ပြည်တွင်းကုန်သွယ်မှုသတင်း

           စစ်ကိုင်းတိုင်းဒေသကြီးသည် မြန်မာအမျိုးသမီးများ ကြိုက်နှစ်သက်စွာ အသုံးပြုနေကြသည့် သနပ်ခါးပင်များ စိုက်ပျိုးထွက်ရှိရာ ဒေသတစ်ခုဖြစ်ကြောင်း သိရသည်။ မြန်မာ့သနပ်ခါးသည် ကဗျာ၊ သီချင်းများ စပ်ဆိုရသည်အထိ ထင်းရှားပြီး၊ ရှေးယခင်ကပင် သနပ်ခါးကို နန်းတွင်းအလှကုန်အဖြစ် အသုံးပြုခဲ့ကြောင်း၊ မြန်မာ့ရိုးရာ အလှတရားတွင် သနပ်ခါးသည် အရေးပါသောအခန်းကဏ္ဍတွင် ပါဝင်ပြီး အမျိုးသမီးများသည် မျက်နှာတွင် သနပ်ခါးဖြင့် အလှဆင်လေ့ရှိကြောင်း သိရှိရပါသည်။

           မြန်မာနိုင်ငံတွင် သနပ်ခါးသည် သဘာဝအလှကုန်ပစ္စည်းအဖြစ် ဈေးကွက်တွင် အရေးပါပြီး နိုင်ငံတကာတွင်လည်း စိတ်ဝင်စားမှုများလာကြောင်း၊ သနပ်ခါးသည် ကျန်းမာရေးနှင့် အလှအပတို့ အတွက် တန်ဖိုးမဖြတ်နိုင်သော သဘာဝလက်ဆောင်တစ်ခုဖြစ်ပြီး၊ ကန့်ဘလူမြို့မဈေးတွင် ရောင်းချ နေသော သနပ်ခါးတုံးများသည် ကန့်ဘလူခရိုင်အတွင်းမှ ထွက်ရှိသလို၊ ရွှေဘိုမြို့ရှိ လက်လီ၊လက္ကား သနပ်ခါးတုံး အရောင်းဆိုင်များမှလည်း ဝယ်ယူရောင်းချကြောင်း၊ ဇူလိုင်လ ပထမပတ်အတွင်း မြန်မာ့ရိုးရာသနပ်ခါး(၁)တုံးလျှင် (၄၀၀၀မှ ၅၀၀၀)ကျပ်၊ အသေး(၁)တုံးလျှင် (၂၀၀၀)ကျပ်နှင့် (၃) တုံးလျှင် (၅၀၀၀)ကျပ်ဖြင့် အရွက်အစားပေါ်မူတည်၍ ရောင်းချလျက်ရှိကြောင်း သတင်းရရှိပါသည်။

DOCA(စစ်ကိုင်း)

     ပြင်ဦးလွင်မြို့နယ်တွင် နာနတ်သီးစိုက်ရာဒေသများဖြစ်တဲ့ ပန်းဦးတောင်၊ဆင်ဖြူအင်း၊ ဘန်သာကျေးရွာများရှိ တောင်ကုန်း ၊တောင်ဆောင်းများမှာ နာနတ်သီးစိုက်ဧကများကို စီးပွားဖြစ်အများဆုံးစိုက်ပျိုးလျှက်ရှိရာ ယခုအချိန်တွင် နာနတ်စိုက်တောင်သူများငွေရွှင်သော ကာလဖြစ်ပါသည်။ နာနတ်သီးအနေဖြင့် ယခုအချိန် မိုးရာသီအစတွင် စတင်စိုက်ပျိုးပါက နောက်နှစ် အသီးစတင်ခူးဆွတ်နိုင်ပြီး ဒုတိယနှစ်တွင် ပေါင်းမြက်ရှင်းကာ ပုလဲမြေသြဇာ ပတ်ဖြန်းခြင်းဖြင့် ပထမနှစ်ထက် အသီးပိုမိုရရှိပါကြောင်း၊(၁)ဧကလျှင် နာနတ်အပင်(၆၀၀၀-၆၅၀၀)ပင် စိုက်ပျိုးနိုင်ကြောင်း ၊ ကုန်ကျစရိတ်အနေဖြင့် စတင်စိုက်ပျိုးလျှင် မျိုး ၊ မြေပြင် ၊ အလုပ်သမားခ၊သွင်းအားစု စုစုပေါင်း ကုန်ကျစရိတ်(၃၀)သိန်းခန့် ကုန်ကျနိုင်ပြီး ပထမနှစ် အသီးခူးဆွတ်ပြီးနောက် အပင်ပြုစုခြင်း ၊ သွင်းအားစုထည့်သွင်းရုံဖြင့်ပင် အပင်များကာ အသီးနှစ်ဆ၊သုံးဆဖြစ်ကာအမြတ်အစွန်းပိုမိုရရှိပါကြောင်း၊အချို့နာနတ်စိုက်တောင်သူများမှာ ရိတ်သိမ်းခူးဆွတ်ပြီးနောက် ပစ်ထားကာ မိုးဦးကျချိန်တွင် ပြန်လည်ပြုပြင်မှုဖြင့်အပင် (၃-၄)နှစ်ခန့်အကျိုးခံစားရကြောင်း၊ လက်ရှိနာနတ်သီးစျေးအနေဖြင့် ခေါင်သီးရှယ်တစ်လုံးလျှင် (၁၅၀၀/-)ကျပ်၊ အလတ်(၁၀၀၀/-)ကျပ်၊ အသေး(၅၀၀/-)ကျပ် စျေးနှုန်းတို့ဖြင့် မန္တလေးမှ ကုန်သည်များလာရောက်ဝယ်ယူနေကြောင်းသိရှိရပါသည်။

DOCA(မန္တလေး)

       မင်းကွတ်သီးသည် အရည်ရွှမ်းပြီး နူးညံ့သိမ်မွေ့သော အသွင်အပြင်နှင့် အနံ့အရသာ ရှိကြောင်း၊ အခွံအညိုရောင်ရှိပြီး နွှာလိုက်လျှင် အထဲမှာ အဖြူရောင်အမြွှာလေးဖြစ်ကြောင်း၊ မင်းကွတ်သီးသည် ချိုချိုချဉ်ချဉ် အရသာရှိသောကြောင့် အအီပြေစေတဲ့အသီးအဖြစ် လူတော်တော် များများက စားကြကြောင်း၊ ကန့်ဘလူမြို့နယ်တွင် ရောင်းချနေသည့် မင်းကွတ်သီးများကို မော်လမြိုင်မှလည်းကောင်း၊ မန္တလေးမှလည်းကောင်း ဝယ်ယူရောင်းချကြောင်း သိရှိရသည်။

      ၂၀၂၅ ခုနှစ်၊ ဇူလိုင်လ ပထမပတ်အတွင်း ကန့်ဘလူမြို့ရှိ သစ်သီးဆိုင်များတွင် မင်းကွတ်သီး (၁)လုံးလျှင် (၅၀၀)ကျပ်၊ (၁၁)လုံးလျှင် (၅၀၀၀)ကျပ်ဖြင့် ရောင်းချလျက်ရှိကြောင်း၊ မင်းကွတ်သီး စားသုံးပေးခြင်းဖြင့် ကျန်းမာရေးကို အထောက်အကူပြုသည့်အတွက် အကျိုးကျေးဇူးများစွာရရှိ စေသော ရာသီပေါ်အသီးအနှံတစ်မျိုးဖြစ်ကြောင်း၊ ယခုပတ်တွင် မင်းကွတ်သီးများ ပုံမှန်အရောင်း အဝယ်ဖြစ်လျက်ရှိကြောင်း သစ်သီးဆိုင်များမှ သိရှိရပါသည်။

DOCA(စစ်ကိုင်း)

   ပြင်ဦးလွင်ဒေသသည် ပင်လယ်ရေမျက်နှာပင်အထက် အမြင့်ပေ(၃၅၃၈)အထက်တွင် ရှိပြီး အေးမြသောရာသီဥတနှင့်အညီ ကုန်မြင့်ကော်ဖီ၊အာ‌ရေးဗီးကား ဖြစ်ထွန်းရာဒေသဖြစ်ပါ သည်။ယခုအခါ ကော်ဖီသောက်သည့်အလေ့အကျင့်ပိုမိုးများပြားလာသည်နှင့်အမျှ ကော်ဖီ လုပ်ငန်း၊ကော်ဖီဆိုင်ဖွင့်လုပ်ငန်းများလည်း စီးပွားဖြစ်တိုးချဲ့လုပ်ကိုင်နေသည်ကိုတွေ့ရှိရပြီး ကော်ဖီအမျိုးအစား များစွာထဲမှ ပြင်ဦးလွင်မှထွက်သည့် ကုန်းမြင့် ကော်ဖီဖြစ်သော အာရေးဗီးကား ကော်ဖီကို လူအများကြိုက်နှစ်သက်သည်ဖြစ်ကြောင်းကို မြန်မာနိုင်ငံအနှံ့ တင်ပို့ရောင်းချနေမှုအရသိရှိရပါသည်။ လက်ရှိမှာလည်း ကော်ဖီအမျိုးအစားအလိုက် (2+1) (3 in 1)ကော်ဖီအသင့်သောက်(၂၀)ဂရမ်(၁၀)ထုတ်ပါ အထုပ်(၁)ထုပ်လျှင်(၅၅၀၀-၈၀၀၀) ကျပ်၊ကော်ဖီမှုန့်စစ်စစ်(၂၀၀)ဂရမ် (၁)ထုပ်လျှင်(၆၅၀၀-၁၀၀၀၀)ကျပ်၊(၂၀)ဂရမ်ပါ (3+1) အသင့်သောက်အထုပ်သေး(၁)ထုပ်လျှင်(၆၀၀-၉၀၀)ကျပ်တို့ဖြင့် ရောင်းချနေပြီး ယခုအချိန် ပြင်ဦးလွင်သို့ ဧည့်သည်ဝင်ရောက်မှုများပြားနေခြင်းကြောင့် ရောင်းအားလည်းမြင့်တက်နေ ကြောင်းသိရှိရပါသည်။

DOCA(မန္တလေး)

    မန္တလေးတိုင်းဒေသကြီး၊ ကျောက်ဆည်ခရိုင်သည် လယ်တွင်း (၉)ခရိုင်တွင် ပါဝင်ပြီး ဆည်ရေသောက်စနစ်ဖြင့် ရှေးယခင်ကပင် စပါး၊ ပဲ၊ နှမ်း၊ ပြောင်း၊ ဟင်းသီးဟင်းရွက်၊ သစ်သီးဝလံနှင့် ပန်းမာန်များအား စိုက်ပျိုးခဲ့ကြပါသည်။ ယင်းသီးနှံများအနက်မှ ရာသီမရွေး စိုက်ပျိုးနိုင်ပြီး စီးပွားဖြစ်ဝင်ငွေတိုးသော ဈေးကွက်ဝယ်လိုအားရှိသော အောင်သပြေပန်းငုတ်များကို ကျောက်ဆည် မြို့နယ်၊မြစ်သားမြို့နယ်၊စဉ့်ကိုင်မြို့နယ်များတွင် စိုက်ပျိုးလျက်ရှိကြောင်း သပြေပန်းစိုက်ပျိုးရန်အတွက် မျိုးစေ့ကို ခရမ်းသုံးခွမြို့နယ်များမှ ဝယ်ယူစိုက်ပျိုးကြကြောင်း၊ မျိုးစေ့ (၁)ပြည်လျှင် (၁၈၀၀၀- ၂၀၀၀၀)ကျပ်ခန့်ရှိပြီး တစ်ဧကလျှင် မျိုးစေ့ ပြည်(၈၀)ခန့် ကုန်ကျကြောင်း၊ စိုက်ပျိုးပြီး (၂)လခွဲသားဝန်ကျင်တွင် အပင်များကို ဖြတ်တောက်ပြီး ငုတ်ချန်ပေးရကြောင်း ၊ ငုတ်ချန်ပြီး တစ်နှစ်အကြာတွင် ရောင်းတန်းဝင်ပန်းများရရှိပြီးဖြစ်ကြောင်း၊ သပြေပန်းများ ပိုးမကိုက်၊ အညွှန့်များ လှအောင်၊ အရွက်မာအောင် ဈေးကွက်မဖြန့်ခင် တစ်လအလိုတွင် ဆေးဖြန်းပေးရကြောင်း၊ စိုက်ပျိုးမှု တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၃၅၀၀၀၀၀/-) ကျပ်ခန့် ကုန်ကျကြောင်း၊ စိုက်ပျိုးရာတွင် ဘောင်စိုက်စနစ်ဖြင့် စိုက်ပျိုးပြီး တစ်ဧကအပင်ပေါင်း (၁၅၀၀၀၀)ခန့်ထိ ရှင်သန်နိုင်ကြောင်း ၊ မြေပြုပြင်မှုနှင့် ရေ ၊ မြေ အပြုအစုကောင်းပါက ပန်းများ ပိုမိုလှကြောင်း၊ အရွယ်အစားပေါ်မူတည်၍တစ်နှစ်သား အောင်သပြေငုတ်တစ်ငုတ်လျှင် (၅၀၀- ၁၅၀၀)ကျပ်အထိ ရောင်းချရကြောင်း၊ နှစ်နှစ်သား တစ်ပင်လျှင် (၃၀၀၀-၅၀၀၀)ကျပ်ထိ ရောင်းချရ ကြောင်း ၊ လက်ကား ဖောက်သည်ဈေးအနေဖြင့် (၂၀%) လျော့၍ ရောင်းချပေးကြောင်း ၊ အောင်သပြေငုတ်များ စိုက်ပျိုးရာတွင် အပင်သက်တမ်း (၃)နှစ်အထိ ရောင်းချပေးနိုင်ကြောင်း၊ ပန်းများကို အနီးပတ်ဝန်ကျင်ရှိ ကျေးရွာများမှ လာရောက်ဝယ်ယူသူများရှိသလို ရန်ကုန်မြို့ များသို့လည်း Express ကားများဖြင့် တင်ပို့ရောင်းချကြောင်း၊ ကျန်နယ်ဝေးများမှ မှာယူလျှင်လည်း ကားဂိတ်အရောက် သေချာစွာထုတ်ပိုးပြီး ရောင်းချပေးလျက်ရှိကြောင်း ၊ အောင်သပြေငုတ်  စိုက်ပျိုးမှုတွင် အခင်းပြတ်ရောင်းချပါက ငွေအလုံးအရင်း ရရှိသော်လည်း တစ်နိုင်တစ်ပိုင်‌ နေ့ချင်းရောင်းချပါက ပိုမိုအကျိုးမြတ်ဖြစ်ထွန်းကြောင်း ၊ သပြေငုတ်စိုက်ပျိုးခြင်းဖြင့် စီးပွားဖြစ် ဝင်ငွေတိုးကာ စားဝတ်နေရေးပြေလည်သောကြောင့် အောင်သပြေပန်းများ စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)