောက်သည်ပေး ရောင်းချလျက်ရှိကြောင်း ၊ မန်ကျည်းပင်စိုက်ပျိုးခြင်းဖြင့် အရိပ်လဲရသလို အိမ်နောက်ဖေး ဈေးဆိုင်တည်သကဲ့သို့ အရွက်နုချိန်မှာလည်း အရွက်သုတ်၊ အချဉ်ရည်ဟင်းများ လည်း ချက်သောက် ၍ရပါကြောင်း၊ အသီးနုချိန်မှာလည်း မြေပဲဆံ၊ မျှစ်တို့ဖြင့် မန်ကျည်းသီးစိမ်း ချက်ကိုလည်း စားသုံးကြသလို မန်ကျည်းသီးမှည့်ချိန်မှာလည်း မန်ကျည်းသီးမှည့်များ ရောင်းချရ သဖြင့် မီးဖိုချောင်အသုံးစရိတ်များ ရရှိသောကြောင့် မန်ကျည်းပင်ကိုလည်း စိုက်ပျိုးသင့်ကြောင်း မန်ကျည်းသီးစိမ်းကို ဇွန်လတွင် ထွက်ပေါ်လျက်ရှိရာ မန်ကျည်းသီးစိမ်း တစ်ဆယ်ကျပ်သားလျှင် (၃၅၀၀/-)ကျပ် ဈေးနှုန်းရကြောင်း၊ ဇူလိုင်လတွင် မန်းကျည်းသီးစိမ်းများ လှိုင်လှိုင် ထွက်ပေါ် လာ သောကြောင့် မန်ကျည်းသီးစိမ်း တစ်ဆယ်ကျပ်သားလျှင် (၁၅၀၀/-) ကျပ် ဈေးနှုန်းကျဆင်းသွား ကြောင်း ကုန်စိမ်းရောင်းချသူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)

          စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့နယ်ရှိ ချင်းတွင်းရတနာဈေး၊ မန်းကျည်းပင်ဈေး၊ သာစည်ဈေး၊ ပြည်ထောင်စုဈေးနှင့်  ဝန်ထမ်းအိမ်ရာရှိ နန္ဒဝန်ဈေးသစ်တို့တွင် ရာသီစာ ဟင်းသီး ဟင်းရွက်များ၊ စားဖိုဆောင်သီးနှံများ၊ အသား၊ ငါးနှင့် ဒေသထွက်ကုန်များ ရောင်းချလျက်ရှိပါသည်။ ၂၀၂၅ခုနှစ်၊ ဇူလိုင်လ ပထမပတ်အတွင်း ရောင်းချနေသော အသား/ငါးဈေးနှုန်းများအနေဖြင့်  CP ကြက်သားတစ်ပိဿာလျှင် (   ၂၄၀၀၀       )ကျပ်၊ ဆိတ်သား အသားသန့်  ( ၁ ) ပိဿာလျှင် (  ၂၅၀၀၀  ) ကျပ်၊ ဆိတ်သား အသားပါ အရိုး ( ၁) ပိဿာလျှင် (၁၂၀၀၀)၊ အရိုး (၁) ပိဿာလျှင် ( ၈၀၀၀)၊ အမဲသား တစ်ပိဿာလျှင် (   ၃၅၀၀၀ )ကျပ်၊ ငါးကြင်း ခုတ်သား ( ၂၅)ကျပ်သားလျှင် (     ၆၅၀၀)      ကျပ်၊ ဝက်သား ( ၁ )  ပိဿာလျှင်( ၃၇၀၀၀)ကျပ်၊ ပုဇွန်ဆိတ် တစ်ပိဿာလျှင် (၄၀၀၀၀)ကျပ်ဖြင့် ရောင်းချလျက်ရှိပြီး ယခင်အပတ်ဈေးနှုန်းများနှင့် နှိုင်းယှဉ်ပါက ဈေးနှုန်းအနည်းငယ်မြင့်တက်လာကြောင်း သိရသည်။

DOCA(စစ်ကိုင်း)